Guddoomiyaha Xisbiga HA NOOLAATO oo cambaarayn dusha uga tuuray
ciidamada Ethiopia ee xasuuqa ka geystay Muqdisho iyo Shabeelada Hoose
![](16aug61.jpg)
Guddoomiyaha Xisbiga HA NOOLAATO Mudane Cismaan Abokor ayaa si kulul
ugu cambaareeyey weerarkii ba’naa ee ay shalay ciidamada Ethiopia ka
geysteen magaalada Muqdisho iyo degaanka Carbiska ee gobolka Shabeelada
Hoose.
“Aniga oo ka hadlaya magaca Xisbiga HANOOLAATO waxa aan si buuxda u
cambaaraynayaa xasuuqa loo geysanayo shacabka Soomaaliyeed ee deggan
Muqdisho iyo Shabeelada Hoose. Ma’ aha wax la aqbali karo xasuuqan aan
kala sooca lahayn ee lagu hayo dadkayaga” ayuu si caro leh guddoomiyuhu
ugu sheegay saxaafadda madaxabannaan.
“Waxa dhacayaa waa dembiyo ka dhan ah aadaminimada, dembiyo dagaal,
iyo xasuuq, kuwaas oo caalamku ka dhigtay sharciyo, una samaystay
maxkamado caalami ah. Sidaa darteed waxa aan xusuusinayaa kuwa geysanaya
gumaadka in maalin maalmaha ka mid ah la soo taagi doono maxkamad si
looga abaal mariyo waxa ay maanta ku samaynayaan dadkayaga”.
Guddoome Cismaan Abokor waxa kale oo uu tacsi u diray guud ahaan
shacabka Soomaaliyeed gaar ahaanna qoysaskii uu sida gaarka ah u
saameeyey xasuuqani.
Gudoomiyaha Xisbiga HANOOLAATO wuxu ugu baaqay xeer ilaaliyaha guud
ee Maxkamadda Adduunka (International Criminal Court Persecutor) Mr Luis
Moreno-Ocampo in aanu indhaha ka qarsan ee uu fiiro gaar ah u yeesho
dembiyadan ka dhanka aadaminimada ee ka dhacaya Soomaaliya ee ay
gaysanayaan ciidamada Ethiopia.
Waxa kale oo Guddoomiyuhu sheegay in sida ugu dhakhso badan xisbiga
HANOOLAATO qoraallo ku saabsan xasuuqan loo geysanayo shacabka
Soomaaliyeed uu ugu kala diri doono hay’adaha caalamiga ah ee ay
arintani khusayso sida Golaha Ammaanka ee Qaramada Midoobay, Maxkamadda
Adduunka, Hay’adaha u dooda xuquuqal insaanka sida Amnesty International
iyo Human Rights Watch.
Dhawaaqan kulul ee Guddoomiyaha ayaa ku soo beegmaya xilli laba
maalmood xasuuq ba’ani ka socday magaalada Muqdisho iyo degaanka
Carmiska oo ka tirsan Gobolka Shabeelada Hoose oo ay geysanayeen
ciidamada Ethiopia, kaasoo sahayday in ka badan 70 ruux oo u badan dumar
iyo carruur.
Xisbiga HA NOOLAATO oo dhowaan la’ aasaasay ayaa hadda u muuqda mid
shacabka u buuxinaya kaalin weyn oo ku bannaanayd oo ah cid codkooda
gaarsiisa caalamka uguna hiilisa si sharci ah.
Haddii aad u baahan tahay faahfaahin ku saabsan xisbiga HA NOOLAATO
fadlan kala xiriir:
hannoolaato@gmail.com