Daabaco Boggan | Print

DHAKAFAAR !

Curiye: Inj. Maxamed Cali Cibaar Delft, Holland

Maansada Dhakafaar waxay soo baxday dhamaadkii bishii maarso 2005-ta, waxaana curiyay Inj. Maxamed Cali Cibaar. Maansadu waxay ka warramaysaa natiijadii ka soo baxaday shirkii muddada sanada ah loo fadhiyay Kiinya iyo waxa ay soo kordhiyeen dagaal-oogeyaashii halkaas isku soo caleemo saaray.

Maansadu waxay dabasocotaa kuna hal-qabsanaysaa Maansadii ka horraysay ee Dhalanteed oo soo baxday bishii maarso 2004-tii iyo Maansadii Dhibaad ee uu curiyay Maxamed-Keyse oo iyaduna soo baxaday dabayaqadii sanadkii 2003-dii. Labadan maanso waxay ka mid yihiin suugaanta faraha badan ee ay hal-abuurada Soomaaliyeed uga digeen cawaaqibxumida ay yeelan karto in dugaag xoolo lagu aamino!.

Dhakafaar waxay wax ka tilmaamaysa hab-dhaqanka qaabka daran ee Soomaalida maanta . Waxay ka digaysaa khatarta culus ee ku soo fool leh ummaddeenna, waxayna ku baaqaysaa in aan la isku dhiibin oo laga dhiidhiyo dhagarta cadowga ummadda iyo dagaal-oogeyaasha uu ku adeegtaa ay dadkeenna, diinteenna iyo deegaankeennaba la damacsanyihiin.

Dhakafaar !

• Keysow Dhibaad iyo

• Huryo dhagas sirteedii

• Waraabihi dhutinayeed

• Tiri dhayladuu helay

• Lafihii xitaa dhuux!

• Dharaqdii afkiisiyo

• Dhiinkii xinjirihiyo

• Dhoollaha casaankii

• Dharaartii la shuufee

• Dhaygaggii la yaabeey

• Dhug yiraahde riyihii

• Dhurwaa xeeladdiisiyo

• In dhagari kashifantoo

• Dhabtii ay caddaataan

• Dhiirranow u haystaye

• Illeyn qaar dhagweynoon

• Illaa cunaha lagu dhago

• Waxba dhaadin baa badan!

• 
   

• Dhigaalkii abwaannada

• Wixii gabayo dhaadheer

• Dhalliil iyo canaan iyo

• Lagu dheehay waanada

• Dhalanteed digniin culus

• Dhabtii waxay abbaartiyo

• Amiin sawirraduu dhigay

• Dadku inuu dhagaystoo

• Ka dhergaan u haystaye

• Illayn badidood maba dhicin

• Dhawaaqiina lama garan

• lama dhugan sarbeebtii !

• 
   

• Gobolladii dhamaantood

• Dhibaatada colaadaha

• Geeridiyo dhaawaca

• Abaar lagu dhamaadoo

• Cudurro isku dhafan iyo

• Gaajadu ay dheertahay

• Mar haddey dhadhamiyeen

• Anaa dhalada hebelow

• Iyo dhumuc anaa weyn

• Xumaan inay dhammaatooy

• Dhimeen baan u hasytaye

• Illayn dheeshii waa weli.

• 
   

• Dhoofkiyo is dhiibkiyo

• Dhaxantiyo qaxootiga

• Ehel kala dhantaalmooy

• Kala dhufte duruufuhu

• Waxii qoysas kala dhumay

• Ama ubad la dhalanrogay

• Kaniisado u dhuuntoo

• Diintiiba dhinac maray.

• 
   

• Wixii oday dhirbaaxiyo

• Dhabannaano xoog badan

• Dhabankiisu bararoo

• Isagoo dhacdhacayoo

• Waayuhu dhabaandhabe

• Dhaaxa ciil huqleeyooy

• Karkareen dhafoorradu.

• 
   

• Dhallinyaro hanwaynayd

• Dhenged sida dameerihi

• Wixii Lala dhacaayoo

• Dhinacyadu dillaacoo

• Dhacaan feerihii galay.

• 
   

• Rag wixii dhufaanmoo

• Dubbihii ku dhacay iyo

• Qabatadi dhab lagu yiri

• Dhambaleen xiniinyihi

• Ama loo dhammeeyoo

• Seey yihiin dhilmaanyaba

• Noloshii la dhaafiyay!

• 
   

• Xaamilo dhamaysoo

• Dhuudhuutinaysiyo

• Dumar caawa dhali raba

• Waxay silic dhaxeenoo

• Baranbaro dhajiiqiyo

• Meel dhilqe ku badanyahay

• Dhagax cuni jirkoodiyo

• Xabsiyada dhex jiifteen.

• 
   

• Dharkooy qoysay oohini

• Wixii dhibban itaal daran

• Dhallaankii ay dihatoo

• Dhiiggeed ka beermoo

• Ilaahay u dhiibiyo

• Kii ku koray dhabteedii

• Ka dheerow la yiriyoo

• Hooyo ubadkii laga dhacay

• Ay dhamaatay murugada.

• 
   

• Dhibaatadaa xanuunka leh

• Iyo boqol kaloo dheer

• Mar hadday dhadhamiyeen

• Anaa dhalada hebelow

• Iyo dhumuc anaa weyn

• Kibir inuu dhamaadoo

• La dhimmaan u hasytaye

• Shacabkaan dhugta lahayn

• Illeyn waa gawaan dhaba

• Dhadhaab aad u adag iyo

• Dhul aan khayrku kuba duxin.

• 
   

• Dhiifoonaanti garashiyo

• Dhiirridiyo kalsoonidi

• Wacad dhowriddii iyo

• Dhaqankiyo asluubtii

• Dhaxalkii awoowgood

• Kuwuu sahal ku dhaafoon

• Waxba meel ka dhigan iyo

• Duulkan dhimirki laga galay

• Waa qaar dhashoodii

• Dhuunigoodi laga horo

• Oo dhibic caddaysiyo

• Dhalo goror ku jira iyo

• Wax carruurtu dhuuqdiyo

• Shay kastaba dhunjinayoo

• Dhaalalkii murdinayoo

• Aan dhururuq reebayn.

• 
   

• Wax kastoo dhibaato ah

• Waa duul ku dhaashada

• Marba tuuggii dhacayoo

• Khiyaanada ku dheer bay

• Dheemankiyo lacagtiyo

• Dhulka maal waxow yaal

• Ammaanada u dhiibtaan.

• 
   

• Fulay dhabqiya nabaddiyo

• Dhaadhaanka nacaska ah

• Garashadu ka dhimmantahay

• Naxariis ka dheertahay

• Xishoodkiina meel dhigay

• Been-kama-dhergaankiyo

• Dhuuntu miday dalooshoo

• Dhul fog laga hagaayiyo

• Midka miinadow dhiga

• Waaba kuway ku dhaataan.

• 
   

• Waxay dhiirrigeliyaan

• Dhiig-miirad baas iyo

• Kuwa dhaawacaayoo

• Sharaftoodii dhumiyoo

• Dhulka iyo dadkoodaba

• Dhaafsanaaya shilinoo

• Dhiig-yacabka laayeey

• Ma dhintoow yiraahdaan

• Xilalkana ku dhoobaan.

• 
   

• Kan dantooda dhowree

• Qarannimo dhisaayee

• Dhididaaya howshee

• Dhalandhoolka milicdiyo

• Habeenkii dhafraayee

• Dhexdu ay u xirantee

• U dhimriya bulshada iyo

• Waa ummad ka dhiifoon

• Geesigay dhaleen iyo

• Caaqillada dhifka ahee

• Laga wada dhursugayoo

• Hadafkoodu dheeryahay

• Ka dhooqaysa himilada.

• 
   

• Diktoor Cilmi dhammeeyiyo

• Dugsi sheekha dhigayee

• Xadiis laga dhagaystiyo

• Kan qurbaha dhabacanee

• Cayrta loo dhibcinayiyo

• Kuwa howd dhex joogee

• Dhaanteeya fiidkii

• Badi wax isma dhaammaan

• Qabiilkaa u dhaayo ah

• Dhabna waxay u haystaan

• Hadday saaka dhaafaan

• Cirkoo dhinac dumayiyo

• Dhimashaba in ay tahay !!

• 
   

• Qoom Ilaah ka dheeriyo

• Dhiil agoon nin heensaday

• Dhacay boqol jir waayeel

• Ummul dhiig ka da'ayiyo

• Gowracay dhallaankii

• Haddaan weyne dhaafayn

• In ciqaab ku dheelmado

• Cilmi baa dhigaayee

• Dhubuqdhubuqdi socotiyo

• Dheelaas ciyaarkiyo

• Dhoollatus qabiil iyo

• Qabyaaladdii dharka la'ayd

• Waa tan dhabannahaystiyo

• Dhakafaar abuurtaye

• Xaggee loo dhaqaaqaa?!

• 
   

• Dhegxumadiyo ceebtiyo

• Middaan inaysan nagu dhicin

• Horay uga dhawaajiyay

• Adna aad Dhibaad iyo

• Ku tilmaantay dhaxal-gala

• Dhurwaagii dugaaggee

• Dharka aadmi qaatee

• Intuu dhaartay beenbeen

• Yiri Aamin igu dhaha

• Xoolo kii u dhiibtiyo

• Doqon waa dhaliishiye

• Hashii dhool ahayd iyo

• Nirigteedi dhaylaba

• Hadduu dhiig qulqulayoo

• Dhaawacoodu halis yahay

• Xaajadiina dhabaqdoo

• Dugaaggii dhamaantood

• Isu wada dhawaaqeen

• Alla wuu ku dhagay iyo

• Ka dhigaay ha joogtee

• Dhiilaha la culayiyo

• Dhaay maalid sugid iyo

• Dhibishdhibishtan maanlow

• Waxaan dhowranaynee

• Dhaayuhu arkaayaan

• Ma dhab baa widaayow

• Mise waan dhadhabayaa?!

• 
   

• Waa dhiillo foolxume

• In gafane dhulkeennii

• Dhaxalakiisa rabo oo

• Dhinac uu ka duso iyo

• Dhabe haybsanaayoo

• Inaan soo dhaweynoon

• Ku ximbaarno dhabarkoon

• Dhaaminno u naga rabo

• Ninkii dhiidhinaayee

• Dhaqdhaqaaq yiraahdana

• Shaambad lagu dhajinayuu

• Yahay ruux dhib kale wada

• Waxan dhowranaynee

• Dhaayuhu arkaayaan

• Ma dhab baa widaayoow

• Mise waan dhadhabayaa?

• 
   

• Intaan dheegtay buug iyo

• Intaan dhego ku kaydiyay

• Waa sheeko ii dhiman

• Dhafandhaaf mas'alo iyo

• Imtixaan dhibkiis loo

• Dhiraandhirin innaga raba.

• 
   

• Markuu xaalku dhii tago

• Rabbow talo dhammanteed

• Kuu dhiibnay adigee

• Dhanka khayrka noo door

• Shaydaanna naga dhowr

• Dadaal aad u dheer iyo

• Duco waa ma-dhaafaan

• Midna saaxib aan dhaho:

• 
   

• Mar haddii an dhoof iyo

• Dhuudhuumashow iyo

• Dhisme leysku meershiyo

• Dhaqtar iyo quraan iyo

• Dhereg iyo ladnaan iyo

• Hanti meel la dhoobaba

• Malag looga dheeraan

• Cimrigii dhammaadana

• Ammintiisa dhaafayn!

• 
   

• Shaqo dhididdayaa iyo

• Xaaraan ka dheregtaa

• Dhuunigii laguu qoray

• Mar haddii uu dhiganyahay

• Dhaandhaan kas daran iyo

• Kii dhabbacanaayiyo

• Dhabcaal aan wax quurayn

• Dhoohane halkoodee

• Sow inaan dhaqaaqnoon

• Dhaliisheenna saxannoon

• Dhiidhinnaa walaal oo

• Dhallinyariyo waayeel

• Sharafteenna dhowraa

• Arrinkeennu kuma dhama?!

• 
   

• Nacab noo dhakanayoo

• Dhabarkiisu muuqdaa

• Weligiiba dhoollaha

• Ha dhalaalsho ciridkoo

• Dhiqdhiq qosol ha siiyoo

• Intuu dhakal mariid iyo

• Ku soo qoosho dhuunkaal

• Dhanaan iyo macaan iyo

• Ha ku sheego dheefoo

• Ha yiraahdo waa dhabaq!

• 
   

• Nacab noo dhakanayoo

• Dhabarkiisu muuqdaa

• Waligiiba dhimaniyo

• Mid wax dhiitinaayiyo

• Dhangax iyo ma quusyito

• Ma-dhimriye habaar qaba

• Dhoombaca ha ababshoo

• Intuu dhiinka darajada

• Dhal-iblays u wada xiro

• Ha dhoobdhoobo doqomada!

• 
   

• Inkastuu dhib jira oo

• Dhaawac culusi nagu yaal

• Dhaar waxaan maraynaa

• Inaan dhabar-adaygnoon

• Dhidibbada adkaynoon

• Dhufaysyada ka bixinoo

• Aan dhasheenna sahay iyo

• Kaydkii u dhiibnoon

• Hamigeennu dheeliyin.

• 
   

• Inkastuu dhib jiro oo

• Dhaawac culusi nagu yaal

• Dhaar waxaan maraynaa

• Kuwa nala dhiggaa iyo

• Haddaan qayrkeen dhaafayn

• Dhinac inaan ka joognoon

• Dhacsannaa xaqeennoon

• Marna hoos naloo dhugan.

• 
   

• Inkastoo dhib jiro oo

• Dhaawac culusi nagu yaal

• Dhaar waxaan maraynaa

• Inaan dhidar hamuun qaba

• Iyo cadowga dhogorta leh

• Dhuudhuumayaa iyo

• Dhiirri soo bereeryaa

• Dhulkayaga intuu dago

• Noogu seexan dhacadiid.

• 
   

• Anigoon ku dheeraan

• Shacabkii Dix-dhagaxeed

• Dhago ha ka furaysteen

• Ama ha na dhageysteen

• Bal in waajib naga dhaco

• Xaqiiqada dhabta ah iyo

• Aan dardaaran kale dhaho.

• 
   

• Bulshayahay dhibkeediyo

• Kala garan wax dheef laay

• Hurdo laguma dhaanshee

• Haddaan dowlis dheer iyo

• Wadaan biyaha soo dhurin

• Dhoomuhuna maranyiin

• Dhallaankoo harraad qaba

• Meel aan dhibici ool iyo

• How tilmaamin dhalanteed!

• 
   

• Bulashayahay dhabtii iyo

• Kala garan wax dheelaay

• Haddaan dhoobo ciidiyo

• Dhagaxantaad shubaysaan

• Dhexda biro ku laabnayn

• Dhisme dabaqyo-dabaqyoo

• Dhista booc u tahay tiir

• Dhushug bow dambaysee

• Dhakadiisa how xilan

• Gogoshana ha hoos dhigan.

• 
   

• Dhambaalkaygu wuxu yahay

• Xaalkan halis u dhaadhacay

• Haddaan diinta dhidibnoon

• U dhawaanno Waynaha

• Dhayiddiisu waa sahal

• Waa dhowyahay xalkiisuna

• Waxa uuse dheeryahay

• Markaan eelka kii dhigay

• Na dhaqtari ku Leenahay !!

• 
   

• Aanan kuu dhameeyee

• Ilaahiisu dhaafyow

• Waa dhibco la qorayoo

• Dhito weeye taariikh

• Dhuqdhuq iyo is-yeelyeel

• Kii ruwaayad dhigayiyo

• Midkii dhiidhinaayee

• Dhexdu ay u xirantahay

• La iskuma dhafaayoo

• Diiwaanno dhigan buu

• Ninba meel ka dhacayaa

• Dharaartii qiyaamiyo

• Aakhirana sii dhiman.

• Rabbi ha ina dhowree

• Annagana dhankeennii

• Axdi waxa inoo dhigan

• Alloo loo dhowaadiyo

• Xaqoo lagu dhegaa iyo

• Dhimashana koley tahay

• Runta inan la dhinac marin

• Dhaabaddeennu waa taas.

Dhammaad
 

Wixii falcelis ah ku soo hagaaji
Mohamed_ebar@hotmail.com

Halakaan ka aqriso maansadii DHALANTEED
http://www.somalitalk.com/maanso/dhalanted.htm

Halkan ka aqriso maansadii DHIBAAD
http://www.aftahan.com/gabayo/Kayse/dhibaad.htm

Hal-abuurka Maansada
Inj. Maxamed Cali Cibaar
Mohamed_ebar@hotmail.com

Faafin: SomaliTalk.com | July 4, 2005

Kulaabo bogga  www.SomaliTalk.com