Daabaco Boggan | Print

Shirka Yemen uga soconaya hogaanka sare ee Isbaheysiga oo qarka u saaran in dhammaan qodobadii khilaafka labada dhinac saldhigga u ahaa heshiis laga gaaro

Tan iyo todobaadkii la soo dhaafey waxaa dalka Yemen, magaalo madaxdiisa Sanca kulan saddex geesood ah uga socdaa garabyada isbaheysiga ee ku kala sugan Jabuuti iyo Asmara iyo wafdi balaaran oo gudaha ka yimid ayna ku jiraan qaar ka mid ah hogaanka muqaawamada. Sidoo kale waxaa goob joogayaal ka ah ganacsato waaweyn oo uu ka mid yahey Xaaji Abukar Caddaan iyo xubno ka mid ah jaaliyada dibadda oo uu hogaaminayo guddoomiyahoodu mudane Tarsan,kuwaasoo ah guddi culeys saar, xoogana saaraya in natiijo wax ku ool ah ay kulankaas ka soo baxdo.

Inkastoo sida wararka lagu helayo ay si aad ah u soo daaheen wafdigii Asmara ka imaanayey, hadana dhinacyada kale waxey muujiyeen dhabar adeyg weyn iyo in ay dhab ka tahey dhameynta iyo xal u helidda khilaafka jira.

Sadexdii maalmood ee la soo dhaafey ayaa u aheyd guddiga dhexdhexaadinta maalmo shaqo oo aad u adag, ayadoo mid ka mid ah guddigaas oo aan la xiriirney uu noo sheegey in xubnaha Asmara ka yimid ay diideen in ay gogosha wadahadalka fariistaan, ayagoo ku adkeystey in ay halkaas u tageen caddeynta mawqifkooda oo kaliya ee aysan u imaan iney wadahadal la galaan cid kale, arinkaanoo u cuntami waayey guddigii waanwaanta ee u badnaa xubno ka mid ah hogaanka muqaawamada gudaha, waxaana halkaas ku dhex marey gudiga waanwaanta iyo xubnaha Asmara doodo aad u kulul oo soconayey saddexdii maalmood ee la soo dhaafey (sabti illaa isniin), taasoo ugu danbeyn ku soo gabagabowdey iney soo qoor dhiibtaan, ogolaadaana iney gogosha wadahadalka horteeda ay ka sheegtaan waxa ay tabanayaan, ka dibna ay ku qanci doonaan go’aanada guddiga waanwaanta ay ka gaari doonaan arimaha la isku heysto marka ay dhegeystaan ka dib.

Si kastaba ha ahaatee maanta oo Talaado ah ayey kulankoodii koowaad oo fool ka fool ah yeelanayeen labada dhinac ee isbaheysiga, isla xilliga danbe ee maanta ayaa la filayaa in go’aano wax ku ool ahi ka soo bixi doonaan kulankaas sida uu ku waramey xubin ka tirsan guddiga waanwaanta, asagoo sii raaciyey in go’aanadooda ay ku saleyn doonaan maslaxadda shacabka Soomaaliyeed ee dhibban ee u baahan gargaar dhinac kasta ah.

Isku soo duub, kulanka Yemen ayaa ka soo gudbey caqabadihii ugu balaarnaa ee ku dhoweeyey kulankaas inuu fashilmo laakin dulqaadka iyo sabirka ay muujiyeen hogaanka isbaheysiga ee uu Sheekh Shariif hogaaminayo iyo xubnaha muqaawamada ayaa nafta ku soo celiyey kulankaas, ayadoo ugu danbeyn xubnihii Asamara ay qoorta u dhiibteen guddiga waanwaanta, arinkaanoo shirka u bedeley in rajo fiican oo degdeg ah ay ka soo bixi doonto , halkaasna ay ku dhamaan doonto isqabqabsigii iyo murunkii dhaliyey in isbaheysiga dib-u-xoreyntu uu kala qeybsamo.

Shacabka Soomaaliyeed meel uu joogaba waxey indhihiisu ku sii jeedaan magaalada Sanca waxa ka soo yeeri doono ayagoo ku farxi doona hal natiijo ah oo kaliya oo ah waa la iswaafaqey ama eedda dusha ka saari doona cid kasta oo ka hortimaada in la heshiiyo

Xafiiska gaarka ah ee isbaheysiga dib u xoreynta Somalia ee Jabuuti

Faafin: SomaliTalk.com |  July 9, 2008

Kulaabo bogga  www.SomaliTalk.com  © www.SomaliTalk.com

La soo xiriir: