Hoos u dhac ku yimid cudurka duumada (malaariyada) Soomaaliya iyada oo
UNICEF ay kor u qaadeyso qaybinta marokaneecada
NAYROOBI, 25 Abriil 2009 – UNICEF ayaa kor u qaadaysa qaybintii
Marokaneecada La Daweeyey ee Cimriga Dheer ay ka qaybisneysay Soomaaliya
waxaana la xaqiiqsaday in taasi ay qayb ka qaadatay hoos u dhaca ku
yimid cudurka duumada, Wakiilka UNICEF Christian Balslev-Olesen ayaa
sidaa yiri isaga oo ka hadlaya dabaaldegga Maalinta Duumada Adduunka.
Iyada oo la qiyaasey in ay duumadu ku dhacday 608,831 qof oo lagu soo
waramey in 3,491 qof ay u dhinteen, ayaa weli Soomaaliya ay duumadu ka
tahay dhibaato weyn oo caafimaadka dadweynaha haysata taas oo u baahan
dadaal wadajir ah si loogu xakameeyo si taabogal ah. Culaysku waxa uu ku
badan yahay hareeraha webiyada iyo degsiimooyinka leh berkadaha biyaha
lagu kaydiyo halkaas oo sanadka oo dhan cudurka la is qaadsiiyo,
goobahaa ayaa u badan Bartamaha/Koonfurta Soomaaliya. Carruurta ka yar
shan sano jirka iyo haweenka uurka leh ayaa si gaar ah cudurka ugu
nugul, iyaga ayaana u badan xaaladaha iyo dhimashada la soo sheegey.
“Si dhab ah ayaa loo ogaadey in si ballaaran u isticmaalidda
Marokaneecada La Daweeyey ee Cimriga Dheer ay tahay habka ugu wanaagsan
ee duumada la isaga ilaaliyo Bartamaha/Koonfurta Soomaaliya iyada oo
dadka isticmaala marokaneecada daaweysan ee cimriga dheer ee ay ku
dhacday ay guud ahaan gaarayaan 6.9% marka la barbardhigo 17% oo ah kuwa
aan hoos seexan marokaneecada,” ayuu yiri Balslev-Olesen, “UNICEF oo la
shaqeyneysa la hawlgalayaal kala duwan ayaa ugu yaraan 1.5 milyan oo
marokaneeco daweysan oo cimri dheer ah ka qaybisey Soomaaliya oo dhan
saddexdii sano ee ugu dambeeyey, sanadkan 2009kana 350,000 oo kale ayaa
la qaybin doonnaa.”
Qaybinta marokaneecooyinka ayaa waxaa suurtageliyey taageero laga
heley Maaliyadda Caalamiga ah ee lagula dagaallamo AIDS-ka, Qaaxada iyo
Duumada (GFATM). UNICEF oo u mareysa la-hawlgalayaasheeda ayaa
xaqiijisey in marokaneecooyinkani si toos ah ay u helaan bulshooyinka
waxaana ay tiigsaneysaa in ay hubiso in ay qaybintu socoto si dadka loo
wada gaarsiiyo sanadka 2013ka taas oo qayb ka ah yoolka muddada dhow ee
Qorshaha Caalamiga ah ee Wax ka qabashada Duumada.
Saboolnimada badatey oo ay uga sii dareen iskahorimaadyada iyo
degaanka aan ammaanka ahayn ee Soomaaliya – taas oo micnaheedu noqday in
qoysasku aaney helin dakhli joogto ah – ayaa UNICEF u qaadatey
istiraatiijiyad bulshada oo dhan loogu wadaqaybinayo iyada oo dhammaan
qoysaska ku nool goobo gaar ah oo Soomaaliya ka mid ah siineysa laba
marokaneeco si kor loogu qaado dadka la gaarayo. Marokaneecada ayaa
lacag la’aan lagu siinayaa qoysaska iyada oo aan la eegeyn in ay iibsan
karaan iyo in kale. Qoysaska ayaa lagu dhiirigeliyaa in ay surtaan
marokaneecada oo ayna isticmaalaan mar kasta oo ay seexanayaan, gaar
ahaan haweenka uurka leh iyo carruurta ka yar 5 sano jirka.
“Ilaa iyo hadda, 60% degmooyinka duumadu ku badan tahay ee la
beegsaday ayaa si lagu qanacsan yahay loo gaarsiiyey. Arrinta xigta ee
muhiimadda lihi waxa ay tahay in la dhammeystiro oo la gaaro degmooyinka
harey iyada oo loo beddelayo Marokaneecada degaannada markii ugu
dambeysey loo qaybiyey saddex sano ka hor.” Ayuu yiri Balslev-Olesen.
UNICEF ayaa ilaa sanadkii 2006dii, shaqaalaha caafimaadka ee dalka ku
tababareysey sida loo daweeyo duumada iyada oo la isticmaalayo nooca
daaweynta Artemesinin-based Combination Therapy (ACT).
Istiraatiijiyaddan daaweynta ee cusubi ayaa muhiim u ahayd si loo
beddelo daawooyinka ay si weyn duumadu ugu adkeysaneysey. Qaybinta maro
kaneecada ayaa dhammeystirtey istiraatiijiyadan isbarbar socota ee
baaritaanka iyo daaweynta taabogalka ah ee duumada taas oo UNICEF ay ku
fulineyso iyada oo qaybineysa Xirmooyin Sheybaarro Degdeg wax u baara
(Rapid Diagonistic Kits) iyo daawada duumada ee ay siiso xarumaha
caafimaadka ee ku yaalla Soomaaliya oo dhan – laga bilaabo rugaha
caafimaadka ilaa xarumaha daryeelka hooyada iyo dhallaanka (MCH) iyo
cusbitaallada.
UNICEF Soomaaliya ayaa u adeegsaneysa dabaaldegga Maalinta Duumada
Adduunka ee 25ka Abriil 2009 in ay ku furto olole ballaaran oo loogu
magac darey ‘xirashada marokaneecada’ oo Soomaaliya oo dhan ku
dhiirigelineysa bulshooyinka in ay isticmaalaan marokaneecooyinkooda
daaweysan ee cimriga dheer. Ololaha ‘xirashada’ ayaa caadi ahaan la
sameeyaa ka dib marka la qaybiyo marokaneecooyinka si xubnaha qoysaska
loo baro sida loo taago marokaneecada, sida loo isticmaalo iyo sida loo
ilaaliyo. Waxa ay xoogga saareysaa in kooxaha nugul (carruurta iyo
haweenka) ay tahay in mudnaan la siiyo marka ay timaaddo cidda hoos
seexaneysa marokaneecooyinka la haysto.
Dabbaaldegga maalintan, UNICEF waxa ay 130,000 marokaneeco daaweysan
oo cimri dheer ah ka qaybin doontaa gobollada Shabeellaha Dhexe, Sool
iyo Sanaag. Maaddaama xilli-roobaadkii uu aad inoogu soo dhowaadey ayaa
arrintani ay noqoneysaa qaybin waqtigeedii galay oo tobanaan kun oo qoys
oo halis ugu jirey Soomaaliya oo dhan looga ilaalinayo cudurkan.
*Warbixin Sanadeedda WHO ee sanadkii 2008
Xaaladda UNICEF
UNICEF waxa ay ka shaqeysaa in ka badan 150 dal iyo dhul si ay ugu
caawiso in ay carruurtu badbaadaan oo ay baraaraan, laga soo bilaabo
yaraantooda ilaa qaangaarkooda. Waa hay’adda tallaalka ugu badan siisa
dalalka soo koraya, UNICEF waxa ay taageertaa caafimaadka iyo nafaqeynta
carruurta, biyo iyo fayadhowr wanaagsan, waxbarasho aasaasi ah oo tayo
leh oo ay helaan dhammaan wiilasha iyo gabdhaha, iyo ka ilaalinta
carruurta laga ilaaliyo rabshadda, dhiig-miirashada, iyo AIDS. UNICEF
waxaa ay maaliyaddeeda oo dhan ka heshaa qaaraan ikhtiyaari ah oo ay
shakhsiyaad, ganacsiyo, mu’asassooyin iyo dowlado bixiyaan.
Xog intaa dheer kala soo xiriir:
- Dr Suraya Dalil, Madaxa, Caafimaadka iyo Nafaqeynta, UNICEF
Somaliya: Mobile: +254 724 255 646. Email:
sdalil@unicef.org.
- Dr Annie Sparrow, Maaliyadda Caalamiga ah ee La Dagaallanka
AIDS, Qaaxo iyo Duumo (GFATM), Xiriiriyaha/isuduwaha, UNICEF
Somalia, Mobile: +254 723 786 763. Email:
asparrow@unicef.org.
- Iman Morooka, Sarkaalka Isgaarsiinta, UNICEF Somalia, Email:
imorooka@unicef.org, Mobile: +254 714 606 733
- Robert Kihara, Sarkaalka Isgaarsiinta, UNICEF Somalia, Email:
rkihara@unicef.org, Mobile: +254 722 206 883