Gudoomiyaha Gudiga Warfaafinta Dibu-xoreynta Saleebaan Colaad Rooble ‘…anagu waan guda galney isla maalintii la sixiixey heshiiska meemarintiisa’ shir jaraa’iid

Gudoomiyaha Gudiga Warfaafinta iyo Wacyigelinta Golaha dhexe ee Isbahaysiga Dibu-xoreynta Soomaaliaya Mr. Saleebaan Colaad Rooble oo shir jaraa’id ku qabtey Hoteel IMPERIAL ee Caasimada Dalka Jabuuti ayaa shirkiisa jaraa’id ku sheegey waqtiga ugu dambeeya shirkii labaad ee Golaha Isbahaysigooda, qodobada ugu muhiimsan Ajendayaashooda iyo xiliga oo soo gebageboobayo.

Md. Saleebaan Colaad Rooble isagoo arimahaasi ka hadlaya ayaa waxaa uu yiri ‘“Sida qorshuhu yahay kalfadhigeena labaad marka uu furmo waxaa ugu horeyn warbixino laga dhegeysan doonaa xubno ka tirsan isbaheysiga oo ka kala yimid gudaha iyo dibedda, waxaa keloo si gaar ah diirada loo saari doonaa arrimaha shirka dib u heshiisiinta Jabuuti , la xisaabtanka xafiisyadooda kala duwan iyo Qorshaha mustaqbalka Isbahaysiga, xiligaan iyo midka fogba”.

Saleebaan Colaad Rooble

Saleebaan Colaad waxaa kale oo uu sheegey in shirka uu bilaaban doono maalinta Sabtida ah oo ay Taariikhdu ku began tahay 19/07/2008, islamarkaana uu socon doono mudo Shan maalmood ah, inta badan xubnaha Goluhuna ay xaadir ku yihiin Jabuuti, islamarkaana ay Saxaafadu ay indhaheeda ku arkidoonto tirade rasmiga ah ee ka soo qaybgaley shirka.

Saleebaan Colaad Rooble mar aan weydiiyey ma jiraa tilaabo xaga nabada uu u qaadey isbahaysiga, wixii ka dambeeyey heshiiskii lagu gaarey dalka Jabuuti, ayaa waxaa uu ku jawaabey

‘waad dareemi kartaa markii heshiiska lagu gaarey Jabuuti wixii ka dambeeyey xubnaha Isbahaysiga waxay bilaabeen in xubnaha Is-bahaysiga meelkasta oo ay joogaan la gaarsiyo, wixii ka soo baxay shirka iyo Taageerayaasha Is-bahaysiga ee ku sugan dalka iyo dibadaba, anagu waan guda galney isla maalintii la sixiixey heshiiska meemarintiisa


Sidoo kale mar la weydiiyay mas’uulkan bal in laga yaabo in kalfadhigooda ay ka soo qeyb gelidoonaan garabka Asmara, maadaama todobaadyadii ugu dambeeyey ay ka soconayeen magaalada Sanca shirar lagu dhex dhexaadinayo, inkastoo uu sheki geliyey ka soo qaybgalkooda waxaa uu ku jawaabey

“Anagu dhamaanba qeybaha kala duwan ee isbaheysiga casuumaadeena waan gaarsiinay, xubnaha Asmarana qeyb ayey ka yihiin dadka la casuumay, waase laga yaabaa in waqtiga oo dhow owgiis ay u suurto geliweyso ka soo qeyb galka shirka”.

Hase ahaatee kalfadhigaan Golaha Dibu-xoreynta ayaa wuxuu ku soo beegmayaa iyadoo aan wali heshiis rasmi ah, aysan ka gaarin khilaafkii u dhexeeyey oo ay ku kala qaybsameen wixii ka dambeeyey heshiiskii Jabuuti oo ay ku kala sixiixdeen DFKMG iyo inta badan Mas’uuliyiinta Is-bahaysiga Dibu-xoreynta, taasina waxay muujinaysaa in Koox kasta oo soo baxda oo sheegata in arimaha Soomaaliya ee murugsan ay wax ka qabandoonto, wixii ka dambeeyey aas aaskeeda, ay u kala jabaan laba garab, xili kasta oo loo qabto shir muhiim u ah, Arimaha Soomaaliya.

Maxamed Macallin Cismaan(All-man) Somalitalk Jabuuti. fatxumaalik@hotmail.com