Puntland Nabad iyo Nolol 

Qore, shakib dhowre
shakib_dhowre@hotmail.com

shaki ku jirin, in dadweynaha reer puntland ay ka dharagsan yiihin in lacagaha aan sharciga aheyn uu maamulka puntland bilaabay inuu keeno deegaankaas sandkii1999. 

lacagahaasi ma aheyn wax qarsoon, sheekooyinkii dadweynaha wax ka mid ahaa :

• Masuul hebal baa loo diray inuu lacag soo sameeyo,
• Ganacsade baa bakhaarka looga buuxshay lacagtii la soo sameeyay,
• Makiinadda ugu weyn ee lacagta sameysa, waxaa iska leh maamulka puntland.  Dhageyso British Broadcasting corporation, laanta af-soomaaliya, jimcihii 27/7/07, jawaabihii madaxda puntland ay ka bixiyeen lacag sameynta,
• Mudadaas dheer maamulku wuxuu baarka u salaaxayay ciddii ku soo biirta golaha shacabku u yaqaan “lacag sameynta"

Intaas oo jirta, haddana  shacabka reer puntland wuxuu waxkasta oo dhibaata ah ugu dulqaatay, in aan nabadgelyada iyo kala danbeynta aan la dhaawicin. Hase yeeshee wakhtigii waa dheeraaday, dhaqaalihii oo xumaaday, sicir bararkii oo gaaray meel aad u sareysa oo shacabkii gooynwaayeen gadashadii nolol maalmeedka. 
 

Daawo: Video-Bannaanbaxii  Garoowe Banaanbixii shalay ka dhacay Garoowe ee looga Cabanayay sicir bararka ay keentay lacagaha Faalsadaa ee ku soo Qulqulaya Puntland DAAWO...

Bannaan baxay ka dhacay Garoowe 25/7/07, wuxuu ahaa fariin muujineysa in dulqaadkii sii dhamaanayo. Dadku waxay ka cabanayeen arrimo runtii la taaban karo, sida .

• Rootigii wuxuu ahaan jiray So.Sh 500, haddana wuxuu marayaa So.Sh 2000,
• Mushaaradii shaqaalaha oo dabooli weyday, sicir bararka ku dhacay badeecooyinka,
• Waxbarashadii oo qaali u noqotay, sababteyna in carruur dugsiyada laga reebo,
• Ganacsatadii oo doolar wax ku gadaya, shillin Soomaaligiina diiday, si aan khasaaro uga soo gaarin sarifka,
• Digniin ah, in dhariga shidan la isgu tagayo. Markii la sheegayo in habeen kasta masaajidada hortooda loogu yimaado maato gaajo la duuduuban. ( fiiri: www.somalitalk.com, 26/7/07, barnaamijka bannaan bixii Garoowe).

Hase yeeshee, madaxda puntland, waxay uga jawaabeen bannaan baxii sidaan

• “Inay jiraan dadka ka soo horjeeda nabadgelyada Puntland kuwaasi waxay xiriir la leeyihiin kuwa amaan-darada ka wada caasumada Muqdisho”.
• “Dhalinyaro ay soo abaabuleen ururka Al-islaax ay bilaabeen in ay dhagxaan ku weeraraan Xarumaha dawlada ee shacabka loogu shaqeeyo sida xarunta baarlamaanka Puntland iyo Madaxtooyada oo labaduba ahaa meelaha dadku dhagxaanta ku weerareen”.
• Haddana madaxdu waxay qirteen inay lacag daabacdaan. Dhageyso

Arimaha shacabka kiciyay waxaa kale oo ka mid ah; Markii xukuumadu caddeysay inay dhoofinta xoolaha nool siisay shirkad sacuudi ah, oo kaligeed xoolo dhoofin-karto. Waxaan wada ogsoonahay in dhoofinta xoolaha nool ay tahay laf dhabka dhaqaalaha puntland. Si wada jir ah bay ganacsatada, shacbku  iyo wasiir isku casilaey, waxay ka muujyeen go`aankaas dareen dhiilo xanbaarsan.

Intaas waxaa sii dheer hadal heyntii mudada soo jirtay, ee ahaa in maamulka puntland inuu shirkado shisheeye ah la galay heshiisyo, lagu soo saarayo kheyraadka ceegaaga dhulka puntland, oo shacabku u qaatay run iyo  inay shaqooyin ka helidoonaan.

Qormadaan waxaan ku soo qaadanayaa sheekadaan soo socota  oo aan ka soo qaatay qaar ka ruwaayad laga dhigay dal ka mid ah dalalka carabta. 

Qawaar waa aqoonyahan, abwaana ah. Wuxuu sameeyay ruwaayado badan oo ku saleysan dareenka dadweynaha dalkaas, isaga oo si maldahan ku cabiraya xargaha murugsan, muska bulshada looga soo dhacay, iyo waliba noocyada ay yihiin dhibaatada laga cabanayo. Xilli dadweynaha dalkaasi ay cabasho badan ka muujiyeen sicir bararka, eexashada, sinaan la`aanta iyo musuqmaasuq xad-dhaaf ah, baa Qawaar wuxuu soo ban- dhigay ruwaayad sheeko reebtay, saameyn weyn ku yeelatay bulshada.

“Si ulakac ah baa Qawaar wuxuu u liqay Taano oo ahaa waxa uga yar lacagta la adeegsado ee wax lagu kalo gato. muddo ka dib, Qawaar waa xannuunsaday, Istibaalka baa loola carray,dhakhtarkii baaritaanka ku sameeyay Qawaar si deg deg ah buu ugu diray in calooshiisa la soo sawiro. Natiijadii markii loo keenay dhakhtarkii, wuxuu arkay  waxa ku jira caloosha Qawaar oo dhibaatada u keenay. Wuxuu u sheegay Qawaar in xaalkiisu yahay khatar oo la qalayo. Qawaar oo wal-walsan baa wuxuu yiri” makiinada aragtay taanada caloosheyda ku jirta, maxay u arki-weyday caloolaha buuxa”. Jawaabtii dhakhtarku waxay aheyd mid Qawaar si fiican ugu qancay “ kuwa buuxsamay yaa isbitaalka keeni-kara”.

Gunnaanadkii, 

Madaxda maamulka puntland waxaan oran lahaa, adduun waa maalmo ee wanaag ka taga, shacabkana dhibaatooyinka heystana xal u raadiya.

Printer la soo qabtay 23/7/07, ma noqondoono mid wax ka badela dhibaatada shacabka puntland ka heysato falalka sharcidarada ee hantidooda lagu boobayo,  inta makiinadaha waaweyn ay sii shaqeynayaan.  

Ganacsatada waxaa oran lahaa, gaar ahaan kuwa qeybta ka qaatay lacag sameynta iyo sicir bararka, taariikhda waxaan ku soo aragney in aysan dhicin in qof baahan oo qori helikara uusan gaajo ugu dhimaneyn darbiga bakhaar buux-dhaafay. 

Dadweynaha puntland waxaan leeyahay, waxaad ka cabaneysaan waxaa ka weyn nabadgelyada aad heysataan, iyada ku fara adeyga, hana oggalaanina burbur ku dhaca puntland. Maamul xumadana wax weyn baad ka qaban-kartaan haddii aad danta guud iyo midnimada ilaalisaan,. Waxaa lama huraan ah in aad ka wada tashataan , isweydiisaan maxaa ka danbeyn bilaha ka haray wakhtigii maamulka puntland.

Puntland waxay  nabad iyo nolol noqon-karto haddii ay wada shaqeeyaan madaxda Maamulka oo daacadnimo u gudanaya masuuliyadooda iyo waxgaradka Puntland. 

Wabilaahi towfiiq. 

Qore, shakib dhowre
shakib_dhowre@hotmail.com

Afeef: Aragtida qoraalkan waxaa leh qoraaga ku saxiixan