SOMALITALK.COM dahabshiil
w w w . S o m a l i T a l k . c o m
SOMALITALK - WARAR

Barnaamijkii Radio Xoriyo
24 Jun 2008.

Halgame N/Hure Sh Ibraahim Cabdalla oo Imaaraadka ku geeriyooday
Gudoomiyaha jwxo oo Tacsi qaran u diray shacabka Ogadenya.
Qaar kamid ah tacsida dhagaystaasha Radio Xoriyo ee N/Hure Sheekh Ibrahim Cabdalla
Geneva Press Club oo xasuuqa Ogaadeenya shir jaraa’id u qabanaya
Xildhibaan Feingold oo mar kale ka hadlay arrimaha Ogaadeenya
Wasaarada A/dibada ee Sweden oo ka hadashay Ogadenya iyo Wasiirka A/dibada ee Sweden oo suaalo ku saabsan Ogadenya lagu weydiiyey Baarlamaanka Sweden.
======================

Halgame N/Hure Sh Ibraahim Cabdalla oo Imaaraadka ku geeriyooday

Guddoomiyihii hore ee Jabhadda Waddaniga Xoreynta Ogaadeenya JWXO, isla markaana lagu tilmaami jiray Hoggaamiyaha Ruuxiga ah ee Ogaadeenya Sh Ibraahim Cabdalla, ayaa axaddii ku geeriyooday magaalada Abu Dabay ee Isu Tagga Imaaraadka Carabta. Alla ha u naxariistee Sh Ibraahim Cabdalla, oo da’diisu ahayd 67 jir, wuxuu xubin ka ahaa Golaha Dhexe ee JWXO, wuxuuna wali ku hawllanaa hirgalinta himiladiisii ahayd inuu u halgamo sidii uu bulshada Ogaadeenya uga dul-qaadi lahaa reeryada gumaysiga.


Sh Ibraahim Cabdalla wuxuu ku dhashay magaalada Qallaafo sannadkii 1941, wuxuuna waxbarashidiisa ilaa iyo heer jaamacadeed ku soo qaatay Boqortooyada Sucuudi Carabiya.
Wuxuu xubin ka ahaa Golaha Dhexe ee WSLF, sannadkii 1981 waxaa loo magacaabay wakiilka WSLF ee waddanka Imaaraadka Carabta, hase yeeshee wuxuu ka mid ahaa masuuliyiintii Ogaadeenya ee ugu horreeyay eek u gacan saydhay siyaasadii majara-habaabinta ahayd ee lagu waday halganka Ogaadeenya, wuxuuna ka mid noqday asaasayaashii JWXO sannadkii 1984.


Sh Ibraahim Cabdalla waxaa guddoomiyanimada JWXO loo doortay sannadkii 1991, isagoo xilkaas hayay ilaa iyo sannadkii 1998. Arrimaha sida wayn loogu xusuusto Sh Ibraahim Cabdalla waxaa ka mid ah weerarkii ay ciidammada Wayaanuhu ku qaadeen bishii Febrawari ee sannadkii 1994, kaasoo ay doonayeen inay ku dilaan isaga iyo madaxd kale oo JWXO oo ka dhacay magaalada Wardheer, arrintaasoo ay ka gadoodeen dadwaynaha reer Wardheer, isla markaana horseeday in ciidammada Wayaanuhu ay halkaas ku dilaan in ka badan 80 qof oo shacab ah, balse ay ku guulaysteen in hoggaamiyahooda ka samata-bixiyaan weerarkaas bahalnimada ah.


Sh Ibraahim Cabdalla wuxuu ahaa Qoraa can ah oo si wayn wax uga qoray qadiyada Ogaadeenya iyo guud ahaanba gobolka Geeska Afrika. Kitaabadii uu qorayna waxaa ugu caansanaa labada Kitaab oo carabi ku qoran oo lagu kala magacaabo “Jabkii Seddexaad ee Absiinaya oo uu Qoray sannadkii 1982 iyo Tuxfatul Awfiyaa oo uu qoray sannadkii 2001.


Alla ha u naxariistee Marxuum Sh Ibraahim Cabdalla wuxuu noqon doonaa halgamaa iyo hoggaamiye ay taariikhdu xusi doonto, isla markaana aan sinaba uga tirtirmi doonin quluubta dadwaynaha Ogaadeenya iyo dadyowga neceb dulmiga iyo isku dul-noolaanshaha.

Geneva Press Club oo xasuuqa Ogaadeenya shir jaraa’id u qabanaya

Naadiga Warbaahinta ee Geneva ee dalka Switzerland ayaa maalinta khamiista ee bisha Juun 26-ka tahay qaban doona shir jaraa’id oo lagu soo bandhigi doono dhibaatada xuquuqda aadanaha iyo xaalada bani’aadamnimo ee Ogaadeenya iyo doorka ay Qaramada Midoobay ku leedahay.
Shirkan jaraa’id waxaa lagu soo bandhigi doonaa arrimo ay ka mid yihiin dilka aan aaba-yeelka lahayn, jidhdilka naf-gooyada ah, kufsiga dumarka, faraxumaynta carruurta, xidhayga aan maxkamada lahayn iyo boobka hantida ee ciidammada gumaysiga Itoobiya sida maalinlaha ah uga gaystaan dalka Ogaadeenya.
Shirkan jaraa’id waxaa ka hadli doona xidhiidhiyaha caalamiga ah ee Guddiga Xuquuqda Aadanaha Ogaadeenya C/qaadir Sulub Cabdi iyo madaxa qaybta Canada ee Guddiga Xuquuqda Aadanaha Ogaadeenya Fowsiya C/qaadir.
Shirkan jaraa’id ayaa lagu martiqaaday xubnaha saxaafadda waddanka Switzerland iyo saxaafadda caalamiga ah.


Xildhibaan Feingold oo mar kale ka hadlay arrimaha Ogaadeenya

Xildhibaan ka tirsan Golaha Senedka ee waddanka Maraykanka, oo lagu magacaabo Russell Feingold, oo ka tirsan xisbiga Dimuqraadiga, ayaa warmurtiyeed uu axaddii soo saaray, wuxuu si wayn ugu dhalliilay siyaasada gurracan ee kaligii taliye Meles Zenawi, isagoo dowlada Maraykanka ugu baaqay inay joojiso kaalmada ay siiso maamulka Addis Ababa, isla markaana ay ku cadaadiso sidii uu u joojin lahaa denbiyada uu ka wado Ogaadeenya iyo ku tumashada xuquuqda aadanaha iyo caqabadaynta hirgalinta hannaanka dimuqraadiyada.


Xildhibaan Feingold wuxuu warmurtiyeedkiisan ku sheegay in sannadkii u denbeeyay oo dhan si wayn uga walaacsanaa wararka ka imanaya Ogaadeenya ee sheegaya weerarrada ay ciidammada Itoobiya ku hayaan dadwaynaha rayadka ah ee Ogaadeenya iyo joojinta uu maamulka Addis Ababa Ogaadeenya ka joojiyay ganacsiga iyo gargaarka bani’aadamnimo.
Wuxuu tilmaamay in ururrada maxalliga ah iyo kuwa caalamiga ahiba ay sheegeen in ciidammada Itoobiya ay gubaan tuulooyinka, isla markaana ay dadwaynaha ku ururiyaan gobo tilmaaman iyadoo aan baad iyo biyo midna lagu siinin goobahaas.


Xildhibaan Feingold wuxuu kaloo tilmaamay in sharciga cusub ee Itoobiya u samaysay ururrada aan xukuumiga ahayn uu caqabd ku noqon doono hawlaha ururradaas, isla markaana uu hakid galin doono dadaalka loogu jiro kobcinta dimuqraadiyada iyo daryeelka xuquuqda aadanaha, iyadoo ururrada aan xukuumiga ahayn laga af-qaban doono kaalmooyinka dhaqaale ee dibada uga iman jiray.
Xildhibaan Feingold ayaa dowlada Maraykanka iyo deeq bixiyayaasha kalaba ugu baaqay inay dib u eegaan kaalmooyinka ay Itoobiya siiyaan oo hubiyaan in kaalmooyinkaasi gacan ka gaysan karaan dimuqraadiyada, horumarka iyo xilkasnimada xukuumadda Itoobiya.


Hoggaamiyihii mucaaradka Zimbawe oo safaarada Holland isu dhiibay

Hoggaamiyihii dhaqdhaqaaqa mucaaradka ah ee MDC ee waddanka Zimbawe Morgan Tsvangirai ayaa isniitii isu dhiibay safaarada Holland ku leedahay magaalada Harare.

Dhaqdhaqaaqa MDC ayaa horay u sheegay in booliska Zimbabwe uu weeraray xarunta ay uu dhaqdhaqaaqu ku leeyahay magaalada Harare, isla markaana uu la tagay in ka badan 60 ka mid ah taageerayaashiisa oo ku waxyeelloobay qalalaasaha Zimbabwe ka jira. MDC wuxuu sidoo kale sheegay in malleeshiyo taageerta madaxwaynaha Zimbabwe Robert Mugabe ay dileen 90 ka mid ah taageerayaasha mucaaradka.


Tsvangirai ayaa axaddii sheegay inaanuu ka qayb qaadan doonin wareegga labaad ee doorashooyinka madaxtinimada dalkaas oo la qaban doono 27-ka bishan, isagoo tilmaamay in tageerayaashiisu ay halis galayaan haddii ay mucaaradka u codeeyaan. Hase yeeshee wuxuu isniintii daboolka ka qaaday inuu diyaar u yahay wadaxaajood uu la galo xisbiga waddanka xukuma ee ZANU-PF, haddii la joojiyo buu yidhi weerarrada iyo dhibaatooyinka loo gaysanayo taageerayaashiisa.
Dowlada Zembabwe ayaa sheegtay in Tsvangirai uu tartanka doorashada ka baxay, ka dib markii uu ka baqay in guuldarro ba’an ka soo gaadho
24 Jun 2008

Axmed Gaal-Eri

Radioxorio@radioxoriyo.com
Raadioxoriyo@yahoo.com

Radio Xoriyo waxaad ka dhegaysan kartaa Mawjadda 41 MB ee dhererkeedu yahay 7560 KHZ,iyo internetka Radioxoriyo.com,Ogaden.com Maalmahaa Talaadada & Sabtida 5:00PM – 5:30 waqtiga Afrikada Bari
 

Faafin: SomaliTalk.com | June 25, 2008

BAARID | SEARCH


khimarBarack Obama oo Telefoon ku Raali Geliyey
Labadii Gabdhood oo Khimarka Muslimiinta awgeed Loogu diidey Masrax uu Ka Khudbaynayey Obama Akhri

Kalfadhigii 20aad ee Golaha Wakiillada Puntland oo Ka Furmay Garoowe...
iyo Gen. Cadde Muuse oo sheegay in 5 bilood ay kusoo saarayaan Batroolka, waxana uu yiri "Jirri ayaa tiriye Shaydaan baan la heshiinayaa si aan waddan kayga wax ugu soo saaro"  Akhri..

aminaVideo.1 | Video.2
Read.1 | Read.2


Kulaabo bogga  www.SomaliTalk.com  © www.SomaliTalk.com

La soo xiriir: webmaster@somalitalk.com

IIDHEH

XAYAYSIIS

Copyright © 1999-125 SomaliTalk.com All rights Reserved.