Zuma oo la kulmay Madaxda Soomaalida K/Afrika , kana hadlay Dhibaatooyinka Soomaalida

Jacob Zuma “ Soomaaliya inta aan tagay tirokoob ma leh, sida eey dalkeena u saacideyna xisaab ma leh, xittaa sirdoonka ANC ayaa ku safri jirey baasaboorada Soomaaliya, hubna waa eey nasiib jirtey”.

Madaxweynaha ANC ee dalka K/Afrika ayaa markii ugu horeysey shaaciyey sir qaran oo ku saabsan gacantii eey Soomaaliya ka geysatay halgankii lagu xoreeyey South Afrika, Zuma ayaa la hadlayay Kumanaan dadweyne ah oo isugu yimid kulan ka dhacay jaamacad ku taala Pretoria, kadib markii uu kulan gaar ah la yeeshey madaxda jaaliyada Soomaalida dalkani, kaas oo yimid xilli rabshadaha shisheeye naceyb ka ah eey sii faafayaan.

Kulan balaaran oo kumanaan dadweyne ah eey kasoo qeybgaleen, ayaa waxa uu ka dhacay xaafada ka tirsan caasimada dalka K/Afrika ee Pretoria, halkaas oo uu dadka kula hadlay madaxweynaha xisbiga talada haya ee ANC, kulanka ayaa looga hadlayay sidii loo xalin lahaa rabshadaha sii faafaya ee ajaaniibta ka dhanka ah, gaar ahaan Soomalida oo ah dhibanayaasha ugu baddan.

Carte iyo Ugaas M shugri

Inta uusan Zuma kulanka ka hadlin waxa uu kulan albaabada u xiranyahay la yeeshey madaxda Jaaliyada Soomaalida dalkani oo uu horkacaya Axmed Dawlo iyo Dr. Cabdullaahi Carte, iyo Maxamed Shugri, kulanka oo eey goobjoog ahaanyeen madax kale oo dawlada ka tirsan, ayuu Zuma madaxda Jaaliyada kaga warqaatay baaxada Dhibaatada Soomaalida heysata iyo sidii wax looga qaban lahaa, waxaa halkaasi warbixin faahfaahsan oo dheer Zuma siiyey Agaasimaha guud ee Jaaliyada (Somali Association of South Africa), Axmed Dawlo , oo ku dheeraaday baaxada Dhibaatada Soomaalida heysata iyo sida sannooyin baddan eey dhibaatadaasi u taagneyd oo aanan waxbo looga qaban,Axmed Dawlo waxa uu mahad celin balaaran u jeediyey dawlada dalka oo uu sheegey in marka la eego siyaasadaha muhaajiriinta quseeya eey yihiin kuwa aduunka ugu wanaagsan, balse waxa uu ka cawday in fulintii iyo hergalintii siyaasadaasi uu dhib ka taaganyahay oo aanan la fulin, taas oo uu Zuma garwaaqsaday, Axmed Dawlo ayaa Jacob Zuma u sheegey in tirada Soomaalida ah ee muddo 10 sanno lagu diley dalkani eey dhantahay 472 qof oo uu ugu dambeeyey wiil dhalinyaro ah oo shalayto lagu diley magaalada Cape Town, Zuma ayaa arrintaasi aad ola tacajabay, wuxuuna muujiyey murugo iyo qowmamo uu arrintaasi ka qabo oo wajigiisa laga dheehan karay, Dawlo aya hadalkiisa kusoo koobey in eey oga fadhiyaan dawlada dalkani iyo xisbiga talada haya in wax laga qabto dhibaatada heysada Soomaalida iyo guud ahaan ajaaniibta.

dawlo vs SABC

Jacob Zuma ayaa hadalkii qaatay, wuxuuna u mahad celiyey madaxda Soomaalida ee goobta joogtey, wuxuu dadkii kulanka fadhiyey xasuusiyey taariikhda Soomaaliya eey la leedahaya dalkani, oo uu sheegey in doorkii eey Soomaaliya ka qaadatay halgankii xoreyta midab takoorka uu yahay wax lama hilmaamaan ah, wuxuu yiri “marar aad u baddan ayaan Muqdisho tagay, xitttaa inta goor eey aan tagay ma garanayo tira badnideeda, Madaxweynihii iyo Shacabkii Soomaaliya waxa eey noo ogolaadeen in aan hubkeena ku keydsano gudaha Soomaaliya, fagaarayaasha aduunka ayay naga taageereen, xitttaa waxay sameeyeen arrin uusan dal kale la wadaagin oo ah in xittaa saraakiisheena sirdoonka eey ku safri jireen baasaboorada Soomaaliya oo taasina eey ogoleyd dawladi Siyaad Barre, Soomaaliya abaal weyn ayaan u heynaa, waxa aan ugu abaalgudnana ma ahan in aan dilno, dhacno oo aan noloshooda cariiri galino, maanta waxa eey nooga baahi badanyihiin ma jiraan”. Zuma oo sii hadlayay ayaa sheegey in tirada Soomaalida dalkani ku dhimatay eey tahay mid aad looga naxo, isla markaasina eey tahay in talaabo quman laga qaado sidii cadaalada looga fali lahaa arrintaasi, wuxuu sheegey in gudi heer qaran ah uu u saaro doono.

Zuma iyo Dr. Carte

Kulanka oo albaabada u xirnaa saxaafadana aan loo ogolaan, ayaa waxaa sidoo kale fadhiyey saraakiil ka socotey UN-ka, kuwaas oo dhaleeceen kala kulmay Zuma, wuxuu weeydiiyey “horta idinku sidiinaba qaxootiga maxaad u qabataan ?, wax is weeydiini ma xumee, aduunka meelo baddan ayaad joogtaane, oo aad waxyaalo baddan qaxootiga u qabataane, dalkan qaxootiga ku nool maxaad u qabataan, bal noo sheega oo noo sharaxa?”. Hadalkaasi ayaa si weyn usoo jiitey ergadii meesha fadhidey, Dr. Cabdullaahi Carte oo kulanka fadhiyey ayaa ii sheegey in kalmadaasi uu Zuma UN-ka ku yiri eey aheyd mid xilli dheer loo baahnaa, isla markaasina uu yahay war dhiilo leh xaga UN-ka oo eeysan jirrin wax eey u qabtaan qaxootiga, wuxuu ii sheegey in Zuma uu shir la balansaday UN-ka oo uu sheegey in uu rabo in uu kala hadlo arrimaha qaxootiga.

Markii uu kulankaasi qaaska soo dhamaaday, Zuma oo si weyn amaankiisa loo sugayay, ayaa waxa uu usoo dhaadhacay Istadidyuumka (garoonka ciyaaraha), oo eey buux dhafiyeen kumanaan dad weyne oo ah dadka degaanka xaafada Mamelodi oo aheyd meesha kulanka uu ka dhacayay, isla markaasina billo ka hor aheyd meeshii rabshadaha ajaaniib naceyb ka uu ka bilowdey oo Soomaali baddan eey ku barakaceen. Markii uu Zuma Hoolka soo galay waxaa markaliya qoob iyo qeeylo farxadeed isku daray dadweynihii oo iyagu ku heesayay heeso lagu yaqaanay xiligii halgankii midab takoorka lagula jirrey, dadka ayaa markaliya istaagay, saxawaxanka dadka ayaa dhagaha ku tirayay,, iyagoo sacab tumaya , qarkoodna eey lugaha dhulka la dhacayaan, qofkii xariiriyaha ahaa ee sameecada ku hadlayay ayaa cod sarre ku qeylinayay isagoo leh (AMANDLA=AWOOD) oo ah kalmad uu caan ku yahay xisbiga ANC, daqiiqad ka dibna waxaa la bilaabay in la qaado heesta Zuma uu caanka ku yahay ee (Mshini waamo= mashiin gaankeeygii ii keen, ama qorigeeygii ii keen).

Dadweynaha

Ugu dambeyntii Zuma ayaa makaroofanka qabsaday, iyadoo sacab xoog baddan lagu soo dhaweeyey, waxa uu dadweynaha u sheegey dhamaan waxyaalihii eey ka wada hadleen madaxdii Soomaalida kulanka qaaska ah uu la yeeshey, wuxuu hadal ku bilaabay “ waxaa jirra waxyaalo baddan oo aana waligeen fursad u helin in aan idiin sheegno, waxaa ka mid ah doorka eey wadamada Afrika ka ciyaareen in aan anaga xorrowno, waxaa tusaalaha koowaad aan usoo qaadan karnaa Soomaaliya, Soomaaliya waxaa caasimad u ah Muqdisho, waxaana madaxweyne ka ahaan jirey mudane Siyaad Barre, hadda waa la afgambiyey, waxay u malaynayeen in uu nin xun yahay, laakiin ma aheyn, anigu Muqdisho waxaan tagay in baddan, garan maayo inta jeer, soomaaliya waxay na siisey saldhigyo, waxay noo ogolaatay in aan dalkeeda galno kana baxno xiliga aan doono,iyadoo waliba nidaamkii midabtakoorka dalkani ka jirrey eey markasta ka codsanayeen in eeysan dalkooda noo ogolaan, balse codsigaasi Soomalaiya eey iska dhago marisey, waxay noogu deeqdey qalab ciidan, si kasta oo taageero aan u rabnay ayay noo taageertay”. Ayuu yiri Zuma oo mararka qaarkood hadalka ay ka dhex galaysay qeylida iyo sawaxanka dad weynaha hadalkiisa la dhacsanaa, iyadoo dadka qaarkood buun iyo seeri eey yeerinayeen, wuxuu Zuma dadka u yeeshey, gaar ahaan kuwa uu la hadlayay oo ahaa dadkii deganaa caasimada dalka, in Tshawane (Pretoria) eey tahay wajiga dalka, haddii xumaan eey ka jirtana aduunka eey ola micno tahay in dalka oo dhan eey xumaani ka jirto, wuxuu sheegey in danojirayaasha oo dhan eey fadhiyaan Pretoria, sidaasi darteedna in fariin qaldan laga gudbiyo caasimada eey tahay wax aanan loo dul qaadan karrin, wuxuu dadka ka codsaday in eey ka baaqsadaan waxyeeleynta ajaaniibta, ciidanka Police-ka ayuu canaan u jeediyey, oo uu u sheegey in howshooda eey kasoo bixi waayeen, talaabo adagna uu ka qaadi doono.

Zuma ayaa naqdiyey nidaamka cadaalada iyo xeerbeegtida dalka oo uu sheegey in uu yahay mid u xaglinaya dambiilayaasha, wuxuu intaasi ku daray in eey tahay in la’iska arko wax ka badalka dastuurka dalka , gaar ahaan qodobada qeexaya xuquuda qofka, dadweynaha ayaa aad u qosley markii uu Zuma yiri “bal qiyaas hadda inagoo halkan taagan ayaa qof qof dilaya anagoo arkayna, markaasaa waxaa la dhahayaa waa eedeysane, maxay yihiin waxaasi, aniga ma ahan wax aan u bogey, haddii lasoo qabto garyaqaan ayaa u imnaya oo dhahaya qofkani xuquuqdiisa meel ha oga dhicina, waa in la siidaayaa, waa la siideyn, kolkaasuu dambigii hore mid ka baddan geeysani, aduunka meel kasta oo aan tagay waxa kaliya oo la’i weeydiinayay waxa eey aheyd heerka dambiyada dalka, arrintani waa in wax laga qabtaa, waxaan tusaale usoo qaadanayaa, markii aan ahaa madaxweyne ku xigeenka dalka waxaa jirtey mar aan tagay Cape Flats, waxaa ii yimid nin askari ah oo darajo leh, si daran ayuu iigu cawday, wuxuu igu yiri “waxan soo qabtay nin dambiile ah, hadda waa uu xirayahay waana markii 4 aad, mar kasta oo aan soo xiro oo maxkamad la geeyo, isla markamada ayaa siideyneysa, markaasuu geysanayaa dambigii mid kaba sii daran sidaasi darteed aniga shaqadani ma ahan mid aan wadi karo waanan ka tagayaa” sidaas ayuuna shaqadii askarigii kaga tagay, waxaasi ma wax haboonbaa?. Sow is dhihi meeysaan dadka gacan ku dhiigleyaasha ah, iyo kuwa haweenka kufsada in si gaar ah loola dhaqmo oo aanan wax damiin ah loo ogolaanin?” ayuu yiri Zuma oo hadal kasta oo muhiim ah oo uu dhahaba uu sacab weyn u dhacayay.

Xiliga uu Zuma isu imaantinka ka hadlayo, waxaa meelo kale oo isla gobolkani Gouteng ah ka socday boob iyo dil baaxad weyn, ugu yaraan 5 qof oo ajaniib ah ayaa la diley, 50 kalana waa la dhaawacay, markii dad caraysan isla xiligaasi eey ku xoomeen ganacsiyo iyo deegaano dad ajaaniib ah eey leeyihiin, waxaa meelahaasi ugu caansanayd faras magaalada, magaalada xarunta ganacsiga dalka ee Johannesburg oo inta baddan eey ganacsiyo ku leeyihiin dad xabashi ah, halkaas oo aan ka fogeyn xaafadaha Soomaalida eey u baddantahay ee Mayfair iyo Fordsburg, waxaa iyaduna wali kacsan xaafadaha Thakoza, Tambiza iyo meelo kale oo iyaguna eey rabshado xoogan ka dhaceen maalmihii lasoo dhaafay.

Guddoomiyaha G/Bari oo Qiray in Dad Badan Laga Qabtay Garoonka & Kantaroolka Bosaso
iyo Khudbadihii Salaadda Jimcada oo Looga hadlay 5 nin oo Ku Xiran Boosaaso... Akhri...

Iyadoo rabshadaha eey sii fidayaan , naf baddan iyo hanti baddana eey galaafanayaan, ayaa dhanka dawlada waxaa jira in kumanaan ciidamada rabshadaha ka hor taga eey ku daad gureysey meelaha uu dhibka ka jirro, laakiin wali waa la xakamayn la’yahay, maanta waxaa amuurta markii ugu horeysey ka hadlaya madaxweyneha dalka Thabo Mbeki oo sheegey in arrinta gudi heer qaran ah loo saaro doono.

Markii uu kulanka dhaamaday, ayaa saxaafad aad u baddan oo meesha joogtey, waxa eey kusoo xoontey halkii eey fadhiyeen madaxdii Jaaliyada Soomaalida, kuwaas oo meesha shir jaraa’id oo gaaban ugu qabtay qalabka warbaahinta dalka, oo eey ka mid ahaayeen, wakaaladaha wararka, wargeysyo, idaacado iyo TV yo qaarkood tabin toos ah hawada ugu jirey, Axmed Dawlo iyo Dr. Calaahi Carte oo shirka jaraa’id ka hadlay ayaa u mahad celiyey dawlada dalka iyo xisbiga talada haya, waxauyna sheegeen in jawaabta culus ee ay ka bixiyeen dhacdooyinkani dhacaya eey yihiin kuwa loo bogey, laakiin loo baahanyahay in wax baddan laga qabto arrimaha, isla markaasina dhinacyo baddan laga eego, iyadoo la adeegsanayo qorsheyaal kala duwan, sidoo kale madax heer gobol ah iyo heer qaran ah oo dawalada iyo ANC ba ka tirsan oo goobta saxaafada kula hadlaya ayaa SASA (Somali Association Of South Africa) ugu mahadceliyey sida eey u agaasimanyihiin, iyo sida eey dhibaatada dakooda heysata u darseen, isla markaasina eey hogaan muuqda ka muujiyeen Soomaalida dhexdeeda muddo 10 sanno ah oo uu ururka shaqaynayay, waxay balan qaadeen in wadashaqayn dawlada eey arriumaha sida ugu dhaqsaha baddan wax oga qaban doonto, iyadoo kaashanaysa ururrada matalada qaxootiga.

Cabdinaasir Axmed Sh. Bashiir (saxansoxo). Email. Saxansoxo1@hotmail.com, or southafrica@somalitalk.com

Faafin: SomaliTalk.com | May 19, 2008