DHADO ROOB NOQON WEYDAY!!
Ciidankii oo dadka dhacaaya iyo dowladdii oo
dhawraneysa!!!
W/Q: C/raxmaan Shariif Max’ed
{Taysiir}
Qalad
joogto loo galo wuxuu sii kordhinayaa dhibta
iyo qalalaasaha oogan, ku qabatay iyo
qaddarta ku habsatay shacabka daallan ee
Soomaaliyeed, waxey u muuqataa inkaar
cimrigeedu dheeraaday, inkastoo ay maanta
dhariga karsamaya dhuxulo u sii yeelayaan
maleeshiyooyinkii laga soo qaaraamay
hoggaamiye kooxeedyada, ee la yidhi: Waxey
ciidan Qaran u noqonayaan dowladda KMG.
Haddana waxey taasi dhali doontaa, kacdoon
5-aad oo Soomaaliya ka curta.
Maalin kasta oo jihada Bari ay Qoraxdu ka
soo dhalaasho, magaalooyinka dalka ee ay
ciidamada dowladdu joogaan waxey bililiqo
iyo boob ugu geystaan dadka rayidka ah ee
laga sharta badan yahay, waxey mararka
qaarkood farateystaan guryaha iyagoo xiran
dharka astaanta u ah ciidamada, oo ku
andacoonaya iney baaritaanno sameynayaan,
ilmada cirrooleyaasha, oohinta carruurta iyo
baroorta dumarku, waxey iska noqotay arrin
caadi ah, xigashooyinkooda halkan kuma soo
wada bandhigi karo, laakiin, erayadeyda
ayaan ku soo koobi doonaa, waxey dadkaasi
cabashooyinkooda u bandhigaan, Allaha
awooddiisa iyo xeeladdiisa adduunka ku
maamula.
Arbacadii aynu ka soo gudubnay ee 17-ka
ay ku beegneyd bishan October, 2007, waxaa
habeen xilli bar ah ay ciidamada ku sugan
isgoyska Aadan Cadde ee magaalada Muqdisho,
ay xoog ku jabiyeen xafiiska KMG ah ee
Naadiga Saxaafadda Soomaaliyeed uu ku
leeyahay goob aan sidaa uga fogeyn isgoyska,
waxeyna halkaa ka bililiqeysteen
Kaamirooyin, Dukumiintiyo iyo agab kale oo
lagu tababarayey ardayda jecel iney
Saxaafadda Soomaalida ku soo biiraan Maqal
iyo Muuqaalba.
Ma aha dhacii ugu horreeyey ee ay
ciidamadu ka geystaan xarumaha ay rayidku
gaarka u leeyihiin ee magaalada Muqdisho ku
yaalla, tiiyoo kuwa berri wax laga weydiin
doono ee horbooda dowladda ay sheedda ka
daawanayaan, iyagoo qosol iyo marxabbeyn ku
soo dhaweeya tallaabooyinka bahalnimada ah
ee ay maleeshiyooyinka tuutaha iyo kaakiga
loo xiray ee iyaga ka amar qaata kula
dhaqaaqaan bulshada, waxeyna si gaar ah ula
eegtaan dadka waxgalka ah.
Naadiga Saxaafadda Soomaaliyeed muddo
8-sannadood ah wuxuu soo saaray boqolaal
Saxafi oo qaarkood wax la qeybsaday
Saxaafadda Caalamka, waxa uu sidoo kale
Naadigu xaruntiisa ku bixiyaa casharro iyo
tababarro uu siiyo jiilal cusub oo u hanweyn
iney ku soo biiraan qeybaha warfaafinta, run
ahaantiina Saxaafadda Soomaalidu way kala
dhantaalmi laheyd Naadiga la’aantiis.
Naadiga Saxaafadda Soomaaliyeed waxaa
aasaasay khubarro Saxaafadda dalka miisaan
ku leh, oo markii ay maskaxdooda
dhalaaliyeen oo ay waaya-aragnimadooda
kaashadeen isla meel dhigay iney aqoontooda
bulshada u gudbiyaan, si ay dhaxal u reebaan
inta ay nolosha baaqiga ku yihiin, waxeyna
Udbaha iyo Dhigaha Naadiga is dhinac dhigeen
14-10-1999-kii, mana jirto hay’ad ku
taageerta dhaqaale joogto ah, sidaasoo ay
tahay Eng. Mukhtaar Xasan Max’ud oo ah
Guddoomiyaha Naadiga Saxaafadda
Soomaaliyeed, ayaa muruqiisa, maskaxdiisa
iyo maalkiisaba u huray si aanu subaxna
xirmin Naadiga, waxaana xubno ka ah
Suxufiyiintii hore iyo kuwa cusubba.
La mood noqonse weyday ayey sheekadu
usugu soo dhuratay, waxaa wax laga xishoodo
ah, kuwa madaxda sheegtay inaaney illaa iyo
iminka ka hadal tacadiga loo geystay
Naadiga, halheys hore oo Soomaaliyeed ayaa
ahaa: Dhado Roob noqon weyday!!, kalsoonida
shacabkii rajada ka qabay iney wax ku ool u
noqoto dowladdan waxey gaartay heerkii ugu
hooseeyey, duniduna waxey u qeybsantay in
quursatay iyo in quus gaarsiisay xaaladda
Soomaaliya, Maleeshiyooyinkan Illaah way ka
xishoon waayeen xaaraantiina way
xalaashadeen, waxaanse eegi doonnaa goob
ceebeedda ay isugu soo dhuran doonaan kuwan
mehradda ka dhigtay boobka iyo bililiqada,
ileen biyo meeshii god ah ayey ku soo
hooraane.
taysiir55@hotmail.com