Wasiirka Saxiixay Heshiiska Badda waa Inuu is Casilaa si aan uga noqono heshiiska

Waxaa qoray
Xuseen Cabdi
hussein_abdi@hotmail.com

Soomaaliya waxay ahayd haddana wali tahay dal aan dadkii lahaa ku noolayn oo ah dal dad waayey maxaa yeelay kheyraadkiisa bad iyo barriba ilaahay ku manaystay waan ka faa’iidaysan kari waynay cid kalena ma rabto inay nooga faa’iideeyso oo waxaa la doonayaa marka qaarkeen wadanka isaga baxaan, qaarna xabadi dhammayso, qaarna cudurro dhammeeyaan anagoo wali tuugsanayna Gellay iyo Qamaddi ama Arabakhi waxaan dhihi jirnay bari samaadkii isla markaana ay qaaraan noo uruurinayaan kuwa dad noogu neceb, oo ay uga dan leeyihiin inay isku keen sii dhammeeyaan isla markaana isku diidan Mad-habado, Qabiillo iyo aragtiyo kale oo midna midda kale ogolayn, dhan kaliya isugu raaci la’ ay quruumo kale iska qaybsadaan taasi oo ifa faaleheedii mar hore joornaalada lagu qoray^[1] TVyadana laga sheegay in Soomaaliya la doonayo inay kala qayb sadaan wadamo gaallo ah oo waliba ah wadamada dariska ah Kiristaanka ah walina gumaysta dhulalka ay Soomaaliya leedahay isla markaana ay ku nool yihiin dad Soomaaliyeed oo ku hadla Afka Soomaaliga isla markaana Muslim ah oo aan wax la wadaagin dawladahaas kirstaanka ah.

Soomaaliya waa wadan hodan ah isla markaana dadkeedu ay ka faa’iidaysan waayeen kheyraadka iyo nimcada taalla ee Rabbi ku mannaystay kheyraadkaas oo si kastaba nooga badan haddii sida uu yahay aan uga faa’iidaysano. Soomaaliya hadda waxay maraysaa heerkii ugu hooseeyey nolosha bani’aadamka oo aysan dhaqnayn ama badbaadin wax kasta oo nolosha bani’aadamku ku suuroobasay ayna ka mid yihiin Nabadda, horumarka iyo ka faa’iidaysiga nimcada alle SWT dhigay dhulkeena kor iyo kalba. Waxaana Rumoobay Xadiithkii Nabi Muxammad SWC kaga digaayey dadka muslimka ah inay xaaladdoodu gaarto, Xadiithkuna wuxuu ahaa marka ay ummaduhu isugu kiin yeeran doonaan sida marka dadka wax ku wada cunayaa Xeero ay isugu yeertaan oo markaas Asaxaabi ka mid ah kuwii markaa ka ag dhawaa uu yiri oo ma yaraan aan yar nahaybaa markaas ayuu nabi Muxammad SWC wuxuu yiri {waad badan tihiin laakiin waxaad tihiin Daadxoorta kanaalka markuu biyo keeno dusha ka saraan oo kale.}

Xadiithka oo dheeraa waxaan uga jeedaa dulucda ah inay ummaduhu isugu keen yeeranayaan maanta si nin walba ama qolo walbaa ay dhankeeda xeerada uga cunto, waxaana daliil u ah in maanta ay badda Soomaaliya ku jiraan ugu yaraan 20 dawladood maraakiibtood kuwaas oo marna ka kalluumaysanaya marna macdanta badda ku jira labaxaya, marna sunta warshadahoodu soo saaraan iyo tan nukliyeerka ku daadinaya. Markaa haddaan usoo noqdo dulucda mawduucayga oo ah {waa inuu is casilaa wasiirka Kenya u saxiixay heshiiska…} Markaan akhriyey heshiiska sida loo qoray waxaa weeye in Soomaaliya iyo Kenya khilaaf xagga badda ah ka soo dhex jiray isla markaana ay hadda labada dawladood ka dib markay ku heshiin waayeen inay arrintaas u gudbiyaa Qaramada Midoobay, taas oo aan horay looga maqal warbaahinta midda maxaliga ah iyo tan caalamigaaba inay Soomaaliya iyo Kiinya isku haystaan dhul badeed. Markaa arrntaas markaan ka fakaray fiiriyeyna mudada lagu saxiixay heshiiska

Inay wasiirka u gaysay arrintani khibrad la’aan iyo isagoo la siray laguna siray habka qoraalka loo qoray oo ah in asagana warqad la tusay uu akhriyo kadibna ka soo fakaro, markii la saxiixayna la soo qoray warqad kale oo ka duwan tii hore laakiin u eg markaana markii la joogo waqtigii saxiixa hoosta laga soo galiyey oo uu sidaas ku saxiixay.
In wasiirka laga tiro batay oo dad badan oo wasaaradda arrimaha dibadda ee Kenya ka tirsani ay wareeriyeen isla markaana la hafiyey ama uu ku dhex wareeray maadaama uu dalkooda joogay ayna marti galinayeen si ay uga dhammeystaan waxay doonayeen oo ah inay mar uun heshiiskaas ka helaan laguna wareeriyey marti soor wanaagsan iyo soo dhaweyn si ay ugu noqoto inuu ka soo baxo wanaaggii loo galay.
Waxaa laga yaabaa wasiirka inay u gaysay arrintaas inay ka ahayd difaac uu badda Soomaaliyeed difaacayey maaddama ay sheegatay dawlad wayn oo daris ah isla markaana taageersan dawladdiisa si ay saaxiibtinnimadoodu u sii siyaaddo, markaana u caddeeyo dawladda inaysan arrintaas ay sheeganayso Kenya dawladdiisu raalli ka ahayn laakiin uusan ka warqabin waxa ka dhalin arrintaas saxiixa ee waliba ku cad inay muran ku jirto biyo badeed ay Somalia leeday!

Wasiirka saxiixay is-afgaradka Kenya iyo Soomaaliya ee ku saabsan badda Soomaaliya: C/raxmaan C/shukuur Warsame

Laakiin wasiirka waxaa hadda u furan inuu is casilo si uu u burburo heshiiskaas isla markaana uu caddeeyo inuu ku qaldamay saxiixa heshiiskaas laguna siray oo aysan aqbalayn shacabka Soomaaliyeed iyo dawladdiisu toona isla markaana uu sidaas ku noqonayo Waddani danta dalkiisa ka hormariyey danaha kale oo dhan. Markaan aan leeyahay wasiirku wuxuu ku doodi karaa inuu qaldamay waxaa weeye macnaha inuu qaladku ka dhaci karo qofkasta oo bani aadam ah arrintaasna waxaa caddaynaya Xadiithkii Nabigeenna Muxammed CSW uu ku yiri { Bani’aadamka oo dhan waa gaf badane waxaana ugu kheyr badan kuwa gafa ka toobad keena gafkooda}. Qofku inuu qaladkiisa ka noqdo ayaa ka fiican inuu ku dheganaado ama ku adkaysto waayo waa geesinimo uu qofkaasi muujiyey isla markaana darsin u noqonaysa ama cashar inuusan ku dag dagin wax uusan kala tashan dadka khibradda u leh arrintaas.

Ugu dambayntii waxaan ku soo gunaanadayaa qoraalkayga baaqna ugu soo jeedinayaa Dawladda inay ka noqoto heshiiskaas isla markaana ay warbixinta badaheenna cabbirkooda, dhererkooda iyo badkoodaba ay si madax bannaan ugu gudbistaan Qaramada Midoobay ama UNka isla markaana ay u sheegaan qoraalkii hore ee dhex maray annaga iyo Kenya inuu yahay mid laga noqday, waxaan kaloo halkaan mahad ballaarin ugu soo gudbinayaa Warbaahinta bahda SomaliTalk.com oo juhdi badan galiyey, cilmi baaris dheerna ka diyaariyey qadiyaddan xasaasiga isla markaana u soo gudbiyey Shacabweynaha Soomaaliyeed meelkasta oo ay dunida ka joogaan.

Waxaa Qoray

Xuseen Cabdi|
hussein_abdi@hotmail.com

[1] Why Kenya and Ethiopia ought to annex and divide Somalia