MAXAAKIMTU WAXAY SI DADBAN U TAAGEERAYAAN IN ITOOBIYA LAWAREEGTO SOMALIYA .... JULY 28 2007           

Cabdiraxman Sh. Ismaciil (ABUUTURAAB). 
Abuturab100@gmail.com               
 

,Anoo sii wata qoraaladii aan ugu digayay Ummadda Somaliyed in aysan ku kadsoomin halganka guuldarro ee ay hogaminayaan maxakimtu, sababtoo ah waxay khilaafeen shareecada Islaamka iyo caqliga saliimka.

Waxa maxakimtu hortaagan yihiin wada hadalka iyo heshiiska Somaliya, ayagoo ku xiraya in Itoobiya dalka ka baxdo, Caqligaas foorarana waa kii sabab u ahaa in Itobiya dalka qabsato.

Waxan ku bilaabayaa hadalkii Cabda Cabdullaahi oo aanan marnaba uga maarmeyn qoraaladayda; (Ciddii ku xirta heshiiska Somalida, iyo wada hadalada, in Itoobiya dalka ka baxdo wuxuu quful ku dhuftay albaabkii Itoobiya ka bixi lahayd).

Waxan ummadda Somaliyeed u sheegayaa in hawlgalka maxakimtu uu yahay mid taageeraya qorshaha Itoobiya kula wareegayso Somaliya,

Waxan kaloo caddeynayaa in maxakimtu si khaldan u fahamsan yihiin, si khaldanna u turjumayaan, waxay tahay dawlad Islaaamiya iyo sida lagu gaarayo. 

Waxay u fahamsan yihiin dawlad Islaamiya ay ku iman karato oo kaliya in kooxda culimada ee maxakimta dawladnimada lagu wareejiyo, cid kale oo xaq u leh in ay shareecada ku xukumaanna uusan jirin, Ra'gaasu wuxuu la fac yahay, nin reer baadiye ah baa Masaajidkii Rassuulkeenna barakaysan CSS ku kaadshay, markaasaa Asxaabtii ku qayliyeen, Rasuulkeenna barakaysan CSS baa wuxuu yiri daaya oo wadaan biyo ah ku shuba kaadidiisa(masjidku ciid buu ahaa),markuu kaadidiisii dhamaystay baa Rassuulku CSS u yeeray oo yiri meeshaan waxa loogu tala galay in Alle lagu caabudo,ninkiibaa wuxuu la yaabay siday ugu qayliyeen iyo sidii Rassuulku CSS ugu naxariistay uguna naseexeeyay, markaasuu yiri, Ilaahow aniga iyo Muxammad u naxariiso, qof kalana ha u naxriisan, Rasuulkii baa ku yiri; wax weyn baad koobtay(naxariistii Alle weyne SW oo ballaarneyd baad labadeenna oo qura ku koobtay), Waxan kaga jeedaa, Ilaahow aniyo Muxammad u naxariiso cid kalana hanoola naxariisan, waxa la mida  ninkii yiraahda shareecada waxa ku xukumi kara hal koox oo ka mida culimada muslimiinta oo kaliya, wuxu soo koobay wax weyn, wuxuuna u muujiyay ku dhaqanka shareecada islaamka, waxan dhaqan gali karin, sababtoo ah waa waxan dhici karin in wadan hal koox oo kaliya dawlad ka ahaato.

Shareecada waxa ku xukumi kara qofkasta oo muslin ah oo ku qanca, mana ahan in culimada oo kaliya fulin karto. waa qawaaniinka dalka oo lagu badalo qawaaniinka Islaamka, ma ahan rag, lagu badalo rag, (ragga dawladda haya oo lagu badalo, raga culimada maxakimta, ama culimo kale).

Taasi waa fahamka iyo fakarka maxakimta, waxase kasii hooseeya kana natiijo xun falka (ficilka) waxay u shaqeynayaa in aan cid kale shareecada ku xukumi karin(saa xaqba uma aysan laha eh,waa siday qabaan), ayana aysan ahayn dad maamulkoodu dawladnimo gaari karo,waxa markaas natiijadii ku dhammaatay in aan waligeed la helin cid shareecada wax ku xukunta, inta maxakimtu jiraan.

Waxan ku caddeynayaa in aysan cid kale xukunka shareecada u ogolayn, intii ay awoodda haysteen mar qurana dawladda ku meel gaarka ma aysan ka codsan, umana soo ban dhigin ku dhaqanka shareecada,(walaalayaal aannagu xukunka idinkuma haysanno, waxan kaliya oo idinka rabnaa in aad shareecada Alle weyne SW ku xukuntaan,shareecadu waa wax u suubada xukun, Allaa usoo dajiyay, adinkuna xaq baad u leedihiin waxad tihiin muslimiin, adduunku idinkama hor imaanayo,( waxa adduunku ka hor imaanayaa ku dhaqanka shareecada markii si khaldan loo turjumo). 
 

Waxan ku caddeynayaa in aan maxakimta fakarkooda iyo maamulkoodu dawladnimo gaarsiisnayn, laba arimood; Tan koobaad awooddii aad ogeydeen oo soo martay (dal,dad,maal,muruq,) sinaba ugama aysan faa'iidaysan, nin awooddaaasoo kale soo martay oo aan dhannaba uga faa'iidaysan waxay caddeyneysaa in uusan dawladnimo shaashaddaba usoo fuulin, Tan labaad maxakimtu waxay ku guul darreysteen in ay yeeshaan hal guddoomiye,urur samaysan kari waayay hal guddoomiye dawlanimo ma hogaamin karo, Adduunku wax badan buu jiray sooma marin urur laba guddoomiye leh, ama dawlad laba madaxweyne leh,Golaha shuurada oo uu Sh. Xassan xukumo ma wuxuu hoos yimaadaa golaha fulinta oo uu Sh. Sharif xukumo?, mise golaha fulinta oo uu Sh. Sharif xukumo baa hoos yimaada golaha shuurada, ee Sh. Xassan xukumo?. 
 

Gunaanadkii wuxu noqday maxakimtu dawladnimo ma gaari karaa cid kalana dawlad kama noqon karto Somaliya intay dhaqdhaqaaqayaan, markaas halgankoodii wuxu ku dhammaaday in Somaliya aysan dawlad noqon, haddii Somaliya dawlad noqon waydana waxa la wareegaya Itoobiya, Somaliya waxa loo qaybinayaa dawlad goboleedyo yar yar, (Somaliland, Puntland, Jubbaland,Shabeelle land,Banadirland, Hobyoland, iyo kuwa kale), oo col ah oo midba mid lagu xuuxiyo, mid kastana hoos timaaddo dawladda Federalka Ethiopia. 
 

Halganka Maxakimta ay ku qaadaceen shirka qaran ee dib u heshiisiinta Somaliyeed, ay si joogto ah u qarxinahayaa Xamar, ay si joogto ah dhufeys uga dhiganayaan, Hoobiyana la hoos galayaan shacabka masaakiinta ah kadibna Itoobiyaanku madfaca ku hogaaminayo, waxa natiijadeedu tahay in aan dawladnimadii iyo qarannimadii   Somaliya waligeed soo noqon. 
 

Waxa mudan in aan qoralkeyga ku gunaanado hadalkii Cabda Cabdullaahi ay u qortay Sh. Sharif; (Waqtigaad Maxamad-dheere dirirayseen adaan ku raacsanaa, haddana mabda'aygii wax iskama badalin, marka aad leedahay miino aassa,  miinaduna aysan kala garanayn ciyaalka banooniga ku ciyaaraya jidadka Xamar iyo Askarta Itoobiyaanka, waxa igala natiijo roon hadalka Maxamad-dheere leeyahay madoonayo in rasaas la maqshiiyo dhagaha shacabka. 
 

Waxan ummadda Somaliyed ka codsanayaa, inaan maxakimta ka harno, inaan dawladda ku meelgaarka taageerno, inaan shirka dib u heshiisiinta taageerno, inaan midowno,in aan is cafinno, Si aan qarannimadeennii iyi dawladnimadeennii usoo ceshanno.

 
Haddaan in yar oo kaftan ah dhex gashado, markaan qoraalka diyaarsho waxan u diraa la taliyaashayda,si ay usoo saxaan una soo gaabshaan, waxay dhahaan markaan akhriska bilowno annagoo wili macaansanaynaa warqaddu naga dhammaataa, wax laga saarana ma lahan. 
 

Talodiina iyo taageeradiinnaan codsanayaa.   
 

Cabdiraxman Sh. Ismaciil (ABUUTURAAB). 
 

Abuturab100@gmail.com