WAXA EEY U TAAGANTAHAY MAALINTA XORIYADA (GOBANIMADA) WADANKAN PAKISTAN
(AUGOST 14, 1947)HORDHAC/GOGOLDHIG
Ummadkastaa waxeey leedahay Taariikh, ummadii qiimeysa taariikhdeeda,
ee keeydisa dabadeedna u dabaal dagta iyo tii ku tumata ee Qashin-Qubka
ku dartaba. Ummadkastaahi waxeey leedahay Halgamayaal Nafhurayaal ah oo
naf iyo maalba u hurey Masiirka iyo Mustaqbalka ummadooda, sidaana
Taariikhda baal Dahab ah uga galay, halka kuwa kalana Bogag Mugdi ah ka
buuxsameen. Akhristaha Sharafta badanoow waxaan maanta halkan ku falan
qeyneynaa maalinta Gooni isutaaga, ama xoriyada/Gobonimada wadankan
Pakistan. Maxeey u taagan tahay? Sidee looga qadariyaa wadankan? Sideese
loogu dabaal dagaa? Waa tan warbixintii oo dhane kusoo dhowoow, adoo
mahadsan.
TAARIIKH YAROO KOOBAN OO KU SAABSAN WADANKAN PAKISTAN
Pakistan waxeey ka mid tahay wadamada Muslimka ah ee aduunka ugu
waaweyn, waxaa Mujtamaceedu gaarayaa illaa 165Million”Offcially”.
Wadanku wuxuu ka soo dhexbaxay wixii loo aqoon jirey Qaarad-U-Ekeyda
Hindiya ee Carabiga lagu yiraahdo “Shibh-Al-qaarrah Al-Hindiyah” meesha
English-ka lagu yiraahdo “Indian Sub-continent”. Wuxuuna wadankan
Pakistan Maabka aduunka kusoo biirey taariikhda markii eey aheyd Augost
14-keedii sanadkii 1947-dii.Wadankan Pakistan wuxuu leeyahay Mujtamac
Muslimiin u badan, waloow firqooyinkiisu aad u farabadan yihiin oo lagu
qiyaaso illaa 39 firqo oo aan Shaqo isku laheyn, oo isku si aan u Tukan,
Masaajidyada u kala soocan yihiin, isku si aan u Soomin, isku waqtina
aan Soomin, oo xaqiiqdii hadii aad u dhaadhaacdo kala qeybinta
soomaalidu ku sameyso culimada sida: Ittixaad, Islaax, Salafi, Tabliiq,
iyo Suufi oo nuucyadiisa leh, sida: Axmadiya, Qaadariya, Saalixiya iwm,
xaqiiqdu waxeey noqoneysaa in kala faquuqaasi uu yahay waxba kama
jiraan, waxoo dhanna waxeey isku noqonayaan Isku Aabo iyo Hooyo aan
waxweyn ku kala duwaneyn ee magacyo uun loo kala sameystey. Wadanku
wuxuu sidoo kale leeyahay Diimo kale oo aad u farabadan sida Hinduus,
Christian, Budiste, Bahai iyo kuwo kaloo kaaba yaabinaya oo
jirintaankooda iyo xuquuq in eey wadankan ku leeyihiin lagu qirey qeybta
Cad ee Calanka wadanka oo u taagan Diimaha kale ee wadanka ka jira..
Qaranka Pakistan wuxuu ka kooban yahay Afar gobol oo waaweyn oo la
kala yiraahdo Sind, Baluchistan, Punjab iyo NWFP (North West Frontier
Province), waxaa soo raaca caasimada federaalka ee Islamabad iyo
deegaanada qabaa’illada (Mandhiqatul qabaa’il). Laga yaabe in dadka
badankii eey warbaahinta caalamka kala socdaan magacyada deegaanadan
qabiileed, dagaalada ka socda darteed, waxaana lakala yiraahdaa
:Kheyber, Kurram, Malakand, Mohmand, North Waziristan iyo South
Waziristan “oo ah meesha dagaalada xoogoodu ka socdaan”.
Ereyga Pakistan waxaa laga habeeyey magacyada Gobollada uu ka
sameysan yahay kuwaasoo kala ah, (Punjab, Afghan Border States, Kashmir,
Sind iyo Boluchistan). Xitaa 1947-dii ka bacdi wadanku wuxuu ahaa mid
aan magac rasmi ah laheyn mudo 9-sano ah, waxeey aheyd oo kaliya 23-kii
March 1956-dii markii lagu dhawaaqey magaceedan ah Jamhuuriyada
Islaamiga ah ee Pakistan (Islamic Republic of Pakistan).Wadanku wuxuu ka
koobnaa labo qeybood oo India eey ku kala dhaxjirtey, oo la kala
dhihijirey, Pakistaanta Bari (Bangladesh) iyo Pakistanta Waqooyi
(Pakistan), waxeeyse kala go’een taariikhdu markii eey aheyd 1971-dii,
markaana waxaa wadanka xukumayey Raiisulwazaarihii la Daldaley ee Mr.
Zulfiqar Ali Bhutto, kaasoo ahaa aasaasihii ururka siyaasadeed ee ugu
weyn wadankan Pakistan laguna magacaabo Ururka Dadyowga Pakistan ee
Af-Ingiriisiga lagu yiraahdo Pakistan People’s Party “PPP” dhalayna
Marwadii la qaarajiyey ee Benazir Bhutto oo madaxtinimada uruka uga
dambeysey ama ka dhaxasheyba, wadankan labo jeer Raiisulwazaare kasoo
noqotey.
Dulucda qoraalka ayaa ah in aan si qoto dheer uga hadalno maalinta
xoriyada wadankan Pakistan iyo sida loo weyneeyo, ee loogu damaashaado.
Hadaba waa sidee sida loo qiimeeyo maalintan ku weyn Pakistaani kasta?
SIDA LOOGU DABAAL DAGO SANADKASTA MAALINTAN
Maalinta xoriyada ee wadankan Pakistan (Pakistan’s Independence day),
oo sidoo kale loo yaqaan “YAUM-E-AZADI: یومِ آذادی” Waxaa loo dabaal
dagaa maalinta eey Augost14-ka tahay ee sanad kasta. Waa maalintii
Pakistan ka xuroowdey Hogaankii gumeysihii Ingiriiska ee deegaanadan
looga aqoon jirey “British Raj” sanadku markuu ahaa 1947-dii. Maalintan
sanad kastaa waa Fasax qaran (National Holiday), waxaa looga dabaal
dagaa gabi ahaanba wadankoo idil, xaflado Calan-saar ah, iyo xusid la
xusayo Halyeeyadii ummadan aayahooda ka talisey ayaa meelkasta ka dhaca.
Waxaa cirka iyo dhulka is qabsada Bullaleeyryo. Caasimada wadanka ee
Islamabad ayaa waxaa ka dhacda Xaflada ugu weyn, halkasoo Madaxweynaha
wadanka iyo ra’isul wazaaruhuba calanka saaraan, xafladaa calan-saarka
ah ee madaxdaasi waxeey ka dhacdaa Qasriga Madaxtooyada iyo Xarunta
Golaha Shacbiga ama Baarlamaanka, iyadoo Safiirada caalamka ee Jooga
Pakistan lagu wada casuumo, halkaas oo eey Madaxda ka jeediyaan
qudbooyin si toos ah wadanka oo idil looga daawado TV-yada,
Radio-yadana looga wada dhageysto. Qudbadahaas waxeey xooga ku saaraan
horumarka iyo waxqabadka dowladu ku talaabsatey ama eey gaartey, Hadafka
mustaqbalka dhow iyo midka dheerba ee u dagsan dowlada markaa xukunka
heysa iyo Qaranka guud ahaanba,Waxaa sidoo kale loogu celceliyaa oo
dadka eey xusuusiyaan Ereyadii Aabaha Qaranka (The Father of the
Nation), Quaid-e-Azam Mohammad Ali Jinnah, kuwaas oo ahaa in eey kusoo
dabaalayaan Midnimo, Iimaan iyo Kaladambeyn ( Unity, faith and
discipline) ummadan Pakistan.
Caasimada iyo dhamaan gobollada wadanka oo dhan waxaa ka dhaca
xaflado calan-saar ah, daaraha waaweyn ee aadka u dhaadheer
(Skyscrapers) oo dhami ayaa calanka wadanka laga soo laalaadiyaa,
bandhigyo dhaqameedyo ayaa gobollada wadanka oo dhan laga wada
daadihiyaa, oo ka dhaca caasimadaha Gobollada waa weyn. Magaalooyinka
waaweyn oo idil waxaa xafladaa calansaarista sameeya oo ku sharfan
shaqsiga markaa ah Duqa magaalada (The Mayor), wadankanse looga yaqaan
“Nazim”. Xarumaha Dowlada kuma xirna oo kaliya ee waxaa sidoo kale
xafladahaas calansaarka laga sameeyaa shirkadaha ganacsi ee gaarka loo
leeyahay, ayadoo eey ku sharfan yihiin saraakiisha ugu sareysan
shirkadahaasi. Iskuulada, College-yada iyo dhamaan jaamacadaha ayaa
iyana qabanqaabiya xafladahaas calan-saarka ah iyo barnaamijyo nuucyo
badan. Qoysaska caadiga ah iyo saaxibadooda ayaa maalintaa isugu yimaada
Qado ama Casho-Sharaf si farxadaa halmeel loogu wada qaato, qaarna
banaanka ayeyba la aadaan. Meelkasta waxaa ka socda Maaweelo iyo
Madadaalo, Tartanno aqooneed iyo Kadisyo nuucyo badan, haba ugu
badnaadeene kuwa taariikhda wadanka xooga saaraya.Wadankan oo TV
Cables-ka uu aad ugu jiro gurikastaa, si waalli ahna looga daawado
Daraamooyinka/Musalsallada Hindiyaanka ah, Maalintaa wadankoo idil wax
kanaal Indiyaan ah lama arkikaro.Calaamadaha (Logos) TV channels-ka
wadanka Pakistan laga leeyahay waxaa loo badalaa Cagaar iyo cadaan oo ah
midibada uu ka kooban yahay calanka wadanka. Waxaa meelkasta lagu
iibinayaa ama qaab gifts ah laguu siinayaa Calanka wadanka. Maalintan
waxaa millitry-ga isna dhinaciisa ugu dabaaldagaa madaafiic loo
diryaamiyo/loo rido malintaa darteed.
Waxyaabaha kale ee Maalintan eey caanka ku tahay ayaa ah badalka lagu
sameeyo waardiyayaasha Madxafka Aasaasaha wadanka ee Mohammed Ali
Jinnah, kuna yaala Magaalada Karachi, loona yaqaan Mazar-e-Quaid. Waxaa
sidoo kale maalintan dhaca xaflado lagu sameeyo xuduuda India iyo
Pakistan, xuduudaas oo lagu magacaabo Wagah Border, Soomaalida gobolka
Punjab joogtana eey aad u tagto. Maalintan Xoriyada, Pakistan iyo India
waxeey isu siidaayaan Maxaabiis laga yaabo in eey si sharci darro ah
xuduudaha uga kala gudbeen.Waxaa sidoo kale maalintan si baaxad weyn loo
soo bandhigaa awooda millitry ee wadanku leeyahay oo isugu jirta tan
Cirka (The Air force), Badda (The Navy), dhulka (The Army), iyo dhamaan
qeybaha kale ee sadexdan waaweyn kasii farcamaan sida Awooda
Nabad-sugida oo qeybo kala duwan leh, hooyana eey u tahay hey’ada
sirdoonka qaranka ee aadka looga baqo, loona yaqaan ISI (Inter-Services
Intelligence), Police-ka iyo kuwa lagu magacaabo Paramilitary forces
sida Rangers-ka. Xaqiiqdii waa maalin wadankan ku weyn, waa maalin
farxad badan, waana mid si weyn loo qadariyo.
Wadankastaa waxuu leeyahy Hogaamiyeyaal, si aragti dheer u fahamsan
Aayaha iyo Danaha Wadanka (National Interests), waxeey u huraan wixi
karaan kooda ah, Maxamed Cali Jinaax , Alama Iqbal, Sir Syed Axmed Khan
iyo dhamaan ragii la midka ahaa, waxeey dareemeen in dhibka Muslimiinta
India ku nool aan cidi daneyneynin, oo waxyaabo farabadan oo xuquuq ah
eey la’yihiin sidaa daraadeedna Muslimiinta u baahanyihiin Dhul u gaar
ah oo eey yeeshan , halgan dheer kabacdida waxaa u riyoowdey riyadoodii
aheyd in Pakistan (The Land of Pure) uu Aduun weynaha kusoo biiro. Ragii
ka dambeeyey ninba maalin ayuu meeshii kasii waday danaha wadankiisa iyo
Maslaxada ummadiisa, waxaa ka mid ahaa ragaas Zulfiqar Ali Bhutto oo
Nuclear-ka maanta Pakistan leedahay u istaagey in eey yeeshaan, isagoo
og halista eey leedahay in uu ku dhaqaaqo arintaas, waxaa Quwadaha
waaweyn ugu hanjabeen in uu duruus u noqon doono hogaamiye yaasha kale
ee aduunka hadii uusan joojinin arintaa, waxuuna ugu jawaabey “Cowskaba
aan u cunnee Nuclear waan yeelaneynaa” wuxu ahaa hogaamiyaha kaliya ee
kasoo jeeda wadan Muslim ah ee Golaha Qaramada midoobey ku
dhexjeexjeexay Charter-koodii, taariikhdu markii eey aheyd 15-kii
December 1971 , wuu ogaa halista tilaabooyinkaas oo dhan leeyihiin, oo
waa la Afgambiyey dibadeed la Daldaley, maantase wadankisii Nuclear ayuu
leeyahay. Waxaa sidoo kale jirey Madaxweynihii isna diyaarada lagu
qarxiyey ee Gen.Zia-ul-Haq, caalamka Islaamkana looga yaqaaney “Abul
Mujaahidiin” ee si aan caadi aheyn u dhisey Millatry-ga wadankan, kuna
soo rogey in askariba midka uu ka quraan xifdis badan yahay ka
Mushaarbato, raga iyo dumarkana u kala soocey labada qeybood ee buska
eey ka kala raacaan. Xaqiiqdu waxeey tahay, Marka loo barbardhigo
Hogaamiyeyaashooda kuweena wey ka aragti dheeraayeen, mustaqbalkase laga
yaabe in Allaah ina siiyo kuwo kuwooda ka wanaagsan.
Dhinaca Soomaaliya marka aad fiiriso inkastoo hogaamiye kastaa ee
nasoo marey waxyaabo wanaag ah ee uu qabtey aan la weeyneyn, haba u
yaraadeen ama u badnaadeene, waxaa dhab ah, Nasiib darro jirtana ah,
Kuwa inaga inoo talinjirey illaa maantana ina horboodaya ayaa xaqiiqdii
waxeey kasii qeybqaadanayeen kala fogeynta ummada, iyo Sed-bursi aan xad
laheyn, iyo Shalay hadii eey taada/tiina aheyd maanta waa teyda/teena,
iyo qodabka midkasta uu ku sifoobayo ee ah in uu “la dagaalamayo
cadaalad darro lagu sameeyey isaga iyo qaraabadiisa iyada uu isaguna
cadaalad darro kale abuurayo marka kursiga uu gaaro”, taasoo ah Silsilad
nasiib darro ma dhamaato ah.
GABAGABO IYO GUNAANAD
Waan jeclaan lahaa in aan maanta warbixintan ka qorayo 26-ka June,
iyo 1-da July, nasiib darrose waxaa qalbiga Soomaali kasta ka Ololaya
waxa wadankeenii uu maanta ku sugan yahay, ee ah: gumeysi, burbur,
barakac, xasuuq, gaajo, sicir barar, Saxaraha ku dhamaasho, Bada ku
baabi’id, Xabsiyada Aduunka ku saxariirsanoow, xerooyin Qaxooti ku
dacdareeysnoow, kuwo qabyaalad ummadii usii kala qoqobaya oo ku leynaya
iyo kuwo u sacbiyana. Iyo in yar oo waxa dhacaya ka xun oo aad uga
tiiraanyeysan wax eey ka qabankaraanse uu iska yaryahay.
Ummadeena Soomaaliyeed waxeey is taahishaa Mustaqbal kan ka
wanaagsan, weey ka bixidoontaa haduu Alle idmo.
Fadlan halkan ka daawo qudbadii Zulfiqar Ali Bhutto uu ka jeediyey
Golaha Amaanka:
http://www.youtube.com/watch?v=qYHUJBRRnc4&feature=related
MAHADNAQ
Waxaan si Kal iyo Laab ah ugu mahadnaqayaa walaalkeey iga yar
Eng.Cali Maxamed Cismaan “Cali Nuur’ Saaxiibkeyga qaaliga ah Mr. Maxamed
Muqtar Cali iyo Dumaashidey Naciima Axmed Yuusuf “Ummu Sumaya” Oo
xaqiidii si hufan igala shaqeeyey ururinta, qorista iyo soo bandhigida
warbixintan Muhiimka ah.
Codsi: Fadlan wixii talo, toosin, sixid iyo dhaliil ah waxaan u
dhiiragelinayaa una soo dhaweynayaa si Maskax iyo Qalbi furan. Fadlan
iigu soo hagaaji e-mailkeyga la socda warbixintan, adigoo mahadsan.
Wabillahi Toqfiiq
Cabdulqaadir Maxamed Cismaan “Cabdi Boqor”
MBA (MKT) Bahria University
Karachi- Pakistan
Email:
abdulkadirphd@hotmail.com
Mobile No: 0092-3002477489