Duran Faarax ''Inaan calanka Soomaaliya Olampikada Aduunka
Peiking 2008 China gayno waxay ahayd waajib laakiinse waa inaan
Olampikada 2012 London si ka wanaagsan uga qayb galno insho
Allah’’.
Sawirada ka daawo halkan....
Waxaan magaalada London kula kulmay Gudoomiye ku xigeenka
Gudiga Olampikada Soomaaliyeed ee xiriirka caalamiga mudane
Duran Axmed Faarax, isla markaana ahaa madaxii hogaaminayey
ergada Soomaaliya ( Chief of Mission) ee ka qayb gashay
tartankii ciyaaraha Olampikada Aduunka ee dhawaan lagu soo
gabagabeeyay dalka China..
Mudane Duran ayaa iga warbixiyay safarkoodii iyo sidii dowlada
China u marti galisay cayaaraha Olampikada aduunka 2008.
Dowlada China sidii ay u martigalisay ma ahan wax laga sheekayn
karo hadii ay ahaan lahayd, martigalinta, soo dhawaynta ,
mehrijaanada , goobaha loogu talagalay inay ka dhacaan
tartamada, degaanada la dajiyay ka soo qayb galayaasha iyo sida
loo adkeeyay xaga nabadgalyada, taas oo run ahaantii dunida dhan
laga qirey in China sida ay u samaysay martigalinta Olampikada
2008 looga samayn dunida loogana samayn doonin, iyadoo wax
walbana ay ka dhacayeen xaafad loo bixiyay Olampic Village oo ku
taal duleedka magaalada Peiking
Waxaan sii su’aalay inuu iga warbixiyo sida Soomaaliya uga qayb
gashay Olampikada sanadkaan,?
Duran : waxaa kaga qayb galnay cayaaraha Olampikada sida
sharciga dhigaayo labo ciyaaryahan oo matalaya dalka Soomaaliya
oo aan ka soo qayb galin is reeb reebyadii hore sida loo
ilaaliyo sharciga u dagsan IOC-da, kaas oo qeexaya in dalalka
caalamka oo dhan ay ka soo qayb galaan Olampikada iyo Gudiga
Olampikada Soomaaliyeed oo isna casumaad ka helay IOC & NOC.
Waxaan kaga qayb galnay wafdi u hogaaminaayo mudane Ibraahim
Gacal Abkow. Gudoomiyaha Olampikada Soomaaliyeed ayna wehliyaan
Mudane Adan Xaaji Yabarow ‘’ Wiish’’ gudoomiye ku xigeenka G.O.S
Mudane Eenow Gudoomiyaha xiriirka kubadda gacanta Soomaaliyeed.
Mudane Prof Caddow. Xubin ka tirsan GOS
Drs Khadiijo Dahir Gudoomiye ku xigeenka cayaaraha fudud
Soomaaliya.
Waxaa kale oo cayaaraha fudud olampikada nooga qayb galaayey
labo ciyaaryahan, kuwaas oo kala ahaa
Cabdi Naasir Siciid oo ka qayb galayay tartanka oradka 5 KM.
Saamiya Yuusuf oo ka qayb gashay oradka 200 M tartanka gabdhaha.
Waxaan su’aalay dad kale oo ka mid ahaa wafdiga Soomaalida oo
aan Soomaali u dhalan oo ka qayb galay cayaaraha inay jireen iyo
sida ay ku dhacday?
Duran Farah waxa uu kaga jawaabay sidatan : waxaa kale oo nagu
wehliyay marti kale oo isugu jirey Soomaali iyo Ajanabi oo
dhamaantood ku yimid sida sharciga dhigaayo kadib markii aan ku
casunay inay nagala qayb galaan waayo IOC & NOC ayaa ugu tala
gasha inay soo raaci karaan wafdiga dhawr qof oo saaxiibo la ah
ama dad ay iyaga u gartaan inay ku casumaan inay kala qayb
galaan tartanka, marka sidaas ayay ku yimaadeen, laakiinse ninka
u dhashay dalka South Africa waxa u ahaa nin wax badan naga
caawiyay ama noo sameeyay qalab aan aad ugu baahnayn kuwaas
qiimo aad u badan noogu kici lahaa hadii uusan noogu caawin,
waxa uu si lacag la’aan ah noogu sameeyay biinanka calanka
Soomaaliya kan xiriirka GOS iyo jaakado, garabaatiyo kuligeen
aan ku joogno China, tusaale ahaan Binanka calanka waxaan
gudoonsiinay dowlado badan oo kulamo aan la yeelanay intaan
joognay China, marka qof kaas oo kale inaa ku casunto inuu kala
qayb galo madaama uu iska bixin karo qarashka deegaanka, cuntada
iyo Ticket waa wajib inaa ku casuno madaama uu noo qabtey wax
weyn, qof kasta oo waxtara dal ama dad waa lagu casumi karaa si
loogu abaalgudo waxa uu noo qabtey.
Waxa kale oo nagu wehliyay caruur Soomaaliyeed oo labo ah oo
iyagana ka qayb galay Youth Camp, iyagana waxay ka mid noqdeen
caruurta dalalka 205 wadan ee ka qayb galay Olampikada.
Yaa la kulanteen intii aad joogteen Peking China ayaan sii
suaalay mudane Duran?
Waxaan la kulanay IOC, NOC iyo dalal aad u badan oo aan wada
daganeen Olampic Village, dhamaantoodna waxaan ka wada hadalnay
sidii aan iskaga kaashan lahayn horumarinta cayaaraha
noocyadiisa kala duwan, run ahaantiina dadka oo dhan aad bay ula
dhacsanaayeen in Soomaaliya oo dhibaato dheer ku jira inay
hadana ay ka qayb galayaan, isla markaana labada ciyaaryahan ee
matalaysay dalka Soomaaliya aad baa loola dhacsanaa loona
xushmaynaayay, taasina waxay ku cadahay wareysiyada laga qaaday
intii ay joogeen China.
Kulankii Dowlada China & GOS Soomaaliya
Waxaan kulan muhiim ahaa la yeelanay Wasaarada Isboortiga China
Republic , oo run ahaantii nagu soo dhaweeyay si weyn
xafiiskooda, kadibna waxaan uga mahad celinay sidii dowlada
China ay gacanta uga gaysteen dhisidii Staduim Muqadisho,
National Theatherka iyo martigalinta cayaaraha Olampikada.
Wasiirada Isboortiga China ayaa noo sheegtey in u arkaan labada
dal Shiinaha iyo Soomaaliya inay yihiin labo shacab oo walaalo
ah isla markaana China aysan waligeed hilmaameen sidii
geesinimada lahayd ee dowladii Soomaaliyeed sanadihii 1970
–yeedii ay hormoodka uga ahayd difaacida ama garab siinta
dowlada Shiinaha.
China ayaa xiligaas dhibaato ka haysatey UNITED NATION-ka,
waxayna kale u sheegtey inay la socdaan in garoonkii Staduim
Muqadisho ay xaruun ka dhigteen ciidamada Ethopia si sharci daro
ah, ayna ka xun yihiin dowlada iyo shacabka Shiinaha dhibaatada
haysata dadka Soomaaliyeed ayna ka murugoonayaan madaama labada
dal ay yihiin saaxiib wadaaga taariikh dheer.
Wasaarada Isboortiga dowlada China ayaa u balan qaaday inay
gacan siin doonta GOS iyo Soomaaliya waqti kasto oo munaasab ah.
Kulankii GOS & Xidigaha Soomaaliya China
Waxaan Peiking China kula kulanay ciyaartooy iyo macalimiin
Soomaaliyeed, kuwaas oo matalayey wadamada kala duwan
Halyeey Cabdi Bile Cabdi ayaa macalin u ahaa ciyaartooyda
oradada dalka Sacuudiga.
Jaamac Karaaciin oo macalin u ahaa ciyaartooyda oradada dalka
Sudan.
Maxamed Saleebaan oo u qaabilsan horumarinta ciyaaraha fudud
dalka Qatar
Maxamed Faarax 5000M u ordayay dalka Britian.
Mustafe Maxamed 3000M u ordayay dalka Sweden.
Cabdi Cabdiraxman 10.000M u ordayay dalka USA.
Kulankaas oo dhaxmarey Gudiga Olampikada Soomaaliyeed iyo Cabdi
Bile, Jaamac Karaciin, Mohamed Sulaymaan, Maxamed Faarax,
Mustafe Maxamed & Cabdi Cabdiraxman ayaa looga hadlay sidii loo
horumarin lahaa cayaaraha fudud Soomaaliya iyo sidii ay wax ugu
qaban lahaayeen dhalinyarada Soomaaliyeed ayaa la isku af gartey
in 6 xero oo lagu tababarto ciyaaraha fudud laga furo Soomaaliya
lix gobal oo ka mid ah sida Banaadir, SH.dhaxe, Hiiraan, Bay,
Sool iyo Togdheer, ugu horeyntiina waxaa laga furey xeradii ugu
horeysay magaalada Laascaanood, waxaana maalgalinaayo
ciyaaryahankii orada 800 & 1500 M dalka Qatar u ordi jirey,
haatana ah madaxa horumarinta cayaaraha fudud dalka Qatar Mudane
Maxamed Saleebaan.
Waxaa xusid mudan in Macalin Jaamac Karaciin iyo Maxamed
Saleebaan ay balan qaadeen inay ku tababaraan si lacag la’aan ah
xeryaha ay ku tababaraan ciyaartooyda dalalka Qatar iyo Suudan
kuwaaas oo xeryo tababar ku leh dalalka Kenya, Tansania, Yemen
iyo Sudan
Mudane Duran Farah ayaa hadalkiisii ku soo gunaanuday inay u
qiiroodeen dalka Soomaaliya intii ay joogeen China , waxana u
yiri waxaa arkaysaa qiimaha ay leeyihiin dadka iyo dalalka kale
marka ay joogaan Olampikada isla markaana wadan walbo ay ka
socdaan boqolaal ka qayb galaysa ciyaaraha noocyadiisa kala
duwan halka anagana 2 qof noolugu ogalaaday inaan ka qayb galno
un sida sharciga dhigaayo balse hada kadib loo baahan yahay
inaan si weyn uga qayb galno iskuna diyaarino 2012 hadii Eebe
idmo,
Waxaana taas suurtagalinteeda looga fadhiyaa dhamaanteen, marka
qofkii wax qaban karo ama ka qayb gali tartamada waxaan ugu
baaqaynaa inaa u soo istago sidii dalka Soomaaliya sumcad darada
ka haysata caalamka ugu badi lahayn xushmad iyo wanaag iyo in
Soomaaliya aanu ku soo celino caalamka ayuu hadalkiisii ku soo
gunaanaday Duran Faarax oo ka mid ahaa ergadii Soomaaliyeed ee
ka qayb gashay ciyaaraha Olampikada aduunka ee dhawaan lagu soo
gunaanaday dalka Shiinaha.
W/D: Yusuf Yusuf
Secretary General of SSPA & Sports Editor
mrsomalia@hotmail.com
London