Barnaamijkii Radio Xoriyo
06 May 2008.
- JWXO: Bayaan dhaleecaynaya dhiibista dadka Ogaadeenya .
- Maamulka Bari oo xidhay oday dhaqameed ka hadlay dadka la dhiibay.
- Bannaanbax wayn oo ka dhacay magaalada Dhuusamarreeb.
- Codadka Shacabka
 Dhegeyso ama
mp3
- Aragtida Halgamaaga:
Dhegeyso
ama mp3
======================
JWXO: Bayaan dhaleecaynaya dhiibista dadka Ogaadeenya .
Jabhadda Waddaniga Xoreynta Ogaadeenya JWXO ayaa isniintii shalay ahayd soo
saartay bayaan kulul oo ay ku dhaleecaynayso heshiis qarsoodi ah oo dhex-maray
gumaysiga Itoobiya iyo Maamulka Gobollada Bari, kaasoo ku saabsan in maamulka
Bari uu gumaysiga Itoobiya u gacan galiyo dadwaynaha reer Ogaadeenya ee ka soo
qaxay tacaddiga ciidammada gumaysiga iyo masuuliyiinta JWXO.
Xukuumadda gumaysiga Itoobiya ayaa iyaduna Maamulka Bari u ballanqaaday inay
siinayso hub iyo tababarro millatari, waxayna tallaabadaasi si cad uga soo
horjeedaa xayiraadii hubka ee Qaramada Midoobay ku soo rogtay dalka Soomaaliya.
Intii Maamulka Bari heshiiskan la soo galay xukuumadda gumaysiga Itoobiya wuxuu
ciidammada gumaysiga Itoobiya u gacan galiyay dadwayne rayad ah oo inta la hubo
gaadhaya 5 qof, kuwaasoo ka denbeeyay labo xubnood oo ka tirsan Golaha Dhexe ee
JWXO oo iyagana uu maamulkaasi u dhiibay ciidammada Itoobiya.
Jabhadda Waddabiga Xoreynta Ogaadeenya waxay bayaankan ku sheegtay in
qaqabashada ba’an ee ka socota gobollada Bariga Soomaaliya ay nabadgelyo daran
ku keentay dadwaynaha Ogaadeenya u dhashay ee halkaas magangelyada u joogay,
kuwaasoo ay dhibaatooyin ba’an la soo darseen. Sidaas darted waxay Jabhaddu
ururrada caalamiga ah ee daneeya xuquuqda aadanaha ugu baaqday inay arrintaas
isha ku hayaan.
Waxay sidoo kale Jabhaddu beesha caalamka ugu baaqday inay xil aad u wayn iska
saaraan sidii dadwaynaha Ogaadeenya ee markoodii hore ka soo qaxay ciidammada
bahalka ah ee Itoobiya ee ku sugana gobollada Bariga Soomaaliya loogu gudbin
lahaa goobo aamin ah.
Jabhaddu waxay sidoo kale bayaankan ku sheegtay in Maamulka Bari uu masuul buuxa
ka yahay natiijada ka dhalata dariiqa cadowtinimada ahee uu doortay.
Maamulka Bari oo xidhay oday dhaqameed ka hadlay dadka la dhiibay.
- Cabdalla Jaamac Jibriil oo ciidanka Booliska Puntland xireen May 3,
2008 ayaa xorriyadiisii helay May 6, 2008 kaddib markii odayaasha
Mudug arrinta soo dhexgaleen..
Maamulka Gobollada Bariga Soomaaliya ayaa subaxnimadii axadda ahayd xabsiga u
taxaabay oday dhaqameed reer Gaalkacyo ah oo si wayn u dhaleeceeyay falkii
nacabnimada ahaa ee maamulkaasi kula kacay dadwayne rayad ah oo Ogaadeenya u
dhashay oo khamiistii uu gacanta ka galiyay ciidammada gumaysiga Itoobiya.
Cabdalla Jaamac Jibriil, oo ka mid ah oday dhaqameedyada sida wayn looga
qaddariyo deegaanka Gaalkacyo, ayaa waraysi uu siiyay British Broadcasting
Corporation wuxuu si wayn u dhaleeceeyay dadka reer Ogaadeenya ee cadowga loo
dhiibay, wuxuuna sheegay in odayaasha iyo waxgaradku ay arrintaas tallaabo cad
ka qaadi doonaan, hase yeeshee malleeshiyada maamulka Bari ayaa axaddii
gurigiisa kala baxay, isla markaana ku xidhay meel aan la cayimin.
Urur xuquuqul insaan ah oo maxalli ah ayaa si wayn u dhaleeceeyay xidhitaanka
odaygan iyo dadkii rayadka ah ee iyagana lagu wareejiyay ciidammada Itoobiya.
Bannaanbax wayn oo ka dhacay magaalada Dhuusamarreeb.
Ugu yaraan 1000 qof ayaa isugu soo baxay badhtamaha magaalada Dhuusamarreeb ee
dalka Soomaaliya, kuwaasoo ka cadhaysan duqayntii ay diyaaradaha Maraykanku ku
dileen hoggaamiye millatari oo ka tirsan ururka ka dagaallama dalka Soomaaliya.
Bannaanbaxan, oo magaalada Dhuusamarreeb lagu qabtay maalintii axadda ahayd,
waxay dadwaynuhu ku dhawaaqayeen hal-ku-dhegyo ka dhan ah maamulka Maraykanka,
waxayna dadwaynuhu sheegeen inay ka cabsi qabaan in diyaaradaha Maraykanku ay
mar kale magaalada duqeeyaan.
Dadwaynahan ayaa sheegay in diyaaradaha Maraykanka oo wali dul-heehaabaya darted
ay si wayn uga cabsanayaan in magaaladooda marar kale la duqeeyo.
06 May 2008
Axmed Gaal-Eri
Radioxorio@radioxoriyo.com
Raadioxoriyo@yahoo.com
Radio Xoriyo waxaad ka dhegaysan kartaa Mawjadda 41 MB ee dhererkeedu yahay 7560
KHZ,iyo internetka Radioxoriyo.com,Ogaden.com Maalmahaa Talaadada & Sabtida
5:00PM – 5:30 waqtiga Afrikada Bari
Faafin: SomaliTalk.com | May 7, 2008
 Odayaasha Gobolka Nugaal oo Bayaan ka soo saaray
Dadkii Loo Gacan Geliyey Itoobiya.. Akhris/Dhegeysi 
| 
Daabaco
Boggan | Print
