Guddoomiyaha Isbahaysiga Dib U Xoreynta Soomaaliya, Sheekh Shariif Sheekh Axmed oo Asmara ku qaabilay wafdi ka socoda Hay’adda Takhaatiirta aan xuduudda lahayn (MSF) 

Gud. Isbahaysiga Dib-U Xoraynta Soomaaliya ahna guddoomiyaha guddiga fulinta Mudane, Sh. Shariif Sh. Axmed aya ku qaabilay Xafiiskiisa  magaalada Asmara ee xarunta u ah  Isbahaysiga, laba wafdi uu hogaaminayey Madaxa hay’dda MSF France  Dr. Jean-Herva Bradol uuna ka mid ahaa Mr.Bruno Jochum, oo isna ah madaxa howlgalada MSF.

Kulankaas oo saacado qaatay ayaa labada dhinac ka wada hadleen  adeegyada  bini - aadamnimo ee dalka looga baahan yahay  iyo sidii loo horumarin lahaa. Hadal gaaban oo  Sh. Shariif Gud. Isbahaysiga halkaasi ka jeediyey waxa uu uga mahadceliyey xubnaha wafdiga booqashada ay ugu yimaadeen isagoo ku ammaanay hay’adooda hawlaha ay ka hayaan meelo ka mid ah Soomaaliya, waxa uuna ku booryey inay wax qabadooda sii labablaabaan.

‘‘Waan ka xunnahay falkii dilka ahaa ee lala beegsaday qaar ka mid ah shaqaalaha hay’addiina ka hawlgali jiray G.J.Hoose, xalligeediina waxa aan ka soo saarnay bayaan arrintaasi khuseeya’’ ayuu yiri Sh.Shariif.

Sh. Shariif ayaa intaa ku daray ‘‘ Isbahaysigu waxa  uu soo dhaweynayaa gacanna  siinayaa ciddii shacabka Soomaaliyeed waxtareysa oo ay ugu horeeyaan hay;adaha samafalka kuwooda wadaniga ah iyo kuwa dibadeedba, waxa uuna la dagaalamayaa gumeysiga dalka qabsaday iyo dabadhilifyadooda’’.

Waxaa isna halkaasi ka hadlay  madaxa Hay’adda MSF  ee saldhigiisu yahay France  Dr. Jean-Herva Bradol , oo ugu horeyntii ka mahadceliyey qaabilaadda iyo sida loo  dhaweeyey  waxa uuna ka warbixiyey waxqabadka ha’addiisa iyo qorshaheeda mustaqbalka waxa uuna tilmaamay argtidiisa ku aadan Isbahaysiga iyo waxa uu ka filaayo , waxaa kale oo uu ku dheeraaday sidii  wanaagsanayd ee maamulkii maxaakimta Islaamiga ah u soo wada shaqeeyeen iyo gacantii ay ka heleen xilligii ay maamulka hayeen. Maanta waxa ay hay’adeydu u baahan tahay in  gacan siiyo gudashada hawlaheeda samafaleed ayuu ku daray hadalkiisa.

Dr. Jean-Herva Bradol, iyo madaxa howlgalada MSF   Mr.Bruno, ayaa dareen iskumid ah ka muujiyay falkii Kismaayo ka dhacay ee Hay’adha Samafalka lagu kacay  iyaga oo sheegay in aysan garanayn ilaa iyo hadda sababta loo beegsaday shaqaalahooda.

Kulankaas ayaan ahayn kii ugu horeeyay ee Madaxda Isbahaysigu la kulmaan wufuud ka socota hay’adaha samafalka, balse ay jireen kulamo kan ka horeeyay oo dhamaan ku saabsanaa xaalada cakiran ee hadda Dalka Soomaaliya ka jirta. 

      Xafiiska Warfaafinta iyo Wacyigelinta

      Asmara, 25/02/2008