‘’WARQAD FURAN : SHEIKH HASSAN DAHIR AWAYS’’
Ugu horeyntii iga gudoon Sheikh Hassan salaan
Islaanimo iyo Soomaalinimo ( Assalama Caleykum
waraxmatulaahi Wabarakaatu ?), salaan dabadeed
waxaan warqadatan furan kugu soo direy inaa kala
hadlo arimo ku saabsan xaalada dalka Soomaaliya
uu marayo iyo mowqifka la rabo inaad ka qaadato.
Mudane Sheikh Hassan waxaad si cad u sheegtay
inaad ka soo horjeedo mowqifka siyaasadeed ay
qaateen labada Gudoomiye ee Isbaheysiga Dib u
xoreynta Soomaaliya iyo ergada wafdiga ka qayb
galaya shirka JABUUTI, adigoo ka siidayey
ideecadaha u dhisan inay xalka Soomaaliya sida
ay hada tahay raba inay sii ahaato, rabana kala
jabka ama kala tagiina, taas oo ah arin ay ka
xumaadaan dadka jecel in gumaysiga dalka laga
xoreeyo loogana xoreeyo midnimo Soomaaliyeed oo
wadajir ah, madaama uu Isbaheysigu yahay kan
kaliya u taagan inuu ka hadlo dhibaatada lagu
hayo ummadda Soomaaliyeed.
Waxaan warqadatan kugu soo qorey inaa ku
xusuusiyo arimo badan oo jira loona baahan yahay
inaad ka fekerto adiga shaqsiyan, madaama aad
tahay nin masuul ah doonayana in Soomaaliya lagu
xukumo shareecada Islaamka.
Soomaalidu sideedaba waa dad Islaam ah laguna
muslimin seef iyo xoog toona, waxaana
rumaysanahay sida taariikhdu qortey in dadka
Soomaaliyeed ay diinta Islaamka qaateen ka hor
intii ay diinta Islaamka ku faafin dhulwaynaha
Carabiya ama aan dhaho inta diinta Islaamka
faafinteeda aysan ka bixin Makka kadib markii
qaar ka mid asxaabtii ay u soo haajireen
Soomaaliya kadibna kaga sii gudbeen dalka
Ethopia, markaas oo ay dadka Soomaaliyeed
qaateen diinta Islaamka, asxaabta waxay ka soo
dageen xeebta Saylac ee Soomaaliya waayo dhanka
Badda ayay kaga yimaadeen Afrika , Ethopiana bad
ma lahan.
Waxaana ka garan kartaa inta dadyoowga dagta
Horn of Afrika ee is xigta xigta juquraafi ahaan
inay wada yihiin Islaam sida Soomaalida,
Cafarta, Oromada iwm ah , kuna wada Islaameen si
nabad ah iyagoo lagu qasbin, marka Soomaalidu
waaba sahal inay qataan iskuna dhaqaan
shareecada Islaamka, waxayna u baahan tahay ka
dhaadhicin sahal ah iyo is tusaalayn joogta ah,
laakinse qasab ma ahan inaan aduunka dhan diinta
Islaamka gaarsiino si qasab ah madaama ay teena
na haysato, Soomaaliduna waxay horey u tiri
tiisa daryeela tu kale ku dara, marka xiliga
hada aan mareyno waa xili loo baahan yahay in
aan daaweyno dhawaacyada na kala gaarey , mida
gumaystaha iyo kuwa u ku adeegto dadka
Soomaaliyeed gaarsiiyeen.
Hadaba Soomaaliya waxaa haysta cadaw soo jireen
ah balse cadawga iskama imaanin ee waxa uu ka
faaidaystey damiirlawayaal Soomaali ah oo uu noo
soo isticmaalay ilaa aan dowladnimadeenii
burburino dadlkeenii baabi’ino dadkeenana
xasuuqno kadibna isagoo socda ayuu yimid ayna
soo horkaceen qabqablayaal shaar qabiil wata.
Soomaalidu waa dad xun oo qabiilka caabuda
hadiisa aysan saas ahayn madax uma aysan noqdeen
damiirlawayaal walina gacan ku dhiiglayaal ah
ayna taas u sii dheer tahay dabadhilifnimo
raqiis ah, waxaana halkaas kaaga soo baxaya
aayad quraan ah oo oranaysa ‘’ hadii qoomku
duloobo waxaan madax uga dhignaa kuwooda ugu
xun’’.
Maxaa ku jaban hadii Isbahaysiga Dib u xoreynta
Soomaaliya uu beesha caalamka kala hadlo in
ciidamada Ethopia ee dalkeena xooga ku qabsaday
inay ka saaran dhulka Soomaaliya, kadibna
ciidamo caalami ah la geeyo Soomaaliya,ugu
dambayntii Soomaalida dhaxdeeda ay ka wada
hadlaan sidii dalkooda nabad ugu soo dabaali
lahaayeen,iyadoo ay ka maqan tahay dano
shisheeye iyo faragalin qaawan oo muuqata?.
Dadka Soomaaliyeed waxay la daalan yihiin
dhibaato muda dheer ay ku soo jireen, waxayna u
baqayaan inay sidaasi ku waayaan dalkooda,
madaama Soomaaliya ay gashay gacan shisheeye,
dalal ka leh dano wajiyo badan, shaqsiyaad
fulinaya dantooda iyo dano dad kale.
Waxaa kula gudboon inaadan ka hor imaanin danta
iyo maslaxada ummada Soomaaliyeed, taas oo ah
inay Ethopia iska xoreeyaan, dalkoodana ay u
tashtaan si ay ugu wada noolaadan aduunkana aan
kula noolaano nabad iyo xornimo .
Waxaad marmarsiiyo u soo qaadatey in la jabiyey
axdigii Isbahaysiga u qornaa oo la qaatey in
lala galo shir kuwa TFG ee dabadhilifka ah
dalkii Soomaaliya oo ay Ethopia haysato,
hasayeshee waxaa meesha ka soo baxday oo cad in
beesha caalamka lagala hadlay sidii ciidamada
Ethopia dalka looga saari lahaa, taasna waa
qasab dana ugu jirto Soomaaliya iyo
Soomaalidaba, waayo hadii caalamka maanta ay
xaqiiqsadeen in Ethopia joogitaankeeda
Soomaaliya ay mushkilada sii fogaynayso ayna
tahay in arinkaasi la meelmariyo iyadoo loo
maraayo wado kale, waxay ila tahay inay guul u
tahay shacabka Soomaaliyeed hadii Ethopia dalka
laga saaro bilaa shuruud, taas oo u ah Ethopia
wajib gabax maadama ay ku fashilantey arinkii ay
dalka Soomaaliya u soo gashay ayna ogaatey in
ummadda Soomaaliyeed yihiin dad ka duwan kuwa ay
ku adeegato.
Ugu dambayntii waxaan kugula talin lahaa inaa
arinkaas ka tanaasusho raali galena siiso ragii
mowqifka wanaagsan ka qaatey arinka Soomaaliya
waqtii ugu xumaa ee soo mara ummadda
Soomaaliyeed, kuwaas oo si cad u diiday kana hor
yimid in dalka la qabsado loona sacbiyo ama ay
ka aamusnadaan, iyagoo u soo marey dhibaatooyin
fara badan.
Waxaan ku shegayaa kuwa gurbaanka beenta ah ku
garaacaya ee kula jooga Casmara iyo Soomaaliya
inay yihiin kuwii dalka soo galiyey ama horey
gacan saarka ula lahaa Tigreega ama Xabashida,
hadana iskaga kaa dhigaya inay ku yihiin
saaxiibo kaa ag dhaw ama kugu talo ah, madaama
ay ka xanaaqsan yihiin in aan lagu aamini Karin
sirta dalka ayay doonayaan inay adigana ku
isticmalaan kala jabinta ururka Isbaheysiga sida
Xuseen Caydiid, Shariif Saalax, Jama Ali Jama,
iyo Yusuf Indhocade, marka waxaad ogataa hadii
aad rabto inaad madax ka noqontid Soomaaliya ama
waxaad aaminsan tahay in la isku dhaqo way fudud
tahay inaa ku gaarto adigoo marin wado qaldan
ayaad dhinac ka soo raaci kartaa ummadda
Soomaaliyeed ee wadaniyiinta ah.
Hadii dalka Soomaaliya laga saaro Ethopian gangs
iyo camiilada ay wadatana xididada loo siibo way
sahlanaanaysaa arinka Soomaaliya iyadoo taasina
ay ka maqnayn in shirqoolka ay wadaan kuwa
dunida ka dhaadhicinaya in Soomaaliya joogto
Alqaacida ee isku eekaysiinaya mar kasta, waa in
fiiro gaar ahaaneed loo yeeshaa waayo dagaal
kale oo aan caalamka la galno faaido nooma aha.
Sheikh Hassan gacaliye xisbi Islaami ah ayaa
furan kartaa si fudud adigoo kaga dayanaya
waddadii ay mareen tusaale ahaan xisbiyada
Islaamiga ah ee dalalka Turkey , Iran ama
Lubnaan iyo Falastiin ka dhisan, adigoo dadkaada
kalsooni kula jooga, kana dhaadhicinaya
fikradaha aad rabto inaad na wada gaarsiiso,
balse caqli ma ahan inaad tiraahdo ma yeelayno
mana hadlayno.
Inaad caalamka la hadashaan oo hadafkiina iyo
mowqifka aad qabtaan miiska korkiisa ku cadayso
ayaa ka fiican intii aad cadawgaada ku gacan
siin lahayd inuu kaaga dheereeyo dunida aan
manta ku nool nahay ee jahwareersan.
Mudane Sheikh Hassan Dahir ha inkirin in
Soomaalida maanta joogta ay fashilmeen kuna
fashilmeen wax walbo oo xataa hadalka xataa wax
la isku fahansiin Kari waayey iska daa qori
caradiis iyo is maquunin.
Dalka aad joogtana waxay leeyihin dan, dantaas
oo ah in Ethopia ciidamadeeda Soomaaliya
gudaheeda dagaal joogta ah ku joogaan, madaama
ay maslaxadooda ku jirto, ma ahan in aad u
fuliso arinkaas, hadii Ethopia hadal iyo xabad
lagu saaro Soomaaliya waa u dan, waxaase khalad
ah in dabadhilifka iyo Ethopia lagula heshiiyo
in ay dalka sii joogaan waxna lala qaybsado.
La soco cadawgaada waa lala hadlaa adigoo
xaqaada si cad u raadsanaya, hadii la sii kala
jabo oo aad ku adkeysato mowqifka qaldan ee aad
qaadatey, waxay ila tahay inay adiga taasi dan
kugu jirin laf ahaantaada waayo gaalo waxay ku
arkaan nin cadaw ku ah, Soomaali badana waxay ku
fekerayaan sidii ay adiga ku shirqooli
lahaayeen, sidii ay u shirqooleen mujaahidkii
yaraa Sheikh Aden Xaashi allaha u raxmadee,
kuwaasna waxaa ka mid ah kuwa hada kula jooga oo
markii horaba si cad u sheegi jirey , waana
hubaa inaysan ka tanaasulin jacaylka Ethopia iyo
nacaybka ay ku qabaan, balse ay la dirirsan
yihiin kuwa hada Tigreega ay ku shaqaysato ee
jooga Baydhaba.
Marka ragii caalamka oo dhan ka hor istaagay
inay aqbalaan inaad tahay wadaad xagjir ah kana
haraan, kuna adkeystey inaa tahay nin Soomaali
ah oo gobanimo doon ah, Ethopia-na waxay
aqrinaysana ku tilmaamay quraafad kuna keenay
Casmara adiga iyo kuwa hada beenta dadwaynaha u
aqrinaya eel eh ururkii ayaa la gatey.
Waxay ila tahay inaa arinkaas ka fiirsato wixii
ka dhalan kara hadii Isbaheysiga Dib u xoreynta
Soomaaliya ay ka baxaan kuwa taageersan mowqifka
labada Gudoomiye ama labada Shariif.
Hadii Ethopia dalka ka baxdo sunteedana la
raaciyo oo xididda u goyno qabqablayaasha iyo
kuwa qabiilka madax marey, waxay ila tahay inaa
guulaysanay, Soomaaliyana xoreynay oo aan ku
noolaan doono sharaf iyo madaxbanaani leh
karaamo, dadka Soomaaliyeedna ay ka bixi doonaan
dhibaatada dilootey mudda dheer.
Waxaan filayaa inaad ku qanci doonto talada
dadka Soomaaliyeed ee doonaya in dalka la
xoreeyo, Soomaaliduna danaheeda wadagarato
iyadoo meesha ay ka maqan tahay dulmi iyo eex
laguna wada qanacsan yahay talada dalka waayo
dalka waa uu naga wada dhaxeeyaa kuligeen,
wadaad iyo waranle iyo nin waalanba waayo horaa
loo yiri :
· Soomaaliya Soomaali baa leh.
· Dugsi maleh qabyaaladu waxay dumiso mooyee
Isbaheysigu Dib u Xoreynta Soomaaliya qof ma leh
oo qabiil ma leh oo waxaa leh dadka
Soomaaliyeed, waana hubaa inuu guulaysan doono
insha allah, laakinse waa tareen socda qofna soo
kori qofna meel dhaxe uga dagi ilaa u gaaro
xuduudaha Soomaaliya oo dhan.
Mahadsanid.
Yusuf Mohamed Abdi Yusuf
mrsomalia@gmail.com