Cabdulaahi Yuusuf oo laba jeer ka badbaadey weerar lagu soo qaadey mar uu
saakey ka ambabayey Garoonka Diyaaradaha Muqdisho
Xuubsireed : labada weerar waa ka badbaadey Madaxweynaha waxaase ku
dhaawacmey...
Axad
(June 1, 2008): Intii uu ku sugnaa Madaxweynaha DFKMG Cabdulaahi Yuusuf Garoonka diyaaradaha ee
Magaalada Muqdisho ayaa lala beegsadey Madaafiic ay soo tuurayeen kooxaha ka soo
horjeeda joogitaanka Ciidamada Itoobiya , Madaafiicdaas oo aan maqlayey mar
aan ku sugnaa agagaarka Lambar 4 ayaa waxaa lagu waramey in qaar kamid ah ay ku
dhaceen gudaha Garoonka , Cabdulaahi Yuusuf oo ay galbinayeen Dabaabaadka
Ciidamada Uganda iyo kuwa burundi wuxuuna ambabaxiisa uu keeney in gabi ahaan uu
xirmo isu socodkii gaadiidka iyo dadka iyo Ganacsigii ee wadada Maka Al-Mukarama.
Ilaa iyo hadda lama oga khasaarihii ka dhashay duqeyntaas waxayna dad ka dhow
garoonka ay inoo sheegeen in Cabdulaahi Yuusuf uu ku sugnaa gudaha Garoonka iyadoo
Diyaaradii uu raaci lahaa ayaa la sheegey in waqtigaa ku sugneyd Garoonka
waxaana arintan weerarkan Cadeeyey Afhayeenka Madaxweynaha DFKMG Cabdulaahi Yuusuf, Maxamed Maxamuud Xuubsireed wuxuu kale uu sheegey in weerarkaa dhaawac uu
ka soo gaarey Askari u dhashey wadanka uganda.
Sidoo kale waxaa isna dagaal la isku adeegsanyo hubka noocyadiisa kala duwan uu
ka dhacay wadada maka Al-Mukarama xili uu halkaa marayey Cabdulaahi Yuusuf oo ku
sii jeedey garoonka diyaaradaha Magaalada Muqdisho si uu ugu duulo Dalka jabuuti
oo maanta ka furmaya shirkii dib u heshiisiinta.
Labada weerar ayaa Afhayeenku sheegey in uu ka badbaadey Madaxweynaha DFKMG Cabdulaahi
Yuusuf waxaana weerarkan sheegtey kooxda Al Shabaab iyadoo shaley galabna
kooxdaan ay weerar ku qaadeen Fariisimo ay degenaayeen Cidamada Itoobiya gaar
ahaan Jaamacada Gaheyr ,Digfeer iyo Zoona -K.
Madaxweynaha DFKMG Cabdulaahi Yuusuf ayaa ku sii jeedey Magaalada Jubuuti si uu uga
qaybgalo kulan halkaa ka dhacayo oo ay isugu imaanayaan Qaramada Midoobey iyo
Dowladda Federaalka kaasoo looga arinsanayo sidii gargaar loogu fidin lahaa
Shacabka soomaaliyeed iyo arimo ku saabsan shirka dib u heshisinta oo maanta ay
wada yeelanayaan Dowlada Federaalka iyo kooxaha ka soo horjeeda.
Beesha Caalamka ayaa dooneysaa in ay labada dhinac ku cadaadisa in ay gaaraan
heshiis dhab si soomaaliya u gaarto nabad dhab ah iyo sidii uu gargaarka Qaramada
midoobey u gaari lahaa dadka dhibaateysan ee ka barakacay dagaalada Mudada
sanadka iyo barka ka socda soomaaliya.
Dadka saadaaliya siyaasada soomaaliya ayaa waxay sheegayaan in aanu waxba ka soo
bixi doonin shirkaas waayo ayey yiraahdeen waxa kala jabey kooxihii mucaaradka
marka wixii ka soo baxaayey yiraahdeeen ee ay soo qaadaan mucaaradka halka lagu
fulinayo iyo khilaaf isna u dhaxeeya dowladda federaalka kaasoo ku saabsan in
aan laga hadli karin bixitaanka Ciidamada Itoobiya ilaa la keeno ciidamada
qaramada midoobey.
W/D Amiin Yuusuf Khasaaro
E-Mail amiinkhasaaro@hotmail.com