"Shirka Jabuti?? Fari kama Qodna Faanoole!"
Gogoldhig
Shirka Mucaaradka iyo dowlada KMG ah uga furmiya magalada Jabuuti ayaa waxaa ka
soo baxaya sawiro kala duwan oo laga dheehan karo durba ifafaalaha uu la soo
baxay. Dadbadan oo siyaasadaha bariga Africa odorasaa ayaa aaminsan in shirkani
uu noqon doono mid aan miro dhalin, qaar ayaaba sheegaya in shirkani uuba ka
liidan doono kuwii horey loogu qaban jiray magaalada Khartum ee wadanka Sudan.
Shirkan ayaa waxaa isha si weyn ugala socda Qaramada Midoobey, ururka Africa iyo
Jaamacada Carabta waxaana si fiican isha ugu haya umada Soomaliyeed oo xiligan
quus ka taagan wadanka marxalada uu marayo. Shirkan ayaa waxaa saamayn weyn oo
faragelineed kuhaya dhowr dal oo ay ku jirto Jabuti oo shirka martigelisay,
waxaana safka hore kaga jira wadamada Ethopia, Eritrea, Masar, America. Waxaana
la aaminsan yahay in Eriteria iyo Ethopia ay dagaalkoodii xaduudaha ay usoo
rareen gudaha Soomaliya halkaas oo maalin kasta dadka rayidka lagu garaaco
madaafiic ay adeegsanayaan kooxo ay labadooduba tageeraan.
Faragalinta Shisheeyaha ee Shirka Jabuti
Tan iyo xiligii ay burburtay dowladii Soomaliyeed horeentii 90naadkii, waxaa
soo baxayey dano shisheeyuhu uu ka leeyahay gayiga soomaliya, Shirkan waxaa
saameyn xoogleh ku haya faragalino shisheeye iyo siyaasado isdiidan.oo ay huwan
yihiin labada garab ee iskuhaya siyaasada wadanka Soomaliya (Mucaaradka iyo
Dowlada). Mucaaradka Soomaaliya ee saldhigiisu yahay Asmara waxaa ay ku
doodayaan in aysan gogol la fadhisan doonin Dabadhilifyaal (Dowlada KMG) iyagoo
xujo ka dhigaya ciidamada Ethopia in ay ka baxaan Soomaliya.
Taas oo la aaminsan yahay in Erirea ay dabada ka riixayso. Dhinaca kale
Eriteria ayaaba raali ka ahayn in Jabuti lagu qabto shirka iyadoo u arkaysa
Jabuti cadaw cusub. Sidoo kale, Jabuti, oo marti galinaysa Shirka, ayaa iyana
curyaaminaysa shirka. Waxay Jabuti ay col u aragtaa C/laahi Yusuf hogaamiyaha
DFKM Somaliya, oo ay aaminsan tahay in dowladii Ismail Cumar Geele 2000 uu ku
dhisay Carta uu burburiyey islamarkaasna C/laahi Yuusuf xiligaas waxaa uu
qaadacay shirkaas, odayaal iyo siyaasiyiin ka qaybgalayna wuu xirxiray.
Dhinaca kale Ethopia ayaa u aragta shirka hadii la isku fahmo fursad
soomalidu ku heshiin karto, iyadoo ka soo horjeeda in la helo nabad iyo dowlad
calan leh, islamarkaasna u aragta Mucaaradka khatar ku wajahan xakuumada Males
Sanawi. Masar ayaa saamayn ku leh iyana shirka, iyadoo DKMG u aragta wax ay
Ethopia ay ku shaqaysato. Maraykanka ayaa ah xudunta fashilka shirka isagoo lagu
eedeenayo markasta oo xal soomaliyeed soo dhow yahay in uu carqaladeeyo.
Weerarkii Dhuusamareeb ayaa dab ku shiday in la heshiiy, islamarkaasna labalaabi
doona weerarada laga soo horjeedo Dowlada iyo Ethopia.
Si kastaba ha ahaatee, Waxaa la aaminsan yahay in shirkani uu yahay Fari kama
Qodna Faanoole oo labada garaba aysan u badaxbanaaneed hogaamintooda siyaasadeed
islamarkaasna ay ka fogtahay wadaniyada, u nixida umada abaaraha, sicirbararka
iyo dagaaladu ay aafeeyeen. Hadaba waxaa aan fiirin doonaa bal waxa kasoo baxa
isbuucyada soo socda.
Abdirizak Adde
Political Analyst
Somalia, Garowe
abdirizak.adde@gmail.com
Faafin: SomaliTalk.com | May 13, 2008 |