Faallo: Doorashada Maamul Goboleedka Puntland ee Janaayo 2009ka, maxey uga
duwnanaan doontaa Doorashooyinkii hore.
Marka hore mahad idilkeed waxaa iska leh Allaah naxariis iyo nabadgelyana
Rasuulkeenii ayeey korkiisa ahaatay. Intaas kadib iga gudooma salaanta islaamka
ah (A.C.W.W).
Sida aynu lawada socono waxaa dhawaan leysu diyaarinayaa hadduu allaha awooda
iska leh ogolaado doorashadii madaxtinimada Puntland, taasoo la qabto 4tii
sanaba mar. Haddaba waxaa isweydiin leh, doorashadani maxey uga duwanaan doontaa
kuwii horay loo qaban jiray. Jawaabtu waa laba midood, iyadoo mar walba ay ku
xiran tahay tayada iyo shaqsiyadda xildhibaanada wax dooranaya. Haddii ay
Xildhibaanadu ku yimaadaan qaabkii taqliidiga ahaa, ee aheyd hebel ii geey
meesha, oo raali halaga ahaado ama yaanan raali laga ahaanee, uu qofkaa iska
yimaado, waxaan filayaa inay kasii darto mooyee wax isbadal ah oo looga fadhiyaa
doorashadaa ma jireyso. Haddiise ay xildhibaanadu noqdaan rag laga soo
fiirsaday, oo ku yimid qiimeyn ku dhisan shaqsiyada qofka, aqoontiisa,
waxgaradnimadiisa, alla ka cabsigiisa iyo weliba waayaaragnimadiisa, waxaa laga
yaabaa inuu qofkaas wax ku doorto damiir iyo mabda’ oo uusan wax baddan qadarin
ragga shaqsiyadda liita ee wax ku doonaya inay shilin ay dhaceen lagu doorto, oo
aan ayagu damiir kale laheyn.
Puntland waxaa soo maray waqti ay ku kala garan karto waddooyinkii ay soo martay
hadba wixii ay ku soo faa’iday iyo kuwii u horseeday hooga iyo ba’a, laakiin
maanta inuu xabadka mar kale u tumo nin aynu ognahay halka uu wax marin doono,
oo aan weligii kheyr looga fadhiyin, waa nasiib darro..
Waxaan mar walba la yaabaa, iyadoo la ogyahay halka ay arin ku danbeyn doonto,
kadib marka la doorto shaqsiyaadkaas iyagu ku sifoobay dulmi iyo waxba isdaba
marinta, oo hadhow goor ay xeero iyo fandhaal kala dhaceen, lagu eedeeyo waa
maamul xumo, waa hebel oo sidaa wax yeelay. Bal aynu isweydiinee haddii aan
iraahdo {2+ 2, waxaan doonayaa inay noqot 5}, suurto gal ma noqonaysaa, sidaas
ayeey la mid tahay waxgaradkeena maanta ku doodaya ama ku fekerayaa qof ay
tayadiisa ogyihiin inuu u noqdo nin wanaagsanaada oo wax qabad leh.
Maanta ayeey waxgaradkeena, culumadeena, aqoonyahanadeena, oday dhaqameedyadeena
iyo wealiba haweenkeenuba ay fursad heystaan, oo ay kasii shaqeyn karaan
maamulka ay doonayaan inay helaan saddex bilood kadib, waxaan aaminsanahay
allaah ka soke inay iyagu ku xiran tahay haddii ay muujiyaan Allaah ka cabsi,
isku kalsooni, isku xirnaan iyo la tashiyo baddan. Laakiin haddii ay ku sii
socdaan nin jeclaysi, iyo nin aan istaahilin tixgalintiisa, wallee looma fadhiyo
inaad heshaan maamul loo aayo, mid kan kasii liita mooyee.
Quraanka haddii aad in baddan akhrisaan waxa uu aad uga hadlaaa arimihii lagu
halagay ummaddo hore iyo weliba qof walboo waddo xun qaada halka uu ku danbeyn
doono, iyadoo looga digayo dadkaa ama lagu tusaaleynayo bal inay taariikhahaa ka
faa’ideystaan. Sidaas si la mid ah dowlad walboo soo martaa dunida ama maamul
walba waxaa laga reebaa qoraalo dhaxal gal ah, oo looga daydo ama looga
digtoonaado in kuwii hore oo kale ay dhacaan. Laakiin annaga Soomaali haddeynu
nahay naloogama fadhiyo arintaas, oo Soomaalidaa waxey leedahay murti aheyd,
{ Durba waxey Illowdaa umuli Dihashadeydiiye }. Oo micnaheedu yahay maba moodid
in dadkeenu ay soo mareen afar sano oo hoog iyo ba’ ah, oo weliba kuwaas baaba’
dadka qaar waxey u yihiin tusaale ay raacaan, oo ku fakaraya ninkaas shaqsiyadda
liitay qaabkuu u soo dhaqmay oo kale isagana inuu helo fursaddaas.
Annigu waxaan leeyahay wax walba haddaan laga shaqeyn iskama yimaadaan. Puntland
waxaa ugu wacan Balaayo oo idil sida burcad badeedka, tahriibka lagu baaba’ay,
lacagaha faalsada ah, lacagaha la dhacayo, handtidii shicibka ee lagu gor
gortamayo, wax qabad la’aanta, waxaas oo idil waa mirihii aad idinku beerateen,
kadib markaas tiraahdeen na maamula nimaan aan iyagu waxar gibinna lagu
aamineen. Waxba yaanan meel kale laga raadinin sababta, annigu waxaan
aaminsanahay haddaad shalay ka fiirsan laheydeen wax baddan baa hagaagi lahaa.
Waxba hadalka yaanan ku dheeraan, waxaan kusoo gabagabeynayaa maanta haddii la
oran lahaa, yaa xilka loo dhiibaa, iyo kuwan kuwo dhaama ma hayno, waxaa taas
marag inoogu filan in aynu hayno maanta inkastoo aynaa ku jirin laabahooda, oo
uu allaah daalacdo laabaha, oo aynu annaga xukumeyno uun daahirkooda, rag isku
darsaday aqoon, waayo aragnimo, karti iyo weliba la hayo tusaalayaal goobihii ay
horey uga soo shaqeeyeen. Raggaas oo intooda baddan ah qurbaawiyiin, maanta
diyaar u ah inay waddankooda wax u qabtaan, ayaan leeyahay raggaas fursada hala
siiyo, anigoo aan kala fadileyn, oo waxaan u arkaa intooda bddan inay yihiin rag
uu misaankoodu culus yahay, oo lagu tuhmayo aqoon iyo karti, raggaas waxaa ka
mid ah { prof.muxiyadiin cali yuusuf Prof. Farjac, Nuuradiin Diirye, Shiikh
Aadan Maxamed Ciise iyo weliba Janaraal Ilkojiir }, raggass oo aan qirayo inay
jiri karaan rag kale oo ka qibrad baddan laakiin aan is oran karo inta hadda is
magacowday inay yihiin Raggan kuwa ugu cad cad uguna tunka weyn. Haddaba maanta
Puntland wey heysa rag ay ku aamini karto Maamulkeeda mustaqbalka, ee waxaa
haray kaalintii Odayaasha dhaqanka, culumada, waxgaradka, aqoonyahanada iyo
haweenka puntland ee la doonaya inay wadastashi baddan kadib ku dadaalaan sidi
Raggan cusub fursad loo siin lahaa, kuwaa lagu daalayna uga fariisin lahaayeen
ummadda. Ma inkirayo inay wax qabteen maamulkii hore laakiin , waxaan leys bar
bar dhigi Karin fursaddii iyo dhaqaalihii ay heleen iyo sidii wax baddan loo
dayacay iyo waxa ay qabteen. Waxa noo haray waa labo bilood oo waqtigaa yar ee
haray halaga faa’ideysto sidii wax loo sixi lahaa.
Musharixiinta cusub waxaan kula talinayaa inay Allaah talo saartaan, oo haddii
midkood uu ku guuleysto, ay kuwa kale la shaqeeyaan, oo aanay imman xiqdi,
hinaaso iyo ka shaqeyn bur bur. Ogow mar walba waxaan allaah kuu qadarin inaadan
helayn, ee mar walba waxaa suurto gal ah in midkiin uu ku guuleysto amaba
inaydaan idinkoo idilba aydaan fursaddaas helin, ee ku dadaala mar walba sidii
ummadda wanaaga loogu soo dabaali lahaa.
Sidoo kale waxaan Madaxweyne Cadde Muuse kula talinayaa inuu ka faa’ideysto
maanta fursaddan oo uu soo dhiso dowlad mustaqbal leh, isagoo fursada siinaya
Raggan cusub ee isa soo sharaxay iyo kuwa kaloo wanaaga lagu tuhmayoba, oo uuna
ka odayeeyo maanta, laakiin hadduu fursaddaas layaco oo uu noqdo madaxweyne
Afrikaan, ogow mar walba dikteetar halka u danbeysa waa hoog iyo ba’. Laakiin
waxaa rajeynaynaa inshaa’allaah inaad noqon doonto mid magac iyo sharaf uga
fadhiista oo qiimeyn iyo qadarin ummaddiisa kula dhex noolaada, taariikhduna ay
had iyo jeer xusi doonto.
Allaah waxaan ka baryeeynaa inuu talada wanaagsan na waafajiyo, oo uu sanadkan
gacanta maamulka u galiyo mid ummadda Puntland u horseeda horumar iyo kii jeexii
lahaa khadkii lagu gaari lahaa himilidi aynu ku taami jirnay. Allaha naga qabto
kuwa usoo durbaan tumanaya inay hoogi iyo ba’ii mid kasii daran nala yimaadaan.
Aaaamiin.
qore:xasan maxamed jamac(suge)
daarow88@hotmail.com