C/qaadir Faarax oo ah sii hayaha Safaaradda Soomaaliya ee Uganda ayaa habeen hore ka bad-baaday sida uu sheegay isku day dil oo lala damacsanaa in lagu qaarijiyo, kaddib markii ay soo weerareen koox aan la garaneyn waxa ay yihiin.

              Ku simaha safiirka ayaa markii la soo weerayay wuxuu koox Soomaali ah kula sheekeysanayay banaanka hore ee Masaajidka Soomaalida ee Towxiid, waxaana ka hor intii aysan si kas ah u soo beegsan isaga ay soo ja-jabiyeen Gaarigiisa, iyadoo guud ahaan miraayadaha oo dhan dhulka dhigay.

               “Anigu waan bad-baaday, waxaana ka baxsaday isku day dil, waxaana u maleynayaa inuu ahaa shir-qool la soo agaasimaya, hase ahaatee baaritaankeeda waan ku jirnaa” sidaa waxaa yiri safiirka oo aan la kulmay, wuxuuna intaas ku sii daray “waxay iga dhaceen $1,500-Dollar, Mobile iyo Gaariga oo ay iga jajabiyeen”.

              Kooxda uu la sheekeysanayay Mr. Faarax ayuu meel gooni ay uga baxay kaddib markii uu u soo dhacay Telephone dibadda ah, waxaana intii uu ku guda jiray sheekadii qofka soo wacay uu sheegay in ay ka soo dul dhaceen laba nin oo markiiba

Mobile-kii iyo wax alaale wixii jeebabka ugu jiray kala baxay, haddii ay ahaan laheyd Documents iyo  lacag, waxaana dadaal dheeraad ah sameeyay kooxdii oo markiiba soo kala yaacday, oo fashiliyay qorshihii ragas, kaddib markii ay dhowr nin oo afkooda hanjaabadyo ka dhacyeen ay ku soo ordeen.

              Weerarkan ayuu sheegay Safiirku in laga yaabo in ay ka dambeeyeen koooxo dhinac ka degan Safaaradda Soomaalida oo loo sheegay in ay ka guuraan maadaama Safaaradda la weyneynayo isla markaana ay u shaqeyn doonto sida Safaaradaha kale, maadaama in muddo ah aysan Safaaraddu si fiican u shaqeyn dowlad la’aantii Soomaaliya ka jirtay aawadeed, wuxuuna sheegay in dadkaas qaarkood ay ka dareemayeen dhaga adeyg ku aadan ka

guuritaanka dhulka iyo guryaha ay leedahay safaaradda, waxaana maalmihii la soo dhaafay socday olole ku aadan dib u dayactiridda goobta Safaaradda Soomaalida ay ku leedahay Magaaladana Kampala.   

               Safaaradda SOomaaliya ee wadankana Uganda ayaa lagu wadaa in bilaha soo socda ay si caadi ah shaqadeedii Dilomacyadeed u  biloowdo, waxaaana lagu wadaa in dhawaan uu yimaado Magaaladan Kampala Safiirka Soomaaliya ee wadanka Uganda Sayid Axmed Sheekh Daahir, kaasoo dhawaan lagu magaacabay wareegto ka soo baxday Xaafiiska Ra’iisul Wasaare Cali Maxamed Geddi.

   W/D: Faarax  Maxamed Cali (Faarax Blue)

   Kampala-Uganda

   Email: farahblue_545@hotmail.com