Shirka Dowladaha ku xeeran Badda Cas iyo Khaliijul Cadan oo uu ka hadlay
Madaxweynaha Jabuuti iyo Wasiirka Bay’adda Dowlada Soomaaliya Md, Burci Maxamed
Xamza oo yiri “Walaahi waanu ka qayb galney shirka, laakiin kaalintii wali wey
maqan tahay, inaan shir ka qaybgalno keliya ma ahan, waxaan loo…”
- Maxamed Macallin Cismaan (All-man) Somalitalk Jabuuti.
Madaxweynaha Dowlada Jabuuti Md, Ismaaciil Cumar Geele “dedaalada joogtada
ah iyo iskaashiga dowladahaan ee la xiriirada dhowritaanka Bay’adda, waxay isla
gaarikaraan jawi siyaasadeed…”
Madaxweynaha Dowlada Jabuuti Md, Ismaaciil Cumar Geele ayaa ka qaybgaley
furitaanka kulan ay isugu yimaadeen urur ay ku mideysan yihiin dowladaha ku
xeeran Badda Cas iyo Khaliijul Cadan oo Wasiiradda Bay’adda kulankoodii 12-aad
ku yeeshey Caasimada dalka Jabuuti, islamarkaana laga soo saarey go’aano ku
aadan Bay’adda wadamadan oo ay ka mid yihiin, Soomaaliya, Jabuuti, Yemen,
Sucuudiga, Jordan, Masar iyo Suudan.
fadhiga Wasiiradda
Madaxweyne Ismaaciil Cumar Geele “Hawsha daryeelka deegaanku waa mid balaaran,
waxayna u baahan tahay in si deg deg ah wax looga qabto, waxaana jira xuduudo
aan la dhaafi Karin, iyadoo aan wax loo dhimeyn nidaamka guud ee u degsan
deegaanka caalamka, arinta daryeelka deegaanku waa hadaf lagamamaarmaan u ah
mustaqbalka Aadanaha, inkastoo la ogyahay xaaladaha deg deg ah oo ay ka mid
tahay, kuleylka la soo dersa ee kusoo kordhaya, bur burka la soo gudboonaada
noocyada kala duwan ee noolaha dunida iyo caafimaadka deegaanka, dedaalada
joogtada ah iyo iskaashiga dowladahaan ee la xiriirada dhowritaanka Bay’adda,
waxay isla gaarikaraan jawi siyaasadeed iyo mid xeer ahaaneed, waana inaan
bedelnaa hab nololeedka deegaanka si aan uga hortagno wixii halis gelinkara
deegaanka” ayuu ku yiri khudbadiisa Madaxweynaha isagoo ku khudbeynaya luqada
Faransiiska.
Wasiiradda Bay'adda Badda Cas iyo Khaliijul Carab
Gunaanadkii shirka oo ahaa shir Al-baabada u xiran oo ay ku yeesheen Hoteel
Kempinski ee caasimada dalka Jabuuti, islamarkaana shirku uu ka furmey ayaa
waxay ka soo saarey qoraal waxyaabihii ay isla garteen.
Wasiirka Deegaanka Jabuuti Cilmi Obsiiye Wacays oo la gudoonsiinayo Abaal marin
Wasiirka Deegaanka Dowlada Jabuuti Md, Cilmi Obsiiye Waceys iyo Xog-hayaha
guud ee Ururkan Md, Saalim ayaa saxaafada la Hadley, islamarkaana goobtaas lagu
gudoonsiiyey Wasiirka Deegaanka Dowlada Jabuuti Abaal marin.
Wasiirka Bay’adda Dowlada Soomaaliya Md, Burci Maxamed Xamza “Walaahi
waanu ka qayb galney shirka, laakiin kaalintii wali wey maqan tahay, inaan shir
ka qaybgalno keliya ma ahan, waxaan loo…” Wareysi
Burci iyo Amiir Turki
Wasiirka
Bay’adda Dowlada Midnimada Qaran ee Soomaaliya Md, Burci Maxamed Xamza oo xubin
nimadii Soomaaliya u matalayey oo aan wareysi gaar ah kula yeeshey Hoteel
Kempinski ee caasimada dalka jabuti waxna ka weydiiyey waxyaabihii looga Hadley
kulankii Wasiiradda Bay’adda wadamad ku xeeran Badda Cas iyo Khaliijil Cadan iyo
waxyaabihii ka soo baxay, dhibaatooyinka ugu waaweyn ee Bay’adda Soomaaliya
haysta ee uu kala Hadley iyo tilaabada ugu horeysa ee uu qaadayo xilkan cusub ee
loo magacaabey ayaa isagoo arimahaasi ka hadlaya wuxuu yiri:
“fursad bay inoo ahayd inaan ka qabgalno shirkan, Wasiiraduna wey soo dhaweeyeen
kasoo qaybgalka Soomaaliya, Barnaamijkaana wuxuu soo socdey mudo badan, laakiin
Soomaaliya kama qaybgeli jirin, waana kulankii ugu horeeyey oo Soomaaliya ay ka
qayb gasho, intii uusan shirka bilaabana waxaan si gooni gooni ula kulmey
Wasiiradda Bay’adda ee ka soo qayb galey sida Wasiiradda Sucuudi Carabiya,
Suudaan, Yemman iyo Dowlada Jabuuti oo aan walaallaha nahay oo shirka
martigelisey, waxaana kala Hadley baahida aan u qabno in qiimeyn lagu sameeyo
Soomaaliya dagaaladii sokeeye kadib, islamarkaana ay gacan nagu siiyaan sidii
soomaaliya ay lugaheeda isugu taagi lahayd, waxayna naga balan qaadeen iney
gacan balaaran nasiin doonaan iyo wixii kale ee xog waran ah, islamarkaana
arinta Burcad Badeedda Soomaaliya loogu gudbin lahaa Wasiiradda Bay’adda
Jaamacada Carabta si Soomaaliya loo caawiyo, waxna loga qabto arinta Burcad
Badeeda, lana derso sababaha keeney iney abuurmaan, ayey ii balan qaadeen
Wasiiradda Bay’adda dalallka Sucuudi Carabiya iyo dalka Suudaan, sababtoo ah
Soomaaliya dowr aad u muhiim ah ayey ka ciyaari kartaa hadii lugaheeda isku
taagto, waxayna leedahay Xeeb aad u dheer” ayuu yiri Md, Burci
Wasiirka Bay’adda Dowlada Midnimada Qaran ee Soomaaliya Md, Burci mar uu ka
jawaabayey su’aal ahayd waxyaabihii ay isla gaareen Wasiiradda Bay’adda ee
todobada dal ayaa wuxuu yiri “inta ugu muhiimsan waxay ahayd in dadaalka la sii
kordhiyo, loona ilaalin lahaa Badda Cas iyo Khaliijul Cadan, Aqoonta dadkuna kor
loogu qaado, lana siiyo tababaro dowladaha xubnaha ka ah Ururkan, loogana hor
tagi lahaa dhibaato ka dhacda Bay’adda dalalkan ku bahoobey Badda Cas iyo
Khaliijul Cadan”.
Mar aan weydiiyey Wasiirku ma is tiri kaalintii ay ku lahayd Soomaaliya Ururkan
wey buuxisey ayaa wuxuu ku jawaabey “Walaahi waanu ka qayb galney shirka,
laakiin kaalintii wali wey maqan tahay, inaan shir ka qaybgalno keliya ma ahan,
waxaan loo baahan yahay inaan dabagal ku sameyno, kana qayb galno hawlaha ay
qabato Hay’addan, kana faa’iideysano daraasadaha ay sameeyeen, dhisnana qaybihii
Wasaaradda, helnaana aqoonyahanadii dalka Soomaaliya wax u bartey”.
“Tilaabada ugu horeysa ee aan qaadayo waxay noqoneysaa arinta Bay’adda inaan
ku xirno nabadgelyada, hadii aan nabad la helin, ma jiro wax la qaban karo,
Bay’adda iyo Nabada aad bey xiriir u wada leeyihiin, midaas inaan awooda saaro
ayey tahay shaqadeydu” ayuu yiri mar uu ka jawaabey su’aal ahayd tilaabada ugu
horeysa ee uu qaado xilkan cusub ee loo maagacaabey.
Go'aankii Wasiirada
ENGLISH | Fararnsiis
Maxamed Macallin Cismaan (All-man) Somalitalk Jabuuti.
fatxumaalik@hotmail.com
Faafin: SomaliTalk.com | March 7, 2009