Wararkii: Nov 8,
2007
- Dadweynaha Muqdisho oo ku ballamay in ay sii wadi doonaan
banaanbaxyada
- Cali Mahdi iyo Gacma Dheere oo olole ka wada Magaalada Baydhabo
- Ciidamo Itoobiyaan ah oo shalay ka ambabaxay Magaalada Muqdisho
- Qarax lala beegsaday maqaayad ku taala Jamhuuriya ee degmada
Yaqshiid
- Xubnaha Baarlamaanka oo sacbis ku ogolaaday qaar ka mid ah
go’aanadii ka soo baxay shirkii dib u heshiisiinta
- Max’ed Dheere oo mar kale ugu baaqay Dadweynaha in aysan
barakicin
- Wafdi ka socday Q/Midoobey oo soo gaaray Baydhabo
Dadweynaha Muqdisho oo ku ballamay in ay sii wadi doonaan
banaanbaxyada
Waxaa Magaalada Muqdisho ka bilowday banaanbaxyada looga soo
horjeedo joogitaanka ciidamada Itoobiya iyo waliba tacadiyadda
ay gaysanayaan waxaana shalay Magaalada Muqdisho ka dhacay
banaanbaxyo looga soo horjeedo arrimahaasi.
Banaanbaxayaaha ayaa waxay ku qaylinayeen ereyo ay ka mid
ahaayeen “in Ciidamada Itoobiya ka baxaan gudaha dalka
Soomaaliya” “Beesha Caalamaka ha eegaan dhibaatooyinka iyo
tacadiyada ay ciidamada Itoobiya ku hayaan Bulshada
Soomaliyeed”.
Dadka oo watay boorar ayaa waxaa horkacayay dhallinyaro iyo
Odoyaal kuwaas oo watay Makaroofano oo ay dadka ugu yeerayeen
ina y ka soo qaybgalaan banaabaxa looga soo horjeedo joogitaanka
ciidamada Itoobiya, waxayna banaanbaxyadaani ka dhacan jidka
Sodonka iyo jidka Warshadaha ayaa dadka wajiyadooda waxaa ka
muuqatay caro aad u xoogan, kadib markii ciidamada Itoobiya ay
dileen labo wiil oo w alaalo ah, taas oo ay si weyn uga wada
naxeen dhamaan ummadda Soomaaliyeed.
Dadkaasi banaanbaxayey ayaa waxay ku ballameen in ay maalin
walba dhigi doonaan banaanbaxyada ay kaga soo horjeedaan
joogitaanka ciidamada Itoobiya. Cali Mahdi iyo Gacma Dheere oo olole ka wada Magaalada Baydhabo
Wararka naga soo gaaraya Magaalada Baydhabo waxay sheegayaan in
Magaaladaasi ay ka socdaan kulamo looga hadlayo arrimo la
xiriira cidda bedeli lahayd Ra’isul Wasaarihii hore ee
Soomaaliya Cali Max’ed Geedi.
Cali Mahdi Max’ed iyo Maxamed
Sheekh Maxamuud Guuleed (Gacma Dheere) ayaa waxaa la sheegay in
saacadihii la soo dhaafay ay Baydhabo ku qaabileen dad fara
badan oo ay kala hadlayeen sidii loogu magacabi lahaa Ra’isul
Wasaaraha Soomaaliya. Cali Mahdi waxa uu kulamo la yeeshay
xildhibaano ka tirsan Baarlamaanka oo uu kala hadlay sidii uu u
noqon lahaa Ra’isul Wasaaraha Soomaaliya, sidoo kale waxa uu
qaabilay Odoyaal ka tirsan Beesha Mudulood oo uu ku booriyey in
ay gacan ku siiyaan sidii loo magacaabi lahaa Ra’isul Wasaaraha
Soomaaliya, sidoo kale Gacma Dheere ayaa isna kulamo la leh
siyaasiyiin iyo waxgaradka tirsan Beesha Habargidir oo uu kal
ahadlay sidii ay gacan ugu siin lahaayeen magacaabista Ra’isul
Wasaaraha Soomaaliya.
Cali Mahdi iyo Gacma Dheere waxay sidoo
kale kulamo gaar gaar ah la yeesheen madaxweynaha Dowladda
Federaalka C/llaahi Yuusuf oo ay u soo bandhigeen in loo
magacaabo xilka Ra’isul Wasaarenimo ee Soomaaliya, waxayna
sheegeen in ay wax weyn ka bedeli doonaan xaaladda murugsan ee
ka taagan Soomaaliya haddii xilkaasi loo magacaabo, waxay kaloo
sheegeen in ay taageero ka haystaan beelaha ay ka soo jeedaan.
Maalmaha soo socda ayaa la filayaa in magaalada Baydhabo ay
gaaraan odoyaal iyo waxgarad ay ka soo kala jeedaan Gacma Dheere
iyo Cali Mahdi, hase yeeshee Madaxweynaha DFKMG C/llaahi Yuusuf Axmed
ayaa la sheegay in lagu cadaadinayo in Ra’isul Wasaare uu u
magacaabo nin haysta dhalshada Mareykanka oo uu wato dalka
Mareykanka, waxaana la sheegay in uun Mareykanku ku tilmaamay banaan ka keenista
ninka loo magacaabayo Ra’isul Wasaaraha Soomaaliya. Ninka la
sheegay in uu
wato mareykanku ayaa laga soo xigtey in hawsha
ugu weyn ee uu qaban doono haddii loo magacaabo Ra’isul Wasaare
ay tahay sidii uu wada xaajood ula furi lahaa kooxaha ka soo
horjeeda Dowladda Federaalka.
Inkastoo dhowr maalmood ka harsan
tahay waqtiga Madaxweynaha DFKMG looga fadhiyo in uu ku soo magacaabo
Ra’isul Wasaaraha Soomaaliya ayaa haddana waxaa Magaalada
Baydhabo ku qulqulaya siyaasiyiin fara badan oo doonaya in ay
qayb ka helaan golaha Wasiirada ee dhawaan la magacaabi dooono.
Ciidamo Itoobiyaan ah oo shalay ka ambabaxay Magaalada Muqdisho
Ciidamo Itoobiyaan ah oo aad u fara badan ayaa shalay ka
ambabaxay magaalada Muqdisho, waxayna wateen Gawaarida dagaalka
iyo kuwa xamuulka, waxayna wadda isku xirta Afgooye iyo Muqdisho
ahayd mid u xirneed Ciidamada Itoobiya.
Ciidamadaan ayaa waxaa la sheegay in lagu xoojinayo dhinaca
xuduuda Ereteriya iyo Itoobiya oo waayadan ay ka jirtay
dhaqdhaqaaq aad u xoogan, waxaana soo gelitaanka iyo ka
bixitaanka Muqdisho ee Ciidamada Itoobiya si weyn ugu wareeray
Bulshada Soomaaliyeed.
Qarax lala beegsaday maqaayad ku taala Jamhuuriya ee degmada
Yaqshiid
Labo qof ayay waxyeelo ka soo gaaray qaraxyo xalay lala
beegsaday xaafadda Jamhuuriya ee degmada Yaqshiid.
Qaraxyadaan ayaa markay dhacayeen waxaa goobta ku sugnaa
dhallinyaro fara badan oo halkaasi ku shaaheysay, ilaa iyo hadda
ma cadda sababta qaraxyada loola beegsaday maqaayaddaasi, hase
yeeshee warar ayaa waxay sheegayaan in maqaayaddaasi loo keenay
dhowr warqadood oo loogu digay, inkastoo aan la ogeyn waxa looga
digay.
Maqaayaddii ayaa lagu kala caray kadibna irdaha loo laabay,
waxayna dad goob joogayaal ahi sheegeen in dhaawacu intaa ka
badan yahay.
Ma ahan markii horeysay oo qaraxyo lala beegsado gobo noocaan oo
kale ah, balse horey ayay u dhaceen kuwo la mid ah.
Xubnaha Baarlamaanka oo sacbis ku ogolaaday qaar ka mid ah
go’aanadii ka soo baxay shirkii dib u heshiisiinta
Iyadoo maalmahan uu muran ka taagnaa in la ansixiyo go’aanadii
shirkii dib u heshiisiinta ayaa haddana markii dambe waxa uu
Guddoomiyaha Baarlamaanka soo jeediyey in cod loo qaado in
Golaha Wasiirada laga soo xulo Banaanka iyo in gudaha laga soo
xulo.
Dood iyo falanqeyn kadib kal fadhi ay shalay isugu yimaadeen
Baarlamaanka waxa ay cod aqlabiyad ah ku ogolaadeen in golaha
Wasiirada laga soo xulo gudaha iyo dibadda Baarlamaanka.
Max’ed Qanyare Afrax oo ahaa raggii sidda aadka ah uga soo
horjeeday in Golaha Wasiirada laga soo xulo banaanka
Baarlamaanka ayaa waxa uu sheegay in arrintaani ay u sameeyeen
in aysan mar kale kala qaybsanaani ku imaanin Golaha
Baarlamaanka.
“Waad ogeyd xiligii uu Baarlamaanku ku kala qaybsanaa Muqdisho
iyo Jowhar wixii dhacay” ayuu yiri Max’ed Qanyare oo sheegay in
coddeyntaani ay wax ka tareyso sidii ay Dowladdu u sii shaqeyn
lahayd.
Dowladda Mareykanka ayaa iyadu la sheegay inay si aad ah u soo
dhaweysay aqlabiyaddii uu Golaha Baarlamaanka ku ogolaaday in
Golaha Wasiirada laga soo xulo gudaha iyo dibadda, waxa uuna
sheegay in arrintaani wax ka tareyso in Caalamka mar kale uu
gacan siiyo Dowladda Federaalka.
Maalmaha soo socda ayaa la filayaa in Madaxweyne C/llaahi Yuusuf
uu soo magacaabo Ra’isul Wasaaraha Soomaaliya, ilaa iyo haddana
waxa uu ku jiraa la tashiyo la xiriira cidda loo magacaabayo
jagadaasi.
Max’ed Dheere oo mar kale ugu baaqay Dadweynaha in aysan
barakicin
Max’ed Cumar Xabeebe (Max’ed Dheere) oo ah guddoomiyaha gobalka
Banaadir oo shalay dib ugu soo laabtay Magaalada Muqdisho ayaa
mar kale ku celiyey in shacabku aysan ka barakicin Magaalada
Muqdisho oo ay ku nagaadaan guryahooda.
Max’ed Dheere waxa uu shalay khudbad ka jeedinayay xarunta
Gobalka Banaadir, waxa uuna si kulul u beeniyey warka ka soo
yeeray guddoomiyaha golaha Midnimada Beelaha Hawiye oo ahaa in
Max’ed Dheere uu mas’uul ka yahay dadka faraha badan ee ka qaxay
magaalada Muqdisho, waxa uuna Max’ed Dheere wararkaasi ku
tilmaamay kuwo aysan waxba ka jirin, isagoo sheegay in shacabka
uu mar kale ugu baaqayo in ay dib ugu soo laabtaan Magaalada
Muqdisho.
Max’ed Dheere waxa uu sheegay in hawlgalada ciidamada Itoobiya
iyo kuwa Dowladda ay sii socon doonaan tan iyo inta nabad lagu
soo dabaalayo Magaalada Muqdisho.
Guddoomiyaha Gobalka waxaa kale oo uu sheegay in uu Magaalada
Nairobi kulan kula soo yeeshay Hay’addaha samafalka oo uu ka
dalbaday in gargaar la siiyo shacabka ku nool Gobalka Banaadir.
Wafdi ka socday Q/Midoobey oo soo gaaray Baydhabo
Wafdi ka socda Qaramada Midoobey ayna qayb ka yihiin Jaamacadda
Carabta, IGAD iyo wadamo kale ayaa shalay soo gaaray Magaalada
Baydhabo, waxayna markiiba kulamo la yeesheen Madaxweyne
C/llaahi Yuusuf Axmed oo ay isla soo qaadeen sidii Hay’adahaasi
ay gacan u siin lahaayeen shacabka Soomaaliyeed, iyo waliba
sidii ay uga qayb-qaadan lahaayeen dib u dhiska dalka
Soomaaliya.
Wafdigaani ayaa sidoo kale ka hadlay xaaladda uu haatan dalku ku
sugan yahay iyo waliba sidii nabad loogu soo dabaali lahaa.
Wafdigaani waxay madaxweynaha ku wargeliyeen in Hay’adaha
samafalka ay ka hawlgalaan gudaha wadanka, balse loo baahan
yahay in la helo jawi nabadeed oo ay hay’aduhu ku shaqeyn
karaan.
Wafdigaan waxay kaloo Madaxweynaha kala hadlayeen sidii uu u soo
xuli lahaa Ra’isul wasaare bedela Ra’isul Wasaarihii hore ee
Soomaaliya Cali Max’ed Geedi, waxayna u soo jeediyeen
Madaxweynaha in uu keeno Ra’isul Wasaare shacabka ka saari kara
waqtigaan adag.
Madaxweynaha waxa uu dhankiisa u soo jeediyey Hay’adaha
samafalka in ay ka sii shaqeeyaan deegaanada nabdoon oo uu
sheegay in ay ku sugan yihiin dad fara badan oo dhibaateysan.
Dhinaca kalana wafdi ka socda dowladda Mareykanka ayaa la
filayaa in uu maanta soo gaaro Baydhabo, waxaana la sheegay in
ay Madaxweyne C/llaahi Yuusuf talooyin ka siin doonaan
magaabista Ra’isul Wasaare.
W/D: Amiin Yuusuf Khasaaro.
E-Mail: amiinkhasaaro@hotmail.com
Faafin: SomaliTalk.com | Nov 8, 2007
Mucaaradka
Itoobiya oo sheegay in Soomaaliya haatan ka jirin Xukuumad ay la shaqeeyaan
ciidamada Itoobiya
.Gacma Dheere oo taageero ka raadinaya Beelaha Haweiye
.Ciidamada Itoobiya oo ka guuray dugsigii sare ee M.A. Cali
.Afar qofood oo mayd ah oo ay dileen ciidamada Itoobiya oo
.Shaaweeye “Aad baan uga xunnahay dilka muwaadiniinta
Wararka oo dhan ka akhri halkan.... Nov 7
Wariye
Canadian ah oo booqasho qarsoodi ah ku tagay Jigjiga kana warbixiyey
xaalada.
iyo Dagallo lagu wiiqay ciidamada gumaysiga
Itoobiya.
Muqdisho
Oo Laga Sii Barkacayo Islamrkaana Qarka U Saaran Inay Isugu
Soo Haraan Dad HUbaysan Iyo Ciidamo Ethiopian ah...
Akhri...
 "Ma
jirto maxaabiis Muqdisho laga keenay oo la keenay Galkacayo..." - Jeer
Xisbiga Mucaaradka ee Ramaas ma waxa uu ku biiray Maamulka DGPL,
mise waa....
 "Muddo
3 maalmood loo qabtey Miisaaniyada Gobolada iyo Degmooyinka Gobolada dalka
in lagu soo diyaariyo" Xuseen Xaashi...
Wiil Xijji Guranaya
READ HERE....
| 
Daabaco
Boggan | Print
ARAGTIDA
DADWEYNAHA.....