Xaflad heer sare ah oo ay ku kulmeen Ururka Initiative of Change iyo
Xisbiga HA NOOLAATO
Xaflad si heersare ah loo soo agaasimay oo ay ku kulmeen Xisbiga HA NOOLAATO iyo
Ururka Caalamiga ah ee Initiative of Change ayaa habeenkii xalay ka dhacday
xaafadda Westminister ee bartamaha magaalada London.
Xafladdan oo uu soo qaban-qaabiyey Ururka Caalamiga ah ee Initiative of Change
oo ka sheqeeya nabadda, is aaminka iyo wada noolaanshaha shucuubta dunida ayaa
waxa lagu soo dhoweynayey Xisbiga HA NOOLAATO oo dhowaan waddaniyiin iyo
aqoon-yahanno Soomaaliyeed kaga dhawaaqeen cariga Ingiriiska.
Ugu horrayn xafladda waxa ka hadlay xiriiriyaha Ururka Initiative of Change Mr
Jim Baynard Smith oo ka waramy wax-qabadka iyo taariikhda ururkooda. Mr Baynard
Smith wuxu halkaa si weyn ugu soo dhoweeyey Xisbiga HA NOOLAATO isaga oo
tilmaamay in aannu muddo dheer arag siyaasiyiin Soomaaliyeed oo aragtidaa fog
leh. Waxa kale oo isna xafladda ka hadlay Peter Riddell oo ka tirsan Ururka
Caalamiga ah ee Initiative of Change oo ka waramy dhibaatadii dunidu soo martay
iyo sidii looga heshiiyey. Peter Riddell wuxu tusaale u soo qaatay sidii looga
heshiiyey dagaalkii labaad ee dunida oo ay ku dhinteen in ka badan 30 malyuun oo
qof, heshiiskaas oo baajiyey in aan dagaal dambe Yurub ka dhicin.
Waxa isaguna halkaa khudbad aad u qiiro badan ka soo jeediyey John Browne oo
madax ka ah guddida la baxday National Sorry Day ee madaxda Australia ku khasbay
in ay raalli gelin ka bixiyaan dembiyadii laga galay dadkii asalka u lahaa
dhulka Australia. Waxaanu John Browne si jiririco leh uga waramay halgankii ay u
soo galeen in la gaaro maalinta National Sorry Day ga.
Intaas kaddib waxa xafladda lagu soo dhoweeyey Guddoomiyaha Xisbiga HA NOOLAATO
Mudane Cismaan Abokor oo ugu horrayn ka waramay baahida keentay aasaaska
xisbiga, taas oo uu ku tilmaamay in ay hawshan bilaabeen kaddib markii ay u
adkaysan waayeen dhibaatada joogtada ah ee ka taagan dalkoodii oo halis ugu jira
in laga waayo maabka dunida. Isla markaana ay ku guul darraysteen siyaasiyiintii
hore in ay xal u keenaan dalkooda iyo dadkooda.
Guddoomiyaha Xisbigu wuxu ku dheeraaday ujeeddooyinka xisbiga iyo sida ay u
arkaan in ay maanta Soomaaliya u badbaadin karaan. Waxaanu Xisbiga HA NOOLAATO
ku sheegay mid aan hore loo samayn isaga oo kale oo ka duwan urur
siyaasadeedyadii dalka soo maray oo dhan xagga afkaarta, hufnaanta dadka wada
iyo sida xubnihiisu uga kooban yahay dhammaan gobalada Soomaaliya oo dhan.
Waxa kale oo iyaguna halkaas ka hadlay Guddoomiye ku xigeenka xisbiga Mudane
Shariif Cali Shariif Axmed iyo Xoghayaha Guud ee Xisbiga Xasan Diiriye oo ka
waramay halka ay marayaan hawlaha xisbiga iyo yoolka xisbigu tiigsanayo.
Xafladdan oo ay goob-joog ka ahaayeen siyaasiyiin iyo ruug-caddaa caan ka ah
geyiga Soomaaliyda oo ay ka mid ahaayeen Ra’iisal Wasaare ku xigeenkii hore ee
Soomaaliya Mudane Cismaan Jaamac Cali (Cismaan Kalluun), Cumar Salaad Cilmi oo
ka mid ah siyaasiyiintii waaweyneyd ee hore ee Soomaaliya, iyo madax iyo
masuuliyiin kale oo isugu jira Soomaali iyo ajanebi.
Waxa kale oo iyaguna xafladda goob joog ka ahaa saxaafadda Soomalida sida TV-ga
Warsan iyo idaacadda Somali On Air.
Weriye C/Naasir Cirro
cirro1982@hotmail.com
Faafin: SomaliTalk.com | June 8, 2008