Xildhibaanada Beelaha Digil iyo Mirifle ee DFKMG oo uga socda shir Al-baabadu u xiran yihiin Magalada Baydhabo.

Shir Al-baabadu ay u xiran yihiin oo ay isugu yimadeen Xildhibaanada Beelaha Digil iyo Mirifle ee ku sugan Magaalada Baydhabo oo looga hadlayo arimo ay ka mid yihiin dhismaha Dowlad Goboleedka Koofur Galeed, Dimuquraadiyada, Nidaamka 4.5-ka, qaabka uu umaamulayo Md. Gudoomiye Sh. Aadan Maxamed Nuur {Sh. Aadan Madoobe} fadhiyada Baarlamaanka ayaa ka socdey gelinkii dambe ee 9/09/007 Guriga Xildhibaan Ibraahim Cabdi Nuur ee Magaalada Baydhabo. 

Shirkaan oo u muuqda mid mudo badan laga soo shaqeynayey ayaa Ajendeyaasha hor yaala ee ay uga hadlayaan dhismaha Dowlad Goboleedka Koofur Galbeed ayaa waxaa la sheegayaa in laga soo shaqeynayey mudo ku dhowaad hal Sano, qaabka dhismaha maamul Goboleedka Koofur Galbeed iyo shuruucdii lagu dhaqi lahaa, sida aan wararka ku helney ayaa waxaa ku midaysan 3-Beelood oo waaweyn oo Dega Gobolada Baay, Bakool, Sh/hoose, Gedo, J/dhexe iyo J/hoose, Beelaha ku mideysan ayaa waxaa la iigu sheegey Beelaha Digil iyo Mirifle, Beelaha Sede iyo Beelaha Absame, ku dhawaaqista maamulkan Koofur Galbeed ayaa waxaa lala sugayey Odey dhaqameedyada Beelahaan, Aqoonyahanada iyo qaar ka mid ah Siyaasiinta Beelaha ee ka qaybgaley shirka dibu-heshiisiinta Beelaha Soomaaliyeed ee lagu soo gebagebeeyey 30/08/007 Magaalada Muqdisho. 

Maamul Goboleedka Koofur Galbeed ayaa lagu wadaa inuu yeelan doono Gole Baarlamaan, Gole Wasiir, mid Garsoor, Gole Odayaal iyo Aqoonyahano ka saacida habsami u socodka hawlaha Maamul Goboleedka. 

Sidoo kale Ajendaha shirka qodobadiisa arimaha dimoquraadiyada iyo Nidaamka 4.5-ka ayaa waxaa lagu soo bandhigi doonaa qaabka Awood qaybsi ee DFKMG ay ka heleen Beelaha Digil iyo Mirifle, waxa ka maqan iyo sida lagula xisaabtamidoono DFKMG mas’uuliyiinteeda sare. 

Dhinaca kale warar hoose oo aan ka helney Xafiiska Gudoomiyaha Baarlamaanka Md. Sh.Aadan Maxamed Nuur {Sh. Aadan Madoobe} ayaa sheegaya in gudiyada Baarlamaanka Gudoomiyeyaashooda ay la kulmeen, islamarkaana ay weydiiyeen su’aalo dhinaca maamulka iyo hawlaha Baarlamaanka horyaala, taasoo su’aalaha qaarkood ay ku adkaatey inuu maareeyo, balse uu ku qanciyey inuu u hawlgalayo sidii uu jawaabo macquul ah ugu soo gudbin lahaa. 

 Hase ahaatee arimahaan hada socda ayaa waxay u muuqdaan kuwa sanado badan la hadal hayey in dalka Soomaaliya laga hirgeliyo, taasina waxaa sababay Maamulkii hore ee Militeriga intii uu jirey ayaa waxaa uu abuurey in Beelaha qaarkood si gooni ah loo haybsooco, islamarkaana la gumaado kuwaasoo dega Gobolada Waqooyi Bari, Waqooyi Galbeed iyo kuwa dhexe, taasina waxaa ka dhashay kacdoon aan xakameysneyn oo wata wajiyo Urur Beeleed, laakiin taasina dawo lagu nasto ma keenin, waxaana xigey in Beelaha qaarkood mar kale si wadar ah loo haybsooco iyadoo la gumaadayo, aakhirkiina waxay dhashey in Beelihii dhexdooda ay dib isugu noqdaan, waxaana la qabtey shirar kala duwan oo midkasta sii fogeynayay deganaashihii dadka iyo dalka Soomaaliya, waxaana ugu dambeeyey kii lagu soo dhisay DFKMG, dhowaana waxaa lagu soo gebagebeeyey Muqdisho shir Beelaha Soomaaliyeed, isagoo aan dhamaan ayaa waxaa furmey kalfadhigii Golaha Baarlamaanka oo isagana hawshiisa ku bilowdey arimo aan waligeed Soomaaliya ka dhicin balse u muuqda mid dhalanteed ah, sidaas darted DFKMG iyaduna waxay ku socotaa mugdi ah oo in badan dadka Soomaaliyeed lagu soo hagayey, mustaqbalkuna waxay keeni doontaa in kooxdii talada qabtaa ay markeeda sameyso waxay sameyn lahayd.

 
Maxamed Macallin Cismaan{All-man} Somalitalk Baydhabo
fatxumaalik@hotmail.com