WARSAXAAFADEED KU SAABSAN KU DILKA XAQ DARADA AH EE MAGAALADA B/WEYNE LOOGU GEYSTAY NABADOON XOOSHOW

      Isbahaysiga Dib u xoreynta Soomaaliya waxa uu si xoog leh u dhaleeceynayaa dilka xaq darada ah ee loo geeystay Allaha u naxriistee Nabadoon Dacar Xirsi Xooshow oo ahaa Guddoomiyihii Golaha dhaqanka ee Gobolka Hiiraan.

      Isbahaysiga waxa uu tacsi tiiraanyo leh u dirayaa dhammaan Shacabka Soomaaliyeed meel ay joogaanba, waxa uuna si gaar ah tacsidaasi ugu gudbinayaa eheladii uu nabadoonka ka geeriyoooday iyo guud ahaan reer Hiiraan .

      Isbahaysigu waxa uu farayaa maamulka gobolka Hiiraan inay sida ugu dhakhsaha badan gacanta ugu soo dhigaan gacan ku dhiiglihii geystay dilka nabadoon Xuurshow, lana hor keeno cadaaladda , dhanka kale Isbahaysigu waxa uu farriin culus u dirayaa dhammaan Masuuliyiinta ka arrimiya goobaha cadawga laga xoreeyey inay dadaalkooda ku wajahan sugidda nabadgelyada guud  ayna labajibaaraan, si loo sugo amaanka  shacabka ku dhaqan degaanada ay masuulka ka yihiin , gaar ahaan dadka u adeega bulshada oo ay hormuudka  ka yihiin Odayaasha dhaqanka , aqoonyahanka , Hay'adaha gargaarka iyo samafalka.

      Isbahaysiga waxa kale oo uu cambaareynaya duqeynta iyo adeegsiga hubka culus oo lala beegsanayo degaannada dadweynaha, oo keenay xasuuq iyo barakicin cusub oo ku yimid dadweynaha Muqdisho iyo nawaaxigooda, waxa uuna mar kale ku celinayaa baahida loo qabo in sida ugu dhakhsaha badan loo celiyo adeegii shirkadaha diyaaradaha Soomaaliyeed oo ku carqalatoobay xiritaanka Garoonka diyaaradaha ee Magaalada Muqdisho.

      Isbahaysigu waxa uu ugu baaqayaa beesha caalamka, Ururada Caalamiga ah iyo kuwa goboleedba inay gacan ka geystaan sidii ciidamada Ethiopia looga saari lahaa dalka , Soomaalidana loogu madax bananayn lahaa inay ka tashadaan aayahooda, taaas oo keeni karta inay dib u soo noqoto jiritaankii iyo karaamadii shacabka Soomaaliyeed.

UGU DAMBEYNTII Isbahaysiga oo cambaareynaya caga jugleynta lagu hayo kuwa bulshada u adeega , waxa uu deeq bixiyayaasha iyo hay'adaha samafalka ugu baaqayaan inay shacabka Soomaaliyeed ee tabaaleysan la soo gaaraan gargaar iyo gurmadyo lagu samata bixinayo, gaar ahaan goobaha uu maamulka iyo kala dambeyntu ay ka jirto, iyadoo maamullada jira ay si weyn ugu diyaargaroobeen sidii loo sugi lahaa nabadgelyada guud loogana hortagi lahaa cid kasta uu isku dayda ianay carqaladeyso.

      Xafiiska Warfaafinta ee ARS

      Jabuuti,07/10/2008.