War saxaafadeed: Musharax Adam Mohamed Esse (Gaadaale)
December 29, 2008
War saxaafadeed (Press Release)
SHAKI LAGA QABO HABSAMI U DHICIDDA DOORASHADA PUNTLAND
Waxaa dadweynaha reer Puntland aad uga shakisan yihiin in aysan dawladda maanta
jirtaa marna daacad ka ahayn in doorashooyin xalaal ahi ka dhacaan ama la qabto
waqtigii loogu tala galay oo ay ayaamo yari ka harsan yihiin. Waxaana keenay
shakigaas arrimaha soo socda:
Dib u rididda soo dhejinta xubnaha baarlamaanka.
Maxkamadaynta dad loogu yeeray in ay dembi ka galeen dalka, loona diiddan yahay
in la meel mariyo xildhibaan-nimada ay u soo sharrexeen Nabadoonnada iyo
Isimmada beelohoodu.
Beelo si toos ah ay dawladdu uga diiddey xubnihii ay keensadeen iyada oo ay
sabab ka dhiganayso; waa in ay beeshu keento gabar, meesha ay ka keentay wiil.
Hadday beeshu gabar keentana lagu yiraahdo waxaa la rabaa wiil. Taas oo loo
qaatay in ay tahay hab ay dawladdu wax ku khayaanayso.
Warar isa soo taraaya oo sheegaaya in ay dawladdu diyaarsanayso ciidammo-beeleed
malleeshooyin ah oo lagu ururinaayo meelo kala duwan, taas oo loo qaatay in ay
dawladdu dadka xoog ku cabburinayso, aysanna marna aqbalayn haddii si xaq iyo
caddaalad ah looga guuleysto.
Doorashada oo ay tahay in la qabto bisha Jannaayo siddeedeeda (January 8, 2009),
ayaa waxaa ka soo yeeraaya dawladda in haddii wax yaabaha ay rabto la fulin
waayo, ay dib u dhigayso waqtigii loogu tala galay in ay doorashooyinku dhacaan.
Waxaan dowladda u soo jeedinayaa saddex arrimood oo doorashada iyo ololeheeda la
xiriira isla markaana heshiiskii is-afgaradka ku jiray in ay wax ka qabato:
In xubnaha laysku khilaafsan yahay xildhibaanimadooda si deg deg ah gacanta
looga geliyo Isimada toddobada ah ee soo jireenkana ah, lagana soo doortay
Isimmo tiradoodu gaarayso ilaa iyo afartan (40 Isim). Isimadaas ayaana laga
filayaa in ay si caddaalad ah u kala saaraan xubnahaas laysku khilaafsan yahay.
In aysan dawladdu fara gelin ku samayn xulitaanka xubnaha golaha wakiillada, ee
ay u daayaan qabaa'ilku dhexdooda si ay si xor ah ugu soo xushaan.Waxaa hadda
socota dadka xildhibaannada qabaa'ilku u soo doorteen ee aan raacsaneyn
dowladda, in ay dawladdu dambi u sameyso dabadeedna dacwad ku oogto si ay u
noqdaan dad dambiilayaal ah isla markaana aan u qalmin in ay xildhibaanna
noqdaan,waxaa kale oo dowladda lagu eedaynayaa in xildhibaannada aan iyada
taageersaneyn ee qabaa'ilku soo xushaan ay xubin ama xubno kale oo ay iyadu
wadato ka doc sameyso, isla markaana laaluush ku bixiso si uu u soo boxo qofka
iyada taageersan, ama buuq iyo is qabqabsi uga dhex sameysmo qabaa'ilka,
arrimahaasina waxay abuuri karaan fidmo iyo isku dhac dadka dhexdiisa, waxaan
dowladda u soo jeedinaynaa in ay arrimahaa faraha kala baxdo oo ka waantowdo.
Wixii khilaaf ah oo beeluhu dhexdooda xallin waayaan waa in loo daayo guddigii
odayaasha dhaqanka ahaa ee lagu heshiiyay in ay xalliyaan.
Waxaan kaloo dowladda u soo jeedinayaa in ay arrinta amniga caasimadda sidii
lagu heshiiyey wax uga qabato inta ololaha doorashadu socdo, waxaana heshiiska
ka mid ahaa in la sameeyo ciidan ka kooban 300 oo qof oo ka kala socda 7-da
gobol ee Puntland ka koobantahay oo qalabeysan, isla markaasna ay kormeeraan
Isimmada reer Puntland.
Anigu waxaan awooddayda musharaxnimo iyo qof ahaanba ku ballan qaadayaa (My
capacity as a candidate and personal level) in aan si xoog leh uga qayb
qaadanayo wax kasta oo lagu sugaayo ammaanka dalka iyo hab sami u dhicidda
doorashada, sidoo kale waxaan ka codsanayaa dowladda, isimada, murashaxiinta,
ciidamada iyo dhammaan qaybaha kala duwan ee bulshada reer Puntland ka
koobantahay in ay iska kaashadaan sugidda nabadgelyada iyo sidii ay doorashadu
ugu dhici lahayd caddaalad.
Waxaa warsaxafadeedkaan soo saaray:
Musharax Adam Maxamad Ciise (Gaadaale)
adamesseforpresident@gmail.com
Faafin: SomaliTalk.com | Dec 30, 2008
C/Laahi
Yuusuf oo Is Casilay Isniin Dec 29, 2008
Madaxweyanaha DFKMG ayaa ku dhawaaqay in uu iska casiley xilka DFKMG
Akhri Warka oo dhan...