 |
|
Sh. Muxamed Idris Axmad
waxa uu halkan kusoo gudbin doonaa maqaal maalinle ah iyo mid asbuuci ah
oo Axadda kusoo bixi doona SomaliTalk.com, insha Allah, ee sidaas la
soco. Sh. Muxamed Idris waxa uu noqday madaxa golaha imaamyadana ee
Woqooyiga Ameerika, iyo Iimaamkii Masjidka Assunah ee Atlanta, Georgia
iyo Masjidka ibn taymiyah ee Columbus, Ohio. Waxaana lagala
xiriiri karaa Emailka:
dalyaqaan@yahoo.com |
|
April 23, 2006 |
MASHRUUCA SOOMAALIYADA CUSUB!!
Waxaan ka qayb galay
shirweynihii jaaliyadda Soomaaliyeed ee Norway oo lagu qabtay magaala madaxda
Oslo 13-17/4/2006. Waxaana kasoo qayb galay dad weyne fara badan oo isaga yimi
dalka Norway qaybihiisa kala duwan, iyo dalalka scandinavianka guud ahaan ee
Sweden iyo Denmark. Waxaana dadkaasu gaareen ama ka badnaayeen qiyaasti 1500.
Hal ku dhegga Shirku wuxuu ahaa: Ilaa ay iyagu is bedelaan!! Taasoo ah qayb ka
mida aayad qur’aana oo macneheedu yahay:
((Ilaahay qawm wexey ku sugan
yihiin ma bedelo, haddaan iyaga wax iska bedelin)) .
Shirka aad ayaa loo soo
agaasimey, waxaana lagu qabtay, meel shirarka loogu tala galay oo uu leeyahay
iskuul ku yaal bartamaha magaalada oslo. Waxaa bartamaha magaalada aad uga
muuqanayey maalmahaas uu shirku socdey, oo dalka fasax ka ahayd, dadweyne aad u
fara badan oo soomaaliya, oo dharkooda gaarka ah qaba, sida dumarka xijaaban, ee
jilbaabka wata, raga cimaamadaha iyo qamiisyada qaba, iyo caruurta soomaaliyeed
oo lebesyadaas oo kale xidhan.
UMMAD DAYACAN!!
Waxaan la tiiraanyaysnahay, la
murugaysnahay, Dadkan aan dalka lahayn, oo dibaddda ku dayacan, oo ubadkoodu
lumayo, oo dhaqankooda iyo diintoodu halista ku jirto, oo afkoodi soomaali
dabaysha raacay, oo dal ay dugsadaan iyo dawlad ay ku abtirsadaan aan haysan.
Waxaan la tiiraanyaysnahay, oo
la gubanayaa, sida aynu u kala daadsanahay. Dadku wuxuu leeyahay dal uu ku hirto,
maxasta ku urursado, mustaqbal ka dhisto maalmaha adduunyada.
Innagana wadankeeni bahala
galeen ayuu noqday. Wuxuu adduunka ka dambeeyaa qarniyaal. Wuxuu ku
mashquulsanyahay siduu habeen iyo maalin isugu urursan lahaa dagaal aan macna
lahayn, natiijana lahayn.
Haddaan diinta Allaah ee la
diidayo in laysku xukumo, laysu bedelin in la ogolaado, Haddaan Colaadda dadka
dhexdoodaa nabad loo bedelin, Haddaan qabyaaladda na curyaamisey is jeclaan loo
bedelin, Haddaan isku dan inaan nahay ayan naga dhaadhicin, oo dan qabiil
keligiis inaaney socon Karin lagu qancin, haddaan danta guud tan gaarka ah laga
hor marin, haddaan aqoonta iyo waaya aragnimada shaqada lagu qaban, haddaan
dagaalada sokeeye cirib xuma maahine wax kale inaaney lahayn la ogaan, haddaan
danta guud iyo dalka la wada dhawrin, haddaan nafteennu sidaas isu bedelin,
waxaa la hubaa inaan xaalladda guud wax iska bedelayn.
SOOMAALIYADA
CUSUB
Waxaan u baahannahay Soomaalida
cusub ee is bedeshey iney isu tagto oo wada xiriirto.
Waxaan ku talin
lahaa:
1)
Soomaalida cusub ee is bedeshey iney bar ay ku kulanto kuna wada xiriirto loo
sameeyo, gaar ahaan xarumaha internetka
2)
Qof
walba oo soomaaliya oo is bedeley oo soomaalida cusub ku biiraya ee dooneysa
dadkeeda iyo dalkeeda iney badbaadiso, ayagoo ka duulaya diinteenna, inuu is
diiwaan geliyo.
3)
In
Ammusanayaasha (soomaali ugu badan) ay codkooda furan oo is diiwaan geliyaan.
4)
In
hal milyan oo qof oo Sooomaaliya oo rag iyo dumar leh, yar iyo weyn leh, gudo
iyo dibad jooga, gobol kasta iyo beel kasta u dhashay, ay diiwaanka u horreeya
buuxiyaan.
5)
In
Sooomaalidaas cusubi ay saxiixdo
(BAAQA
SOOMAALIYADA CUSUB).
Taasoo ah:
(Waxaanu dooneynaa Soomaaliya xora oo Nabada, dawlad iyo maamul
kala dameeya leh, diinteeda ku dhaqanta, xorriyad dalkeeda ugu noolaata,
shisheeye soo fara gelin, aqoon iyo amaano masuuliyadda lagu doorto, qabyaalad
iyo gobolaysi ka xorowda, damiir islaanimo iyo wadaninimo leh, dagaalka
dhexdoodaa joojiya, dalkooda dib u dhista, degganaan iyo nolol wanaagsan
bulshadeeda ugu dadaasha, qaxootiga iyo ummadda adduunka ku kala firiqday
dalkooda ku soo celisa, facyaasha soomaaliyeed ee soo socdana nolol islaameed oo
wanaagsan ugu gogolxaara.
Waxaan diyaar u ahay, doonayaana, in soomaaliyadaas cusub ee
adduunka khariidadiisa caqli iyo cilmi cusub ku soo gasha dhismeheeda ka qayb
qaato, naf iyo maalna ku bixiyo ilaahay idanki, anigoo Ilaahay aakhiro ajar kaga
doonaaya)).
6)
Waxaan soo jeedin lahaa, in (Soomaalida cusubi) Meel kastoo ay joogto, hammigaas
xambaarto, fidiso, bulshada u horseeddo, odayaasha iyo beelaha iyo culimada iyo
aqoon yahanka (SOOMAALIYADA CUSUB) doonayaa xilkaas qaadaan.
Xaaladda aan ku suganahay
soomaali ahaan mid loo adkaysan karo maaha, haddii aynaan is bedelin, xaalkeenna
wax ka bedelin, danteenna u dhaqaaqin, mustaqbalka facyada soo socda wuu madow
yahay, haddaan Ilaahay sabata bixin.
Waxaan shaki ku jirin, haddii (soomaalida
cusub) ee (Soomaliyada cusub ) dooneysaa dhaqaaqdo inaan wax is hortaagi karaa
jirin inshallaahu, iyo wax kala geyn kara toonna.
Ummad dooneysa iney noolaato,
ubadkeeda mustaqbal u jeexdo, dugaagga iyo wax ma garadka wadadeeda ka leexiso,
dalkeeda iyo nolosheeda dhisato.
Japan markii ay dagaalka
adduunka kazoo baxday iyadoo burburtay, wexey ku tashatay iney adduunka aqoon ku
gaarto oo dhaafto. 13 sano ayey ku qaadatay, iney kacdoon cilmi iyo sanco ah
hormariso.
Maku tashan karta (Soomalida
cusubi) iney barnaamij 10 sano ah oo nolol cusuba wadankeeda iyo dadkeeda u
bilawdo. Waa nolosha aaney garan Karin,
XAABADA, WAX
MAGARADKA AH, EE DAGAALKA aan natiijada lahayn keliya yaqaan, iney DAMBASKA IYO
QASHINKA (16) SANO DHEX FADHIYAAN,DANTA MOODEY, WELINA ISLA QUMMAN YIHIIN.
Soomaalida wanaaga jecel waxaan
ka codsan lahaa, iney afka iyo qalinkaba ku hadlaan, oo codkooda muujiyaan.
MA DOOONEYNAA
INAAN DAD MUSLIMA OO NOLOL WANAAGSAN DHISTA NOQONO, MISE WAXAAN ISKA AHAANNA ARI
DHURWAAYADA MANAXAYAASHA AHI HADBA DHINAC U CAYRINAYAAN?
Qore: SH. Maxamed Idris
dalyaqaan@yahoo.com
Afeef: Aragtida qoraalkan waxaa leh
qoraaga ku saxiixan
Faafin: SomaliTalk.com | April
23,
2006
SHUKRAN
MALAYSIA: Qaybtii 1aad
| Qaybtii 2aad | Qaybtii 3aad |
Qaybtii 4aad | Qaybtii
5aad | Qaybtii 6aad |
Qaybtii 7aad | Qaybtii 8aad |
Qaybtii 9aad | Qaybtii 10aad |
CALOOL XUMO: 1
| 2 | 3 | 
Daabaco
Boggan | Print