Afhayeenka Barack Obama oo Raali-Gelin ka bixiyey Laba Gabdhood oo Khimaarka Muslimka Awgeed Loogu Diidey In ay Fariistaan Meel TV-gu Qabanayo ee Masrax uu ka Khudbaynayey Obama....

Laakiin Hebba Aref oo kamida Labada Gabdhood ayaa Dalbatay in Obama uu si toos isagu Raali-gelin u bixiyo

Gabdhaha waxaa loo diidey inay fariistaan meel ka dambaysa masraxa uu hadal ka jeedinayey Obama si aan TV-ga looga arag gabar khimaar ku lebisan oo dhabarka ka taagan Obama.. Taas weeye tan Afhayeenku raalli gelinta ka bixiyey, gabadhuna ay ku adkaysaneyso in Obama toos raalligelin uga bixiyo arrintaas....

• Tarjumadii: SomaliTalk.com | June 18, 2008

  ---

DETROIT, Michigan  -- Gabar Muslimad ah ayaa sheegtay in ayada iyo gabar kale oo Muslimad ah loo diidey in ay fariistaan kuraasta ka dambeysey masraxii uu ka khudbaynayey Barack Obama -- halkaas oo ku aadan meel kaamarada TV-gu qabaneyso sababtoo ah waxay gabadhahaasi ku labisnayeen Khimaarka ay xirtaan dumarka Muslimiintu.

Hay'adda wararka ee AP waxay tiri: Qof dumar ah oo Muslimad ah ayaa rumaysan sababtii loogu diidey in ay fariisato kuraasta ka dambeeyey meeshii uu ka khudbaynayey Barack Obama (ee ku aadan TV-ga) in tahay iyada oo ku lebisnayd khimaar awgeed.

Hebba Aref ayaa Arabacadii (June 18, 2008) waxay sheegtay in iyada iyo Shimaa Abdelfadeel ay ka mid ahaayeen 20,000 oo taageerayaal  oo isugu yimid tiyaatar (magaalada Michigan) uu Obama ka hadlayey Isniintii markaas ayaa koox ay gabadhahaasi isku meel joogeen waxaa dadka ololaha Obaama qaban-qaabiya ee volunteer-ka ay dadkaas ku casumeen in ay fariistaan masraxa ka dambeeya meesha uu Obama ka hadlayey - [si kaamarada TV-gu u qabato dad taageerayaal ah oo ka dambeeya Obama].

Laakiin, ayey tiri Hebba Aref, qaban-qaabiyaashii waxay kooxdii u sheegeen in gabdhahani ay ku labisan yihiin xijaabka Muslimka, khamaarka ay xirtaan gabadhaha Muslimiinta ah, sidaas ayaa loogu diidey inay fariistaan masraxa gadaashiisa, meesha Kaamarada TV-ga ku aadan.

Hebba Aref, 25-sano-jir ah qareen, waxay tiri waxay qaban-qaabiyaashii sheegeen sababta ay u diideen in ay tahay "arrin siyaasadeed oo xasaasi ah awgeed".

Laakiin afhayeenka Obama oo magaciisu yahay Bill Burton ayaa soo saaray warsaxaafadeed uu ku sheegay in dhacdadaasi aysan ahayn qorshe ka soo fuley Ololaha Obama.

"Waa arrin qoonsimaad leh, oo ka soo horjeedda hadalladii Obama ee midaynta dadka Ameerikaanka, mana aha taasi nooca ololahayaga. Si daacad ah ayaan raalligelin uga bixineynaa hab-dhaqankan," ayuu yiri afhayeenka Obama.

Waxay markaas Hebba Aref ku jawaabtey mahad celin ay u jeedisey afhayeenka Burton, laakiin waxay weydiisatey in Obama uu si toos ah raali geliyo u siiyo iyada iyo gabadha kale Shimaa Abdelfadeel, oo uu isla markaas u soo diro casumaad in ay fariistaan masraxiyada ka dambeeysa meel uu ka hadli doono mustaqbalka [meel TV-gu qabanayo]. Markaas ayaa Afhayeen kale oo u hadashay Obama oo magaceedu yahay Amy Brundage waxay sheegay in ololahooda ay raalli gelin bixiyeen.

"Waxa uu u baahan yahay in uusan arrintaan yaraysan, waana in uu diro dhambaal xooggan oo ku aaddan arrintan noocaan oo kale ah ee kala faquuqa ah," ayey tiri Hebba Aref.

Inta badan musharaxiinta Maraykanku marka ay ka hadlayaan masraxyada waxay casumaan dad ka mid ah bulshada ka soo qayb gashay kulankaas oo ay fariisiyaan masraxa gadaashiisa si ay u hagaajiyaan ama u qurxiyaan sawirka musharraxa (una muujinaan in uu haysto taageerayaal badan).

Hay'adda AP waxay qoryay in Hebba Aref ay tahay Muslimad ku dhalatay Maraykanka, waalidkeedna ay yihiin laajiyiin ka soo jeeda dalka Masar. Waxayna gabadhaasi sheegtay in markii ololahii Isreeb-reebkii hore lagu jirey in ay aad u difaacdey Obama xilli suuqa la isla dhex xulayey in uu yahay Muslim. Wakaalada Wararku waxay tiri Obama waa Kirishtaan.

Obama sidoo kale aad ayuu uga taxadarey iska fogeynta xiriirkaas, isagoo hore u sheegay in wararka la isla dhex marayo ee ahaa in uu Muslim yahay in ay sidoo kale arrintaasi cay ku tahay Muslimiinta.

"Ma doonayo in la iigu yeero waxa aanan ahayn, laakiin waxaan dareemay sidii... in qofkasta u tixgelinayo arrintaan la isla dhexmarayo ee Muslim ahaanta sidii in ay tahay arrin fal-dembiyeed ah ama dembi ah," ayey tiri Hebba Aref.

Laba Walaalo Soomaaliyeed oo "Halifax Herald" Sawirkooda u Xulatay in ay Kamidyihiin kuwa ugu Wanaagsan Sannadka 2000....

Hebba Aref waxay aad ugu faraxday in kooxdii iyada la socotey, oo uu ku jirey walaalkeed Sharif, iyo weliba dad aan Muslim ahayn oo iyada jaal la aha, ay diideen inay fariistaan kuraasta ka dambaysa masraxii uu ka hadlayey Obama.

Waxay Hebba Aref sheegtay in markii uu Obama ka hadlayey goobtii ay iyada aad ugu akaatay in ay maqasho dhambaalkiisii midaynta dadka kala midabka ah. Waxayna tiri "Markii uu sidaas dhehayey, waxaan ku fekerayey, "bal wax yar u kaadi, waxaa si cad la ii faquuqay saacad ka hor."

CNN oo arrinta gabadha Muslimiinta faallo dheer ka bixiyey ayaa weriyaha, barnamaijka 360, waxa nin siyaasadda ka faallooda weydiiyey: haddii dumarkaasi fariisan lahaayeen masraxa gadaashiisa ma waxaa dhaawac soo gaari lahaa magac Obama. Ninkii waxa uu ku jawaabey "MAYA", waxana uu intaas raaciyey in ficilkaas dumarka Muslimiinta loogu diidey masraxa gadaashiisa in ay ahayd khalad.

• Barnaamijkii CNN: Dhegeyso Halkan ama Halkan (mp3)

Akhri: Muslims barred from picture at Obama event  

Akhri: Warkii AP  http://ap.google.com/