| w w w . S o m a l i T a l k . c o m |
|
| |
|
Cumar C/nuur Nuux – Nabaddoon. TALADA WAX NAGA SIIYA!!
Heshiiskii Cadan!! Maxaa lagu heshiiyey?...In khilaafka u dhexeeya labada garab la soo afjaro! Hadal wanaagsan iyo fikrad wacan weeye….laakiin sidee loo soo afjarayaa? In Baarlamaanka kala irdhoobey meel la isugu keeno si ay qaraarro mideysan u qaataan! Hadal wanaagsan iyo fikrad fiican weeye…laakiin sidee la isugu keenayaa? In magaalo labada hoggaamiye ku soo heshiiyeen la isugu tago! Ma xuma laakiin magaaladee? Maxaa kaloo lagu heshiiyey? In khilaafka u dhexeeya labada garab la soo afjaro! Hadal wanaagsan iyo fikrad wacan weeye….laakiin sidee loo soo afjarayaa? In xukuumadda lakala diro oo mid mideysan lagu baddelo(government of national unity)! Hadal wanaagsan iyo fikrad wacan weeye… laakiin sidee bay ku imaaneysaa xukuumad mideysan? In Wasiirka 1aad la baddelo oo mid raggii mucaaradka ahaa lagu beddelo si labada garab u midoobaan!! Hadal wanaagsan iyo fikrad wacan weeye… laakiin ma midoobayaan labada garab haddii sidaas la yeelo? Laga soo bilaabo maalintii la soo sheegay in Afhayeenka Baarlamaanka Kumeelgaarka Federaalka Soomaaliyeed mudane Shariif Xasan Sh. Aadan iyo Madaxweynaha DFKS mudane Col C/laahi Yuusuf Axmed ku heshiiyeen magaalada Cadan ee dalka Yemen, waxaa ummadda Soomaaliyeed meel ay joogtaba rajo ka qabtay in heshiisakaasi jawi iyo yididiillo cusub u furi doono DFKM Soomaaliyeed ee khilaafka iyo ismaandhaafku hareeyey muddadii ay jirtay ee sannadka iyo barka ku sii dhow. Ummaddu waxay islahayd mar haddii labadii oday ee meesha hormuudka ka ahaa heshiiyeen way u sahlanaan doontaa in mushkiladaha ay soo afjaraan oo xubnaha dawladdooda meel isugu keenaan!! Qofkastoo indheeradgarad ah oo akhriyey shantii qodob ee labada hoggaamiye ku heshiiyeen waxaa u muuqatay in heshiiska intii ugu muhiimsaneyd aan la soo bandhigin! Balse labada hoggaamiye ay dhegta isugu sheegeen iskuna dhaarsadeen in hawsha sidaas loo soo afjaro!! Waxaa dhici karta in lagu heshiiyey (waa malo awaal) in magaalo la isla ogyahay loo raro golaha Baarlamaanka iyo xukuumaddaba. In awoodda maamulka xukuumadda la qaybsado oo sida hadda ay tahay wax laga beddelo. Iyo in dhaqaalaha kooxda Jawahar ay gacanta ku hayso ee iyadu isku koobtay lawada intifaacsado. Heshiisyadaan oo si fafaftiran la isula lafaguray ayaa dhegta la isugu sheegay lana isku dhaarsaday. Intaa waxaa dheer in wixii dawladaha deriska ah ku xiran la isla xalliyo oo ninkii buuggiisa xoogaa madmadow ahi ku qoran yahay lagala hadlo saaxiibbada dawladda kumeelgaarka ah Shariif iyo C/laahi su’aashu waxay tahay ma dantiinnaad u heshiiseen? Mise danta ummadda aad madaxda u tihiin? Odayaal madaxdii Soomaalida ee maantaay, haddii aad dantiinna u heshiiseen ogaada in dantiinnu ku jirto tan ummadda aad madaxda u tihiin. Haddiise aad danta ummadda u heshiiseen iyo sidii dhibka, khilaafka iyo jaahwareerka jira looga bixi lahaa ka fiirsada go’aamada aad qaadannaysaan. Talada wax ka siiya kana qaata dadkiinna wanaagdoonka ah, gaar ahaan aqoonyahanka qurbojoogga ah ee aan mansab iyo maamul midna idinku haysan. Magaalada Baarlamaanka lagu shirinayo yeysan noqon mid labadiinnu aad dhegta isugu sheegteen, ee ha noqoto mid lagu doortay faa’iidooyin ay kuwa kale dheertahay, xag nebedgelyo, xag dhaqaale (waa in Baarlamaanka iyo madaxda dawladdu meel ay degaan oo aan qarash badan ku bixin laga helayaa), mideyn ay mideyn karto fikradaha isdiiddan ee qolo walba danaheeda gaarka ah eeganayso. Ogaada minjo dhiiqo midba mar baa la saaraa.. ee yeysan hawshu idinka noqon jajuub iyo anigaa iri. Haddii taasi soconeyso intaanba layslama soo gaareen. Waqtiga hadda lagu jiro looma baahna in khilaaf cusub la abuuro. Gaar ahaan waa in aan intii hore dawladda iyo Madaxweynaha heshiiska ula ahayd khilaaf cusub soo kala dhexgelin. Waa in khilaafkii hore la dhammeeyaa, ama la yareeyaa sidaas baa meeshii la joogay horay looga sii socon karaa. Haddiise intii horay heshiiska u ahayd kala jabto, wixii wax qabad ah oo lagu tillaabsaday burburo, dee lama dhihi karo heshiiskiinnu faa’iiduu soo kordhiyey. Soomaalidu waxay ku maahmaahdaa “raad orooryaad dib looma raaco”. Waxaa idinla gudboon in aydaan dib ugu noqon murankii iyo khilaafkii aad Kenya ku kala jabteen. Laba magaallo ayaad hadda degantihiin (intiinna badan). Waxaa habboon in aad labadaas magaalo mid uun isugu wareegtaan, kadib markaad xallisaan wixii wiiqaya ama ka hor imaanaya wadajirka iyo horumarka dawladdu higsanayso. Ma habboona, mana aha munaasab in waqtigaan kala guurka ah la sameeyo isbeddel culus (sida Wasiirka 1aad oo la baddelo iwm) waayo waxaa ka dhalan kara mashaakilaad hor leh iyo caqabado kale oo xallintoodu muddo dheer qaadato. Haddii ay lagama maarmaan tahay in isbeddello waaweyn la sameeyo, waa in ay noqotaa kadib marka mashaakilaadka jira la xalliyo, Baarlmaanka iyo dawladduna muddo wada shaqeeyaan, danta guud iyo danta gaarna kala caddaato. Waanadu waxay waxtartaa dhagtii wax weelaysa.. Nimay meeli u caddahay meeli ka madow.. Talo walaal diide turunturro ma waayo.. Wadajir bay laba gacmood wax ku gooyaan… Qoraalkii waa iga intaas, haddana aan idiin daba dhigo mid ka mid ah suugaantii Nabaddoon, waa maansadii BAAQ ee aan tiriyey mar aad labadiinnu laba doon kala saarnaydeen laba badood oo kala fogna ku kala sugnaydeen: BAAQ Maansadaan BAAQ waxaa tiriyey Inj Cumar C/nuur Nuux – Nabaddoon. Waxay maansadu soo baxday 18/07/2005. Inj. Nabaddoon oo ka maansooda xaaladda dalka gaar ahaan dhanka nabadgelyada iyo jiritaanka qarannimo. Gabaygaan oo tusaaleyn, baaq iyo bayaan isugu jira wuxuu leeyahay:
===Dhammaad====
W. T. Inj. Cumar C/nuur Nuux – Nabaddoon Afeef: Aragtida qoraalkan waxaa leh qoraaga ku saxiixan Faafin: SomaliTalk.com | Jan 30, 2006 Kulaabo bogga www.SomaliTalk.com | |
| © www.SomaliTalk.com | |
| >> Usheeg Asxaabtaada |
Daabaco
Boggan | Print
| Allah Is Great | ||||
|
