Ma in Ubad la dhalaa argaggax leh...?!!.

 

     Daraasado-bulshadeed dhowaan la sameeyay, ayaa waxaa ay soo ban-dhigtay: in qaar ka mid ah waddammada reer-galbeedka ay Haweenkoodu wal-wal xoog leh iyo walbahaar ka muujiyaan "Uur-yeelashada" iyo "Ubad-dhaliddaba".  In xitaa la dhalo, la koriyo oo la ababiyo hal canug, ayay haweenkaasu u arkaan arrin raaxada, nasashada iyo farxaddaba ka qaadeysa labada is-qabta..!!.

 

     Waxaa Daraasaddii ugu dambaysay lagu ogaaday in %10 ka mid ah Haweenka iyo %15 ka mid ah ragga ku nool dalalka Maraykanka iyo Kanada ay diiddan yihiin  guud ahaanba in  Ubad  la dhalo, oo la noqdo " hooyo iyo aabbe".  Tirada dadka sidaas qaba ayaa weliba ku sii jirta koritaan xawli leh.

 

     Culimada  Cilmu-nafsiga iyo kuwa Cilmiga mujtamaca, ayaa aad uga soo hor-jeeda, oo la dagaallama fikraddaas, waxayna ogaadeen in sababaha loo diidayo waayadan in wax la dhalo, ay ka mid yihiin: cabsi ay dadka dalalkaas qaarkood ka qabaan oo ka sii walwalayaan shaqo la'aanta sii badanaysa iyo in hadhow la dabooli kari waayo baahiyaha faraha badan ee Ubadka dhalanaya iyo weliba argaggax laga sii qabo Mashaqooyinka dabiiciga ah ee la sheegay inay dunida ku soo fool-leeyihiin, ee ay ma midka yihiin:- is-baddalka Cimilada oo keeni doona : kororka Kulaylka, ayna ka sii  dhalanayaan: dhalaalka Barafka ceegaaga cirifyada dunida, oo isaguna sababi doona daadad, fatahaadda webiyada iyo  Harooyinka iyo Musiibooyin kale oo dabiici ah.

    

Cilmi-baaristan  ayaa intaas raacisay in "Mac-hadka Caalamiga ah ee Daraasadaha Dimogarafiyada uu dhowaan shaaciyay isaguna: in meel-dhexaadka Ubad-dhalidda ee Haweenka dalalka reer Galbeedka uu hadda yahay laba Canug/haweeney kasta, taas oo ku sii socota hoos u dhac....!!!.

 

     Annagu  Soomaali-ahaan, waxay culimo badani u arkaan in: waqtiyada hadda nagu soo aaddan aynu u baahan-nahay : is-guursi iyo Ubad-dhalid badan( taran ), waayo, iyadoo aynu markii horaba tira-yarayn, marka laysu eego dhulka Jamhuuriyadda xorta ah oo la eg 638.000-Km2. iyo tirada dadka Soomaliyeed oo lagu qiyaasi jiray ku-dhowaad 10-milyan  oo ruux dagaallada ka-hor, ayaynu 20-sano ku-dhowaadkii ugu dambeeyay isku aafeynay ,iskuna gumaadnay dagaallo sokeeye oo doqonnimo ah; ugu dambeyntiina quwado shisheeye ayaynu isu sii adeegsannay, qiil kastoo loo yeelaba...!!!.

 

     Sidaas darteed,-Allaha ka dhigo ee- markii ay nabad buuxda oo Soomaalinimo ku dhisan dalka ka dhalato, kana hana-qaaddo, waxaa loo baahanayaa daboolidda halkii ay banneeyeen Hanaddadii isugu jiray: Ciidammada Qalabka sida, Siyaasiyiin, Aqoon-yahanno, Xoogsato, Haween, Dhallinyaro, Farasa-yaqaanno iwm. ee ku naafoobay ama ku le'day dagaallada doqonnimo( sokeeye ).

     Dhaqaalaha, Aqoonta, Caqliga, dib u dhiska dalka, hoggaanka Siyaasadda iyo horumarka guud , ayaa intaba ku xiran dadka. Sidaas darteed, waa in ubad la dhalaa lana tarmaa...

 

Muxyaddiin M.Kaalmoy  -kalmoi@hotmail.com

Afeef: Aragtida qoraalkan waxaa leh qoraaga ku saxiixan