Daabaco
Boggan | Print
Faroole iyo Zenawi: March 14, 2009.. ENA
Daahir Riyaale iyo Zenawi: March 13, 2009
Sheikh Shariif iyo kurisga Zenawi
Shariif Axmed iyo Zenawi, Feb 3, 2009
Gaashaanle Sare Nuur Cadde Ma Xasuuqa Shacabka
Soomaaliyeed ayuu Zenawi uga Mahad Celiyey?...
G/sare Nuur Cadde iyo Zenawi, Addis Ababa, Feb 6, 2008
Geeddi iyo Zenawi oo jooga Addis Ababa xilligii uu ra'iisul
wasaaraha u ahaa DFKMG -
Muqdisho,
June 5, 2007: Zenawi oo Muqdisho kula kulmay C/laahi Yuusuf iyo
Geeddi, kaddib markii maxkamaadaha laga saaray Muqdisho. Sawirka:
daylife
|
Naftii-hurihii ka Waxtar Badnaa Sheekhiisa
C/Waaxid
C/hi Khaliif
London, UK
cabdulwaxid@hotmail.com
Ilaah baa mahad leh. Nabadgelyo iyo naxariis nabi Muxamed korkiisa ha
ahaato.
Haddaad daaci As-Salafiyo-Ajjadiid ama Islaax ama Suufi ah weydiiso:
ka warrama nin sabab u noqday in la dilo oo gaalo isku soo hogaanshay
maxay diintu ka qabtaa? Waxaa dhici karta in kan ugu fiican ku yiraahdo:
ma ahayn nin caqli badan marba hadduu naftii Ilaah sharfay sidaas
raqiiska ah u halaagay! Waxaa dhici karta in qaarkood, sidaan ku aragno
ama ka maqalno teleefishinnada iyo idaacadaha ay ku sii daraan waxyaalo
aan la weydiin sida iyagoo dhaha: qofkii dad isku qarxiya waa ehlu-naar.
Qofkii dad shacab ah laaya waa saas. Qofkii qof Amisom ka tirsan dila
waa saas! Weydiiyuhu waxaa dhici karta inuu mas’alo khaasa cindiga ku
hayey laakiin ducaaddaasi waxaa dhici karta iney la ciyaarayaan
saxaafadda Carabta iyo tan Caalamka.
Waxaa dhici karta in weydiiyuhu uu ka hadlayey arrintii xaddiiskii
saxiixa ahaa ee ku yaalay saxiixul Muslim ee ka hadlayey wiilkii yaraa
ee boqorku u dirsaday inuu wax ka barto ninkii saaxirka ahaa ee gaboowga
la il darnaa. Haddii arrinta wiilkaas iyo dadka la halmaama ay niman
ducaad ama mar marka qaarkood culumo sheegta si aan ka fiirsi lahayn ama
iyagoo raalligelinaya cadow saas uga hadlaan waa arrin gef ah, sidoo
kalana shacabka laga qarinayo xaqiiqda jirta.
Arrinta wiilkaas ka waxtar badnaaday sheekhiisa waxaa ku sugan
cajaa’ib:
- Wiilkaas wuxuu soo baxay ka hor intaan nabi Muxamed (SCW) la soo
dirin. Ma u habboon tahay qof Qur’aanka iyo Axaadiista akhriyey inuu
wiilkaas iyo dadka la midka ah caay ku miiso?
- Wiilkaas isagoo dhallinyar, adduunyana lugihiisa taallay
maaddaama u ku noolaa qasriga boqorka, jago weyna u soo socotay ayaa
waxaas oo dhan wuxuu ka doorbiday inuu xaqa raadsho. Ka warrama qof
muslim ah oo 40 sano dhaafay oo intaas culuum Islaam soo baranayey
oo isagoo sacluuko/faqiir ah oon waxba heysan doorbiday inuu la
shaqeeyo CIA iyo Tigree si uu xukum u helo?! Waxaa ka sii daran,
dadkaas qaarkood waxay heystaan magac diin laga urinayo! Sheekh
hebel! Shariif hebel! Daaci hebel!
- Wiilkaasi boqorkiisii waa ka qarsaday inuu nin raahib ah wax ka
barto halka dad ducaad sheeganaya inta sirta naga qarsadaan la
showraan CIA, madaxda Midowga Afrika iyo kuwa Carabta?
- Cilmi-baaris kaddib wiilku wuxuu goostay inuu tijaabiyo xikmadda
Koonka/adduunka. Markii bahalkii dadka jidkii ka xiray; wiilkaasi
inta dhagax qaatay buu labo arrimood sameeyey. Tan hore wuxuu
waxweydiistay Allaah. Wuxuu kaloo yiri: haddii raahibka xaggaa looga
jacayl badan yahay sixiroolaha, dhagaxaan ku dil bahalkaas. Sidii
bey noqotay. Hadda dowladdaan jirta iyo madaxdeeda waxay la
dhacsanyihiin madaxda Afrika sida Kibaki, Musevani, Kigame iyo kuwa
kale halka aysan weli qaabilin madaxdii Muqaawamada! Waxay la
shireen nimankii laga jeclaa cariga Maraykanka. Marka
hogaamiyaheennu wuxuu qaaday jid ka soo horjeeda midka wiilku
qaaday.
- Wiilku wuxuu ku soo koray bulsho gaala ah marka inuu raahibka
iyo saaxirka kala saaro wuu ku khasbanaa inkastoo waddadii xaqa
ahayd u maray. Hadda hogaamiye muslim sheegta baa leh:
baarlamaankoow haddii dastuurka xaggiina laga jecelyahay Shareecada
wax ka dhaha? Soow waalidiintood uma dadaalin oo dugsi-Qur’aan kuma
bilaabin? Shaki ma leh. Marka side qof muslim ahi Shareeco Islaam
muran u gashay?
- Wiilku wuxuu gartay in marka arrintu khatar gasho ineysan wacdi
kaliya ku filneyn ee loo baahanyahay naf-hurid. Wixii raahibku
intaas oo sano keeni waayey ayaa wiilka sabab looga dhigay inuu
dadkii daqiiqad ku muslimaan. Qof kasta oo muslim ah waa ogyahay
qofkii raba in Islaam la isku xukumo waxaa loo baahanyahay
naf-hurid. Marka Nafti-huruhu wuu ka nacfi badanyahay qofka ku
ekaada inuu dadka waaniyo oo waxbaro keliya. Wiilka yar waa ogaa
hadduu rabo inuu dadka badbaadiyo in loo baahanyahay inuu naftiisa
ku deeqo.
- Wiilka yar wuxuu gartay in faa’iidada ugu weyn tahay in dadku
cadaab ka badbaadaan. Wiilkaas wuu ogaa in dadka loo dooro dhimasho
haddayba janno ku helayaan. Qofka inuu dadkiisa u doono in ay
Shareeco isku xukumaan adduunka ama Shahiidnimo ku dhintaan ayaa ah
wixii diinta loo soo dejiyey. Hadda waxaad maqleysaa niman culumo
sheegtay oo shaqo ka dhigtay wax ka soo horjeeda waxaa wiilkaas
diintu ku ammaantay. Haddii carruur badan oo sanad-jir ka yar oo
Tigreegu Soomaaliya ku laayeen hadli lahaayeen waxaan shaki iiga
jirin iney dhihi lahaayeen: Muqaawamooy xaq baad ku taagan tihiin ee
doona in Shareecada la isku xukumo. “Culumadaas” haddii caqligooda
la fiirsho, wiilku wuu khaldanaa maxaa yeelay dadkii oo dhan
sababtiis baa loo ciqaabay oo u dhinteen! Laakiin Islaamku wuu
ammaanay ilaa uu noo soo wariyo xitaa ilmihii yaraa oon hadli karin
in inta Ilaah ka hadliyey ku jiri hooyadiis: isku tuur dabka, xaq
baad ku taagan tahee? Ilaahoow sabi aan hadli karin yuusan naga
caqli badnaan!
- Wiilku wuxuu bixiyey sirtii lagu dililahaa isagoo fiirinaya
xikmadda ka weyn. “Culumadaas” waxaad mooddaa iney leeyihiin haddaad
naftaada khatar gelisid waxaad tahay: samadiid. Waxayna shacabkii
Xamar iyo Soomaaliya ku wareeriyeen heestii: samadiidoow dabin baa
kuu dhigan lagugu dili doonee! Dacaayad raqiis ah bey dadkii ku
khaldeen.
- Yaa fiican culumada iyo ducaadda intaas qaaradaha adduunka
dawaafaya ee dadka waxbaraya iyo kuwa dhufeyska ugu jira caddowga?
Labaduba waa fiican yihiin laakiin Imaan C/hi Binu Mubaarak baa
gabayga ka tirshay isagoo caabidkii Xarameynka ku leh: haddii
illin/ilmo cabsi-Ilaah darteed dhabankaaga qoysay; annaga waxaa
dhafoorradayada qooyey dhiig. Marka marka naloo kaa eego waxaad ku
jirtaa ciyaar! Ka warran ajarka qof hal habeyn naga waardiyeeyey
Tigree iyo Tigree-raac?
- Culumadaas aan sheegayo qaarkood tobankii sano ee u dambeeyey
haddii la qiyaaso tigidhadii ay dayuuradaha ku raaceen waxaa dhici
karta in midkood keliya qarash gareeyey wax ka badan boqol kun oo
doollar! Ceeb ma leh oo dadkey waxbarayaan, kheyrkaas ay waddaan
baana dadku u jeclaaday laakiin waxay wax ka sarifteen ajarkii ay
aakhiro heli lahaayeen marba haddii Ilaah cayshkii u sahlay. Ma
filayo iney sanadahan dambe ay habeyn gaajo ku seexdeen lacag la’aan
darteed. Intaas waxay joogaan magaalooyin waaweyn oo nal, biyo iyo
internet leh. Ka warran nafti-hurayaashii ay diyaaradaha Maraykanku
kor ka garaacayeen? Taankiyada Tigreega iyo Ashahaado-la-dirirkuna
madaafiicda la dhacayeen? Sidoo kalana ay qaniinayeen kaneeco,
dhuug, hangarale, masas iyo abeesooyin? Ka warran oonkii iyo
cunto-la’aantii heysatay? Ka warran dhaawacoodii loo waayey wax lagu
qulaamiyo ama lagu dhayo?
- Nafti-hure haddii la waayo oo dadku beerahooda iyo ganacsigooda
iska dabogalaan waxaa imaanaya xaddiiskii nabigu (SCW) ka digay ee
ahaa waxaa idin ku goobanaya oo idin wadaagaya ummadaha oo dhan sida
saxanka weyn ee Alla-bariga/sabta cuntada loogu wadaago. Soow
xaddiiskii maanta ma yaal? Soow badaheennii maraakiibtii dagaalka ee
waddama waaweyn nama kor taagna? Soow Tigreegii iyo kuwo ay soo
wakiisheen gobolladii dhexe dagaal kama wadaan? Soow Amisom oo loo
soo tabobaray iney Muqaawamada ugaarsadaan Xamar ma joogaan? Soow
ninkii hogaamiyaha sheeganayey madaxweynayaashii gaaladaha ahaa sida
kan Kenya, Ugaandha, Ruwaanda iyo Burundi kaalmo kama raadsan?
Ciladda xaddiisku sheegay ma aqoon la’aan bey ahayd? Mise
adduunyo-jacayl iyo dhimasho-ka-carar? Xaddiiska waxaan ka fahmayaa
haddii nafti-hurayaal xaq ku taagan bataan in cadowga na cunaya laga
guuleysandoono haddii Ilaah idmo. Xaddiisku Mushrikiin ama gaalo
keliyaa idin ku goobaneysa ma oran! Aan Fahamno waxa nabinimadu
tahay iyo hadalka Suubanaha! Wuxuu yiri “Umam”. Ma kala duwana
haddii Umadahaasi noqdaan sida Cali Cabdalla Saalax, kan Jibuuti,
Qatar iyo kuwa ka yimid gaalo sida Maraykan iyo reer Galbeed. Alla
Suubanaha hadlkiisu qiimo badanaa! Hadduu dhihi lahaa gaalo ama
mushrikiin maanta Ashahaado-la-dirirka iyo dowladda Shariifku qiil
bey heli lahaayeen laakiin xaddiiska waxaa laga fahmayaa ineysan
kala duwaneyn qofkii Islaamka diida hadduu sheegto George, Zenawi
ama Maxamed, Cabdi, Cali ama Axmed. Madaxda muslimiinta heysta waxay
ku jiraan “Umam” ku soo duulay Ummadda muslimiinta ah. Nimankaas na
heysta iyagaa dadka ugu neceb isku-xukunka Shareecada Ilaahay! Dadka
sida haruurkii muslimiinta u boobaya iyagaa koow ka ah. Dhulalka
reer Galbeedka waxaa laga yaabaa in laguu dulqaato muddo haddaad
xaqa ka hadashid laakiin ka warrama waddamada Carabta? Waxaan ka
hadlayaa xukaamta.
- Teeda kale mar wiilkaas la rabay in laga tuuro buur ama biyaha
badda lagu maansheeyo kama reebin inuu noqdo nafti-hure. Marka
Maraykan iyo Tigreegu intaas oo jeer bey isku dayeen inay tirtiraan
Muqaawamada kumana guuleysan. Sidoo kalana walaalihii ku shahiiday
dartood ma keenin in Muqaawamadu ka baqaan iney dalbadaan in
Shareecada Islaamka lagu xukumo dalka.
- Haddii la is dhaho wiilkaasi wuxuu caawinayey oo wax barayey dad
aan muslim markaas ahayn, marka seen u simi karaa shacabka
Soomaaliyeed oo “100%” muslim ah iyo dadkaas? Soow in shacabka loo
naxo maaha? Haddii nabigu (SCW) uu hooyadeen Khadiija iyo
saxaabiyaddii daahirka ahayd eey dhaleen - Faadumo binti Muxamed
(labadaba Ilaah raalli haka noqdee) u doorbiday iney caleenta iyo
hargaha cunaan markii seddex sano lagu go’doomiyey meeshii la ogaa,
iyadooyba dhici karto in hooyadeen Khadiija (RC) macaluul u dhimatay
maxaa hadda dhibka na soo gaara loogu samri la’yahay si hadafka loo
gaaro? Teeda kale soow nabi Muxamed (SCW) iska-hor-imaadkii
dagaalkii Badar ee qof qofka ahaa ma xulin seddex saxaabi oo dad ugu
sokeeyey? Marka dhimashada xaqa lagu dhinto iyo barakaca iyo gaajada
muslimiinta soo gaarta waa sunadii Ilaahay. Marka sheekhii leh waan
gees marayaa oo waxaa jirta waddo kale isagaa laga rabaa daliil.
- Teeda kale shacabkeenna muslimiinta ah wixii na soo gaara,
innagaa isagu wacan. Haddaan gacmaha qabanno kuwa daalimiinta ah
waxaa soo afjarmaya daldaloolada gaaladu naga soo geli karto. Aan
xasuusanno xaddiiskii doonidii labada dabaq ahayd. Haddii dadku
daalimiinta iyo Ashahaado-la-dirirku qabanwaayo waxaa dhacaysa inaan
kulligeen wada halaagsanno.
- Iyadoo qodobkaas 14-naad aan ka duulayo marka shacabku xaqa u
hiiliyaan dhibku waa yaraadaa. 2006-dii muddo yar baa
Ashahaado-la-dirirkii looga saaray Soomaaliya. Haddeer
Ashahaado-la-dirirkii labaad baa dagaal ka wada gobollada dhexe.
Markii shacabkii Ceelbuur gacansiiyeen Muqaawamada wataas dabada
looga dhacay gaalo-raacyada. Marka shacabka Xamar waa ku
mahadsanyihiin ineysan weli ku dhicin dabinkii lala rabay ee ahaa in
Amisom laga dhigto xabiib halka Muqaawamada loo tusayo
shar-wadayaal. Arrintaas Ilaah idanki ma shaqeyneyso. Dad baa la
idiin soo diray sheeganaya culumo oo sheekadoodu tahay iney
Muqaawamada dacaayadeeyaan. Waxaan xasuustaa 1996-dii niman hadda
Xamar makarafoon la taagan oo heysta Muqaawamada oo leh jihaadkii
waa dhammaaday iyagoo caayaya wiilashii Luuq Zenawi kula dagaalayey.
Haddee waa Zenawi oo Soomaaliya ku soo duulay!
- Waxaa isu key qaban la’ sida ninkii ku muxaadareynayey inuusan
isu quurin sida nabiga (SCW) falay - inuu guursado gabar 9 sano jir
ah, iyo nin Salafiya-jadiid sheeganayey oo markaas daaqadda kala
baxay ninkaas kale xitaa heer uu gaaray inuu yiraahdo Qardaawi uma
kala soocna xalaal iyo xaaraantu isagoo ku magacaabay buuggiisii
“Al-Xalaal Wal-Xaaram sidaan oo kale: Al-Xalaal Wal-Xalaal! Micnuhu
waa wax kasta Qardaawi waa u xalaal. Hadda Qardaawi, Ali-Islaax,
As-Salafiya-Ajjadiidah, iyo As-Suufiyah waa isku dhinac marka loo
eego Muqaawamada. Marka nimankii saas isku ahaa maxaa maanta isku
safka ka soo jeedshay?
- Nafti-huraha kama wado qof shacab isku qarxiya ama sidaas wax u
qarbuda ee waxaan ka wadaa qof naftiisa diyaar uga dhigay inuu Ilaah
ka iibsado. Haddii wiil Soomaaliyeed ka soo tago dibadda oo ku biiro
koox ma aha in la yiraahdo waxaa ka dambeeya wadaado. Waxaa u fiican
in shacabku Soomaaliyeed ee qurbaha jooga gartaan khaasatan kuwa
Maraykan in ugu dhowaan sanad kasta in wiil Maraykan ahi inta iskuul
galo uu dilo ardaydii wax la dhiganeysay! Sidoo kale sanad kasta
waxaad arkeysaa in la arko nin Maraykan ah oo carruurtiisa iyo
xaaskiisa dila ama dad kale xabad la dhaca dabadeedna is dila! Ka
warran haddii la dhaho diinta Kiristaankaa saas tiri? Ama dadka
Maraykankaa sidaas ka raalli ah? Marka haddii wiil Soomaali ah isku
qarxiyo xafiis Riyaale ama Cadde Muuse leeyahay maxaa loo leeyahay
culumaa soo dirtay? Marka nin Maraykan ah dilo xaaskiisa iyo
carruurtiisana waa u kaligiis? Maxaa markii wiil Maraykan ahi iskuul
inta galo xabbad la dhaco ardeydiisii looga dhigaa inaan wax dhicin
halka marka wiil Soomaali ah isku qarxiyo cadowgii waddankiisa ku
soo duuleyna loo dhahaa wadaado dibad jooga ama masaajid dibad ku
yaal baa ka dambeeyey? Ma Ash-Shabaab baa tabobaray wiilkii Jarmalka
ahaa ee intaas oo carruur ah oo iskuul la dhiganeysay dilay
dabadeedna isna is dilay?
- Hogaamiyaha muslimiintu waa inuu geesi noqdaa. Dagaalkii Uxud
iyo Xuneynba nabiga (SCW) waxaa ku soo haray dad yar ilaa waqti.
Marka Muqaawamada waxaa la gudboon iney samraan. Horayna waa loo
arkay in dadka badankiisu markay adkeysan waayaan idin ka cararaan
laakiin haddaad sidii nabi Muxamed (SCW) samirtaan dadku waa soo
noqon doonaa markay arkaan dadaalkaad waddaan. Yaa sidii Cumar Binu
Khidaam (RC) ka hor istaagi kara Sacad Binu Cubaadah (RC) inuu
xukunka qabto? Marka sheekh Shariif xaq uma laha inuu ka hor hadlo
Muqaawamada maxaa yeelay isagaa halkankii ka cararay wuxuuna doortay
inuu ku raaxeysto huteelada ugu qaalisan waddamdaas. Marka ninkii
sheekh, daaci ama wuxuu rabo ha sheegtee qiil u raadsha Shariifka
waxba uma helayo. Marka xitaa haddii diinta la iska indho saabo
waxaa fiican waxa Soomaalidu ka tiri nafti-huraha in la milicsado
sida heestii ahayd: waxaan ahay naftii-hure.
- Maanta arrintu waxay taagan tahay halkii dagaalkii Mu’tah. Soow
nabigu (SCW) ciidan yar oo ilaa seddex kun ah uma dirin iney
wajahaan 200,000 oo Ruum ah? Waxa lagu dilay Ehlu-beytkii nabiga
(SCW). Waa arrintaas waxa keena in la arko dadkii ugu kheyr badnaa
Muqaawamada oo dariiqa waran markay la dagaalaan cadowga ka hub iyo
tiro badan. Ma xaqbaa in dad ducaad sheeganeysa dhahaan haddii
Muqaawamada Soomaaliya caqli leeyihiin wiilal yar yar uma direen
ciidan Tigree ama Ashahaado-la-dirir ah oo wata dabbaabado iyo
saanad milateri oo farobaan? Sidoo kale ma xaq baa in la dhaho
hadday xaq ku taagan yihiin hogaamiyayaashoodu dariiqa ma
warnaadeen? Dagaalkii Mu’tah iyo kan Muqaawamadu ku jirto wuxuu na
barayaa in kalsooni lagu qabo Ilaahii koonka abuuray. Markaad is
dhiibto waxaa imaanaya nasrigii. Wiilashii Matabaan la waray kaddib
soow hadda Muqaawamadii Xamar ma joogto? Meeyey Gabre? Inkastoo
Gabrayaal kale ay madaxtooyada ku jiraan si dadban laakiin Ilaah waa
dulleeyey Tigree. Insha Allaah gaala-raaca kalana waa dulloobayaan.
- Marka waxtarnimadu kuma xirna aqoon badan ood leedahay oo keliya
ee waxay ku xiran tahay daacadnimo, geesinimo iyo fahan sax ah oo
Ilaah ku siiyo. Wiilkaas yar sheekhiisii waxbaray oo soo taagan baa
Ilaah xaqa fahansiiyey. Raahibkaasi wuxuu dad badan oo culumo
sheeganaya dheeryahay wuxuu ahaa nin laab xaaran wuxuuna wiilkii ku
yiri: adaa iga waxtar badan ee samir. Raahibkaasi wiilkaas inuu ka
hormaray uma xanaaqin, xaasidnimana uma qaadin ee wuu u
hambalyeeyey. Sidoo kalana wuxuu faray inuu wiilku samro. Raahibkii
ciqaabkii waa taabtay laakiin wiilkii ma haaraamine wuu ku samray.
Soow ma fiicna in culumada iyo ducaaddu sidaas u samraan oo ay
wiilasha nafti-hurayaasha ah u qiraan halgankooda?
F.G. Marna ma dhahayo Ash-Shabaab ama Muqaawamada kale ma khaldamaan oo
waa malaa’ig. Sidoo kale hadday khalad sameeyaan laguma raacayo. Hadda
Soomaaliya bad iyo berriba waxaa ka soo weeraray gaalo iyo gaalo-raac
marka waxaa muhiim ah in la taageero Muqaawamo oo ugu yaraan aan la
dacaayadeyn. Dowladdii Mbagathi waxaa ka soo hoosbaxay
Ashahaado-la-dirir. Tan Jibuuti waxaa ka dabo dhashay Ashahaado-la-dirir
magac Suufiyo soo huwaday. Been idiin ma sheegayo, dowladda Shariif
waxay jeclaan lahayd in Muqaawamada la mariyo. Laakiin Ilaah baa xukunka
leh ee Beesha Caalamku ma laha.
C/Waaxid C/hi Khaliif
London, UK
cabdulwaxid@hotmail.com
Isku-xukunka Shareecada oo Baarlamaanka la Hordhigayo!
Akhri...
Afeef: Aragtida qoraalkan waxaa leh qoraaga kusaxixan
Faafin: SomaliTalk.com | March
18, 2009 |