Warar: June 25, 2007
-
Baddy Ackonda oo shaki ka muujiyey hadalkii sheekh Aweys
-
Cali Mahdi “waxaan xiriir la sameynay..
-
Ciidamada Itoobiya ee qaraxa loogu gaystay..
-
Qarax xoogan oo ka dhacay suuqa Bakaaraha...
-
Qaraxyo weli ka sii socda Magaalada Muqdisho...
-
Beri oo 26-ka Juun laga xusayo meelo..
-
Beelaha Hawiye oo ka hadlay Xaaladda Kismaayo
-
Odoyaasha Beesha Sade ee Kismaayo oo...
Waxaa isku soo dubaridey:
Amiin Yuusuf Khasaaro
E-Mail amiinkhasaaro@hotmail.com
Baddy Ackonda oo shaki ka muujiyey hadalkii sheekh Aweys
Afhayeenka Ciidamada Uganda ee Soomaliya jooga Kabtan Baddy
Ackonda ayaa si kulul u beeniyey war ka soo yeeray
Guddoomiyaha Golaha Shuurada Maxaakiimta Islaamiga Sheekh
Xasan Daahir Aweys ee ahaa in ciidamada Uganda iyo kuwa
Itoobiya ay si isku mid ah u weerari doonaan, waxa uuna
warkaasi ku tilmaamay mid aan sal iyo raad toona laheyn.
Afhayeenka waxa uu sheegay in ciidamada Uganda aysan marnaba
ka qayb-qaadan dagaalkii dhex maray ciidamada Itoobiya iyo
kuwa Dowladda oo is garabsanayey iyo kooxihii ka soo
horjeeday ee ka dhacay Muqdisho bilihii Maarso iyo April.
Afhayeenku waxa uu sheegay in ciidamada Uganda ay Soomaaliya
joogaan sidii ay uga qayb-qaadan lahaayeen nabadda iyo dib u
heshiisiinta Ummadda Soomaaliyeed. “Dadkii barakacay ayaanu
gaarsiinay raashin iyo biyo” ayuu yiri Afhayeenka oo intaa
raaciyey “waxaas oo dhan waxaan u sameeneynay sidii aan u
badbaadin lahayn shacabka Soomaaliyeed”. Afhayeenku waxa uu
sheegay in xitaa ay daaweeyeen dadkii ku soo dhaawacmay
dagaaladii ka dhacay magaalada Muqdisho oo ay qaarkood
haatan ku jiraan isbitaalka Ciidamada Uganda ku leeyihiin
Muqdisho. Afhayeenku waxa uu sheegay in ciidamada Uganda ay
ilaaliyaan ilaha dhaqaalaha ee Magaalada Muqdisho, sidoo
kale waxa uu sheegay in ay ka shaqeeyaan sidii ay meel isugu
keeni lahaayeen bulshada Soomaaliyeed. Mas’uuliyiinta
Maxaakiimta Islaamiga ah ayaa horey u sheegay in ciidamada
Uganda ay qayb ka ahaayeen dagaalkii ka dhacay magaalada
Muqdisho, isla markaana ay dusha ka eegayeen xasuuqii loo
gaysaneyay shacabka Soomaaliyeed, sidoo kalana waxa uu
sheegay in goobaha ay degan yihiin ay ahaayeen kuwo looga
soo duulo shacabka Soomaaliyeed.
Cali Mahdi “waxaan xiriir la sameynay..
Guddoomiyaha guddiga dib u
heshiisiinta qaranka Soomaaliyeed Cali Mahdi Max’ed oo
maalmahan ku maqnaa Magaalada Nayroobi ayaa shalay dib ugu
soo laabtay Magaalada Muqdisho waxa uuna sheegay in beesha
caalamka ay diyaar u tahay inay si buuxda u taageero shirka
dib u heshiisiinta soomaaliyeed oo lagu wado in la qabto
15-ka Juulaay.
“waxaan Beesha Caalamka isku
afgaranay kharashka ku baxay shirka dib u heshiisiinta
Soomaaliya’ ayuu yiri Cali Mahdi Max’ed oo sheegay in waqti
aan dib loo dhigi doonin shirka dib u heshiisiinta
Soomaaliyeed, waxaa kale oo uu sheegay in la soo
gebagabeeyey hoolkii lagu qaban lahaa shirka dib u
heshiisiinta Soomaaliyeed, mar waxa laga weydiiyey in ay
xiriir la sameeyeen Maxaakiimta Islaamiga ah, waxa uu
sheegay Cali Mahdi in ay xiriir la sameeyeen Mas’uuliyiinta
ugu sareysa Maxaakiimta Islaamiga oo uu sheegay inay ku
wargeliyeen in ay ka soo qaybgalaan shirka dib u
heshiisiinta Soomaliyeed.
Dhawaan ayaa Guddoomiyaha
guddiga fulinta Maxaakiimta Islaamiga Sheekh Shariif Sheekh
Axmed uu sheegay in shirka dib u heshiisiinta uu yahay mdi
lagu dibindaabyeynayo shacabka Soomaliyeed, laguna
seta-dheereysanayo in dalka lagu sii hayo Gumeysi.
Ciidamada Itoobiya ee qaraxa loogu gaystay..
Wararka naga soo gaaraya
deegaanka Halgan ee Gobalka Hiiraan waxay sheegayan in
Ciidamadii Itoobiya ee halkaasi qaraxa loogu gaystay ay
dalbadeen gurmad aad u xoogan iyo waliba ciidamada baara
miinooyinka.
Ciidamada Itoobiya ayaa ilaa
iyo hadda dhaafi la’ goobtii qaraxa loogu gaystay, iyagoo ka
cabsi qaba in qarax kale wadada loogu aaso.
Ciidankaan oo gaaraya ilaa iyo
25 gaari kana tagay magaalada Muqdisho ayaa weli
deegaankaaasi ku sugan, waxayna kulan la yeesheen Odoyaasha
deegaanka, waxayna ka dalbadeen in gacanta loo soo geliyo
kooxihii ka dambeeyey qaraxaasi, waxaana shalay sidoo kale
halkaasi gaaray ciidamo ka tirsan Dowladda Federaalka.
Qaraxyo weli ka sii socda Magaalada Muqdisho...
Iyadoo habeenkii saddexaad uu
galay bandowgii lagu hayey Magaalada Muqdisho ayaa haddana
waxaa socda qaraxyada iyo dilalka loo gaysanayo Ciidamada
Dowladda Federaalka.
Xalay ayaa qaraxyo waxay ka
dhaceen qaybo ka mid ah magaalada Muqdisho, waxaana meelaha
qaarkood ka dhacay weeraro toos ah, gaar ahaan xaafadaha
Hawl-wadaag iyo Hodan.
Askari ka tirsan Ciidamada
Dowladda ayaa lagu dilay Xaafadda KPP, isagoo ka soo baxayey
Masaajidka Sheekh Cali Suufi, markii Salaadda maqrib la
tukaday kadib.
Ciidamada Dowladda ayaa iyagu
ku suganaa Isgoysyada Magaalada Muqdisho, iyadoo xaafadaha
inta badan horey u gelin.
Bandowga ayaa dadka qaarkiis
waxay sheegeen in uusan waxba ku soo kordhin xaaladda
Nabadgelyo ee magaalada, waxaana sii kordhaya qaraxyada loo
gaysanayo xubnaha ka tirsan Dowladda Fedeaalka.
Qarax xoogan oo ka dhacay suuqa Bakaaraha...
Shalay galabnimadii ayaa waxa
uu qarax ka dhacay isgoyska Hawl-wadaag, waxaana qaraxaasi
ku dhintay labo qofood, oo labo ka mid ah ahayaeen dumarka
ka ganacsada Qaadka.
Qaraxaan oo lala damacsanaa
gaari ay lahaayeen ciidamada Dowladda ayaa qaraxaasi markii
uu dhacay waxay Ciidamadu fureen rasaas ay sidoo kale ku
dhaawacmeen dhowr ruux.
Dadweynaha rayidka ah ee
Magaalada Muqdisho ayaa maalmahan waxay bartil-maameed u
noqdeen qaraxyada iyo rasaasta ay furayaan ciidamada
Dowladda, waxaana bishii la soo dhaafay ilaa iyo haatan
qaraxyadaasi iyo rasaastaasi ku dhintay dad gaaraya Konton
qofood.
Qaraxii shalay ayaa waxa uu
khalkhal geliyey ganacsigii suuqa Bakaaraha, iyadoo
ganacsatada qaarkood xireen goobahoodii ganacsi, sidoo kale
waxaa istaagay isku socodkii gaadiidka oo markii dambe dib u
furmay.
Dhanka kale Magaalada Muqdisho
waxaa xalay laga maqlay qaraxyo iyo rasaas, iyadoo tan iyo
xalay oo dhan la maqlayey rasaasta goos-gooska ah oo la
sheegay in ridayeen ciidmada Dowladda.
Bandowga lagu soo rogay ayaa
hakad gelin amaba aan joojin qaraxyada loo gaysanayo
ciidamada Dowladda iyo goobaha kale ee ay ku sugan ciidamada
Itoobiya, balse waxay dadka qaarkii qeexayaan in ayba sii
kordheen qaraxyadaasi.
Dowladd Federaalka ma aysan sheegin xiliga la qaadayo
bandowga, hase yeesheen mas’uuliyiinta Dowladda qaarkood
ayaa sheegay in bandowgaasi uu wax weyn ka qabtay
nabadgelyada Magaalada Muqdisho .
Beri oo 26-ka Juun laga xusayo meelo..
Beri oo ku began 26-ka juun oo
ah maalintii ay xoriyadda qaateen gobalada Waqooyi, waxaana
haatan socda diyaargaroow loogu jiro maalintaasi.
Dowladda Federaalka ayaa la
filayaa in manta ay magacowdo guddi isku dubarida
munaasabadaha 1-da luulyo iyo 26-ka Juun.
Munaasabadahani ayaa waxay ku
soo beegmeen xili Magaalada Muqdisho ay ka jiraan qaraxyo
iyo dilal, iyadoo munaasabadahan oo kale ay dhici jireen
banaanbaxyo iyo fantiyo weyn oo lagu xusayo Maalmaha
xoriyadda.
Wararka naga soo gaaraya
Baydhabo ayaa sheegay in magaaladaasi ka socoto diyaargarow
xoogan oo loogu jiro maalmahaasi si weyn looga qiimo dalka
Soomaaliya.
Dadka qaarkii ayaa qaba in xilgaani aysan habooneyn in la
qabto xaflado ku aadan Maalinta xoriyadda maadaama dalka
haatan ku sugan yihiin ciidamo Itoobiyaan ah oo ay sheegeen
in ay sharci daro dalka ku soo galeen.
Beelaha Hawiye oo ka hadlay Xaaladda....
Kulan ay shalay isugu
yimaadeen Waxgaradka iyo Odoyaasha Beelaha Hawiye ayaa waxaa
looga hadlay xaaladda Magaalada Kismaayo, waxayna
cambaareeyeen dagaaladii dhawaan ka dhacay magaalada
Kismaayo.
Labada dhinac ee ku dagaalamay
Kismaayo ayay u soo jeediyeen inay khilaafkooda ku xaliyaan
wada hadal iyo isafgarad, isla markaana dhawaan beelaha
Soomaaliyeed ee gobalkaasi degan laga qaybgeliyo wada
hadalada iyo maamulka loo sameynayo.
Odoyaasha Beelaha Hawiye waxay
sheegeen in ay diyaar u yihiin inay ka qayb-qaataan dib u
heshiisiin la dhex dhigo kooxaha ku dagaalamaya magaalada
Kismaayo.
Dhanka kale Qaar ka tirsan
Mas’uuliyiinta Dowladda ayaa Dowladda Federaalka ku eedeeyey
in ay mas’uul ka tahay dagaalada mar kasta ku soo
noqnoqonaya Magaalada Kismaayo.
Odoyaasha Beesha Sade ee Kismaayo oo...
Wararka ka imaanaya magaalada
Kismaayo waxay sheegayaan in kulan ay shalay isugu yimaadeen
Odoyaasha Beesha Sade looga hadlay xaaladda Magaalada
Kismaayo, waxayna ku baaqeen in marka hore xabadda la
joojiyo wixii khilaaf ahna wada hadal lagu xaliyo, sidoo
kale waxay ku baaqeen in sida ugu dhasiyaha badan dib loogu
celiyo hantidii laga qaatay qaar ka mid ah dadka degan
Magaalada Kismaayo.
Odoyaasha ayaa war-saxaafadeed
ay soo saareen sidoo kale ku baaqay in sida ugu dhaqsiyaha
badan Maleeshiyooyinka looga saaro magaalada Kismaayo, isla
markaana la hawlgeliyo ciidamada Booliiska si ay u sugaan
nabadgelyada Magaalada.
Sidoo kale waxay sheegeen in
ay soo dhaweynayaan cid kasta oo wada waan-waan nabadeed si
xal loogu helo magaalada Kismaayo, sidoo kale waxay
sheegeen in ay la shaqeynayaan Dowladda Federaalka, iyagoo
dowladdana u soo jeediyey in sida ugu dhaqsiyaha badan loo
dhiso maamul cadaalad ku dhisan.
Dhawaan ayaa Magaalada
Kismaayo waxaa ka dhacay dagaal ay ku dhinteen dad badan,
kaas oo u dhexeyey labo ciidan oo ka tirsanaa Dowladda
Federaalka oo hab beeleed u kala saftay.
Ciidankii ku sugnaa magaalada
Kismaayo ayay u suuragashay in ay Magaalada ka saaraan
kooxihii ka soo horjeeday, waxayna Odoyaashu sheegeen in la
qabto kulamo kale oo lagu soo afjaro khilaafka sii daba
dheeraanaya.
Amiin Yuusuf
Khasaaro
E-Mail
amiinkhasaaro@hotmail.com
Faafin: SomaliTalk.com | June 25, 2007
Afhayeenk Ciidanka
Uganda oo shaki ka muujiyey hadalkii sheekh Aweys
Cali Mahdi “waxaan xiriir la sameynay..
Ciidamada Itoobiya ee qaraxa loogu gaystay..
Qarax xoogan oo ka dhacay suuqa Bakaaraha...
Qaraxyo weli ka sii socda Magaalada Muqdisho...
Beri oo 26-ka Juun laga xusayo meelo..
Beelaha Hawiye oo ka hadlay Xaaladda Kismaayo
Odoyaasha Beesha Sade ee Kismaayo oo...
Wararka oo dhan
ka akhri halkan....
Jun 25
| 
Daabaco Boggan | Print
"
Dowlada FKMG Ah Ee Soomaaliya
ARAGTIDA/MAQAALLADA DADWEYNAHA EE MAANTA