Madaxweyne Sheekh Shariif Sheekh Axmed oo Soo Gebagebeeyey Kulamadii Musharixiinta Xilka Ra’iisul Wasaaraha

Madaxweynaha DFKMG Sheekh Shariif Sheekh Axmed ayaa soo gebagebeeyey kulamo gaar gaar ah oo uu la lahaa Musharixiinta Ra’iisul Wasaaraha Xukuumada cusub ee Soomaaliya iyo Xildhibaanada Shanta Beelood saacadihii ugu dambeeyey 11/02/2009-da, sida aan ka helney ilo wareedyo kala duwan oo ku dhawaa Aqalka Martida ee Madaxtooyada dalka Jabuuti uu ka degan yahay Madaxweyne Sheekh Shariif.

Xubnihii ugu dambeeyey ee uu la kulmey Madaxweyne Sheekh Shariif ayaa waxaa ka mid ahaa Gudoomiyaha Shirkada Ganacsiga ee Towfiiq Md, Siciid Cabdullaahi Deni oo fadhigiisu yahay Magaalada Dubai, kaasoo la filayo in loo magacaabo xilka Ra’iisul Wasaaraha Xukuumada Soomaaliya.

Mid ka mid ah Xildhibaanada ARS oo aan khadka taleefoonka kula xiriirey, islamarkaana aan wax ka weydiiyey halka ay wax marayaan ayaa wuxuu yiri “Musharixiinta uu la kulmey Madaxweynaha magacyadooda waxaa isku soo harey oo aan la tiring Siciid Cabdullaahi Deni, Cumar Cabdirashiid Cali Sharma’arke iyo Maxamed Cabdirisaaq Maxamuud Abuubakar oo markii dambe laga tirey isana magaciisa meesha”.

Isku dayo kala duwan oo aan sameyney magacyada dadka Musharixiinta Ra’iisul Wasaaraha isu soo sharaxay, islamarkaana aan wax ka weydiiyey xubno kala duwan oo ka tirsan Baarlamaanka labada dhinac iyo qaar ka mid ah aqoonyahanada Soomaaliyeed ee jooga madasha Jabuuti cida loo magacaabayo ayaa waxay carabka ku adkeeyeen in uu yahay Ra’iisul Wasaaraha cusub ee Xukuumada TFG Md, Siciid Cabdullaahi Deni, Madaxweynuhuna uu ku jiro kala doorasho labada xubnood ee isku soo harey.

Maxamed Macallin Cismaan (All-man) Somalitalk Jabuuti.
fatxumaalik@hotmail.com