Xaflad weyn oo lagu maamuusayay ardayda ka qalinjabisey Mac-hadka
Al-furqaan oo ka dhacday L/caanood
Sawirada Xafladda halkan ka daawo....
Waxaa lagu qabtay xarunta Khadiija Bint Khuweylid ee dumarka
subaxnimadii isniinta 30/06/2008 xaflad ballaadhan oo si weyn loo soo
agaasimay oo lagu maamuusayay ardaydii ka qanlinjabisay mac-hadka
Al-furqaan ee culuumta sharciga iyo luqada carabiga. Xafladda waxaa ka
soo qeybgalay maamulka, macallimiinta, ardayda mac-hadka, waalidiintooda
iyo qaar ka mid ah dadweynaha reer Laascaanood. Waxaa kale oo ka soo
qeybgalay marti sharaf kale oo ka kala yimid gobolada dalka iyo
dibadaha.
Ugu horrayn waxaa xafladda lagu bilaabay aayado Qur’aan ah, ka
dibna waxaa kalimad soo dhaweyn iyo mahadcelin ah ka soo jeediyay
goobtaas Sheekh C/naasir Xaaji Axmed oo uga mahadceliyay marti sharafta
meelo dhaadheer uga yimid ka qeybgalka munaasabaddan qiimaha badan,
wuxuuna yiri sheekhu abaalgud waxaa ugu qiimobadan ducada ee Alle khayr
ha idan ku abaalmariyo. Waxaa kale oo sheekhu ku tilmaamay risaalada
mac-hadku in ay tahay: barista iyo faafinta cilmiga sharciga oo ah
dhaxalkii nabiyaasha. Waxaa kale oo sheekhu tilmaamay in cilmigu xal u
yahay mushkiladda bulshada.
Waxaa iyana bandhig aqooneed aad u heer sarreeya oo ku socday
afka carabiga ku soo bandhigay xafladda qaar ka mid ah ardayda machadka.
Culuumta ardaydu soo bandhigeen oo aad loogu riyaaqay waxaa ka mid ahaa:
caqiido, tajwiid, musdalaxa xadiiska, qawaacidda fiq-higa, sarfaha,
naxwaha, usuulul fiqhi, tafsiirka iyo culuumta Qur’aanka, fiqhi, usuusha
takhriijka xadiiska, balaaghada. Waxaa intaa dheeraa gabayo kala jaad
jaad ah oo qaarkood ay kaga hadlayeen mac-hadka. Waxaa marti sharaftii
iyo dadweynihii xafladda ka soo qeybgalay oo dhan aad u soo jiitay
ardayda oo culuumtaas oo dhan ku soo gudbiayay luqada carabiga iyaga oo
waliba kor ka akhriyayey. Waxaa iyana xusid mudan manhajka ardayda loo
dhigay oo ah mid aad iyo aad isugu dheellitiran oo funuunta diinta iyo
luqada carabiguba ku dhan yihiin. Waxaa iyana wax aad loogu farxo ahaa
tarbiyada sare iyo haybadda culimanimo ee ka muuqatay ardaydaas oo
da’doodu aad u yaryarayd.
Madaxa guddiga maamulka mac-hadka Eng. Jaamac C/laahi Caydiid
ayaa isna xafladda ku soo bandhigay warbixin faahfaahsan oo ka hadlaysa
taariikhda mac-hadka, ujeedooyinkiisa, waxqabadkiisa, waxyaabaha uu
hiigsanayo iyo kaalinta bulshada kaga aaddan horumarinta mac-hadka.
Waxaa iyana xafladda ka hadlay Sh. Maxamuud Max’ed Xalliike oo
ka mid ah macallimiinta mac-hadka. Waxaa isna kalimad xamaasad iyo qiiro
ku dhehantahay ka yiri xafladda Suldaan C/salaam Max’ud Xaaji Nuur oo ku
tilmaamay dadku in ay yihiin wax la maalgashado waxa ugu muhiimsan,
ciddii ubadkeeda maalgashanweydana ay taariikhda ka harayso. Suldaanka
oo ka mid ahaa ardaydii ugu horraysay ee wax ku baratay mac-hadkan waxa
uu ugu baaqay balshada in ay taageeraan mac-hadka, ayna u shafeecaan,
wuxuuna ku nuuxnuuxsaday sida qof walba loogaga baahanyahay in uu
kaalintiisa ka qaato horumarinta mac-hadka.
Sh. Axmed Max’ed Suleymaan oo gabay uu ku amaanayo mac-hadka halkaa
ka tiriyay, Yuusuf Jaamac Calas oo ku hadlayay magaca waalidiinta
ardayda, waxaana uu ku ballanqaaday in ay si buuxda u taageeri doonaan
mac-hadka. Waxaa kale oo kalimad kooban soo jeediyay Sh. C/laahi Daahir
Jaamac (Baashe) oo ku hadlay magaca marti sharafta ka timid Hargeysa iyo
Burco. Waxaa kale oo kalimad kooban isna soo jeediyay Cumar Faaruuq oo
ka mid ah masuuliyiinta shirkadda isgaarsiinta Golis ee saldhiggeedu
yahay Boosaaso. Waxaa kale oo kalimad ka yiri golaha Jaamac Max’ed Mire
(Amiir) oo ka mid ah duqowda deegaanka, wuxuuna ku ballanqaaday in ay
taageero buuxda siinayaan mac-hadka. Waxaa magaca jaaliayadaha dibadda
ku hadlay Garaad Ciise Garaad Soofe oo ardayda ku dhiirrigaliyay in ay
dadaalka waxbarasho sii wadaan, wuxuuna ugu baaqay jaaliyadaha iyo
dadweynahana in ay labanlaabaan taageerda ay siiyaan mac-hadka. Waxaa
kale oo uu tibaaxay Garaad Ciise in ardaydii ka baxday mac-hadka
L/caanood ay ku xiriiriyaan arrintaas meel kasta oo ay joogaan.
Xafladdan waxaa lagu maamuusayey 59 arday oo dhamaysatay daraasadii
machadka oo ahayd labo sanadood, iyo 65 arday oo dhamaysatay sanadkii
koowaad ee waxbarashada.
Ugu dambayntii waxaa la guddoonsiiyay ardayda ugu sarsarreysey
abaalmarin dhiirrigalin ah.
Maamulka Machadka Al Furqaan ee Culuumta Shareecada Islaamka iyo
Luqada Carabiga
Laascaanood
la xiriir:
alfurqaninstitute@hotmail.com
Faafin: SomaliTalk.com | July 1, 2008
Daabaco
Boggan | Print
Kalfadhigii 20aad ee Golaha Wakiillada Puntland oo Ka
Furmay Garoowe...
