Daabaco Boggan | Print

Cali Maxamuud Xiirane

DHOOB-DHOOB

Tixdan gabayga ah ee la yiraahdo Dhoob-dhoob waxay soo baxday 27/09/04,waxaana tiriyay  Cali Maxamuud xiirane.

Gabygu wuxuu waxuu ku saabsanyahay colaadda nagu raagtay iyo dhibaatooyinka ay sababtay. Gabaygu 3 qaybood buu u qaybsamaa oo kala ah cabasho, codsi iyo digniin, wuxuuna u badanyahay maah-maahyo, tilmaamaya boobka la caadeystay iyo taladu markay kula gudboontahay haddaad garab marto caaqibo xumida ay leedahay. 

• Dhaqso hadalku iigama tagiyo, aniga dheel-dheele
• Dhaqan uma lihi umana aanan dhalan, ehel dhalleeceyne
• Wax dhan baan dhursugayoon hubsaday, oon kadhawrasadaye
• Dhaa-dhaanse hadduu kula dhashiyo, nacas dhaban weyni
• Dhaxantuba waxay kaaga iman, dhankuu kaa jiro e
• Nacabkaa ku soo dhuuman iyo tuug ku dhaawiciye
• Dhiiqada cadoowgii nagu jiidaye naguna dhaylaasay
• Ee dhibkanaga muddo dheer sugiyo kala dhantaalkeenna
• Iyo kuwaa u sii dhoohaalayaahi wax is ma dhaamaane
• Dad sidaas ka dhigan baan arkoon, dhaqan wadaagnaaye
• @@@@@@@@@@@@@@@@@@@@@@@@@
• Dhagax baa ku dhaca meel dhow, oo dhawaqna meel dheere
• Dhulkayaga Warkaa iiga soo dhacaye, badaha soo dhaafay
• Waa dhambaal colaad noo sidiyo, Dhiillo iyo yaabe
• Niman baa ku dhaar maray, inay nabad ka dhowraane
• Ooy cadow u dhiibaan, dhulkii dhaaddanaan jiraye
• Qoon dhega lehoon dhawaqana maqline, dhoohan baa jiro e
• Dhigaalkii odayadii na dhaliyo, dhaxalka noo yaalla
• Murtidiyo xigmadaheey dheheen, waa lama dhaafaane
• Dhe-dhenshaa waalan baa la yiriyoo, kii dhergaa darane
• Soo dhacyeeyna dhurwaagii barteen, xoolo kugu dhaafin
• Sar-sar adag haddaan loo dhigeyn, iyo oodo dhacameedba
• Ka dhigaayda dhawaqaad tiraah, wuu dhibsanayaaye
• Kuu dhaamin maayaa kaaga roon, dhagarta qaarkeede
• Dad sidaas ka dhigan baan arkoon, dhalyo wadaagnaaye
• @@@@@@@@@@@@@@@@@@@@@@@@
• Dhubuq-dhubuq horaa laga dhaxlaa, dhabanno sii hayne
• Dhar-dhaarrada uu dhaalkoodi jabay, dhamacda yaa saaray
• Nin gurani hashuu dheelmay baan, dhinac fayoobaane
• Yaa shacabkii dhaantada u tumay, dhaaddahaa jabane
• Laf dheerta yaa dhuuxii ka shubay, waa dhutinayaane
• Dhuuggana geelii yaa ku horay, ama dhukaameeyey
• Dhaaryiga ayaa ula noqdayoo, dhiishii gorofeeyey
• Wan dhufaanan oo dhergayoos, dhinicu weynaaday
• Illaa dhegta dhiigga loo daro, oo dhabanka loo tuuro
• Dhaayaha indhihiisaan arkayn, samada dhuuxoowe
• Dad sidaas ka dhigan baan arkaa, oo dhiggiisa ahe
• @@@@@@@@@@@@@@@@@@@@@@@
• Dhuunkaasha kuwii dhexdhigaye, badaha noo dhoobay
• Ee dhufeysyada noo dhabbacane, cadaw u sii dhuunta
• Ee dhafoorka naga toogtayeen, culumadii dhaafin
• Dhashiikahana nala wada dhacaye, dhiigga naga miirtay
• Dheelmadkiyo kuwii awal na baday, saan u dhalandhoolnay
• Ee dhallaankii moowjadaha ku dhumay, dhoofka ugu baaqay
• Dhidirkii xabaalaha qoda, ayaan qurun ka dheereeyne
• Dhafar dabin loo qoolay bayse qaar ku dhacayaane
• Dhool bari ka soo hillaacay baa, dhaan u nagaadaaye
• Dhedo roob ma noqotee toloow yaa dhabqiyay howsha?
• Rajadeenni yaa dhumiyayoo, samihi dheereeyey?
• yaa na kala dhantaaloo dadyahow  dhima awooddeenna
• Inay taladu naga sii dhuntoon dhidibbo loo taagin
• Dhakafaar ayaa inala jecel, waxaan dhaboobaynin?
• Dheeftii saqiirrada ayaa dhunxiyay oo laystay?
• Dhaca yaa ku faanoo xaq-darro, guriga soo dhoobta?
• Dhirbaaxada asaaggii ayaanay, dhiillo ugu muuqan?
• Ayaa dhiig walaal daadshayoo, xinjir ku sii dhaatay?
• Anigoon ku dheeraan murtidan, anan dhammaynin
• Jawaabaha dhabtaa waad ogtiin, meeshay dhacayaane
• Farsamaa wanaag lagu dhisaa, lagu dhuroobaaye
• Dhiriqdhabad  khiyaaniyo, haddaad dheel ka bixi waydo
• Oo dhimirkii kaa maqanyahayoos, meel kalow dhoofay
• kaa dheeri intaad leedihiyo, dhawr hubkaan haysto
• Adduunyada  dhibaatada ka jirta, aakhiraa dhimmane
• Dhugmar yeesha Soomaaliyeey, seegnay Dhaxalkiiye
• Waanada dhegeeystoo mar uun sidatan noo dhaama
• @@@@@@@@@@@@@@@@@@@@@@@@@
• Inkasta oo raggii dhibka waday, dhabarku uu muuqdo
• Oo aanay dhidibbadeedii adkeyn, dhigihiyo loolku
• Waa tii la dhadhabay waxbadan, dowlad dhalataaye
• Middii awal nala dheelisaa ka roon, dhaqan xumaantaane
• Dhoob-dhoobkii wixii  aad dhisteen, ma la dhalanteedshay?
• Ma dhabaandhabeen haddana, kuwii shalay naga dhaamay?
• @@@@@@@@@@@@@@@@@@@@@@@@@
• Murti kale waxay nagu dheheen, waa dhaqan awoowgeene
• Miyirku dhaqsuu seddex uga tagaa, ama u dhaafaaye
• Hayeeshee dhawaanba waa soo noqdaa, dheefsi laawuhuye
• Haddii awrka dhebidiisiyo, uu qooqu dhalanteedsho
• Dhibicda roobkiyo wuxuu dhaafiyaa, dooggii uu dhigaye
• Dhaanyinkeedii dhirtiyo xareeddii, oo dhaaxa la idleystay
• Fursaddiisii uu dhumiyiyo dhugtii, waa ku soo dhiciye
• Mase dhe-dhemin karaayoo, marnaba dheef umay harine
• Dadaan waxba dhaamin baan arkaa, oo dhiggiisaahe
• @@@@@@@@@@@@@@@@@@@@@@@
• Dhallaan badan islaantii dhashay, ee dhalmada daysay
• Odaygey u dhaxdayna uu tu kale, reer la dhiso maago
• Is dhuf-dhufadka dhiillada, markuu hadalku dheeraado
• Ii dhig madaxiyo dhaqan kaama rabo, aan la is la dhaafeynin
• Dhallaaqdeedii markii ay dhacdo, oo talo dhanaanaato
• Iney dhoofto ama ay dhiirrato, ooy dhasha la sii joogto
• Labaday is dhafan-dhaafisaa, arrin dhammaantiise
• Dhaqankooy adkeeysaa middaas, kaga dheg rooneeyde
• Maxayse ka dheeftaa haddeer, xaalkii wuu dhumaye
• Dadaan waxba dhaamin baan arkaa, oo dhiggeedaahe
• @@@@@@@@@@@@@@@@@@@@@@@
• Mid la dhaarshay xilkuu dhabar u riday, dhayal haduu moodo
• Oos dhuuni uu ku iibsado dalkuu, shalay u soo dhaartay
• Dhaadashiyo ballan inuusan gelin, soow kuma dhaboobeyso
• Kac na dhaaf dhabqalallaad tehee, soow la dhihi maayo
• Mid ka soo dhalaaleen dayicin, soow uma dhaaraanto
• Dhiifooni xumadii uu kasbaday soow kuma dhalleecoobin
• Caqligiisii dhaafayna dhaqsaba, soow ma dhaabanayo
• Waxbase kuma dheefee markaas, soow dharrici maahan
• Faraskiisiina isagaa ka dhacay, oo dhiirigays dhigaye
• Tariikhdaan dhumine la dhigay, soow uma dhiteysnaato
• Dhaqaalihii uu horuu dhunsaday, soow lagama soo dhoobo
• Dhallinyaro careysani dhengadaha, soow la dhici mayso
• Dharbaaxadu dhegtay uga dhacdaa, soow dhiigga qubi mayso
• Xabsigii la dhigiyo dhulkii, soow dheeggu kama diido
• Dhacsaashii isagoo qabana askari, soow dhiibi tiri mayso
• Xeeriyo fandhaal kala dhiciyo naftii, soow kala dhaqaaq maahan

_________________________

      Cali Maxamuud Xiirane
     Xiirane2@hotmail.com
              London, UK

Faafin: SomaliTalk.com | Mar 11, 2004