Dukumiinti ku Saabsan iibintii Guriga Safaarada Soomaaliya ee Kenya
- SomaliTalk.com | November 15, 2010
Waxaa SomaliTalk.com heshay nuqullo kamid ah dukumiinti la xiriira
iibsigii guriga Safaaradda Soomaaliya ku leedahay dalka Kenya,
dukumiintigaas oo aad ka daalacan kartid
halkan
Download(pdf) ama
HALKAN
(magazine) waxaa ka mid ah:
Dukumiinti
muujinaya taariikhdii dhulka uu ku yaal guriga Safaarada Soomaaliya,
taariikhdaas oo ka soo bilaabanaysa 1930. Waxana dhulkaas la kala iibsadey 6 jeer ka hor intii aan Dawladda
Soomaaliya iibsan 12/4/1973, oo xilligaas ku iibsatey Ksh550,000. Waxa kale
oo dukumiintigaas ku qoran in 16/8/1994 laga iibiyey Suleiman Rahemtulla
Omar iyo xaaskiisa Zarina Suleiman Omar.
Dukumiinti muujinaya in uu qoray Saadha Mohammed Gulleid
oo katirsanaa wadashaqaynta Wasaaradada Arrimaha Dibadda Soomaaliya, taas oo ay ku qoran
tahay in Safiirka Soomaaliya ay Dawladda Soomaaliyeed u ogolaatay in uu
guriga iibiyo -
Waxaa layaab leh in dhanka hoose ee warqaddaas lagu qoray far Qalin ah
oo lagu sheegayo in iibinta safaarada la ansixiyey 19 March 1990.
Dukumiintigaas
waxaa kale oo kamid ah warqad ku taariikhaysan 19 Mar 1990 taas oo ku qoran
AfSoomaali oo ku socota safiirka Soomaaliya, waxaana warqaddaasi ku
bilaabatay sidan : "Dawladda Soomaaliya waxay ku fareysaa in aad iibiso
guriga Deganka ee Danjiraha dapka Soomaaliyeed ee dapka Soomaaliyeed ee
Nairobi, No. LR/1870/111/50..." (FG. AfSoomaaligaas khaladan ayagaa ku
qoray..) Waxaana warqaddaas ku saxiixan in uu Tasdiiqiyey Safiirkii
Jamhuuriyadda Soomaaliya Ahmed
Sheikh Mohamud. Waxaana iibka sabab looga dhigay si loo xallinayo
dhibaatooyinka mushaharka shaqaalaha jooga Kenya... FG. Waxaa warqaddu ku
taariikhaysan tahay 19 Mar 1990, waa ka hor intii aan xukuumaddii Soomaaliya
dhicin.
Dukumiintiga
waxaa ka mid ah warqaddii uu February 1995 qoray Wasiirkii Arrimaha Dibadda
Kenya (Musyoka) oo uu ku sheegay in dublomaasiyad xiriir ah uusan ka dhaxay
Soomaaliya iyo Kenya, maadaama ay dhacday Dawladdii Soomaaliya, sidaas
daraadeedna shaqalaha Safaarada Soomaaliya aysan u aqoonsanayn
dublomaasiyiin.
Waxaa kale oo
dukumiintiga ka mid ah warbixin muujinaysa qiimayn february 2006 lagu
sameeyey dhulka uu ku fadhiyo dhismahaasi, qiimayntaas oo ah 130 million oo
Kenya shillin ah.
Dukumiintiga
waxa kale oo kamid ah dacwad ka dhan ah iibkaas oo ay maxkamadda geeyeen
laba dublomaasi Soomaaliyeed oo ah Musa Hersi Fahiye iyo Mohamed Omar ayagoo
maxkmada la fuulay lammaanaha iibsadey guriga, waxayna maxkamadda hortageen
May-June 1995 ayagoo doonayey in guriga loo soo celiyo Soomaaliya.
Mohamed
Omar waxa uu ahaan jirey safiirka Soomaaliya u fadhiyey dalka Jabuuti,
waxana uu geeriyoodey dhawr bilood kabacdi markii uu hortegey Maxkamadda Kenya
si uu ugu doodo Soomaaliya in loo soo celiyo dhismahaas - haddaba ugu yaraan 10
million oo Soomaali ah ee hadda nool waxaa la gudboon in ay xaqiijiyaan
ficilkii uu halgamaagaasi ku doonayey inuu dhismahaas usoo celiyo
Soomaalida, maadaama asagii uusan xilligan ummadda u doodi karin oo Allah
oofsaday - Allah ha u naxariisto.
Maxkamadda
Kenya oo Go'aan ka gaari doonta Dhismaha Safaaradda: December 7, 2010
Maxkamadda
Sare ee Kenya ayaa sheegtay in ay December 7, 2010 go'aan ka gaari doonto
arrinta muranka dhalisay ee ku saabsan safaaradda Soomaaliya ee la iibsaday.
Dhismahaas oo laga dhacay shacabka Soomaaliyeed intii ka dambaysay burburkii
dawladdii Soomaaliyeed.
Dacwaddaas
waxaa maxkamadda Kenya geeyey dublomaasiyiin Soomaaliyeed oo dalbaday in arrintaas
iibka ay Maxkamaddu ka dhigto waxba kama jiraan isla markaasna gurigaas iyo
dhulka uu ku fadhiyo loo soo celiyo Soomaaliya.
Guriga sida dukumiintiga sare muujinayo waxaa
lacag gaaraysa KSH 15 million ku iibsadey ganacsade reer Kenya ah Suleiman
Rahemtulla Omar iyo xaaskiisa Zarina Sulieman Omar waxayna kaga iibsadeen
safiirkii hore ee Soomaaliya u fadhiyey Kenya Ahmed Sheikh Mohamud.
"Guriga oo ku
yaal xaafada qaaliga ah Spring Valley, kuna beegay isgoyska Brookside Drive
iyo Lower Kabete Road ee Nairobi, waxaa hadda lagu qiimeeyey Sh500 million,"
sidaas waxaa dhowaan qortay Jariidada EastAfrica. Waxaana jariidadu intaas
ku dartay "Suleiman Rahemtulla Omar iyo xaaskiisa Zarina Suleiman Omar waxay
ogaan doonaan in gurigii ay ku iibsadeen KSH15 million in loo celiyo
Dawladda Federaalka Kumeelgaarka ee Soomaaliya." Waxaa halkaas ku
haboon in lagu daro waxay shacabka Soomaaliyeedna doonayaan in dhismahaas
loo soo celiyo, lana xaqiiyo dacwaddii ay fureen labada muwaadin ee
Soomaaliyeed Musa Hersi Fahiye iyo Mohamed Omar.
Dowlad
Safaarad La'aan ah iyo Shacab dulman!.
Safaaradii
Soomaalida ee dalka Kenya waxaa iibsaday danjiriihii dalka Soomaaliya u
fadhiyay ee xilka loo dhiibey ka hor inta aysan bur-burin dowladdii
Soomaaliya wixii intaas ka danbeeyayne dalka Soomaaliya kama jirin wax
dowlad dhexe ah sida aan Qormooyinkii
hore aan ku soo xusay.
Intii u
dhaxeesay sanadkii 1991-2004 dalka Soomaaliya wax danjire ah uma joogin
dalka Kenya, balse dowladii KMG ee uu Madaxwaynaha ka ahaa C/laahi Yusufu
isla markaana uu R/wasaare ka ahaa Cali Mohamed Geedi laguna soo dhisay
dalka Kenya ayaa Danjire Mohamed
Ali Ameeriko u soo magacoowday in uu Danjiraha Soomaaliya ee dalka Kenya
noqodo, iyadoo sannadkii 2007 uu Madaxwaynaha dalka Kenya warqada
ogolaanshaha u gudbiyay sidaasna uu ku noqday Danjiraha rasmiga ah ee dalka
Soomaaliya u fadhiya dalka Kenya ilaa xilligana isaga ayaa danjire ka ah
halkaas.
Dhamaan
dowladii KMG ee dalka Soomaaliya soo maray tan iyo sanadkii 2000 wixii ka
danbeeyay laguna daray dowladda FKMG ee uu Madaxwaynaha ka yahay Shariif
Sheekh Axmed dalka Kenya waa u muhiim sababtuna waa Kenya oo xarun u ah
Dowlado, Heyado sida UN-ka iyo Ururo daneeya arrimaha Soomaaliya sidaas
darteed Safarka ay Masuuliyiinta Soomaalida ku tagaan dalka Kenya wuu ka
badanyahay safarka ay dalka Gudihiisa ku tagaan.!
Dhulka la
iibsaday ee Safaaradii hore ee Soomaaliya ee dalka Kenya dacwadiisa waxa ay
ka socotaa Maxkadama sare ee dalka Kenya balse sida dacwada u socoto iyo
sida ay Dowladda Soomaalida aysan diyaar ugu aheyn in aan dhulkaas gacanta
soomaalida lagu soo celin waxaad is leedahay miyaysan Soomaalidu dowlad
laheen mise dadkan madaxda sheeganaya waa dad aanba aqoon micnaha ay
leedahay arrintan.?
Ugu yaraan
labo mar ayaan tagay Maxkamadda ay dacwada ka socoto balse nasiib daro ma
arag dad xil iska saaraya in dhulkaas la soo celiyo marka laga reebo Danjire
Mohamed Ali Ameeriko iyo Qunsulka Safaaradda Soomaalida Mudane Edson oo
xooga muujinaya dadaal aan u muuqan in uu meel dheer gaari karo.
Shacab dulman!
Dalka Kenya
waxaa dagan ama ku nool Qaxootiga ugu badan ee Soomaali ah isla markaana
waxa ay Soomaalidu ku leedahay ganacsi balaaran inkastoo dhibaatooyin badan
ay ku qabaan joogista dalka Kenya sida….
1-dadka ka soo
carara Dhibaatadda ka jirta Dalka Soomaaliya gaar ahaan Koonfurta Dalka
Soomaaliya ee nabad galyadda u soo raadsada dalka Kenya gaar ahaan marka ay
xuduudka soo galayaan aad ayaa loo dhibaateeyaa iyadoo lacago laaluush laga
qaado iyo dhibaatooyin intaas ka badan, sida Xabsi iyo in dib loogu celiyo
dhibaaadii ay ka soo carareen!
2-Dadka
Soomaalida ah ku nool gudaha Caasimada dalka Kenya ee Nairobi gaar ahaan
xaafaada Islii ee ay Soomaalidu ku badantahay waxaa ka dhaca dhibaatooyin ay
askarta u geestaan dadka shacabka ah , waxaa laga qaadaa lacag baad ah,
mararka qaar waxa ay kaa qaadanayaan wax walba oo jeebkaada ku jira sida
lacag ama Mobile.
3-Dadka Dibaha
ka yimaada ee dalka Kenya safarka ku yimaada marka ay baxayaan iyo marka ay
yimaadaanba dalka Kenya Airpor-ka weyn ee Joma Kenyata ayaa lagu dhibaa
waxaana laga qaataa lacago lagu sheegay in ay yihiin laaluush balse baad ah.
4-Qaxootiga
Soomaalida ah ee ku nool xeryaha Qaxootiga ee dalka Kenya waxaa loo geestaa
dhibaatooyin isku jira dil kufsi iyo dhibaatooyin kalle intaba.
Haddii dowladi
jirto dhulkana uu nabad ah waxan oo dhibaato ah ma dhaceen balse
nasiibdarada nagu dhacday ayay ka midtahay. Waana filayaa in maalin un
Soomaalidu ay heli doonto dowlad iyo nabad.
Dacwadda
dhulka Soomaalida way socotaa, wixii dheeraad ah ee dhulkaas dacwadiisa ku
soo kordhana waan idiin soo gudbin doonaa.
Safaaradda
Soomaalida ee Kenya Maxay Soomaalida u qabataa?
Inkastoo
Dowlad Somaaliyeed oo xoog badan aysan jirin haddana Safaarada Somalida ee
dalka Kenya waa saafaaradaha ugu shaqada badan safaaradaha ay Somalida ku
leedahay dalka dibadiisa sababtuna waxay tahay dalka Kenya oo ah dal ay ku
yaalaan xarumo ay daganyihiin safaarado iyo Heyado daneeya arrimaha Somalia.
Waxyaabaha ugu
muhiimsan ee ay safaarada Somalida ee dalka Kenya ay qabatay waxa ka mid ah.
Soo dhaweenta
iyo ka warqabka Madaxda Dowlada sida Madaxwayaha, Ra'iisul Wasaaraha,
Wasiirka arrimaha dibada iyo mas'uuliyiinta la shaqeeyo Dowladda Soomaaliya.
Isku xirka safaaradda iyo Heyadaha, safaaradaha iyo shaqsiyaadka daneeya
arrimaha Somalia. Gaar ahaan dadka Ajaanibta ah ee safaradda ku aadda dalka
Soomaaliya ee la shaqeeya Heyadaha ama Dowladdaha daneeya Arrimaha
Soomaaliya.
Fududeenta
helida Baasaboorka Somaliga iyo wax u qabashada dadka dhibaatada kala kulma
waaxda socdaalka ee dalka Kenya, sida dadka ay Police-ka dalka Kenya ku
dhibaan Airport-ka iyo xuduudaha dalka Kenya.
La socodka iyo
caawinta Burcad badeeda Somalida ee ku xiran xabsiyo ku yaala dalka Kenya
gaar ahaan waxyaabah ay u qabataan waxaa ugu badan in ay soo booqdaan ama ay
u diraan dad xaalkooda la socdaa balse dan badan lagama galo.
In ay dowlada
Kenya safaarada kala hadashay sidii loo furi lahaa xuduudka dalka Kenya iyo
in la helo xerooyin cusub oo ay dagaan dadka Somalia ka soo barakacaya oo
haatan ay xerada Dhadhaab buux dhaaftay haatan.
Madaxda
Safaarada Somalida waxay u is taageen sidii loo soo celin lahaa dhulkii hore
ee Safaaradda Somalida ee dalka Kenya oo xaafada Westland ee magaalada ku
yaal, waxaa la isla fuulay Maxkad iyadoo wali ay socoto maxkamadii waliba ay
dacwadaasay wali socoto somaliduna rajo wanaagsan ayay ledahay.
Dhawaan sida
ay sheegtay Maxkamada sare ee dalka Kenya waxaa mar kale dib loo dhigay
dacwadii Safaaradda Soomaalida ilaa bisha December oo ah dhamaadka sannadkan
2010, Insha Allah wixii arrintaas ku soo kordha waan idinla soo socodiin
doona, inkasta oo walaac laga muujiyey in dhulkaas la soo celiyo ilaa
Soomaaliya ay ka dhalato dowlad dhaxe oo cagaheeda isku taagto.
Qoraalkii
Safaaradda Soomaalida aan kaga hadlayay intaas ayaan ku soo dhameestiray
wixii aan qaldayne ka raali ahaada.
Qaybihii hore
ka akhri halkan http://somalitalk.com/tag/safaarad/
Dukumiintiga la xiriira iibka safaaradda
ka eeg HALKAN
(magazine) ama halkan
(pdf)
Ibraahim Da'ud
Abdalle
sayfudiin@gmail.com
Kuala Lumpur,
Malaysia.
Faafin: SomaliTalk.com | November 15, 2010