Beesha H/Gidir oo ka hadashey Qaabkii Dowladda loo Dhisay
Mas’uul sare oo ka tirsan Beesha H/Gidir oo lagu magacaabo Xirsi Geelle Faarax,
ahna Afhayeenka Beesha Reer Xaaji Sulaymaan ee East Africa oo ka hadlay qaabka
loo qaybiyay Wasiiradda Dowladda ayaa sheegay inaysan ahayn mid caddaalaad lagu
soo dhisay. “Waxaa wax lala yaabo ah in Madaxweynaha iyo Ra’iisul Wasaaraha ay
dowladda u dhisaan qaab ku salaysan kooxaysi oo ku cusub siyaasadda Soomaliya”
ayuu yiri Xirsi Geelle oo sheegay in dadkii nabadda u soo halgamay gogoshana
dhigay Jabuuti meel cidla ah looga tago laguna beddelo kuwii nabadda diiddanaa
una shaqaynayay C/llaahi Yuusuf iyo Ethiopia.
“Maxaa looga tegay loona tixgelin waayay Nuur Cadde, Caasha Xaaji Cilmi, Axmed
C/salaan, Mustaf Dhuxuloow, Muuse Nuur Amiin iyo intii la midka ahayd, waxaa
nasiib darro ah in aan la tixgelin talooyinkooda, waxayna furaysaa dariiq cusub
oo ah in aan nabadba laga shaqayn ee laga shaqeeyo xumaanta si loo helo abaal
marin” ayuu yiri Afhayeenka oo sheegay in la abaal mariyay kuwii diidanaa
nabadda ee meel walba la isugu yimaado dadka miisadaha ku geddin jiray, iyo
kuwii adduunka gaarsiin jiray inuusan xasuuq ka kadhicin Soomaaliya, soona
horseeday inay ciidammada Ethiopia dalka Soomaaliya soo galaan, xasuuqna ka
gestaan.
“Beesha H/gidir waxay si buuxda u taageeraysaa Dowladda Midnimada Qaran, waxayna
ku dadaalaysaa inay ka shaqayso nabadda Soomaaliya, gaar ahaan midda caasimadda,
iyadoo weliba ka shaqaynayso dadkii barakacay inay sida ugu dhaqsiiyaha badan
ugu soo laabtaan guryahooda” ayuu yiri Afhayeenka oo sheegay in dowladda
Midnimada Qaran ay kudhisan tahay qaab qabiil waxna lagu qaybsaday, sidaa
daraadeed in la xisaabtamo aysan ahayn ceeb, Beesha H/Gidirna ma aysan helin
mudnaantii ay ku lahayd Dowladda, sababtoo ah ayuu yiri Afhayeenka Beesha
H/Gidir waxaa la siiyay 3 wasiir oo mid buuxa aan lagu arkin, “Wasaaradda
Arrimaha Gudaha oo laga jaray Amniga Qaranka, Wasaaradda Taclliinta Sare oo laga
jaray Waxbarashada iyo Wasaaradda Iskaashiga Caalamiga oo laga jaray Wasaaradda
Arrimaha Dibadda ayaa la siiyay Beelweynta H/Gidir, taasina ma ahan xisaabta ay
ka mudan tahay dowladda Beesha” ayuu yiri Afhayeenka.
“Sh. C/qaadir Cali Cumar booska laga siiyay dowladda oo ah Wasiirka Arrimaha
Gudaha oo laga bixiyay Amniga Qaranka, sidoo kalena ay ka maqan tahay Ra’iisul
Wasaare ku-xigeen ma ahayn middii ay Beesha Reer Xaaji ka sugaysay Dowlada” ayuu
yiri Afhayeenka oo sheegay in Ra’iisul Wasaaraha uu ka soo jeedo Beesha Daarood,
halka ku xigeennada loo qaybiyay Dir, Daarood iyo Raxanweyn halkaana ay ka maqan
tahay jagadadii Ra’iisul Wasaare Ku-xigeen ay xaqa u lahayd Beesha Hawiye.
“Nuur Cadde oo shacabka Soomaaliyeed ka mudnaa in lasiiyo billad geesi ayaa
waxaa abaalmarin looga dhigay in taladiisa aan haba yaraatee la tixgelin,
taasina maahan mid Shacabka Soomaaliyeed uu ka aamusi karo” ayuu yiri Afhayeenka
oo sheegay in Drs. Caasha Xaaji Cilmi oo haysata Novel Peace Press hormuudna u
ahayd isbeddelka siyaasadeed ee caalamka ka yimid kuna wajahan arrimaha
Soomaaliya lagu abaalmariyo in dhegaha laga furayso lana tixgelin waayo, “markii
labada shariif ay ku go’doonsanaayeen Asmara waxayahayd qofka keliya ee Caalamka
ka gadaysay inay raggaasi ahayn rag xagjir ah oo xiriir la leh Al-Qa’ida in
maanta la tixgelin waayo, dowladdana qaab isbahaysi loo qaybsado waxay u egtahay
in aan la rabin lana tixgelinayn qofkii nabadda ka shaqeeya, iyadoo weliba Drs.
Caasha Xaaji Cilmi ay ahayd siyaasiga keliya ee sida aadka ah Caalamka ugala
hadli jiray xasuuqa lagu hayo dadka rayidka ah gaar ahaan dumarka iyo carruurta
dhaqaale fara badan ku bixisay daaweyntooda iyo xannaanayntooda dadkii rayidka
ahaa ee lagu baabiyay Muqdisho” ayuu yiri Afhayeenka oo sheegay in ay habboon
tahay in Madaxweynuhu uu si taxadar leh uga fiirsado qaabka ay wax ku socdaan
maadaama xilligan loo baahan yahay in wixii horay u qaldamay la saxo, shacabkana
Muqdishana ay sugayeen in dadkii ka shaqeeyay nabadda kana bixiyay cadowgii
dalka ku soo duulay ay dib ugu soo laabtaan iyagoo gogosha nabadda sida, laakiin
aysan taasi dhicin waxaase nasiibdarro ah kuwii shalay xasuuqa u horseeday
shacabka Muqdisho inay maanta iyagoo masuuliyaddii dalka la wareegay ay ku soo
laabtaan, Reer Muqdishana ma hilmaami doonaan Nuur Cadde, Caasho Xaaji Cilmi,
Axmed C/salaam iyo xubnihii kale ee la shaqeeyay ayuu hadalkiisa ku soo
gabagabeeyay Afhayeenka.
Amiin
Yuusuf Khasaaro, SomaliTalk.com, Muqdisho
E-Mail
amiinkhasaaro@hotmail.com
Faafin: SomaliTalk.com | Feb 25, 2009
![keynaan](co1.jpg)
Xildhibaan
Maxamed Keynaan "Dowlada la Dhisey Ma Ahan Dowlad Xaq Raadin ee Waa Dowlada Xal
Raadin ah" iyo Xildhibaanad Caasho Cabdalla "Madaxweynuhu Jihaadka uu
Iclaaminayey, Ma Ahayn Jihaad ee Waxay Ahayd Jihaad Kursi Doon ah"..
Akhri... Feb 25
Waraysi:
Wasiirka Hawlaha Guud & Guriyenta, Maxamed Cabdi Yuusuf, waraysigaas iyo..
Sh. Aaden Madoobe oo yiri "kulanka Xiga ee baarlamaanku wuxuu Ka Dhicidoonaa Muqdisho 15
Maalmood Kadib" iyo Ra'iisul wasaaraha oo lagu wado in uu wasaarad cusub
magacaabo.. Akhri
Wasiirka Arrimaha Dibadda DFKMG Md, Maxamed Cabdullaahi Oomaar oo Wareysi
Siiyey SomaliTalk ayaa ka Hadley Tilaabooyinka ugu Horeeya ee uu Qaadayo iyo
Arimaha Baasaboorka. Akhri... Feb 23