Xoghayaha arrimahada dibadda ee Maxaakiimta Islaamiga ah Prof, Ibraahim Xasan Caddow ayaa daboolka ka qaaday in Cali Mahdi Max;’ed uu xiriir la soo sameeyey isla markaana ku wargeliyey inay ka soo qaybgalaan shirka dib u heshiisiinta.

Prof. Ibraahim ayaa sheegay in maxaakiimta Ilsaamiga ah diyaar u yihiin in ay ka qaybgalaan meel kasta oo looga hadlayo arrimaha Soomaaliya, waxa uuna sheegay in arrintaani uu kala hadli doono mas’uuliyiinta ugu sareysa Maxaakiimta Ilsaamiga ah ee iyagu ku sugan Magaalada Asmara.. “Dalka waxa uu ku jiraa Gumeysi, xalka Soomaaliya waxa uu ku xiran yahay iyadoo ciidamada shisheeye ka baxaan Soomaaliya” ayuu yiri Ibraahim Xasan Caddow oo sheegay in inta ay ku sugan ciidamada Shisheeye dalka aysan suuragal aheyn in la qabto shir dib u heshiisiin ah. Prof Ibraahim oo hadalkiisa sii wata waxa uu sheegay in Maxaakiimta Islaamigu yihiin kuwo doonaya nabada soomaaliya. Ugu dambeyntii waxa uu sheegay in gudiga dib u heshiisiinta looga baahan yahay ergo u diraan xubanaha ugu sareeya Maxaakiimta ee Asmara ku sugan si ay u soo ogaadaan qaabka ugu haboon ee shir dib u heshiisiin loo qaban karo.

Wararka hoose ka akhri "Cali Mahdi oo shaaciyey inuu xiriir la sameeyey Maxaakiimta Islaamiga ah "

Max’ed Dheere “kuwa qaraxyada ka wada Muqdisho ma doonayaan in…”

Qarax ka dhacay Magaalada Baydhabo oo ay dad ku dhinteen

Wararka naga soo gaaraya magaalada Baydhabo waxay sheegayaan in xalay fiidnimadii uu qarax ka dhacay Magaaladaasi gaar ahaan halkii uu horey ugu yiilay Hotel Bakiin, waxaana qaraxaasi la xaqiijiyey inay ku dhinteen labo ruux oo halkaa ka ag dhawaa. Warar kala duwan ayaana ka soo baxay qaraxaas oo sheegay in qaraxasai uu ahaa bam gacmeed la soo tuuray iyo in uu ahaa Miino meesha la dhigay. Markiiba waxaa soo gaaray goobti uu qaruxu ka dhacay ciidamada Booliiska oo halkaasi baaritaan ka bilaabay.  Dhawaan ayay ahayd markii qarax lala beegsaday Bankiga dhexe ee magaalada Baydhabo halkaas oo ay ku dhinteen labo askri oo ka tirsanaa ciidamadii halkaasi illaalada ka ahaa, sidoo kale waxaa ka horeeyey bam lagu tuuray shaneemo ku taalay Magaalada Baydhabo oo ay ku dhinteen afar ruux, isla markaana ay dhaawacyo ka soo gaareen dad rayid ah.

Barre Hiiraale oo ku dhaawacmay qarax la kacay Baabuurkiisa

Wararka naga soo gaaraya Degmada Baardheere waxay sheegayaan in Xildhibaan Barre Aadan Shire (Hiiraale) oo dhawaan laga qaaday xilkii wasiirka Gaashaandhiga Dowladda Federaalka ayaa shalay ku dhaawacmay qarax miino halka meel u dhexeysa Muuri  iyo Baardheere oo isku jira ilaa iyo 10-kiilo Mitir.

Qaraxaan ayaa sidoo kale waxaa la sheegay inay dhaawacyo ka soo gaareen dhowr sarkaal oo la socday Xildhibaan Barre Hiiraale oo haatna lagu daweynayo xarun caafimaad oo ku taala degmada Baardheere.

Warar kala duwan ayaa ka soo baxaya dhaawaca gaaray Barre Hiiraale qaar waxay sheegayaan in uu yahay mid fudud, halka kuwo kalana ay sheegayaan in uu yahay mid culus, waxayna wararka qaar sheegayaan in saacadaha soo socda Xildhibaanka laga yaabo in dhaawiciisa loo qaado Magaalada Nayroobi ee dalk Kenya.

Baryahanba degmada Baardheere waxaa ka jiray qaraxyo, waxaana laba qarax lala beegsaday goob lagu daawanayey Aflaanta oo ku taala degmada Baardheere kuwaas oo ay ku dhintee dhowr qofood.

Qarax shalay ka dhacay agagaarka Baar-Ubaxa gaar ahaan dhinaca suuqa Bakaaraha

Ugu yaraan shan qof ayaa ku geeriyootay toban kalana way ku dhaawacantay kadib markii uu qarax ka dhacay agagaarka Baar-Ubax gaar ahaan dhinaca bakaaraha waxaana qaraxaasi lala damacsanaa gaari ay wateen ciidamo Booliis ah.

Dadka dhintay iyo kuwa dhaawacmay ayaa la sheegay in aya ahaayeen dad rayid ah oo ka ag dhawaan goobta uu qaraxu ka dhcay.

Waqtiyadan dambe waxay Magaalada Muqdisho wehel u noqotay qaraxyada iyo dilalka loo gaysayo xubnaha Dowaldda, waxaana maalintii doraad ahayd uu qarax ka dhacay Magaalada Muqdisho waxaana ku dhintay ilaa iyo shan Haween ah oo ka shaqeynayey hawl nadaafadeed.

Cali Mahdi oo shaaciyey inuu xiriir la sameeyey Maxaakiimta Islaamiga ah

Guddoomiyaha Guddiga dib u heshiisiinta Qaranka Soomaaliyeed Mudane Cali Mahdi Max’ed ayaa waxa uu shaaciyey in uu xiriir la sameeyey mas’uuliyiinta ugu sareysa Maxaakiimta Islaamiga ah oo uu ugu horeeyo xoghayaha arrimaha Dibadda Maxaakiimta Islaamiga ah Prof. Ibraahim Xasan Caddow oo ku sug an Magaalada Doxa ee dalka Qadar.

Cali Mahdi waxa uu sheegay inuu ka dalbaday Prof. Ibraahim in Maxaakiimta Islaamiga ah ka soo qaybgalaan shirka dib u heshiisiinta Soomaliyeed oo la filayo in la qabto 15-ka bisha foodda nagu soo hayso.

Cali Mahdi waxa uu sheegay in Guddiga dib u heshiisiinta ay dadaal u gali doonaan sidii ay shirka dib u heshiisinta uga qaybgali lahaayeen dhamaan kooxaha Soomaaliyeed meel kasta oo ay ku sugan yihiin ha noqdaan kuwa mucaaradka ku ah Dowladda Federaalka iyo kuwo kalaba.

Cali Mahdi waxa uu sheegay in qof kasta ay diyaar ula yihiin uu ka soo qaybgalo shirkaasi haddii uusan ku shaqeyneen qoriga.

Cali Mahdi waxaa kale oo uu sheegay in dhaqaalihii lagu bixin lahaa shirkaasi uu caalamku u diyaariyey, isla markaana la dhameystiray goobtii lagu qaban lahaa shirkaasi oo ah xaruntii hore ee Gaadiidka Booliiska Soomaaliyeed.

Cali Mahdi waxa uu sheegay ergooyin u kala diri doonaan qaar ka mid ah Gobalada Dalka oo aysan weli ergooyin u dirin, si ay ugala so hadlayaan ka qaybgalka shirka dib u heshiisiinta iyo sidii ay ergooyin ugu soo diran lahaayeen shirka dib u heshiisiinta.

Amiin Yuusuf Khasaaro
E-Mail amiinkhasaaro@hotmail.com

Maxamuud Cumar Bille
Garoowe-DGPL
mcbille@gmail.com