DAAWO:- VIDEO: Muhammad: Legacy of a Prophet

Daabaco Boggan | Print

MAS’UULIYIIN KA TIRSAN ISBAHAYSIGA DIB U XOREYNTA OO LA KULMEY SARAAKIIL KA TIRSAN ICRC

Xubno sar-sare oo ka tirsan Isbahaysiga Dib u xoreynta iyo Dib u soo noolaynta ayaa shalay magaalada Birmingham ee dalka Britain kula kulmey wafdi ka soo socdey Gudiga Caalamiga ah ee Laanqayrta Cas ICRC oo uu hoggaaminayey madaxa hawlgalka ICRC-da ee Bariga Afrika Daniel Duvillard. Ujeedada kulanka labada dhinac ayaa ahaa sidii ICRC-da loogu gacan siin lahaa hawlgallo gargaar ah oo ay ka fulinayso gobollada & degmooyinka dalka.

Dr. Zakariye Maxamuud Xaaji Cabdi, guddoomiye ku xigeenka Isbahaysiga Dib u Xoreynta oo hoggaaminayey xubnihii la kulmey wafdiga ICRC-da, ayaa sheegey inay ICRC-da ka dalbadeen inay gargaar bani’aadannimo oo isugu jira cunno iyo daawoba gaarsiiso goobaha ay dadka Soomaaliyeed ku dhibaateysan yihiin ee hareeraha magaalada Muqdisho iyo gobollada dalkaba, waxaana uu si gaar ah u xusey abaaro ku dhuftey deegaanno ka tirsan gobollada Dhexe ee dalka.

Dhinaca kale mas’uuliyiinta ICRC-da ayaa shaaca ka qaadey inay haatan diyaarinayaan hawlgallo ka ballaaraan kii ay hore uga wadeen Soomaaliya waxayna wadeen xirriiro ay la kala sameynayeen dhinacyada isku haya Soomaaliya si gacan loogu siiyo hawlgalladooda ay gargaarka ku gaarsiinayaan dadka dhibaataysan.

Zakariye ayaa sheegey inuu jirey kulan hore oo isaga iyo ICRC-du ay hore ugu yeesheen magaalada Geneva ee dalka Switzerland, shirkanina uu daba socdey kaas, waxaana uu sheegey inay dhinacooda u ballan qaadeen wada shaqeyn. Xubnaha kale ee Isbahaysiga ee wafdigan la kulmey waxaa ka mid ahaa Maxamuud Cabdi Gaab oo ah guddoomiyaha Guddiga Arrimaha Gargaarka ee Golaha Dhexe ee Isbahaysiga Dib u xoreynta.

Isha: Wargal

Faafin: SomaliTalk.com | Feb 3, 2008

Kulaabo bogga  www.SomaliTalk.com  © www.SomaliTalk.com