Dibadbax Jaaliyadaha Soomaalida Ogaadeenya ee Yurub
Sawirada bannaanbaxa Halkan ka daawo...
Boqolaal ka tirsan xubnaha Jaaliyadaha Soomaalida Ogaadeenya ee qaarada Yurub
ayaa si wada jir ah u qabtay Banaanbax weeyn si heer sare ah loo soo agaasimay
shalay oo aay taariikhdu ahayd 07da bishan July todobaad 2008. Dibad baxan ayaa
ka bilaambay 1dii duhurnimo ka soo horjeedka fadhiga xarunta Xuquuqul Insaanka
Qaramada Midoobay ee Geneva, halkaa oo aay dibadbaxayaashu ku muujiyeen
dareenkooda ku aadan xadgudabyada xad dhaaf ah oo uu gumeeysiga itoobiya sida
joogtada ah uga geeysanayo Ogaadeenya. Inta uu banaanbaxani socday ayey xubnaha
jaaliyadaha Ogaadeenya ee Yurub ku qeeylinayeen erayo ka dhan ah gumeeysiga
itoobiya iyagoo is la markaana muujinayay garab istaagida shacbiga dulman iyo
taageerada eey u hayaan halganka xalaasha oo aay umada Ogaadeenya ugu jirto
sidii uga hoos bixi lahayd gacanta gumeeysiga madoow.
Banaanbaxayaashu ayaa waxey ka dalbanayeen heeyadan Qaramada Midoobay u
qaabilsan dhowrista xuquuqda aasaasiga ah ee aadanaha in aanay indhaha ka laaban
gumaadka marag madoontada ah ee lagu hayo shacbiga dulman is la markaana
cadaalada hor keenaan madaxda dowlada gumeeysiga itoobiya ee qorsheeysay is la
markaana meel marisa tacadiyada ka dhanka ah umada gumeeysi diidka ah ee
Ogaadeenya. Xubno is ku dhafan oo midowga jaaliyadaha ayaa ugu danbeeyntii si
rasmi ah u gudbiyay qoraalkii rasmiga ahaa masuuliyiin ka socotay heeyada
xuquuqul insaanka ee Qaramada Midoobay iyagoo halkaana kula yeeshay wada hadal
fool ka fool ah is la markaana ku adkeeyay in eey ka soo baxaan waajibka ka
saaran samabixinta iyo ka difaacida shacabka waxashnimada ciidamada gumeeysiga
itoobiya.
Banaanbaxayaasha ayaa socod dheer ku soo maray wadada dheer ee ka soo baxda
xarunta Xuquuqul Insaanka ilaa aay ka soo gaaraan ka soo horjeedka xarunta
Qaramada Midoobay halkaa oo uu ka furmay kalfadhigii wadamada xubnaha ka ah
urarkan. Sidoo kale dibadbaxayaasha ayaa halkaa ka sii waday ku dhawaaqida iyo
gaadhsiinta madaxda iyo warbaahinta caalamka ee goobta joogtay dhibaatada lagu
hayo umada Ogaadeenya iyo waajibka saaran guud ahaan bulshada caalamka gaar
ahaana Qaramada Midoobay soo fara galinta iyo xal u helida dhibaatada gumeeysigu
abuuray ee ka taagan Ogaadeenya.
Intii lagu guda jiray xil gudashada hoowshan ayeey xubnaha jaaliyaduhu
qeeybinayeen qoraalo ku suxan yihiin dhibaatada gumeeysigu ka geeysto Ogaadeenya
iyo dalabyo laga dalbanayo dunida xorta ah ka soo bixida iyo fulinta shuruucyada
caalamiga ah ee aay saxiixeen ee ku aadan garab istaagida umadaha dulman oo aay
umada Ogaadeenya ugu horeeyso.
Xubnaha jaaliydaha Ogaadeenya oo isugu jiray haween, caruur, dhalinyaro iyo dad
da’ah ayaa qaarkood soo galay safaro dhaadheer oo xaga dhulka ah iyagoo sheegay
in CWXO guulo wax ku oola ka soo hoyeen hardanka lagaga soo horjeedo ciidanka
gumeeysiga markaa iyaguna Eebe idankii guulo wax ku uul ah ka soo hoyin doonaan
halganka qeeybtiisa dibada waxeyna ka kala yimaadeen wadamada: UK, Finland,
Germany, Holland, Sweden, Norway, Denmark, Italy iyo Switzerland.
Banaanbaxan oo ahaa kii koowaad ee si wadajir ah loogu qabto ka soo horjeedka
xarumaha Qaramaha Midoobay ee magaalada Geneva ayaa guul ku soo gaba gaboobay
5tii galabnimo iyadoo markaa ku balamay xubnaha jaaliyadaha Soomaalida
Ogaadeenya ee qaaradan Yurub in aanay ogolaan doonin kana dhaadhicic doonaan
dowladaha eey ka tirsan yihiin in canshuurta laga qaado ee la siiyo taliska
gumeeysiga ku gumaado umada soomaalida Ogaadeenya is la markaana gudashada
waajibka Alle ka dib ka dhigi doonaan xaqiijinta xadafka umada oo ah ka hoos
bixida gumeeysiga hadafka koowaad oo aay leeyihiin.
A.bdullaahi Mohamed
Email : communauteogaden@net2000.ch
Geneva, Switzerland
Faafin: SomaliTalk.com | July 9, 2008