Khabiir dhinaca xaquuqda Aadanah ah oo soo uruuriyey xadgudubyo ka dhan ah..

Khabiir madax banana oo dhinaca xaquuqda aadanaha oo lagu magacaabo Ganiim Al-Najaar ayaa waxa uu caddeeyey laga soo bilaabo Bishii December 2006 ilaa iyo Bishii April 2007 ay Soomaaliya ka dhaceen xadgudubyo aad u waaweyn oo dhinaca xaquuqda aadanaha, waxa uu sheegay Khabiirku in dad gaaraya afar Boqol oo Kun si qasab ah looga barakiciyey guryahoodii, isla markaana la dilay dad fara badan oo aan waxba galabsan, waxaa kaloo sheegay in madaafiic aan loo meel dayin lagu burburiyey xaafado ku yaala Magaalada Muqdisho, waxaa kale oo uu sheegay in intii u dhexeysay waqtigaasi ay Soomaaliyaka dhaceen xadgudubyo iyana laga beegsaday Haweenka iyo Carruurta, waxaa kale oo uu sheegay in dadkii ku dhaawacmay xitaa loo diiday inay gaaraan goobaha caafimaadka.

Mudan Al-Najaar waxa uu sheegay in dad fara badan xabsiyada loo taxaabay qaarkoodna loo gaystay dil iyo hanjabaadyo.

Khabiirkaan ayaa la filayaa in warbixinadaasi uu ka uruuriyey Soomaaliya uu sida ugu dhaqsiyaha badan ugu gudbin doono qaramada Midoobey.

Al-Najaar ayaa dhowr jeer yimid Dalka Soomaaliya isagoo uruurinayey xadgudubyada ka dhacay Dalka Soomaaliya

Sheekh Shariif “Shirka waan ka qaybgaleynaa haddii Dalka gudihiisa laga saaro...

Guddoomiyaha Golaha Fulinta Maxaakiimta Islaamiga Sheekh Shariif Sheekh Axmed oo u waramayey Taleefishinka Al-Jasiira ayaa waxa uu sheegay in Maxaakiimta Islaamiga ah ay diyaar u yihiin in ay ka qaybgalaan shir kasta oo looga hadlayo danta Ummadda Soomaaliyeed, haddii marka hore ciidamada Itoobiya ka baxaan gudaha dalka Soomaaliya, isla markaana shirku uu noqdo mid ay dhex dhexaadiso gacan saddexaad iyaduna dhex dhexaad ah. Sheekh Shariif waxa uu sheegay inta ay ku sugan yihiin ciidamada Itoobiya gudaha dalka Soomaaliya aysan suuragal ahayn shir dib u heshiisiin ah.

Sheekh Shariif waxaa kaloo uu sheegay in ay soo dhaweynayaan cid kasta oo wada maslaxadda Ummadda Soomaaliyeed.

Sheekh Shariif, waxaa kale oo uu sheegay in ay diyaar u yihiin in ay goob kasta kula dagaalamaan ciidamada Itoobiya, tan iyo inta ay ku jiraan gudaha dalka soomaaliya, sida uu hadalka u dhigay, isagoo sheegayin ciidamada Itoobiya yihiin kuwo xoog ku haysta gudaha dalka Soomaaliya.

“Shir kasta waxaan diyaar u nahay in aan uga qaybgalno magaca Maxaakiimta Ilsaamiga ah” ayuu yiri Sheekh Shariif.

Nabadoon Caan ah oo Lagu Diley G/Nugaal
Allaha u naxariistee,

Waxaa Arbacadii June 13 dabley hubaysan ay meesha lagu magacaabo Hal iyo Nirig, oo ku dhow tuulada Sin-u-jiif ee Gobolka Nugaal, ku dileen Nabadoon Abshir Ismaaciil Gurey oo ka soo jeeda Gobolka Karkaar.

Nabadoonka ayaa ka mid ahaa 8 qof oo la socday gaari yar, oo ah nooca Mark II, loo yaqaan ee isaga goosha gobollada.

Waxaana halkaas ku dhaawacmay 7 qof oo labo dumar tahay, balse marka laga reebo nin 2-da lugood jaban yihiin intooda kale waa dhaawac sahlan , sida uu noo sheegay nin ka mid ah dadka dhaawaca keenay. Ciidanka Police-ka oo halkaas u anbabaxay ayaa ku soo hungoobay, waxaana la sheegay in nimankii, dilka geystay ay fikadeen.

Wararka laysla dhexmarayo ayaa sheegaya in dilka nabadoonka lala xiriirinayo aano qabiil. Nimanka dilka geystay ayaa la sheegayaa in ay rasaas oodda kaga qaadeen gaariga, ka dib markuu istaagi weyaayey, iyadoo la sheegayo in ka dib markuu darawalku shakiyey oo arkay isbaaro u xiran dadka burcadk ah uu isku dayey in uu jiiro, balse taayirada laga banjariyey, ka dibna halkaas lagu diley nabadoonka .

Soomaaliya ayaa waxaa caado noqotay dilka dadka biri-ma-geydada ah sida odayaasha dhaqanka, culuma-u-diinka, aqoon-yahanka iyo waliba dumarka iyo caruurta, amaba dadka danta umadda ka shaqeeya, sida Saxaafada, Hay'adaha Gargaarka IWM.  

Maxamuud Cumar Bille
Garoowe
mcbille@gmail.com

Siminaar uu soo qabanqaabiyey Ururka Suxufiyiinta Soomaaliyeed (SAPJ) oo lagu qabtay..

Siminaar lagu baranayey Mas’uuliyadda Saxafadda uuna qabtay ururka Suxufiyiinta Soomaaliyeed ee marka la soo gaabiyo loo yaqaano (SAPJ), isla markaana ay maalgelisay Xarunta Midnimo Information Center ayaa shalay qaybaha kala duwan ee Saxafiyiinta Magaalada Muqdisho loogu soo gebagabeeyey Hoteelka Waamo ee Magaalada Muqdisho.

Siminaarkaan ayaa waxaa ugu horeyn khudbado ka soo jeediyey rag aqoon fiican iyo waayo aragnimo u leh saxaafadda mudo dheerna ku soo guda jiray, waxayna dhamaantood iyagoo ilaalinaya mawduuca Siminaarka sheegeen in Mas’uuliyadda saxaafaddu tahy shayga koowaad ee saxafidga laga doonayo in uu ilaaliyo si ay u dhowrsanaanto sharafkiisa.

Siminaarkaan oo socday hal maalin ayaa waxaa cashir ka bixinayey Macallin C/llaahi Max’ed Xasan (Black), oo ah tifaftiraha wargeyska Ayamaha, wuxuuna macallinku si aad ah ugu dheeraaday mas’uuliyada saxaafadda iyo shuruucda Saxaafadda, isagoo soo qaatay tusaalooyin dhowr ah oo qayb ka ahaa sidii saxafiyiintu macaluumaad dheeraad ah uga kororsan lahayeen siminaarka.

Saxafiyiintii ka soo qaybgashay Siminaarkaas ayaa dood balaaran ka sameeyey qodobo dhowr ah oo la soo hor dhigay, oo ay ugu horeysay sida uu Saxafigu ku ilaalin karo mas’uuliyadda saxaafadda, isla markaana sida lagu heli karo habka ugu fudud oo uu Suxufigu ku eed la’aan karo, sharaftiisa saxafinimana ay ku badbaadi karto.

Macallin Black ayaa sheegay in Saxafiga mar kasta looga baahan yahay in uu adeego Shacabka, isla markaana uu dhex dhexaadnimadiisa ku saleeyo dariiqadda saxda ah, balse uu ogaado in ay mas’uuliyad ka saaran tahy shacabka, maadaama buu yiri uu Wariyuhu u adeego shacabka.

Ugu dambeyntii ka soo qaybgalayaashii siminaarkaasi waxay si wadajir ah ugu mahadnaqeen Xarunta Midnimo Center oo iyadu maalgelisay Siminaarkaasi, waxayna xaruntu sheegtay in ay sii wadi doonto dhiiragelinta Siminaarada noocaan oo kale ah si kor loogu qaado Aqoonta Saxafigu u leeyahay Saxaafadda iyo waliba mas’uuliyadda xoogan ee saaran. 

Cabi Xaaji Goob-Doon “Wargeyska Daarul-Xayaa waa uu ka been abuuray..”

8-da Bishan ayaa Wargeyska Daarul-Xayaa waxa uu soo bandhigay wareysi uu siiyey Madaxweynaha Dowladda Federaalka C/llaahi Yuusuf Axmed kaas oo uu ka wareystay arrimo fara badan oo la xiriira xaaladda Soomaaliya iyo arrimo kale, waxa uuna sheegay wargeysku in wadamo ay ka mid yihiin Bakistaan iyo Iiraan ay yihiin kuwo taageero siiya wax uu ugu yeeray kooxo argagixiso ah oo ku sugan dalka Soomaaliya, waxaa kale oo uu Madaxweyne C/llaahi wargeyska u sheegay in wadamadaasi rag ka tirsanay ka qayb-qaateen dagaalkii ka dhacay Deegaanka Baargaal. Waxa uuna wargeysku wax ka weydiiiyey sababaha ay Dowladda Federaalka taageerada uga hesho Dowladda Itoobiya maadaama ay Soomaaliya ka tirsan tahay Jaamacadda Carabta, waxa uuna C/llaahi Yuusuf ku jawaabay, “In aan taageero ka raadinayo Dowladda Itoobiya waxaa nabaday Jaamacadda oo aan ka weynay taageeradii aan ka sugeynay”, isagoo sheegay in intii ay socdeen dagaalada sokeeye aysan Jaamacadda Carabta ka helin wax taageero ah.

Afhayeenka Dowladda Cabdi Xaaji (Goob-Doon) ayaa wararka uu sii daayey wargeysku ku tilmaamay kuwo aan sal iy rad toona laheyn, waxa uuna sheegay in Madaxweynaha uusan wax eedeeyn ah u jeedin Dolwadda Bakistaan, balse hadalkiisu uu ahaa in shaqsiyaad ka tirsan Dowladda Bakistaan ay ka qayb-qaateen dagaalkii ka dhacay Deegaanka Baargaal, isagoo sheegay Cabdi Xaajin Dowladda Bakistaan iyo Dowladda Federaalka uu u dhexeeyo xiriir walaaltinimo, sidoo kale waxa uu sheegay in Ururka Jaamacadda ay ka heleen taageeradii ay u baahnaayeen, maadaama ay soomaaliya ka mid tahay Dowladaha Jaamacadda Carabta.

Koox Soomaali ah oo la sheegay in ay afduub u gaysatay...

            Wararka naga soo gaaraya Degmada Buula Xaawo waxay sheegayaan in labo Askari oo Keenyaati ah kana mid ah askarta ilaalisa xuduuda u dhexeysa Soomaaliya Kenya ay qafaasheen koox soomaali ah oo aan la garanayn meesha ay la aadeen.

Ciidankaan oo la afduubtay maalintii doraad aheyd ayaa waxaa dadaal ugu jira Odoyaasha Buula Xaawo Odoyaasha deegaanka, waxaa shalay kulan wada yeesheen saraakiil ka tirsan ciidamada wadanka Kenya iyo Odoyaasha, waxayna Odoyaashu sheegeen in ay baadi goob u geli doonaan sidii lagu heli lahaa labadaasi askari.

Waa markii uguy horeysay oo askar keenyaan ay soo afduubtaan koox Soomaali ah, ilaa iyo haddana lama garnaayo sababaha loo afduubay labadaasi askari.

Dowladda Kenya ayaa bishii Janaayo ee sanadkaan waxay xirtay xuduuda u dhexeysa Soomaaliya iyo Kenya kaddib markii uu saameyn ku yeeshay dagaalkii u dhexeeyey Ciidamada Itoobiya iyo Maxaakiimta Islaamiga, waxaana dhowr jeer dowladda kenya laga codsaday inay furto xuduuda u dhexeeysa iyada iyo Soomaaliya maadaamka labda dal uu ka dhexeeyo xiriir dhanka ganacsiga ah

C/llaahi Yuusuf oo booqasho raaligelin ah ugu tagay C/qaasim

Madaxweynaha Dowladda Federaalka C/llaahi Yuusuf Axmed oo u wehliyo Ra’isul Wasaare Cali Max’ed Geedi iyo Wasiirka Arrimaha Gudaha Max’ed Sheekh Maxamuud Guuleed (Gacma Dheere) ayaa shalay hoygiisa ku booqday Madaxweynihii hore ee Soomaaliya C/qaasim Salaad Xasan.

Booqashadan oo ahayd mid raaligelin ah ayaa ka dambeysay kaddib markii ciidamo Itoobiyaan ah iyo kuwo Dowladda Federaalka ay xoog ku galeen guriga C/qaasim Salaad Xasan.

C/llaahi Yuusuf Axmed oo ka hadlay arrintaasi ayaa waxa uu yiri “aad baan uga xunahay in ciidamo ka tirsan dowladda ay u dhacaan ama ay farateystaan guriga C/qaasim Salaad Xasan”. Waxa uuna intaa sii raaciyey “Waa Madaxweyne naga mudan xushmad waana madaxweynihii iga horeeyey aniga, mana aqbaleyno in gurigiisa xoog lagu galo”.

C/qaasim oo isna ka hadlay kulankaasi ayaa waxa uu soo dhaweeyey raaligelinta Madaxda sare ee Dowladda, sidoo kale waxaa halkaasi ka hadlay mas’uuliyiin sare oo ka tirsan dowladda oo iyana raaligelin buuxa u gudbiyey C\qaasim Salaad Xasan.

Warar ayaa waxay sheegayaan  in Madaxweynaha aan dib loogu soo celin hubkii horey looga qaaday gurigiisa, hase yeeshee Dowladda waxay ballanqaaday in wixii haatan ka dambeeya ammaanka madaxweynaha la wareegi doonaan ciidamada Dolwadda Federaalka. 

Lacag deeq ah oo la gaarsiiyey Binti Jaylaani

Lacagtaan oo loo soo wakiishay Amiin Yuusuf Khasaaro ayaa waxaa halkaasi ka mahadceliyey qoyska Binti Jaylaani Max’ed oo u rajeeyay intii soo uruurisay kaalmadiisa in Illaahay bedel khayr leh ka siiyo. C/raxmaan C/llaahi oo ka mid ah Jaaliyadda Gottenberg ayaa sheegay in lacagtaasi ugu talagaleen in gabadhaasi wax loogu qabto gaar ahaan dhinaca caafimaadkeeda, isagoo naga soo xiriiriyay dalka Sweden.

Mana ahan markii ugu horeysay oo lacag la soo gaarsiiyo gabadhaasi, balse waxaa horey u soo gaaray lacago dhowr ah, waxaa la filayaa in Binti dhawaan caafimaad ahaan loogu qaado cariga Mareykanka, waxayna u mahadcelisay dadka Soomaaliyeed ee ku nool dalka Australia oo iyagu isku dayey in gabadhaasi ay caafimaad u geeyaan dalka Australia, balse ay suurageliweysay kaddib markii ay reerka gabadhu doorteen in caafimaad ah loogu qaado dalka Mareykanka.

Amiin khasaaro