Madaxweynaha dowlada FKMG Soomaaliya Shiikh Shariif oo sheegay in wadamada
Uganda iyo Burundi ay ka ogolaadeen in ciidamadooda ay sii joogaan Soomaaliya
tan iyo inta dowlada ay gaareyso isku filnaansho dhankasta ah.
(SomaliTalk.com, Muqdisho, March 28, 2009): Madaxweynaha dowladda FKMG
Soomaaliya Sheekh Shariif Sheekh Axmed oo maanta (Sabti) shir jaraa’id ku qabtay
Magaalada Muqdisho ayaa sheegay in uu kala hadlay Madaxweynayaasha Burundi iyo
Uganda sidii ay u caawin lahaayeen dowladda KMG inta ay isaga filnaanayso.
Madaxweyne Sheekh Shariif Sheekh Axmed oo warfidiyeenada kula hadlayay Aqalka
Madaxtooyada ee Villa Soomaaliya kadib markii uu shalay ka soo laabtay wadamo uu
safaro ku tagay oo dibadda ah ayaa sheegay in dowladaha Burundi iyo Uganda oo
ciidamo ay ka joogaan Soomaaliya ay kala hadleen sidii ay u caawin lahaayeen
Soomaaliya ilaa inta ay ciidamo ka samaysanayso.
“Waxaad la socotiin in Ciidamada AMISOM ay ka mid ahaayeen heshiiskii lagu soo
saxiixday dalka Jabuuti,marka anaga wadamadaasi waxaan u gubinay qorshaha
dowladda oo ah in ciidamo ay dhisato,dadka inaga soo horjeedana aan la
heshiino”ayuu yiri madaxweyne Sheekh Shariif.
Sidoo kale madaxweynaha Soomaaliya Sheekh Shariif Sheekh Axmed ayaa sheegay in
dowladaha Liibiya iyo Suudaan markii ay la soo kulmeen ay u sheegeen in ay
wadaan qorshayaal ay isugu keenayaan dowladda KMG iyo dhinacyada kale ee
"Mucaaradka" ee ka soo horjeeda dowladda uu madaxweynaha ka yahay isaga.
Sheikh Shariif Sheekh Axmed Madaxweynaha DFKMG ee Soomaaliya ayaa waxaa uu
tilmaamay in ay wadaan qorshayaal ay isugu dhafayaan ciidamadii dowladda TFG-da
iyo kuwa Maxkamadaha Islaamiga iyo sidoo kale sidii darees loogu qeybin lahaa oo
ay u wada shaqeyn lahaayeen labada dhinac.
Madaxweynaha ayaa waxaa uu ka hadlay hadalkii dhawaan ka soo yeeray Madaxa
Ururka Al Qaacida ee Cusaama bin Laadin ee uu ku baaqay in lala dagaalamo
dowladda uu madaxweynaha ka yahay,waxaana uu sheegay madaxweynuhu in warkaasi uu
yahay waxa laga xumaado oo aan loo baahnayn in al qaacida xiligaani ay ka
hadsaho Soomaaliya.
“Waxaan Aad ugu xumahay In Al qaacida wax ay ka hadasho inteey weyday maanta ay
Soomaaliya oo haatan dowlada dhisatay oo heshiisay ay ugu baaqayso in ay
dagaalamaan”ayuu hadalkiisii intaasi ku daray Madaxweyanaha.
Mar wax laga weydiiyay weerarkii dhawaan loo geystay Wasiirka arimaha gudaha
dowladda KMG Soomaaliya sheikh C/qaadir Cali Cumar ayuu sheegay Madaxweymuhu in
uu falkaasi uu ahaa mid aan loo baahanayn oo aan ku banaanayn shareecada
Islaamka in dhiig Muslim la daadiyo.
“Ninkii aaminsan maanta in dilka wasiirka arimaha gudaha uu jano ku galayo in uu
qaldanyahay dhamaanteen waan wada ogsoonahay,anagana Al qaacida diin naba
barin,deeqna namasiin, dowladna nooma dhisin”ayuu ku nuux nuuxsaday madaxweynuha
DFKMG.
Ugu dambeyntii madaxweynaha dowladda KMG Soomaaliya Sheekh Shariif Sheekh
Axmed ayaa sheegay in kulan ay maanta ku yeesheen isaga iyo wasiirada dowladda
KMG xarunta Madaxtooyada ay ka wada hadleen waxyaabihii intii uu dibadda ku
maqnaa u soo qabsoomay iyo sidoo kale waxyaaabihii wasiiradu ay qabteen iyo
arimaha wadahadalada
Muuse Maxamuud Jiisow
musejisow@hotmail.com
Muqdisho Bakaaro Somalia
00252-1-5576666
00252-50-907666
Faafin: SomaliTalk.com | March 28, 2009
Daabaco
Boggan | Print
