Magacyada Xildhibaanadii Cusubaa ARS oo si rasmi ah loo
Gudbiyey, Gudoonka
Baarlamaanka KMG oo loo Gudbinayo Mooshin ay Sixiixeen in ka Badan 60 Xubnood
iyo Is-bahaysiga Dibu-xoreynta Soomaaliya oo Sheekh Shariif Musharax Madaxweyne
Ugu doortey.
DAAWO:
Sawirro Aad u Badan oo Shirka Jabuuti Halkan ka daawo
Magacyada Xildhibaanada cusub ee Is-babaysiga Dibu-xoreynta Soomaaliya ayaa si
rasmi ah loo gudbiyey 25/01/2009 sida aan ka helney ilo wareedyo kala duwan,
islamarkaana ka tirsan xubnaha gudiga sare ee Is-bahbaysiga dibu-xoreyta
Soomaaliya u mataleyey.
Shir ay isugu yimaadeen xubnaha Is-bahaysiga Dibu-xoreynta Soomaaliya Golihiisa
fulinta iyo Golihiisa dhexe oo lagu qabtey Hoteel Lasestaa ee Caasimada dalka
Jabuuti ayaa waxay go'aan mideysan ku gaareen in musharaxa Madaxweyne ee ay isku
raacsan yihiin uu yahay Sheekh Shariif Sheekh Axmed oo ah Gudoomiyaha Is-bahaysiga
dibu-xoreynta Soomaaliya.
Kulanaka ay isugu yimaadeen Xubnaha Is-bahaysiga ayaa waxaa ka hadley Sheekh
Shariif Sh. Axmed iyo Shariif Xasan Sheekh Aadan oo ah Gudoomiyaha Golaha
DhexeIs-bahaysiga, gunaanadkii shirka ayaa waxaa hadal qoraal ah oo ku saabsan
musharxnimada sheekh shariif ka akh-riyey Prof; Cabdiraxmaan Ibbi.
Horay waxaa xilkan isugu soo sharaxay maalmihii hore ee bishan, Janaayo 2009-ka
hadii aan isku deyno sida ay u kala horeeyeen waxay kala ahaayeen Xildhibaan
Maxamed Qanyare Afrax, Xildhibaan Maxamed Maxamuud Guuleed, La-taliyihii
madaxweynihii hore ee DFKMG Soomaaliya Yuusuf Cumar Azhari, Ra’iisal Wasaarihii hore
ee DFKMG Soomaaliya Prof; Cali Maxamed Geeddi, Guddoomiyihii hore ee maamulka Gobolka
Banaadir Cadde Gaabow, Sii hayaha Xilka Ra’iisal Wasaaraha DFKMG Soomaaliya Nuur Xasan
Xuseen (Nuur Cadde), Avv. Cabdi Cabdulle Siciid Jini Boqor, Jen. Maxamed Siciid
Xirsi Moorgan oo dhinaca Ammaanka La-taliye uga ahaa Madaxweynihii xilka ka
degey Col/C/llaahi Yuusuf, Xildhibaan Xasan Abshir Faarax, Maslax Maxamed Siyaad,
Xildhibaan Cawad iyo ra'iisul wasaarihii dawladii Carta Cali Khaliif Galayr iyo musharixiin kale oo aan wali isa soo shaacbixin kuwaasoo
maalmaha soo socda la filayo in ay soo buuxindoonaan liiska tartarka
Madaxweynaha ee dhiiga badan uga daadanayey kudhawaad 20 Sano, inkastoo saadaal
quman aan laga bixin karin cida ku guulesaneysa Xilkan dhinac kasta looga dhegan
yahay hadana waxaa muuqata in TFG iyo Xubnaha dibad jooga ah ay ku badan yihiin,
taasoo muujineysa in qabashada xilkan ay ku hoos duugan tahay dhibaatada raagtey
ee Soomaaliya, balse la arkidoonee cida ku guuleysata.
Dhinaca kale in ka badan 60 xildhibaan ayaa mooshin looga doodayo qodobka
doorshada Madaxweynaha u gudbineysa 26/01/2009 Gudoomiyaha Baarlamaanka DFKMG,
ahna sii hayaha xilka Madaxweynaha DFKMG Soomaaliya Sheekh Aadan Madoobe.
Baarlamaanka DFKMG oo maal mahaan si gooni gooni u soo gaarayey caasimad dalka
Jabuuti oo kulankii ugu horeeyey ku yeeshey Guriga Ummada ee Caasimada dalka
Jabuuti, oo ay soo xaadireen 210 Xildhibaan ayaa waxaa shirgudoominayey sii
hayaha xilka Madaxweynaha, ahna Gudoomiyaha Baarlamaanka FKMG Sheekh Aadan
Maxamed Nuur oo ay ku wehliyaan labdiisa ku xigeen.
kulankan oo ahaa mid mid Al-baabada ay u xiranaayeen ayaa warar kala duwan oo
aan ka helney xildhibaanada Baarlamaanka waxay sheegeen in layskula soo qaadey
arimaha dibu-heshiisiinta iyo doorashada madaxweynaha.
Waxay Xildhibaanada isla garteen in qodobka doorashada madaxweynaha oo ku eg 30
bishan aynu ku jirno in la kordhiyo, islamarkaana la mariyo sida uu qabo
dastuurka DFKMG Soomaaliya, halka qodobka dibu-heshiisiinta, Gudoomiyaha gudiga
dibu-heshiisiinta Baarlamaanka uu codsadey in dib loogu dhigo ilaa iyo maalinta
26/01/2009.
marka si guud loo eego kulankii Baarlamaanka ayaa wuxuu u muuqdey mid ay ku dhex
jirto koox kooxeysi, waxayna xildhibaanadu u fadhiyeen koox koox intii uusan
shirka bilaaban, waxayna qaarkood si cad isugu sheegayeen aniga waxaan doonayaa
Gudoomiyaha Baarlamaanka ee codkaada isii, halka kuwo kale ay dhahayeen waxaan
doonayaa madaxweynaha ee codkaada isii, halka kooxo kale iyaguna u loobin
gareynayeen Xildhibaano kale oo aan wali fahmin.
Waxaa keloo Xaflad lagu soo dhaweynayo Xildhibaanada Baarlamaanka FKMG,
islamarkaana lagu furayo shirka ay ku yeelanayaan Caasimada dalka Jabuuti iyo
sii wadista shirka dibu-heshiisiinta ay garwadeenka ka tahay qaramada Midoobey
oo ay gogosheeduna fidisey Dowlada Jabuuti, oo ay ka soo qaybgaleen Sheekh Aadan
Maxamed Nuur oo ah siihayaha xilka Madaxweynaha, Wasiirka Warfaafinta Cali Cabdi
Farax iyo Wasiirka Arimaha Diinta Dr Xaamud Suldaan ee Dowlada Jabuuti martida
loo yahay, Gudoomiyaha Is-bahaysiga Dibu-xoreynta Soomaaliya Sheekh Shariif iyo
Gudoomiyaha Golaha dhexe Is-bahaysiga Shariif Xasan Sheekh Aadan, Wakiilka
Qaramada Midoobey Axmed Wallad Cabdalla, Mumatilka Jaamacada Carabta, Midowga
Afrika iyo IGAD ayaa lagu qabtey isla Guriga Ummada ee dalka Jabuuti.
waxaa halkaasi ka hadley Sheekh Aadan Madoobe, Nuur Cadde, Sheekh Shariif,
Wakiilka Qaramada Midoobey, Axmed Wallad Cabdalla, Wakiilka Jaamacada Carabta,
Wakiilka Midowga Afrika, Wakiilka Urur Goboleedka IGAD iyo Wasiirka Warfaafinta,
dhaqanka, Boostada iyo Isgaarsiinta, ahna Af-hayeenka Dowlada Jabuuti Cali Cabdi
Faarax.
Wasiirka Warfaafinta Dowlada Jabuuti Cali Cabdi Faarax, isagoo ku hadley magaca
Madaxweynaha Dowlada jabuuti Ismaaciil Cumar Geele, waxaa uu xubnihii isugu
yimid shirka ee qaybaha Soomaalida kula dardaarmey in waqti yar la haysto,
islamarkaana loo baahan yahay in laga faa'iideysto fursadan ay Soomaaliya
haysato, tahayna fursadii ugu dambeysey ee Soomaaliya soo marta.
Dhanka kale DGPL ayaa qoraal ay soo saartay waxay farriin ugu dirtay shirka
Jabuuti. Qoraakaas hoos ka akhri
Maxamed Macallin Cismaan(All-man) Somalitalk Jabuuti
fatxumaalik@hotmail.com
Qoraal ka soo baxay Xafiiska Madaxweynaha DGPL.
Axad: 25-Jan 2009
Garowe,Puntland:Qoraal farriin oo uu Madaxweynaha DGPl u diray u qaybsanaha
qaramada midoobey arrimaha Soomaliya Axmed Wallad Cabdalla.
Qoraalkan oo shalay galab ka soo baxay xafiiska Madaxweynaha Dr Cabdiraxmaan
Sh.Maxamed Maxamuud ayaa waxa uu xambarsanaa Farriin ku aadan shirka dhowaan ka
furmaya dalka Jabuuti eel Dawladda Jabuuti.
Qoraalkan ayaa Madaxweynuhu ku sheegay sababahaa loo aasaasay Puntland in ay
tahay sidii loo joojin lahaa colaadaha loona heli lahaa Dawlad Soomaaliyeed oo
ka dhalata Dalka Somalia.
Madaxweynaha ayaa sheegay in uu shirkan u arko xal u helidda Ummadda
Soomaaaliyeed sidaa darteed waxaa waajib ah in aan ka Puntland ahaan iyo ka
shacab ahaanba aanu door ku yeelano ka qaybgalka wax ku ool ah iyadoo laga
eegayo dhinaca Caddaaladda waana sida keliya ee uu ku guulaysan karo shirkaasi.
Hadaba qoraalka Farriinta ah ee loo diray u qaybsanaha qaramada Midoobey
Arrimaha Soomaliya Axmed Wallad Cabdalla ayaa waxaa uu ka koobnaa afar qodob oo
kala ah.
1.in ay Puntland ka qayb noqoto hindise kasta oo dibuheshiisiin siyaasadeed iyo
mid bulsheed oo loo samaynayo Ummadda Soomaaliyeed.
2.xulista xubnaha ka qaybgalaya hindisahaas waa in ay Mas’uul ka noqdaan
Maamulka iyo urrurada Bulshada Puntland.
3.Magacaabis kasta oo xubnaha Baarlamaanka ah ee shirka hadda ka socda lagu
salaynayo habka beel qaybsiga ee 4.5 waa in loo soo gudbiyaa Maaamulka.
4.xubin kasta oo lagu daro Baarlamaanka cusub oo lagu sheego in ay matalayaan
Puntland iyadoo aan la wargelin maamulka in loo aqoonsan doono sharci
darro,Puntlandna ma aqbali doonto.
Gunaanadkii qoraalka farriinta ah ee ka soo baxay Madaxweynaha ayaa waxa ay
ahayd in Axmed Wallad Cabdalla uu aqbalo qiimaynta gaarka ah ee uu u hayo
dadaalkiisa aan joogsiga lahayn ee xal u raadinta shacabka Somalia.