26ka Juun Maalin Ciishotay Balse Mudan Maamuus iyo Damaashad!!!
Gogoldhig
Waxaa mahad leh Allaah sareeye guusha siiyay Aabayashii usoo dagaalamay Halganka
Xoriyada, kadibna waxaa mahad mudan Halgamayashii dhiigooda u huray difaaca,
diinta, dadka iyo dalka Soomaaliyeed.
26ka Juun 2008 - Maalmuhu waa isku mid uun ma kala qiimo badna, waase ay kala
duwan yihiin, haday tahay dhererka,cimilada iwm, mana aha maalmuhu kuwa qaabeeya
ama jaan-gooya sida ay u eekaanayaan ama waxa dhacaya ee waxtar iyo waxyeelo
labada noqon kara, waxase kala jaad-jaad ka dhiga oo kala duwa hadba qofku sida
uu isagu u suntado, isaga oo Sal uga dhigaya Balo iyo Barkhad, Nolol iyo Geeri
iwm ee uu isagu muto !!!
Ma jiraan Maalmo qaloocaa,ma jiraan Maalmo toosanina , ma jiraan kuwa Cadi kuwa
Madoobina ma jiraan , haba sheegin kuwo Irmaani, kuwo gudhana haba soo qaadin
,ee waa kolba sidaad ka dhigato adigu ee aad u muunadaysato ama u ilo-xidhato
iyo waxa aad ku beegto, ama ku dul xidhato ama ku dultosho si ay uga muuqato
maalmahan aan kala go-a lahayn ee aan bilowgooda iyo dhamaadkooda toona cidi
garan karin.
Taarikh Kooban.
Hadaba hadii aan dib u bildhaansado maalintan maantan oo kale ah, iyo 48 sano ka
hor waxa dhacay, waxay tahay maalin inooga duwan maalmaha kale ee badan, waa
maalin 26 Juun oo ah maalintii ay xurimada Qaateen gobolada Woqooyi ee dalka
Soomaaliya ayaan lahayn saan saan weyn oo lagu xuso guud ahaan dalka gaar ahaan
gobolada waqooyiga Soomaaliya
26kii Juun 1960, waa maalintii aynu gobanimada helnay, waa maalintii aynu
noqonay dal xor ah oo ka mid ah dalalka adduun weynaha, waa maalintii ay ina
aqoonsadeen dalal ka badan 30. Waa ayaantii abwaan iyo hoobal tooni aanu wax la
hadhin. Waa dharaartii Alle ha u naxariistee Cabdillahi Suldaan Timacadde iyo
Cabdi Iidaan tiriyeen gabayada taariikhiga ah een doogoobin.
26kii Juun 1960, waxay ahayd maalin in badan la saadaalinaayey. Waxay ahayd
maalin rag iyo dumar, ciroole iyo caruur loo ciyaaray, loo soo jeeday, loo
xaragooday. Waxay ahayd maalin dhalinyaro badani ku beegeen arooskooda. Waxay
ahayd maalin wiil iyo gabadhii dhalatay lagu tilmaamay cawo dhalad. Waxay ahayd
maalin xisbiyada qaran, mucaarad iyo muxaafid ay gacmaha is qabsadeen. Maalin
hadal macaan iyo weji furan leysku salaamay. Maalin miskiinka taakulintiisa la
kala boobay. Maalin Soomaali madax kor u qaaday. Maalin kii shalay ku
gumeysanaayey uu magan kuu noqday.
Waxay ahayd maalintii u horeysay ee 5ta Soomaali dhammaan wada ciiday. Waa
dharartii u horeysay ee dal xor ah oo Soomaaliyeed dhashay. Haddaba waxa dadka
qaar isku qaldaan maalintan qaayaha leh ee la odhan karo waa tan ugu mudan
ummadda Soomaaliyeed, iyo dhibaatadii, burburkii iyo dilkii ka dambeeyey ee
dhaliyey inay burburto hilowgii iyo himiladii weyneed ee midnimada shanta
Soomaaliyeed. Halgamayaashii ay horseedka u ahaayeen xisbiyadii SYL iyo SNL,
waxay ahaayeen qaar niyad wanaagii ay u hayeen midnimada Soomaaliyeed si shuruud
la,aan ah.
Bal u fiirso waxa la ciyimay in shanta Soomaaliyeed shan maalmood oo isku xigta
loo diyaariyo. Waxa la gartay in Waqooyiga Soomaaliya oo u horreysaa qaadato
26ka Juun, Koonfurta Soomaaliyana ay qaadato 30ka Juun, Kowda Juulayna ay noqoto
maalinta israaca oo marba cidda xorowdaa ay kuwa xorta ah ku soo biirto. Waxa
loo daayey 27, 28, iyo 29ka Juun seddexdii aan weli xoroobin. Waxa soo raacday
Jabuuti oo sidii loo qorsheeyey qaadatay 27kii Juun, waxa weli aan xoroobin
Soomali Galbeed iyo NFD oo ay sugayaan labada Maalmood ee 28ka iyo 29ka Juun.
Taasi waxay ina tusaysaa in israacu ahaa mid lagu doonaayey in lagu helo shanta
dale e Soomaaliyeed ee aanu ahayn mid ku kooban labadii mataanoobay.
26ka Juun waa maalin rajo wanaag iyo saadaal suuban la kowsatay ee waa in la
mariyaa maamuuska ay leedahay oon hoos loo dhigin. Waa inay noqotaa mid qalin
dahab ah lagu qoro, lana soo ban dhigo qiimaha xoriyaddu leedahay.
Waa in la xusaa ragii u soo halgamay xoriyadda abwaano, siyaasiin, odayaal iyo
culumaba lana maamuuso ciddii ku dhimmatay, kuwa ku agoonoomay iyo inta nool oo
la qadariyo. Waa in ubadka loo qoraa taariikhda. Ogow cidda aan aqoon waxay
shallayto ahayd ma garan karto waxay noqon berito.
26ka Juun waxa dhaliyey muwaadiniin gacmaha is haysta, kala xisbi ah, kala beel
ah, oo wadaninimo walaalaysay. Waxaan la iloobayn kaalinta ay ka qaateen
abwaanada iyo dhammaan intii halganka dheer u soo martay xoriyadda dalkeena
hooyo.
Aan jaleeco macaanka gobannimadu leedahay. Bal dhuux, ereyada macaan ee ku jirta
heesaha caanka ah "Qolobaa calankeedu waa caynoo innaga keennu waa cirkoo kaloo
aan caadna laheyn"
26 Juun waxaay ahaan jirtay Mid ka mid ah maalmaha ugu xiisaha badan isla
markasan ugu taaqriiqda wanaagsan marka la eegayo dalka Soomaaliya hasa yeeshee
ayaaneey muuqan wax is badal ah oo ay ka sameeysay dalka Soomaaliya maanta oo ku
beegan 26 Juun sidoo kale Meelo badan oo dalka Soomaaliya ka mid ah oo aysan ka
jirin wax hadal heyn ah oo la xirirta munaasibadasi halka goobo badan oo dalka
ka mid ah isla markaan si weyn looga xusi jiray aaneey jirin wax qaban qaabo ah
ama diyaar garoow arintaasi la Gobo Badan oo astaan u ahaa qaranka Soomaaliyeed
ayaan u muuqan talaabo ama diyaar garoow arintaasi loogu xafladeeynayo.
Dad Badan oo qaar ka mid ah ahaayeen Madaxdii hore ee Soomaaliya ayaa waxaa ay
ku tilmaameen maalintaan in ay tahay mid ummada Soomaaliyeed ku weyn isla
markaana ay mudan tahay in qalbiga lagu hayo maadaama ay tahay maantii ugu
horeeysay ee shacabka Soomaaliyeed ay iska ridaan Heeryadii gumeeysiga.
Magaalada Hargeysa oo aheeyd halkii ugu horeysay ee laga taago calan ay ummada
Soomaali leedahay kadib markii ay iska dul qaadeen gumeeysigii ingariiska ayaa
waxaan laga xusin maalintan mana jirto wax arintaasi la xiriirta oo laga
dareemayo magaaladaasi ama Gobolka Waqooyiga Soomaaliya.
Sidoo kale waxaa la sheegay in shaqalaha dowlada La fasaxay iyadoo loo
tixraacayo in maalin un ay qaateen calan madaxbanaan balse wax munaasibad ah iyo
weliba farxada laga dareemayo magaalada Hargeysa ma jiraan sida maalinta 18 May
oo si weyn looga dabaal dego Hargeysa iyo Magaalooyin kale oo dhulka Maamulka la
magac baxay Soomaali land.
Si Kastaba ha ahaatee maantay waxaa nasiibdarro ah in qarannimadii iyo
midnimadii loo soo tiil iyo tacab beelay aay farahayaga si hawlyari ah uga
baxday ,oo Xabashi Afqarmuune uu Xamar oo ah caasimadii dalkii Soomaaliya ay
dhaxmushaaxeyso sidii gumeystihii cadaanka ahaa ee laga suuliyey 48 sano ka hor
Ma jiraan wax hadal ah oo arintani la xiriira oo ka soo baxay dowlada Daba
Quudhiga ah Soomaaliya oo Caalamka u aqoonsan yahay in ay tahay dowlada Sharciga
ah ee ka arimisa dalka Soomaaliya sidoo kale ma jiraan wax xaflad ama diyaar
garoow ka socda xarunta Vila Soomaaliya oo aheeyd halka sida weyn loogu dabaal
degi jiray maalinta 26 Juun ayaan jirin wax arintaasi la xiriira oo ay dowlada
ka sameeysay, iyo Xarunta Baarlamaanka ee magalada Baydhabo ayaan wax arintaasi
la xiriira iyo u dabaal dega munaasibada maalinta 26 Juun oo ku beegan maalintii
ay gobolada Woqooyi ka qaateen xuriyada dalka Ingariiska afartameeyo sano ka
hor.Hadaba miyeysan ahayn maanta oo kale mid mudan maamuus iyo dabaal dagyo guud
ahaan laga sameeyo dalka oo dhan gaar ahaan Waqooyiga soomaliya oo ah halkii ugu
horeysey ee calan soomaali leedahay laga taago,
Guul Alle iyo Gobannimo
Mohamed Ismail
mismacil@live.co.za
Johannesbrug
South Africa