abdalle9@hotmail.com

---

GABAY: BAAQ NABADA BAAN XAMAR U DIRI
 

Waxa tiriyey: Maxamuud Axmed Cabdalle (shiine)
06/21/2009
Email: abdalle9@hotmail.com  

Gabayga Halkan ka Dhegeyso ama soo rogo (mp3)
 

1. Baaq nabada baan Xamar u diri, labada baalloode
2. Barbarrada xarbiyayaan wanaag, baaninahayaaye
3. Birmageydadaan doonayaa, inay badbaadaane
4. Beladiyo colaaddaan dadyohow, baaja leeyahaye 
    
5. Soomaali waxa bi'iyey waa, bah iyo reer reere
6. Bili beena iyo madaxnimiyo, baashi baan ahaye
7. Qarankeedi goortuu burburay, ee la kala baydhshey
8. Hadday bahala dirirtaa sidii, beer fircooniyaahee 
    
9. Nin walbiba badsuun baa hoddiyo, beegsi magac weyne
10. Bal inuu caqligu wada bukooy, maanka wada beeshay
11. Waxa biraha loo tumanayaa, buul horaw dumayee 
     
12. Afartaasi waa baaqan diri, nabad u baaweyne
13. Waa beer walaaliyo kalgacal, biiro, iyo waano
14. Afar kalena waa boorrin iyo, beyd xusuus mudane 
     
15. Baaddilkii qabiilaysigiyo, boqontii lays heeray
16. Bilaash gawracii maatadiyo, bederradii le'eday
17. Baroortii habeen iyo dharaar, bogox ka yeeraysey
18. Muqdishaay nabsigii biiraybaa, haatan soo baxayee 
     
19. Beergooyadiyo, boqol jirkii laga xishoon waayey
20. Cawradii la buubsanahayee, ee la bixin waayey
21. Birta sebigii lagu gawracee, bahalka loo xooray
22. Shiirkole wixii booldhay oday, lagu biraynaayey 
     
23. Kaaraan wixii mayd baryaye, BMku cantuugay
24. Suuq Bacaad wixii dhiig burqaday, bilistu yuusaysay
25. Nasiib Buundo wixii baas cuskaday, baanji lagu laayey
26. Wixii beyd nin kale loo dhacaye, boobka lagu qaatay 
     
27. Baduuggii Curuubiyo, Jubbiyo, baro dalxiisaadka
28. Bamkii bilicda Xamar Weyn ka dilay, boobihiyo jiibka
29. Madfacii halkuu beegsadaba, lagu butaacsiiyey
30. Barakaciyo kala oodankii, baylah buu dhalayee 

    WARAYSIGII DR. RAABEH- 2005

    "Kuwa xabashida u tegey waxaysan garanayn xabashi, waxaysan garanay sidii xabashidu u gashay kuwii ayaga ka horeeyey" Akhri... (2005)

    QORMADII DR. C/LAHI EE 2007:

    YAA GABLAMI, YAASE GOOD DILI? - Soo cusboonaysiin qoraalkii Dr. C/laahi ee 2007

    C/RISAAQ XAAJI XUSEEN- 2002

    Qoraalkii  uu C/Risaaq Xaaji Xuseen  2002  Ka Qoray Faragelinta Itoobiya ee Arrimaha Gudaha  Soomaaliya.. Akhri

    :::GABAYGII SHIINE::: GABAY: DABDHEER May 15 oo ku aaddan aasaaskii SYL.. Akhri

31. Maantana ma bela qoon wataa, kugu butaynaaya?
32. Ma baab diina bay taagan tahay, waxad barooddaaba?
33. Is biimayn miyaa lagu dilaa, boqol masaakiina?
34. Bulshadii intii kugu hadhaa, beebbe lagu seemay? 
     
35. Rabbiyow badbaadiyo kusii, nabadda oo baahda
36. Berya hodantigaagii markale, lagugu soo booqdo
37. Beladiyo allow kaa xijaab, baaskan kugu raagey
38. Barbaartii samaha lagu yiqiin, kugu barwaaqowdo 
     
39. Afarkalena buun qayla dhaan, baan ku dirayaaye
40. Bi'i waaye Soomaaliyeey, bariya ciiddeenna
41. Baallaha kalow soo birmada, beer qudhaa nahaye
42. Bari iyo Waqooyow tashada, banaha soo awda 
     
43. Nabsigu waa belaayee ka baqa, beladu waa guule
44. Bawdada walaal niman asturin, duni ku baayaalye
45. Berraa cadawgu soo beegayaa, baasha ula noole
46. Tolla'ayeey bog Soomaaliyeed, yaa u boyn waayey? 

Waxa tiriyey: Maxamuud Axmed Cabdalle (shiine)
06/21/2009
Email: abdalle9@hotmail.com 

Sidoo kale dhegeyso maansada XALKU MAAHA.. Dhegeyso ama soo rogo