- Dowladda Federaalka oo isku khilaafsan Dagaalka Muqdisho ka socda
- Maxaa keenay in Dowladdu ka baxdo qaar ka mid ah goobihii ay kaga
sugneed Magaalada Muqdisho?
- Wararkii ugu dambeeyey ee Xaaladda Dadka Barakacay ee Magaalada
Muqdisho
Waxaa isku soo dubariday
W/D Amin Yuusuf Khasaaro
E-Mail amiinkhasaaro@hotmail.com
Dowladda Federaalka oo isku khilaafsan Dagaalka Muqdisho ka socda
Warar aanu ka helnay saraakiil ku dhow dhow Dowladda Federaalka waxay
sheegayaan in Dowladda Federaalka ay si aad ah isugu khilaafsan yihiin dagaalka
weli ka socda Magaalada Muqdisho ee dhaliyey in kumanaan kun oo dad ah ay ka
barakacaan guryahooda.
Xubno isugu jira Xildhibaano iyo Wasiiro ayaa waxay Dowladda kula taliyeen in
aan wax madaafiic ah lagu garaacin goobaha ay ku sugan yihiin kooxaha
"Islaamiyiinta" ah, waayo ayay yiraahdeen waxaa halkaasi ku sugan dad shacab ah
oo ay waxyeelo ka soo gaareyso, waxayna sheegeen in haddii ay adeegsadaan
madaafiic ay la mid noqon doonaan Dowladdii hore ee uu madaxda ka ahaa C/llaahi
Yuusuf Axmed.
“Waa in aan shacabka u turnaa oo aan u naxariisanaa” ayuu yrii Wasiir ka tirsan
Dowladda oo sheegay in Dowladda ay la gudboon tahay in ay is difaacdo oo keliya,
sidoo kale xubno iyana ka tirsan Baarlamaanka iyo Wasiirada ayaa iyana qaba in
la duqeeyo goobaha ay ku sugan yihiin kooxaha Islaamiyiinta ah oo aan wax
naxariis ah loo sameyn, iyagoo sheegay in loo baahan in marka goobahaasi la
duqeeyo kadib ay galaan ciidamada lugta ee Dowladda Federaalka.
Maxaa keenay in Dowladdu ka baxdo qaar ka mid ah goobihii ay kaga sugneed
Magaalada Muqdisho?
Ciidamo ka tirsan Maxaakiimta Islaamiga ah oo taageerayey Dowladda Federaalka
ayaa iyagu mar qura banneeyey goobo ku yaala Magaalada Muqdisho, taasina waxay
keentay in ciidamadaasi ay ku uruuraan Madaxtoonyada iyo goobo kale oo ku yaala
Magaalada Muqdisho.
Nin qariyey magaciisa kana mid ah Saraakiisha Dowladda ayaa waxa uu ka waramay
sababaha ay dowladdu u soo banneysay xarumahaasi, waxa uuna yiri “Dowladdu
markii hore ay ka qaldaneed qaabka uruurinta ciidamada, isagoo sheegay in loo
baahnaa in ciidamada Maxaakiimta ee taageersan dowladda iyo kuwii horeyuga haray
dowladdii C/llaahi Yuusuuf inta la isku dhafo la geeyo goobo ka baxsan magaalada
halkaas looga furi lahaa tababar laguna diiwaan gelin lahaa”, waxa uu intaas sii
raaciyey “Goobaha ay ku sugnaayeen ciidamada Maxaakiimta ayaa sarkiishooda waxay
dowladda u soo gudbiyeen liisaska ciidamada ay hayaan oo goobaha qaarkood lagu
sheegay in ay gaarayaan toban kun, waxayna dowladda ka codsadeen in la siiyo
mushaar ciidamadaasi, taas oo ay ku cuslaatay dowladda federaalka” sidoo kale
waxa uu sheegay ninkaasi in ciidamada maxaakiimta ay diideen in ay qaataan
dareeska ciidamada, sidoo kale waxay soo jeediyeen saraakiishooda in la bedelo
saraakiishii hore ee ciidamadii Dowladdii C/llaahi Yuusuf, waxaa sidoo kale
ninka ka dhawaajiyey in ciidamada maxaakiimta la soo gaarsiin waayey sahaydii
iyo saanaddii ay u baahnaayeen, taasina waxay keentay in goobaha qaarkood ay ku
go’doomaan iskuna dhiibaan ciidamada mucaaradka”.
Isku soo wada duuboo dowladda haatan waxa ay dib u uruurineysaa ciidamaddii si
ay mar kale u wajahaan kooxaha ka soo horjeeda, waana midda keentay in dad fara
badan ka cararaan guryahooda, xaalka muqdishana hadda waxa uu u eg yahay mid
colaadeed.
Wararkii ugu dambeeyey ee Xaaladda Dadka Barakacay ee Magaalada Muqdisho
Iyadoo dhowr maalmood uu socday dagaalo u dhexeeya Ciidamada Dowladda iyo
kooxaha Islaamiyiinta, waxa uuna dagaalkaas sababay dhimasho fara badan, dhaawac
iyo barakac, waxaa maalinba maalinta ka dambeysa sii kordhaya dadka barakacaya,
waxa uuna barakaca ugu badani ka socdaa degmooyinka Wardhiigley iyo Yaqshiid oo
ah gobo lagu bartilmaameedsaday madaafiic aad u xoogan.
Barakacaan ayaa waxa ku soo beegmay xili lagu gudajiro xili roobaadkii, waxaana
shalay ilaa iyo xalay dadkii barakacay dushooda ku da’ayey roobab lixaad leh,
waxaana u sii dheer in dadkaasi aysan haysan wax ay afka geliyaan, waxayna hoos
jiifaan geedo hoostood, sidoo kale waxa uu ku soo beegmay barakacaan iyadoo
hay’adda WFP uu ka go’ay raashinkii ay dadka siin jireen, iyadoo Qaramada
Midoobey ay sheegtay in dadka Soomaaliyeed ay hadda soo wajahday xaalad xun oo
isugu jirta Abaaro iyo Dagaalo, waxayna Qaramada Midoobey codsaday in gargaar
deg deg ah lala gaaro dadka Soomaaliyeed.
Ilaa iyo hadda ma jirto waanwaan u dhexeysa labada dhinac ee ku hardamaya
Magaalada Muqdisho, waxaana laga dhega fureystay dhamaan baaqyadii nabadeed ee
loo soo jeediyey, sidoo kale labada dhinac ayaa ku jira hub uruursi, iyadoo
ciidamada AMISOM iyana la geliyey heegan aad u buuxa oo ku aadan sidii ay u
difaaci lahaayeen dowladda uu madaxda ka yahay Sheekh Shariif Sheekh Axmed.
Haddaad fiiriso dadka barakacaya waxaad soo xusuusaneysaa xiligii Dowladda
Itoobiya ay dagaalka kula jireen kooxaha Islaamiyiinta, waxaana la xaqiijiyey in
dad aan horey uga qixin Ciidamada Itoobiya ay haatan bilaabeen inay ka
barakacayaan guryahooda.
Dagaal goor dhow ka bilowday deegaano ka tirsan Muqidsho (May 13)
Iyadoo labadii maalmood ee ugu dambeysay ay xasilneed Magaalada Muqidhso ayaa
goor dhoweed waxaa qarxay dagaal u dhexeeya ciidamada Dowladda Federaalka iyo
kooxaha ka soo horjeeda, waxa uuna dagaalkaani markii ugu horeysay ka bilowday
4-ta Jardiino, waxa uuna ku fiday deegaano ay ka mid yihiin Suuq Bacaad iyo
Towfiiq, waxaana la isku adeegsanayaa hubka noocyadiisa kala duwan, waxaana
bilowday mar kale barakac aad u baahsan, waxaana haatan barakacaya dadkii ku
haray deegaanadaasi oo iyagu horey ugu baaqday dhanka dhaqaalaha.
Waxaa la maqlayaa daryanka madaafiicda, iyadoo maalmahan labada dhinac ay
ahaayeen kuwo isku hub uruursanayey, Waxayna Dowladda Federaalka dooneysaa in ay
dib ugu laabato goobihii ay horey uga soo baxday, sidoo kale ciidamada Amisom oo
gacan siinaya Dowladda Federaalka ayaa iyagu saakay fariisimo cusub ka sameystay
goobo ku yaala Magaalada Muqdisho, waxayna degeen xaruntii hore ee Ciidamada
Asluubta Soomaaliyeed, oo ay horey u deganaan jireen ciidamadii Itoobiya ee ku
sugnaa Soomaalya.
Mudane ka tirsan Dowladda ayaa waxa uu sheegay in haddii dowladdu ay adeegsato
madaafiic ay la mid noqon doonto Dowladdii C/llaahi Yuusuf ee taageerada ka
heleysay Ciidamada Itoobiya, waxa uuna u soo jeediyey dowlladda in gacan ka
hadalka ku bedelaan wada hadal iyo isafgarad si shacabku ay mar kale dib ugu soo
laabtaan guryahooda.
W/D Amin Yuusuf Khasaaro
E-Mail amiinkhasaaro@hotmail.com
Faafin: SomaliTalk.com | May 14, 2009
Wasiirka Arimaha Diinnta iyo Aw-qaafta Dowlada Jabuuti oo Guriga Ummadda ka Furey Dood Cilmiyeed Doorka Culimada
Soomaaliyeed ay ka Qaadan karan Nabadynta Akhri
May 14
Alshabaab G/GEDO Oo Sheegay Inay Gurmad U Dirayaan Alshabaabka Ka Dagaalamaya
Magaalada Muqdisho.
Mamulka Deg.Baledxawo Oo Xabsiga Dhigay Rag Gaadiid Kenya Ka Soo Qafaashay
Akhri May 14
|
Daabaco
Boggan | Print
