Maxaa loo beegsanayaa suuqa Bakaaraha 

Jimcaale Rooble ( Jimcaale@hotmail.com)

Waxaa beryahan socda olole lagu hayo suuqa Bakaaraha oo si joogto ah ay u baarayaan maleeshiyaadka kooxda Mbagathi iyo ciidamada itoobiya iyadoo hanti badan laga dhacay ganacsatada bakhaaradooda iyo dukaamadooda la baarayay, hadaba waxaa layswaydiinayaa maxaa laga rabaa suuqa bakaaraha , ma inta dhulkii oo dhan laso hagaajiyay ayaa suuqyada dowrkoodii lasoo gaaray?, mase dukaamada iyo bakhaarada badeecadaha kala duwan lagu gado ee suuqa ayaa Hoobiyaal iyo madaafiic lagu dhex haystaa?, runtii arintu labadaas midna maahan oo waan aragnaa in amaan la sugo iska daaaye xataa waxaa la sugi la’ayhay amaanka shakhsiyeed ee mas’uuliyiinta dowladda , in bariis iyo bambooyin meel is la yaalaana waa arin aan macquul ahayn. 

Hadaba arinta dhabta ah ee loo beegsanayo suuqa Bakaaraha waxaa weeye iyadoo Itoobiyaanka dalka haysta ay iswaydiiyeen in maadaama  dalkii oo dhan ay koontaroolayaan, magaaladii Xamarna cunaqabatayn lagu soo rogay oo xataa dekedii aanay shaqaynayn kadib markii canshuur xad dhaaf ah lagu soo rogay waa ayo cidda maal galisa dagaalka maalinlaha ah ee wax iska caabinta ee lagu hayo ciidamadooda iyo maleeshiyaadka kooxda Mbagathi, waxayna iska dhaadhiciyeen in cidda maal galisa muqaawamada ay tahay ganacsatada suuqa bakaaraha maadaama aan dagaal lawadi Karin taageero dhaqaale la’aanteed, hadaba ayagoo taas ka duulaya ayay yiraaheen waxaa hub laga baarayaa Suuqa bakaaraha iyagoo cuuryaamiyay dhamaan dhaqdhaqaaqii ganacsiga ee ka socday suuqaas, natiijada ka dhalatayna waan aragnaa maleeshiyaadkii hogaamiya kooxeedyada oo 16 sano dadka laynayay oo inta laba bilood xero lagu hayay dadkii lagu soo fasaxay waxay bilaabeen arintii caadada u ahayd waa dil dhac iyo boob, taas oo gumaysigu rabo in uu shacabka soomaaliyeed isku laayo dhinac walbana ka cuuryaamiyo si usii haysto dalkeena.

Gumaysiga itoobiya iyo gumaysi kalkaalku waxay iloobeen in shacabka soomaaliyeed aanu marna aqbali doonin gumaysi xataa hadii aduunyadoo dhan laga soo xiro, waliba markasta oo cadaadis lasii saaro waxaa sii kordhi doona wax iska caabinta iyadoo ugu danbayntana aan rajaynayno in qaar badan oo aan garan waxa lala damacsanyahay Soomaaliya ama ay qabyaaladi madax martay in ay fahmi doonaan in gumaysigu aanu macno kale lahayn gumaysasho mooyee taas ayaana keeni doonta dib uxoraynta dalka soomaaliya iyo midnimada ummadda Soomaaliyeed … Muqaawamada waxaan leenahay waa in aad sabartaan  waayo xornimada laguma helo  si sahlan  oo waxay u bahaan tahay halgan adag, waxaad ujeedaan in kuwa gumaysi kalkaalka ahi iyaguba ay ku sabrayaan baadilkooda. Mushrikiintii carabta ee kasoo horjeeday nabigii ilaahay iyo saxaabada waxay dhihi jireen war ku sabra ilaahyadiina iyo sanamyadiina aad caabudaysaan sida quraanku nooga waramay, marka maxaad moodaa qofka xaq ku taagan ee waliba dhulkisii gumaysi kan ugu liitaahi qabsaday , waxaa loo baahan yahay sabar adag guushana  waad helaysaan ilaahy idanki. 
 

Wasaalaamu calaykum WW. 
 

Jimcaale Rooble ( Jimcaale@hotmail.com)