SIDEE LAGU BADBAADIN KARAA
MANHAJKA SALAFIGA AH?!!!
QAYBTA 1AAD
BISMILLAH,
ASALAAMU CALEYKUM W.W
HORDHAC
Mahad dhammaanteed waxay u sugnaatay Allahii nagu
galladaystay nimcooyin fara badan oo ay ugu weyn tahay nimcada islaamnimadu,
nabadgalyo iyo naxariisina korkiisa ha ahaato nabigiisii Muxammed, ehelkiisii,
asaxaabtiisii iyo intii wanaagga ku raacdayba ilaa maalinta abaal marinta.
Intaas ka dib;
Walaalayaal, sida aan wada ogsoonnahay ummadda Soomaaliyeed
waa ummad 100% muslim/sunni ah, waana arrinta sababtay inay Soomaalidu yeelato
cadowyo fara badan oo arrintaasi xanuun ku hayso jeclaan lahaana inay
taqriirkaas wax uun ka baddalaan, waxaa iyaduna xusid mudan in baraarug xoog
weyni ka jiray muddaba Soomaaliya oo dhan kaasoo ay aad u korodhay aqoonta
diinta loo leeyahay, dadkuna ay aad u muujiyeen shacaa’irta Islaamka, ka
gudbeen shubuhaad fara badan oo khuraafi ah, isla markaana ku qanceen in
islaamku yahay nidaamka kaliya ee ku habboon nolosha aadanaha, ka dib markii
cilmigu u iftiimiyay waxyaabo fara badan ayna soo mareen tajribooyin kala
gaddisan.
Tan iyo markii ay SAXWADU ka
hanaqaadday gayiga Soomaalida, waxaa lala dagaallamay shirkigii iyo
khuraafaadkii waxaana dadka la baray towxiid baraxtiran iyo in cibaadada ALLAH
loo khaalis yeelo, waxaa laguda galay in kitaabka iyo sunnadaba si xeeldheer loo
daraaseeyo, oo tafsiirka iyo axaadiistaba ummadda loo akhriyo, qur’aankana si
qurux badan iyo tajwiid lagu akhriyo,
baraaruggaas waxaa si gaar ah uga faa’iidaystay haweenkii oo gabdhihii baa
madaarista loo diray, waxaana soo baxay hablo qaari’aad ah iyo hooyooyin
culumo ah, waxaa guud ahaan kor u kacay wacyiga dadweynaha oo waxay dadku si
fiican u qaateen MANHAJKA SALAFIGA AH oo ku salaysan fahamka saxiixa ah ee risaalada Islaamka, kaasoo
ah manhajka AHLU SUNNAHA loogana
dayanayo suubanaheennii Muxammed csw iyo asaxaabtiisii oo ahaa salafkii
ummaddaan; waana halka uu u nisbo sheeganayo magacaan iyo manjhajkaan aan
gargaarka u raadinayo oo ay aniga ii muuqatay in khatar weyni ka soo food
saartay sidii uu uga sii jiri lahaa waddankii Soomaaliya la oran jiray, haddii
aan laga gaashaaman oo laga hor tagin khatartaas xilliga ugu habboon!
Dhinaca arrimaha bulshada, shacabweynaha Soomaaliyeed waxay heleen culumo
danaha guud ka shaqeynaysa oo madaaris, iskoollo, jaamacado iyo isbitaallo u
dhisaysa, ganacsigii kor u qaadaysa, isgaarsiintii hormariyay, xilligii
burburkana dadka tabarta daran is garabtaagtay oo agoomaha iyo araamisha
aruurisay, kuna baaqaya in bulshadu isku tashato oo iyadu is kaalmayso (dabcan
dadaalkaas dad aan culumo aheynna waa ku jireen balse culumadu lafdhabar bay u
aheyd,) oo iyagaa dhiirrigalinayay tilmaamaha kheyrka oo dhan, iyo in ruuxa
mu’minka ahi uusan isagu bulshada culaab ku noqon ee looga baahan yahay inuu
noqdo mid diinta, dadka iyo dalkaba anfaca, sidii xadiiskuba ahaa (Mu’minka
xooggani wuxuu ka kheyr badan yahay Allana looga jecel yahay mu’minka tabarta
yar) , xoogaasna waxaa ka mid ah ka warqabka iyo waxtarka uu ruuxu
bulshadiisa anfaco; isku soo wada duuboo sida sunnaduba tahay markii dadku
diinkoodii wax uun ka hagaajiyeen baa Allana adduunyadoodii hagaajiyay, (Illeyn
Allah addoomadiisa ma dulmiyee) iftiinkiina tusay, taasuna waxay dhalisay in ugu
danbayntii xaqii soo daahiray oo baadilkiina suulay kadib markii shacabku iska
dulqaadeen dulmigii ay 17ka sano ku hayeen nimankii dagaal oogayaasha ahaa oo
jaqayay dhiigga dadweynaha, waxaana durbadiiba la hirgaliyay ku dhaqankii
shareecadii mudada dheer lagu taamayay in manhaj laga dhigto! Wixii ka dhacay
baa ka dhacay iyo mucjisadii la arkay muddadii 6da bilood aheyd ee Golihii
Maxaakimta Islaamiga Soomaaliyeed (GMIS) ay ka talinayeen koonfurta iyo
bartamaha Soomaaliya, kaasoo isagiina aakhirkii aan calfan waynay sababtu meelo
badanba ha ka timaaddee, waxaanse shaki ku jirin in VITO laga saaray dhinaca
cadowga islaamka oo iyagu aqbali waayay in Islaamiyiintu xalliyaan wixii inta
kale xal u wayday!
Ka dib jab xoog leh iyo dhibaato la soo maray muddo 2 sano ah, dad iyo
duunyana galaafatay, waxaa Alle mar kale nasrigii u soo celiyay mujaahidiintii u
kacay difaaca diinta, dalka iyo dadka oo taageero kama danbeys ah ka helay
dadweynihii Soomaaliyeed, Sababka ay taageeradaas Islaamiyiintu ku heleenna waa
kheyrkii hore looga bartay iyo dadka oo aamminay in wadaadadu mar walba u taagan
yihiin horumarka shacabka adduun iyo aakhiroba.
Hadaba haddii aan isla qirnay in maanta kubbaddii jirto dhinaca
wadaadada oo shacabkii Soomaaliyeed ay ka dhursugayaan waxa xigi doona, wax
walbana ku aammineen islaamiyiinta, oo xitaa ay siyaasaddii Soomaalidu maanta u
xiran tahay wadaadada, maxaa la gudboon culumada Soomaaliyeed? Mujaahidiinta?
Masuuliyiinta xisbiyada ama xarakaadka Islaamiga Soomaaliyeed? Yaa xaqiijin kara
in MANHAJKA SALAFIGA ahi uu ka
faa’iidaysto fursaddan qaaliga ah uuna noqdo nidaamka kaliya ee Soomaaliya
lagu dhaqo? Yaa dhayi kara boogaha ku yaal quluubta Soomaaliyeed? Yaa dadweynaha
u dammaanad qaadi kara inay sii wataan barashada MANHAJKAN iyo dabbakhiddiisa si ay adduunyada ugu noolaadaan nolol
istiqraar iyo raaxo leh, aakhirana raalli ahaanshaha rabbi iyo janno ku gaaraan?
Yaa guud ahaan shacbiga Soomaaliyeed uga faa’iidayn kara fursaddan dahabiga ah
iyo nasiibkaan naadirka ah oo aanay haysan shucuub fara badan oo Muslimiin ah
caalamkaan wareersanna ku dhex dhibaataysan? Yaa ka hortaga niyad jab ku dhaca
quluubta shacabka daallan iyo inay ka aammin baxaan wadaadada, dibna u waayaan
wax ay aamminaan? Yaa ka baaqsanaya burbur ku yimaada sumcadda diinta iyo magaca
Islaamiyiinta? Yaa diida in kaarka wadaadadu gubto sidii rag hore kaararkoodii u
gubteen, warkood danbana aan cidi u dhagaysanayn?! Yaa nimcadaan aqoonsada oo ka
mahadceliya oo loo kordhiyaa? Yaa ka baaqsada caro iyo cadaab rabbi iyo nimcadoo
laga wareejiyo? Yaa tajrubooyinka iyo taariikhda wax ku qaadanaya? Yaa indho leh
oo waxku arka? Yaa dhago leh oo wax ku maqla? Yaa qalbi leh oo waxku garta? Yaa
caqli leh oo waantooba? Yaa…? Yaa…?
Su’aalahaas iyo kuwo kale oo fara badan waxaan ku falanqayn
doonnaa qormooyinkeenna soo socda haddii Allah inoo qaddaro.
SIDEE
LAGU BADBAADIN KARAA MANHAJKA SALAFIGA AH!
QAYBTA
2AAD
Qaybtii hore ee hordhaca aheyd waxaan uga soo warranay sida
shacabka Soomaaliyeed uga faa’iidaystay dacwadii muddada dheer ku socotay ,
waxaanan isla soo sawirnay sida xaalku u yaal xilligan la joogo: indhihii
raciyada, saaxiibbada iyo cadowga oo u jeeda dhinaca islaamiyiinta iyo
dadweynihii oo ka warsugaya waxa wadaadaduna ku sameeyaan markan, iyagoo
dhinacna ka cabsi qaba in ay marxalad cusub oo madaafiic iyo qax ah galaan,
dhinacna ka quuddarraynaya in wadaadadu kheyrkii ay uga barteen u horkacaan oo
berismaad iyo barwaaqo la galo, Soomaalidana ugu danbeyntii berrin bajiimo lagu
furo!
Qaybtaanna waxaan ku qaadaa dhigi doonnaa, jawaabaha
su’aalihii aan qormadii hore ku soo gabagabaynay iyo inaan ugu danbeyn jawaab
kaafi ah u helno su’aasha cinwaanka u ah qoraalkeenna iyo inaan Allah idinkii
ka guulgaarno ujeeddada qoraalkan oo ah inaan u iftiimiyo dadka ay masuuliyadda
weyni garbahooda saaran tahay inay xilka si wanaagsan u gutaan, naftooda iyo
ummaddana badbaadiyaan!
Hadaba, waxaan muran ka taagnayn in xallinta mashaakilka na
haysta uu yahay waajib saaran ruux walba oo Soomaali ah, oo aysan jirin cid
kaligeed wax walba qaban karta iyo cid howsha lagu fiirsanayo, waxaase jirta in
eeddu dadka kala qaban og tahay, waxaana jira dad si gooni ah xilku u saaran
yahay, loogana baahan yahay inay dadka u hogaamiyaan wadadii ay uga samata bixi
lahaayeen dhibka haysta; dadkaas waxaa ugu horreeya culumada cilmiga naafica ahi
ku dagay kuwaasoo ah rajada qura ee maanta Soomaali u hartay, cidda kaliya ee
dhexdhexaadka ka noqon karta khilaafyada jira ama kooxda kaliya ee laga yaabo in
warkooda la maqlo haddii ay si fiican uga faa’iidaystaan ixtiraamka loo hayo,
arrintana si daacadnimo iyo ikhlaas ah u galaan iyagoo Allahna kaalmo
weydiisanaya.
Culumadaas waxaa hor yaalla howlo aad u calculus una
fara badan, waxaana ka mid ah:
1)
Inay ku dadaalaan adkaynta iyo ka miro dhalinta qodobbadii ay soo
saaraan iyo ilaalinta in lagu xadgudbo qodobadaas.
2)
Inay xoojiyaan, ballaariyaan hay’addan ay dhiseen, isla markaana
ku dadaalaan sidii ay hay’adani u noqon laheyd hay’adda ugu sarreysa dalka,
xitaa dowladdana ka sarraysa kana madax bannaan, si ay ugu suurtagasho gudashada
howlaheeda sida: dhexdhexaadinta, musaalaxada iyo sixiddaba.
3)
Waxbaridda, toosinta iyo wacyigalinta dadweynaha:
Qodobkani waa mid aad u baaxad
weyn, wuxuuna u muuqdaa shaqada ugu badan ee culumada hortaalla; si ay xal waara
ugu helaan mushkiladda jirtana waa
inay xididada u siibaan jahliga ummadda haysta dhammaantiis, taasoo haddii ay ku
guulaystaan soona saaraan shacbi aqoon iyo ilbaxnimo leh, wacyigiisuna sarreeyo
ay markaas suurta gal tahay in la soo afjaro dhibaatadii dadka mudada dheer
haysatay!
Inkastoo culumadu dadka wax fiican bareen hadana waxaa soo ifbaxday in
axkaam fara badan aan sidii la rabay loo daraasayn, kuwaasoo marxaladda la galay
awgeed dadku si aad ugu baahdeen, waxaana ka mid ah:
a)
Ilaalinta manhajka salafiga
ah iyo horumarintiisaba: sida aan soo tilmaamnayba manhajkani waa midka
Allah raalliga uga yahay ummadda muslimiinta ah inay ka waddo iyo dhaqan
dhigtaan ammuurahooda adduun iyo aakhiroba, waxaana haysta weerarro fara badan
oo gudo iyo dibadba uga imaanaya, kuwaasoo isku dayaya inay calwiyaan oyna
suurad xumeeyaan si uu u noqdo mid gaari waaya hadafkiisii, sidaas darteed waxaa
culumada la gudboon inay ku baraarugaan weerarkaas isla markaana u guntadaan
sidii ay manhajkaas uga difaaci lahaayeen fikradaha xadgudubka iyo gaabinta
isugu jira, uguna xifdin lahaayeen dhexdhexaadnimada lagu yaqaan, taasoo mar
walba ku dhisan xikmadda, dhimrinta iyo naseexada wanaagsan.
b)
Xurmada dhiigga muslimiinta:
qodobkan waa mid si aan xad laheyn loogu baahan yahay in daawo loo helo,
culumaduna ayba tahay inay qaylo dhaantooda ka bilaabaan maxaa yeelay waa
halaagga ugu daran ee mujtamaceennu faraha kula jiro kaasoo loo baahan yahay in
dhiigga dadka walaalaha ah ee raqiiska noqday loo soo celiyo xurmadii uu lahaa
si fitnaduna u danto; waana in culumadu si
bayaan ah har iyo habeenba uga hadashaa xurmada dhiigga, maalka iyo sharafta
qofka muslimka ah iyo cadaabka, ciqaabta Alle u yaboohay dadka qarrariya
xurmadaas, waana in isla markaas la dhaqangaliyaa qisaasta iyo xuduudda Alle u
jideeyay dadka ku xadgudba xuquuqda dadka muslimiinta ah, si loo helo daawada
runta ah iyo nolol la mahadiyo.
c)
Qeexidda jihaadka xaqa ah: jihaadku
waa islaamka baarka ugu sarreeya, waana arrin looga baahan yahay qof walba oo
muslim ahi inuu ugu yaraan qalbiga ku hayo inuu noloshiisa maalin jihaado,
waxaanse muran ku jirin inuu leeyahay shuruudo waaweyn oo loo baahan yahay in uu
dhammaystirto marka uu noqonayo jihaad xaq ah, sidaas darted waxaa culumada
looga baahan yahay inay ummadda u kala caddeeyaan jihaadka xaqa ah ee lagu
koryeelayo kalmadda Allah iyo dagaallada fitnooyinka ah ee muslimiinta dhexmara,
waana inay ummadda ku guubaabiyaan jihaadka maxmuudka ah si loo helo sharafkiisa,
isla markaana uga digaan fitnada si ayan ugu halaagsamin; maxaa yeelay waa
culumada cidda kaliya ee cilmigooda ku kala saari karta arrimahaas.
d)
Ahmiyadda Hoggaanka: diinteennu
waxay ahmiyad weyn siisay in ummaddu yeelato hoggaan, waxayna aad u diidday
fowdada, lamana soo koobi karo inta jeer ee qur’aanka arrintaas Allah ku xusay
iyo sida uu dhaqankii nabiguba ahaa in haddii uu 3 nin meel u diro uu mid madax
uga dhigi jiray, sidoo kale ay saxaabadii nabigu markii uu nabigu geeriyooday ay
ka hormariyeen aaskiisii inay muslimiintu hoggaan yeelato, maxaa yeelay waxayba
isku khilaafayaan sida loo duugayo haddii uusan jirin ruux talada ugu danbeysa
yeesha, sidoo kalana waxaa laga weriyaa sheykhul islaam Ibnu Taymiya hadal
macnihiisu ahaa (60 sano oo uu hoggaamiye faajir ah ummadda xukumo ayaa ka danbi
yar hal sano oo fowdo lagu jiro), arrintaasna haddaan Soomaali nahay sharraxaad
badan ugama baahnin, maxaa yeelay si baraatiko ah ayaan u dhadhaminnay
dhibaatada ay leedahay dowlad la’aantu iyo khasaaraha dhinac walba soo gaaray
ummaddeena, kaasoo xitaa saameeyay akhlaaqdii shacabka oodba mooddo in
qaamuuskeenna laga masaxay wixii kala danbeyn iyo nidaam la oran jiray;
arrintaasina xaqiiqadii waxay kaalin weyn ku leedahay dhibka maanta na haysta oo
xitaa waxay saamaysay dadkii loo malaynayay inay wax garanayaan, ka dib markii
aan waynay wax madax ah iyo wax majo ah, ruux walbana uu isagu yahay amiirka aan
laga daba hadlin, dabadeedna la waayay cid dameerkii kaxaysa, sidaas darteed
culumada waxaa horyaalla sidii ay wax walba uga hormarin lahaayeen sidii
ummaddaani hoggaan talada looga danbeeyo u yeelan laheyd, waayo waxaaba ku xiran
hirgalinta howlaha looga baahan yahay inay qabtaan oo waxba ma qaban karaan
haddii aysan jirin cid hirgalin karta qaraarada ay soo saaraan amaba ciqaabi
karta ciddii ka hortimaadda waxa culumadu soo jeediso!
e)
Aadaabta khilaafka: qodobkani wuxuu isna hoos galayaa waxbaridii
dadka, waana in culumadu hoosta ka xarriiqaan in aan marnaba ummaddaan khilaaf
laga waayayn oo ayba abuurkooda ka mid tahay inay is khilaafaan; haddii Allah
dooni lahaana hal koobbi buu ummadda ka wada dhigi lahaa balse xikmadda rabbi
baa ku dareersatay inay dadku kala ra’yi duwanaadaan, muhiimmadduse waxay
tahay in khilaafka edeb loo yeelo, dadkana la baro in kala duwanaantaas
ra’yiga la isku nabadgaliyo, nin walbana tii la qummanaata uu ku dhaqmo, (dabcan
tani waxay khaas ku tahay ummuuraha khiyaarka gali kara waana kuwa ugu badan ee
aan isku haysanno!)
f)
Ixtiraamka Culumada: qodobkani waa mid higalintiisa laga rabo
dhinacyada oo dhan, balse waxaa culumada ku gaar ah inay tahay iyaga cidda laga
rabo inay barto dadweynaha gaar ahaan xertooda cilmiga ka raacata tawaaduca iyo
in ruux walba uu qaddarkiisa aqoonsado, isla markaana ay ixtiraamaan cid walba
oo ka aqoon badan gaar ahaan culumada wax bartay, iyagoo ka aadaab qaadanaya
salafka ay u nisbo sheeganayaan, oo waa tan khulafadii nabiga csw, sayid Cumar
ama sayid Cali laga soo guuriyo in midkood yiri ( ruuxii xaraf i bara waxaan u
noqonayaa addoon), sidaas darteed waa in culumada qudhoodu arrintaas shacabka
ugu noqdaan tusaale wanaagsan oo ay iyagu is ixtiraamaan, isna qadariyaan, haba
ku kala aragti duwanaadaan masaa’isha qaarkood amaba xagga abtirsiga
xarakaadka diimeed ee ay ka soo jeedaane! sidoo kale waa in daalibul cilmuguna
qaddarkiisa aqoonsadaa taladana uga danbeeyaan culumadooda iyagoo waliba
ixtiraamaya, markaas waxaan filayaa in Allah noo naxariisanayo, ummuuraheennana
uu isku keenayo.
g)
Dhowriska Danta Guud: qodobkan waxaan uga jeedaa in culumadu nagu
hoggaamiyaan barashada fikirka wax isu dooridda, wax wada wadaagga iyo in aan
dhammaantayo u muuqanno kuwo wada guulaystay, iyadoon jirin cid laga raayay
amaba laga adkaaday!, qodobkani wuxuu aad muhiim ugu yahay suurtagalna uu ka
dhigi karaa inaan ka baxno azmada nagu habsatay, maxaa yeelay, waxay in muddo ah
Soomaalidu kusoo jirtay dagaal sokeeye oo qabiil qabiil laysku laayay iyadoo
awoodda lagu tartamayo, natiijadiina waxay noqotay in qolona aysan u suurtagalin
inay awooddii xoog ku qabsato intii kalana baabi’iso, waxaa hadana la galay
marxalad kale oo kooxa kooxo laysku dagaalay iyadana waa lagu hungoobay in
kooxna la quusiyo oo koox fakir gooni ah u tacasubaysaa ay Soomaalida oo dhan
sandulle ku xukunto, sidaas darteed bay iila muuqatay inaan markaan u baahannay
inaan fahamno in waxa aan ku dagaalayno aan wada leennahay isla markaana ay na
deeqaan haddaan wadaagno, waxa kaliya ee naga maqanina ay tahay daacadnimo
iyo ikhlaas, sidaas darteed markan loo baahan yahay in caqliga saliimka ahi
shaqeeyo, koox walibana oggolaato in ay wax
ka tagto waxna qaadato, libta la isku oggolaado, anaaniyada iyo kooxaysiga
aan iska illowno si loo daryeelo Danta
Guud! Xaqiiqadii waxaan kaliya oon u baahannahay inaan si gun dheer u
daraasayno sunnada nabiga iyo manhajka salafiga ah, waxaana tusaale na kaafiya
uga helaynaa xaalkeenna sidii xikmadda badneyd ee uu suubbanaheennu csw, u
xalliyay mushkiladdii ay qureyshi ugu sigatay inay isku layso cidda dhigaysa
xajarul aswadka meesha uu yaallay, xilligii ay kacbada dhisayeen,
iyagoo waliba xilligaas mushrikiin ahaa, dabadeedna uu suubbanuhu faray in
qolo waliba nin soo saarato oo ay isla qaadaan dhagaxii si koox waliba ugu
faanto inay libintaas wax ku leedahay, oo aan qolona dibadda loo dhigin! Sidaas
si la mid ah ayay maantana Soomaalidu ugu baahan tahay in koox waliba wax ku
lahaato libinta heshiis la gaaro iyo inay tanaasul samaysay si Soomaali u
daawoowdo isuguna timaaddo oo wax u wadaagto!
h)
Ugu danbeyn si aan u wada guulaysanno waa in hogaamiyaasheennu
fahmaan inaan dadka xoog lagu maamuli karin, balse ay ku qanciyaan inay iyagu
yihiin hogaamiyaalka saxda ah iyo
cidda ehelka u ah inay masiirka ummadda ka taliyaan, waana in ay taageeradaas ka
helaan ka kasbadaan quluubta dadweynaha iyagoo soo bandhigaya maamul wanaag,
caddaalad, sinnaan iyo kitaabka iyo sunnada oo loo xukuntamo!
Dadka Soomaaliyeed waa dad aad u daneeya siyaasadda, waxyaabaha ugu
waaweyn ee laga faa’iiday burburkiina waxaa ugu muuq dheer in dadkii wada
siyaasiin noqdeen oo ruux waliba uu doonayo inuu wax ka falanqeeyo
howlmaalmeedka dowladda, xukuumadda iyo baarlamaankaba, waxaana arrintaas aad u
saaciday saxaafadda madaxabannaan iyo raadiyaal iyagu dadweynaha ku martigaliya
inay ra’yigooda ka dhiibtaan mowduuca maalintaas shaqada u ah xukuumadda,
iyagoo aan waliba soo qaadan waxyaabaha wanaagga ah ee la gaaro ee kaliya
ugaarsada khaladaadka ka dhaca mar walba cidda tooshku markaas ku shidan yahay,
halkaasna waxaa laga dhaxlay shacab iyagu ku mashquulsan howlo aan iyaga u
oollin iyo dadweyne fadhi
ku dirir ah, isla markaana wax ku miizaama guusha ama fashalka uu ruuxu ama
kooxdu ka gaarto siyaasadda markaas jirta! Iyagoon marnaba dib u jalleecayn
wanaagyada kale ee kooxdu leedahay amaba howlo kale oo la mahdiyay oo ay horey u
qabteen, waxaana gabagabadu noqotaa hebel ama koox hebla kaarkoodii
waa gubtay! Ama filimkoodii eey baa cunay! iyo erayo la mid ah oo gadaal uga
soo biiray qaamuuska Soomaalida mudadii burburka, kuwaasoo tusinaya in kooxdaas
ay sumcad beeshay, cid danbe oo dhagaysanaysaana aysan jirin! Sidaas darteed
waxaan ugu baaqayaa wadaadada, ama guud ahaan islaamiyiinta uu maanta masiirka
ummaddu gacantooda ku jiro inay ku
baraarugaan khatarta ay leedahay inay ku fashilmaan kana faa’iidaysan waayeen
fursaddan ay ku badbaadin karaan ummadda iyo manhajkooda salafiga ah!, waana inay ogaadaan in haddii ay
guuldarraystaan aysan kaligood saamaynayn balse ay guuldarradaasi galaafan
doonto wax alla iyo wixii ay ahaayeen, hore u qabteen iyo waliba manhajkii ay
garwadeenka ka ahaayeen! dadkuna ku fekeri doonaan wixii ay ku badalan lahaayeen,
taasina ay fursad siin doonto in ay dib usoo nolaadaan khuraafaadyadii hore ee
dadka diinta looga dhigi jiray iyo baadilkii oo soo noolaada, saaxadana ay dagi
doonaan dad aan ehel u aheyn oo waliba dhakhso u xoogaysta!
UGU DANBEYN WAXAAN MAQAALKAYGA KU SOO GABAGABAYNAYAA IN MASUULIYADDA
BADBAADINTA MANHAJKA SALAFIGA AH AY GARBAHOODA SAARAN TAHAY ISLAAMIYIINTA (CULUMADA,
XARAKAADKA ISLAAMIGA AH, MUJAAHIDIINTA, DAALIBUL CILMIGA) IYO DHAMMAAN INTA
AWOODDA MUUQATA KU LEH SAAXADA SOOMAALIDA, KUWAASOO HADDII AY ARRINTAAN ISKU
LARAAN, XALLIN WAAYAAN, KUNA HESHIIN WAAYAAN WAXYAALAHA AY ISKU HAYAAN, OO AY U
MUUQAN WAYDO SHAYGA UGU MUHIIMSAN OO AH (MIDNIMADA, BADBAADINTA UMMADDA IYO
MANHAJKEEDA SALAFIGA AH) AY IYAGU QAADI DOONAAN MASUULIYADDA CAWAAQIB XUMADA KA
DHALATA FALKOODA ADDUUN IYO AAKHIROBA, ALLANA KULA XISAABTAMI DOONO IYADOON
JAAHILNIMONA LOOGU CUDURDAAREYN!
Sidoo kale waxaan ugu baaqayaa dadweynaha Soomaaliyeed ee
wanaagga jecel isla markaana ay u muuqato khatartani gaar ahaan odoyaasha,
aqoonyahanka, abwaaniinta, haweenka iyo dhammaan inta danaynaya inuu badbaado
manhajkan salafiga ahi inaysan arrinta iska eegan ee ay qabtaan wax alla wixii
ay qaban karaan, si aynaan u wada halaagsamin!
Waxaan jeclahay inaan ugu danbeyn u digo dadka caadaystay inay faafiyaan
fikradaha dadka kala fogeeya ee nin jeclaysiga, kooxaysiga, iyo anaaniyada ku
dhisan ee aan xaq taageerka aheyn inay Allahooda uga cabsadaan ummaddan
masaakiinta ah ee baaba’day ee ay iyagoo dheregsan joogana meelo ammaan ah ay
mucaawinada uga dhigeen carrabkooda dalabta leh iyo qalinkooda sunta ah een
marnaba u khidmaynayn danahooda, bal’e baasiinka ku shubaya dabka baxaya ama
cusbada marinaya dhaawacyada ku yaalla jirkooda iyo quluubtooda! Dadkaas oo u
badan aqoonyahankii la shinsanayay waxaan xasuusinayaa xadiiskii nabiga csw ee
macnihiisu ahaa (ruuxii iimaan lihi kheyr
ha ku hadlo ama ha iska aammuso!, waxaanan ku leeyahay muslimiin wanaagsan
noqda oo gacantiinna iyo carrabkiinna halaga nabad galo!
NB:
Qoraalkani waa talo
soo jeedin oo qura, mana aha taladii ugu saxsaneyd, balse wuxuu ka soo go’ay
niyad daacad ka ah arrinta uu ka hadlayo, waxaan ka cudurdaaranayaa wixii gef ah
ee ku jira, anigoo Allahna danbi dhaaf ka weydiisanaya, wixii wanaag ah oo ku
jirana waxaan Allah weydiisanayaa inuu iga ajar siiyo igana aqbalo ujeedadii aan
ka lahaa, dadkayga uu ku anfaco, dhibaatadana aan uga baxno. Aamiin.
Waxaa
Qortay:
Firdowsa C/qaadir
Cabdi
E-mail: firdowsabdi@yahoo.com
Afeef: Aragtida qoraalkan waxaa leh qoraaga ku saxiixan
Faafin: SomaliTalk.com | April 14, 2009 |