Qaahira, waa magaalo sidee
ah?
Socdaalkeygii Qaahira.
Marka hore mahad idilkeed
waxaa iska leh Allaah, naxariis iyo nabad
gelyana Rasuulkeenii ayeey u sugnaatay. Kadib
dhammaan akhristayaasha sharafta lahow iga
gudooma salaanta Islaamka
( A.C.W.W ).
Qaahira oo ah caasumadda
Waddanka Masaarida, waa magaalo aad iyo aad u
baaxad weyn, ayna ku nool yihiin dad lagu
qiyaasay illaa iyo 18 Milyan. Waa magaalo ay
xadaaradeeda iyo ilbaxnimadeeduba aad iyo aad u
sareyso, waxaa ka dhisan goobo aad iyo aad u
fara baddan oo taariikhi ah, waxey leedayahay,
oo ka dhisay masaajidyadii ugu horreyay xilligai
saxaabadda, sida kii uu dhisay saxaabigii
jaliilka ahaa, Cumar ibnu Caas. Waxey kaloo
leedahay goobo fara baddan oo lagu barto Aqoonta
kala duwan sida jaamacadda weyn ee taariikhda
lagu xuso Al- As-har oo leh waxbarasho min
Primary illaa iyo heer jaamacadeed, kuna taala
meel walboo aad ka tagto magaalada Qaahira.
Waxaa kaloo Qaahira ku yaala jaamacado kale, oo
laga barto aqoonta kal duwan ee lagu diyaariyo
jaamacadaha Adduunka.
Qaahira waa magaalo aad iyo
aad loo ilaaliyay ammaankeeda, waxaad arkeysaa
dadka oo iska soconaya xilli danbe habeenkii, oo
cid la hadleysaa aysan jirin. Dadku inbaddan
habeenkii ayeey danahooda Suuqeysiga ama is
booqashadaba sameeyaan, taasoo u daliil ah
amniga qaaliga ah ee ka jira halkaa. Maciishadda
magaaladda Qaahira waa mid iska macquul ah,
Inkastoo waayahan danbe ay kala mid tahay dunida
kale maciishada cirka isku shareertay.
Qaahira waxaa ku nool
Soomaali aad iyo aad u fara baddan oo ka kala
yimid meelo kala duwan, una jooga Qaahira
duruufo iyo dano kala duwan, sida Arday ka timid
Soomaaliya oo Minxo ama deeq waxbarasho ka
heshay dowladda Masaarida, kana kal yimid
qeybaha kala duwan ee Soomaaliya, dad iyagu
kasoo guuray waddamada Yurub iyo mareykanka oo
halkaa caruurahooda u keenay inay wax uga
bartaan, kuna ilaaliyaan diintooda iyo
dhaqankooda wanaagsan, sidoo kale waxaa jira
Soomaali kale oo fara baddan oo ku sugaya halkaa
bal inay fursad ay uga baxaan illaa iyo Yurub
ama Ameerika ka gaadaya, ama wax ka sugaya
Xafiiska UNta..
Soomaalida Qaahira waxa ay ku
kala nool yihiin xaafado kala duwan, intooda
baddan waa dad og muhiimadii ay qaahira u
yimaadeen, Inkastoo ay jiraan kuwo weli u
dhaqmaya sidi iyagoo Soomaaliya jooga, ama
aanay maareyn karin caruurahooda ay ka keeneen
waddamada Yurub ama Ameerika. Runtii mar marka
qaar aad baa loo dhibsadaa caruuraha laga keenay
Yurub iyo Ameerika, oo haddana isku meel lawada
dajiyay amaba ay dhici karto inaany la joogin
waalidkoodii, oo dad kale looga sii tagey.
Qaahira run ahaantii waxaa ka
jirta fursado baddan oo qaali ah, waa haddii
laga faa’ideysanayo. Xagga waxbarashada aad iyo
aad ayeey ugu sareysa, oo caruurtaada waad u
heleysaa nooc walboo waxbarasho ah. Xitaa waxaa
inta baddan la helaa Macalimiin waqti walba
diyaar kugu ah inay gurigaaga kugu yimaadaan, oo
Caruurta ka saacidaya nidaamka waxbarasho ee
Masar.
Qaahira waxaa ku taala
Safaarad Soomaaliyeed oo runtii Soomaalida ka
caawisa adeegyada muhiimka ah ay u baahan
yihiin, sida Baasaboorada cusbooneysiintooda,
raadinta sharciyadda, iyo weliba raadinta
deeqaha waxbarashada. Inkastoo ayan aheyn sidii
la rabay, oo dadku intaas ay wax uun sheegayaan,
haddana waxaa wax walba ka weyn nidaamkaas ka
sharciyeysan Masar ee u shaqeynaya muwaadinka
Soomaaliyeed.
Guud ahaan Soomaalida joogta
Qaahira ama daneyneysa inay degto Qaahira waxaan
kula talin lahaa inay dhowraan anshaxa iyo
qawaaniinta u degsan waddankaas, ayna
caruurahooda ku tarbiyeeyaan sidii ay
akhlaaqiyaad wanaagsan kula dhaqmi lahaayeen
dadka la nool. Sidoo kale waxaan Walaalaha
daneynaya inay degaan Qaahira kula talinyaa
inaanay ku xiraan meel hebla Soomaali baddan baa
degan, ee uu waddanku isku mid yahay guud ahaan
Qaahirana ay nabadgelyadeedu sareyso, meel
walbana la degi karo. Ogow xaafadaha leysugu
geeyay caruuraha Soomaalida iyagaa isduubsada,
oo akhlaaqdii ay la joogeen Yurub iyo Ameerika
ayeey intoodii badneyn la yimaadeen Qaahira,
kuwo Allaah u naxariistay mooyee..
Nolosha dhabta ah ee Qaahira
maaha mid qoraalkan kaliya lagu soo koobi karo,
ee waxaa ka bogan kara kaliya qofkii taga oo soo
booqday, anna qoraalkeygii intaas ayaan kusoo
koobayaa wey dhici kartaa inaanan uga hadal sidi
la rabay, laakiin waxa ay iga tahay oo qura inta
aqoonteyda ah bal inaan walaalahay ugu deeqo, oo
gaarsiiyo.
Qalinkii : - Cabdixakiim
Jaamac Jooje.
saicentadv@yahoo.com