Dhanbaal: GABAY 

Mahamed Elmi
somcarers@hotmail.com

Waa farriin tilmaamaysa maanta muuqaalka ay aduunyadu leedahay iyo sida ay bogga uga rarantahay iyo xadka uu dulmigu gaadhay waxaanad moodaa waqtiyadii la rogi jirey inay qarka u saarantahay markaad eegto halka wax marayaan 

waxa tiriyey Maxamed Cabdi Cilmi

wuxuu soo baxay 20.12.06 

1. Cabdalow dhawaaq gabay murtida dhaqanka suugaanta
2. Dhegtu maanso ay haybisiyo dhumucda hawraarta
3. Ka dhaqaaqay maahmaah dhugliyo tix iyo dhaad-dhaade
4. Naftii aanse dhiman baan gafayn dhaabad iyo doode
5. Aduunyadatan dheeliday mar qudha ee dhinac usoo ciirtay
6. Dhanka qudha aduunyadan ka raran ee maanta dhitinaysa
7. Aduunyadan dhanxiir iyo ibliis xaqa ka dheereeyey
8. Aduunyadan dhafoor taabadkiyo dhudhunka xoog joogta
9. Aduunyadan dulmigu uu dhantacay ee shiigi ku dhowaatay
10. Dhadhamada aduunyadan hunguri dhuuni dabajoogta
11. Aduunyadan dhurwaa iyo gugume talada loo dhiibay
12. Aduunyadan dhankii loo dayaba dhagartu naafaysay
13. Dhaca iyo aduunyadan dilkiyo kibirku dheereeyey  
14. Aduunyadan lafaa dhuuxday iyo dhiigga bani aadmi
15. Aduunyadan magligu dhiidhiyee dhaawac xarad belay
16. Aduunyadatan dhaqankiyo milgii maanta ka dhaqaaqday
17. Dhalanteed aduunydan nafluu beenta ku dhabriiray
18. Aduunyadan jidkii loo dhigiyo dhaaftay marinkeeda
19. Aduunyadan la dhalan dooriyee seegtay dhabadeeda
20. Dhaaxuu nin darandooriyaa dhacay gadaashiiye
21. Dhaaxay namruud iyo fircoon uunka dhibayeene
22. Dhaaxay ayaamuhu direen wiilal magac dheere
23. Nin dhegaa furaystiyo nimaan dhaadin wax jooga
24. Dhaaxay nimaan waana dhugan runi dhacsiisaaye
25. Boqor duuble dhaaxaa waqtigu dhigay gabaahiire
26. Dheg mugged ma buuxsado nin jecel inuu dhamaystaaye
27. Dadkuun baa dhamaadee iyada looma dhaadhaca e
28. Dhaaxuu ninkii dhereg hirqaday dhibay masaakiine
29. Ninkii dhiilka buuxiyo nimcada eebe u dhameeyey
30. Nabsi waa habeen dhexe hadduu dhawri garan waayo
31. Dhakhso waw jabtaa uun lugtii dhaafta jeeniga e
32. Nin ku ayni dhaafiyo maxaa dhiig cab ka huleelay
33. Maxaa dhidar gaboobiyo orgobi iilka lagu dhaabay
34. Dhoylaawi liitiyo muxuu jaahil ka dhuyaalay
35. Nin dhirbaaxo qaayibay muxuu dhawray godobtiisa
36. Muxuu dhiilo yaabliyo ufada uunba ku dhameeyey
37. Dharaaraha gedmiyo waayaha dhiga duruusaaye
38. Muxuu dacar ka dhabaqsaday nin  xumi gaaxda dhitadiisa
39. Afartaa dhanbaalkiyo tusmada dhaqanka hawraarta
40. Waa dhibic daroortiyo gudgude waqal dhigiisiiye
41. Waa dhool hilaaciyo sidii dhayda caanahe
42. Waa dirir dhamaysiyo xareed jeexday dhudhubaaye
43. Waa sidigta dhaameel iyo casuur gaawe loo dhigaye
44. Dhaan nageeye weeyoo wax badan waanigii dhaxaye
45. Bal dhegaysta caawaan murtida dhuri sidii ceele
46. Wuxuu dhigay maraykane ciraaq maanta dhaxalsiiyey
47. Dhaawaca faluujiyo baqdaad dhimashadaa baahday
48. Dhallaankoo le’diyo maatadii dhamac la leefsiiye
49. Dhaca uu jidaystiyo hadduu dhuray batroolkiiye
50. Falastiin dhulkeediyo markaad eegto dhinaceeda
51. Ama aad dhankaa iyo lubnaan dhawrta waxa jooga
52. Dhirbaaxada yuhuudiyo hubkaa qudus la soo dhoobay
53. Dhafandhaafka sulubkiyo ridada laysu dhinacyeeye
54. Dhimbiilaha Qasiyo Raamalay dhibi ka joogtaaye
55. Inagana la soo dhidhi amxaar dhoobay iyo hawed
56. Dhacadiidsi waa kaa dalkii dhooban xasanawe
57. Dhisma qaran haddaan loo dhammaan dhaaxba wuu dumiye
58. Midnimadu hadday dheelidoo hayb la dhaxalsiiyo
59. Oo uu qabiil soo dhexgalo dhimatay maantaase
60. Israacaa dhantaalmiyo shacbiga kala dhaqaaqiisa
61. Markii dhawrba meel joogsatee wadajir ay dhaaftay
62. Nacab inuu ku dhiiraday la arag loona soo dhigaye
63. Dhilistiyo cabdow raawis xumi dhacan ma gooyaane
64. Dhegxumaanta ceebtiyo naxliga dhooban agaheena
65. Dhiidhiibsi beeshoo majiro magac la dhawraaye
66. Waxa dhaba dhawaaqii salaan dhaabaduu yidhiye
67. Dhimashadu xaq weeyoo mar bay nolosha dhaantaaye
68. Muslin inuu dhufaanoo kufrigu maanta dhalan doorsho
69. Uu dhaqanka diintiyo tiro tiro dhaadashada muuqa
70. Dhalinyariyo waayeel dirkaba dhuunta ka wareenye
71. Dhadig iyo laboodkuba ka siman dhabar garaacaase
72. Dhaameelka laac iyo sabniin dhawrta dabinkiisa
73. Dhinbiishaa hulaaqdiyo fusuqa dhabatadaa faaftay
74. Dhugatiyo xanuun buu sidaa aafo dhumuc wayne
75. Dhunkaal iyo sun buu qaybiyaa lagu dhamaadaaye
76. Dhaqaalaha gargaarkiyo hantida dheefta iyo hooda
77. Masaakiin la dhawriyo dadnimo waa ka dheertahay
78. Islaamkaba dhamaantii ku noqoy dhiilo iyo hooge
79. Dhadhamada badhkeen buu ku hoday dhuuni iyo soore
80. Daba dhilif gaboobiyo fulaa looga soo dhacaye
81. Nin dareenku dhibayiyo nimaan dhawran sharafkiisa
82. Nin dhursugay nimaan dheesha garan dhaantadiyo heesta
83. Ninkii waranka dhaabtiyo ninkii dhicin lahaa maanta
84. Allihii dhidbee kawnka dhigay looba gacan dhaafye
85. Ka dhabee islaamaw jahaad laysu soo dhiga